ज्‍यल्‍का 3:18 - कोन्छ्‌योककी सुङ

¹⁸ तुक क्‍यानी ङ ख्‍युरुङला टोङ्‍गु तेरिन, ख्‍युरुङ छ्‍युक्‍पु डोप गा वोसिन, ङे नेसुर मेला र्‍हेनी ङोमा जोवु सेर ङ्‍यो। तमा ङोछा लङ्‍गुप ताङ पेर्तुङ्‍बा वोतुप जु उपुपला मज्‍या कर्मु ङ्‍योनी कोन। ख्‍योरो मिक थोङ थुपुपला मिकला मेन ङ्‍योनी कु।

ज्‍यल्‍का 3:18 Iomraidhean Croise

मत्ती 13:44

“कोन्‍छ्‍योककी ग्‍येल्‍खाप ति शिङ खला बानी ज्‍यकुप क्‍येङ्‍येन दोके यिन। मी च्‍यिककी ती ङ्‍येनी ते राङ बानी ज्‍योकिवी, तमा गा लानी खोरो खाङ्‍बा गल्‍नी खोरो मुला वोतुप टोङ्‍बातिवा तेरी चोनी ती शिङ ति ङ्‍येवी।

मत्ती 25:9

यिने रिक्‍पा वोतुपतिवी ‘मेवी, तुक क्‍यासिन ख्‍यिराङ ताङ ङ्‍यिराङ तेरीला मलङ्‍गिवी। बोरु छोङ्‍खाङला गल्‍नी ख्‍यिराङला गोवु नुम ति ङ्‍योनी शोक।’ सिनी सिक्‍यासुङ।

लूका 12:21

रङगी थोक्‍ला तिराङ टोङ्‍बा शम्‍नी कोन्‍छ्‍योककी थोङ्‍दाङला छ्‍युक्‍पु मेतुपतिवा ति दुकै राङ डितो।”

२ कोरिन्थी 5:3

तुक क्‍यासिन ते लेप्‍सिमा दाक्‍पुला जु सम्‍बा ङ्‍येनी पेर्तुङ्‍बा मुलुवी।

२ कोरिन्थी 8:9

दाक्‍पी चोवो येशू ख्रीष्‍टकी कटिन ति ख्‍यिराङला छ्‍या राङ वे। खो छ्‍युक्‍पु वे, यिन्‍सिनाङ ख्‍यिरा थोक्‍ला खो पेराङ्‍बु दोके च्‍युङ्‍सुङ। तीकी तेन्‍दोक ति खो पेराङ्‍बु च्‍युङ्‍गुप नेसुर ख्‍यिराङला छ्‍युक्‍पु च्‍युङ्‍शी सिनी यिन।

१ तिमोथी 6:18

तमा तिवाला “मी यम्‍बाला ल्‍यामु कितुप ताङ लाका ल्‍यामु कितुप सेम वोतुप ताङ सेम बोल्‍मु वोतुप ताङ रङगी लोला वोतुप टोङ्‍बातिवा कतुकारला ख्‍येलुपतिवाला तेरुप सेम वोतुप च्‍युङ गोकिवी।” सिनी क बिन।

याकूब 2:5

तुक क्‍यानी ङे ङ्‍यिङ्‍ज्‍येवु अच्‍युनुपतिवा, दी ताम्‍ङे ङ्‍येना। जम्‍बुलिङला वोतुप पेराङ्‍बुतिवाला कोन्‍छ्‍योककी पेनी तिवी क्‍यावु तेपाला छ्‍युक्‍पु जोनी खोला ङ्‍यिङ्‍ज्‍ये कितुपतिवाला तेरिन सिनी खोकी थाक्‍छ्‍येन नङ्‍गुप ग्‍येल्‍खापला दे छ्‍योवु जो मनङ्‍गिवी रो?

१ पत्रुस 1:7

ती छेटाङ ति ख्‍यिरा तेपा टेङ्‍बु वोतुप छ्‍या देन्‍दुपला यिन। ख्‍यिरा क्‍यावु तेपा ति सेर मे नाङ्‍ला र्‍हेनी ङोमा जोवु सिनाङ छासे खक्‍छ्‍येवु वोतुप तप्‍की येशू ख्रीष्‍ट फेपुप तुजेला ख्‍यिराङला खोकी ग्‍येल्‍खापला सोवा ताङ मोवा ताङ ताङ्‍देन क्‍या नङ्‍गिवी।

ज्‍यल्‍का 16:15

“दी ताम्‍ङे ति ल्‍यामो ङ्‍येना। ङ कुर्मेन वावु दोके हाक्‍माकोवा क्‍यानी वुङ्‍गिनो। सु च्‍याङ्‍से क्‍यानी खोप्‍रे मज्‍या कोन्‍नी टडिक क्‍या देकिवे, ती ति मोलाम थोपुप यिनो। तुक क्‍यासिन तिवा मी मिङ्‍गाला पेर्तुङ्‍बा साङ मुलुवी, ङोछाला साङ मेख्‍येल्‍वी।”

ज्‍यल्‍का 19:8

खोकी नमाकी वो ग्‍यकुप ताङ चेङ्‍गा वोतुप गोङ नावु नेङेनकी मज्‍या कोन्‍नी वे। ती मज्‍याकी तेन्‍दोक ति खोला तेपा कितुपतिवी क्‍यावु लाका ल्‍यामु यिन।” सिनी सिक्‍यासुङ।

ज्‍यल्‍का 2:9

ख्‍युरुङ छेटाङला ख्‍येलुप ताङ पेराङ्‍बु वोतुप ति ङला छ्‍या वे। यिने ख्‍युरुङ याङ पेराङ्‍बु मिन, छ्‍युक्‍पु यिन। ख तिराङकी ङ यहूदी यिन सिरुप मीतिवी ख्‍यिराङला क्‍येन बिन्‍नी ख्‍यिरा तेन्‍दोकला लावु साङ ङला छ्‍या वे। तिवा ति शैतानकी छ्‍योक्‍पाकी मीतिवा यिन।

ज्‍यल्‍का 3:17

ख्‍यिरा याङ ङ छ्‍युक्‍पु वे, ङला नोर टोङ्‍बा बङी वे, ङला काङ साङ मोगोवी सिवी। यिने ख्‍युरुङला छ्‍या मे, ख्‍युरुङ याङ दुक्‍पा ङ्‍येतुप ताङ ल्‍हासिनाङ ङ्‍यिङ्‍ज्‍ये लङ्‍गुप ताङ पेराङ्‍बु ताङ मिक मोथोङ्‍गुप ताङ पेर्तुङ्‍बा गल वे।

ज्‍यल्‍का 4:4

तमा ती ग्‍येल्‍ठिककी गारी गुरीला यम्‍बा ग्‍येल्‍ठिक खल्‍ज्‍यिक ताङ ज्‍यी चोके नोक। ती ग्‍येल्‍ठिक रे रेकी खला गोला ग्‍येल्‍वी सेरकी उशाक ताङ जुला मज्‍या कर्मु कोन्‍दुप गोमा कितुप मी छ्‍येतिवा देनी नोक।

ज्‍यल्‍का 7:13

ते वोतुप गोमा कितुप मी छ्‍येतिवी पर्ला मिरा च्‍यिककी “दी मज्‍या कर्मु कोन्‍दुपतिवा सु यिन? कनी नेसुर वावु यिन?” सिनी ङला टिसुङ।