रोमी 3:21 - कोन्छ्‌योककी सुङ

²¹ यिने त याङ मोशाकी ठिम मेसिनाङ कोन्‍छ्‍योक नेमा वावु टेङ्‍बु ति छ्‍या तेन वे। तीकी कोर्ला मोशाकी ठिम ताङ कोन्‍छ्‍योककी लुङ्‍तेम्‍बातिवी गोमाला के पङ्‍बु बिन वे।

रोमी 3:21 Iomraidhean Croise

लूका 24:44

ती ज्‍युक्‍ला खोकी तिवाला सुङ्‍सुङ, “ङे गोमाला ख्‍यिरा मुला वोतुप पेला ख्‍यिराङला ‘मोशाकी ठिम ताङ कोन्‍छ्‍योककी लुङ्‍तेम्‍बाकी थेप ताङ भजनसंग्रहकी थेपकी नाङ्‍ला ङे कोर्ला टिवु तेरी ताम्‍ङेतिवा छे राङ गोकिवी।’ सिनी सिक्‍या वे।”

यूहन्‍ना 1:45

तमा फिलिप तीकी नथानेलला ठेनी, “मोशाकी कोन्‍छ्‍योककी सुङला टिवु ताङ कोन्‍छ्‍योककी लुङ्‍तेम्‍बातिवी टिवु ती मी तीला ङ्‍यिरा ठेसुङ। खो याङ नासरत नेसुर फेवु योसेफकी पुज्‍युङ येशू के यिनोक।” सिनी सिक्‍यासुङ।

लोमा छ्‍येतिवी लाका 10:43

खोला तेपा कितुपतिवा तेरीला खोकी मिङ नेमा तिवी क्‍यावु दिक्‍पा ने थर ज्‍यिकिवी सिनी तेरी कोन्‍छ्‍योककी लुङ्‍तेम्‍बातिवी खोकी कोर्ला सिक्‍या वे।”

लोमा छ्‍येतिवी लाका 15:11

यिने चोवो येशूकी कटिन नेमा राङ दाक्‍पु दिक्‍पा ने थरुप दोके तिवा साङ चोवो येशूकी कटिन नेमा राङ दिक्‍पा ने थरुप यिन सिरुप ति ङ्‍यिराङला तेपा वे।”

लोमा छ्‍येतिवी लाका 26:22

यिन्‍सिनाङ हारिङ सेक कोन्‍छ्‍योककी ङला दाल्‍जा किटे क्‍यान वे। ती तप्‍की ङ दे लानी छ्‍ये छ्‍युङा ङ्‍यिकरला पङ्‍बु तेरिन। कोन्‍छ्‍योककी लुङ्‍तेम्‍बातिवा ताङ मोशाकी सिक्‍यावु सुङतिवा वुतुङ के छेकिवी सिरुप ताम्‍ङे ति मिसिन यम्‍बा ताम्‍ङे काङ साङ सिमाक्‍या वे।

लोमा छ्‍येतिवी लाका 28:23

तुक क्‍यानी तिवी ङ्‍यिमा च्‍यिक पावलला ठेतुप तुजे जोसुङ। तमा मीतिवा बङी पावल देतुप खाङ्‍बा वासुङ। पावलकी टोप नेज्‍युनी सोर्‍हिप सेक तिवाला कोन्‍छ्‍योककी ग्‍येल्‍खापकी कोर्ला लाप्‍सुङ। तमा मोशाकी ठिम ताङ कोन्‍छ्‍योककी लुङ्‍तेम्‍बाकी थेप नेसुर येशूकी कोर्ला तिवाला पङ्‍बु बिन्‍सुङ।

रोमी 1:17

ती लेन ल्‍यामु ति कोन्‍छ्‍योककी थोङ्‍दाङला दाक्‍पु दिक्‍छेनतिवाला चुक क्‍यानी टेङ्‍बु वोतुप जोवु ति छ्‍या तेन्‍सुङ। ती टेङ्‍बु ति दाक्‍पी येशूला तेपा क्‍यासिमा तिराङ गिवी। कोन्‍छ्‍योककी सुङला साङ “खोला तेपा क्‍यानी टेङ्‍बु च्‍युङ्‍गुप मीतिवा ति तिवी क्‍यावु तेपा नेमा मिजी ङ्‍येकिवी।” सिनी टि वे।

रोमी 1:2

ती लेन ल्‍यामु ति काङ यिन सिसिन ती ति तोङ्‍ला के कोन्‍छ्‍योककी खोरो सेवु येशू ख्रीष्‍टकी थोक्‍ला खोरे लुङ्‍तेम्‍बातिवा नेसुर खोकी सुङगी नाङ्‍ला थाक्‍छ्‍येन नङ वे।

रोमी 16:26

यिने त याङ ती छ्‍याकला वोतुप लेन ल्‍यामु ति कोन्‍छ्‍योककी लुङ्‍तेम्‍बातिवी टिवु खोकी सुङला ल्‍यामो क्‍यानी ठछ्‍येली हाक्‍को थुपुप गल वे। तमा नरीकी नरी लुवु कोन्‍छ्‍योककी क नेसुर यहूदी मिन्‍दुप मिरिक यम्‍बाकी मीतिवा तेरीकी तेपा क्‍यानी खोकी सुङला ङ्‍येन्‍सुङ।

रोमी 3:28

तुक क्‍यानी कोन्‍छ्‍योककी थोङ्‍दाङला टेङ्‍बु वोतुप ति मोशाकी ठिमला मिजी क्‍यङ्‍नी मिन, यिने येशू ख्रीष्‍टला तेपा क्‍यासिमा तिराङ टेङ्‍बु ङ्‍येकिवी।

रोमी 5:19

च्‍यिलासिसिन आदम मी च्‍यिककी कोन्‍छ्‍योककी कला माङ्‍येन्‍दुप तप्‍की मी बङी दिक्‍छेन च्‍युङ्‍गुप दोके त याङ येशू ख्रीष्‍ट मी च्‍यिककी कोन्‍छ्‍योककी कला ङ्‍येन्‍दुप तप्‍की मी बङीला दिक्‍पा ने थर्नी टेङ्‍बु च्‍युङ्‍सुङ।

रोमी 5:21

तुक क्‍यानी दिक्‍पाकी जोसालेन्‍सिन मीतिवा तेरीकी खला शेपकी ग्‍येला कितुप दोके कोन्‍छ्‍योककी कटिन साङ टेङ्‍बु वोतुप नेसुर ग्‍येला किवी। तमा दाक्‍पी चोवो येशू ख्रीष्‍ट नेमा दाक्‍पुला नाम्‍साङ मिशिवु मिजी नङ्‍गिवी।

रोमी 9:30

तुक क्‍यानी दाक्‍पु काङ सिरुप? यहूदी मिन्‍दुप मिरिक यम्‍बाकी मीतिवी कोन्‍छ्‍योककी ठिमला सिक्‍यावु दोके माक्‍यासिनाङ खोकी थोङ्‍दाङला टेङ्‍बु च्‍युङ वे। ती टेङ्‍बु ति तेपा क्‍यावु तप्‍की च्‍युङ्‍गुप यिन।

१ कोरिन्‍थी 1:30

यिने कोन्‍छ्‍योककी ख्‍यिराङला येशू ख्रीष्‍ट ताङ मुला जु च्‍यिक राङ जो नङ्‍गुप यिन। खोकी ख्रीष्‍ट नेमा दाक्‍पुला खोकी रिक्‍पा नाङ्‍सुङ। तमा खोकी थोङ्‍दाङला दाक्‍पुला चाङ्‍मा ताङ टेङ्‍बु वोतुप जोनी दिक्‍पा ने थर च्‍यिसुङ।

२ कोरिन्थी 3:9

दोजो मीला क्‍येन तेरुप शब्‍ज्‍यीकी लाकाला साङ तुका वोसिर वोसिन मीला टेङ्‍बु जोप शब्‍ज्‍यी कितुप लाकाला याङ मङ चोके वोसिर ग्यकुप वोते।

२ कोरिन्थी 5:21

ख्रीष्‍टला दिक्‍पा मे, यिन्‍सिनाङ कोन्‍छ्‍योककी दाक्‍पी क्‍यावु दिक्‍पी थोक्‍ला खोला पर्च्या नाङ्‍सुङ। तुक क्‍यानी ख्रीष्‍ट नेसुर दाक्‍पु ति खोकी थोङ्‍दाङला टेङ्‍बु च्‍युङ्‍सुङ।

गलाती 3:8

खोकी सुङला खोरे राङ यहूदी मिन्‍दुप मिरिक यम्‍बाकी मीतिवाला तिवी क्‍यावु तेपा नेसुर टेङ्‍बु च्‍युङ्‍गुप ति गोमाला के हाक्‍कोसिमा “ख्‍युरुङ नेसुर राङ तेरी गिपातिवाला मोलाम थोप्‍किवी।” सिनी अब्राहामला गोमाला के सुङ्‍नी वे।

गलाती 5:5

च्‍यिलासिसिन दाक्‍पु ति कोन्‍छ्‍योककी थु चाङ्‍मा नेमा खोला तेपा क्‍यानी टेङ्‍बु च्‍युङ्‍गुप रेवाला गुनी देकिवी।

फिलिप्पी 3:9

तमा खो ताङ मुला च्‍यिक्‍पा राङ च्‍युङ थुप्‍शी। येलुङ ठिमला तेन्‍नी टेङ्‍बु यिन सिनी ङ नो मिकी, यिने तन्‍दा येशू ख्रीष्‍टला तेपा क्‍यासिमा वुङ्‍गुप ति वुतुङ के टेङ्‍बु यिन। ती ति येशूला तेपा क्‍यासिमा कोन्‍छ्‍योक नेमा वुङ्‍गुप टेङ्‍बु यिन।

१ पत्रुस 1:10

ती थर्वाकी थोक्‍ला कोन्‍छ्‍योककी लुङ्‍तेम्‍बातिवी साङ ल्‍यामो क्‍यानी हाक्‍कोवु छाल्‍सुङ। तमा तिवी कोन्‍छ्‍योककी ख्‍यिराङला थर्वा नङ्‍गुप कटिनकी कोर्ला नम्‍दर शेसुङ।

२ पत्रुस 1:1

येशू ख्रीष्‍टकी थोक्‍ला शब्‍ज्‍यी कितुप लोमा छ्‍ये ङ सिमोन पत्रुसकी छ्‍योक नेमा टसी देलेक! दी यिकी ति टेङ्‍बु वोतुप दाक्‍पी कोन्‍छ्‍योक ताङ दिक्‍पा ने थर ज्‍यितुप येशू ख्रीष्‍ट नेमा ङ्‍यिरा दोके खक्‍छ्‍येवु तेपा कितुप मीतिवाला टिवु यिनो।