१ पत्रुस 1:7 - कोन्छ्‌योककी सुङ

⁷ ती छेटाङ ति ख्‍यिरा तेपा टेङ्‍बु वोतुप छ्‍या देन्‍दुपला यिन। ख्‍यिरा क्‍यावु तेपा ति सेर मे नाङ्‍ला र्‍हेनी ङोमा जोवु सिनाङ छासे खक्‍छ्‍येवु वोतुप तप्‍की येशू ख्रीष्‍ट फेपुप तुजेला ख्‍यिराङला खोकी ग्‍येल्‍खापला सोवा ताङ मोवा ताङ ताङ्‍देन क्‍या नङ्‍गिवी।

१ पत्रुस 1:7 Iomraidhean Croise

मत्ती 19:28

तमा येशूकी तिवाला “वुतुङ के ङ ख्‍यिराङला सिरिन, दी जम्‍बुलिङ तेरी सम्‍बा फोनी ङ मी पुज्‍युङ खोरो मोवा वोतुप ग्‍येल्‍ठिकला देनी ग्‍येला कितुप पेला ख्‍यिराङ ङे तिङ्‍ला तिङ्‍योकुपतिवा साङ ग्‍येल्‍ठिक च्‍यिङ्‍ङीला देनी इस्राएलकी मिरिक च्‍यिङ्‍ङीकी खला ठिम कितो।

मत्ती 25:21

तमा ज्‍यिन्‍दाक ति गा कियी सिरा ‘को छ्‍येसुङ, ख्‍युरुङ खोङ्‍तेर्मु ताङ लावा ल्‍यामु! ख्‍युरुङ ताम्‍ङे चेयीला खोङ्‍तेर्मु च्‍युङ्‍सुङ, तुक क्‍यानी ङ ख्‍युरुङला ताम्‍ङे बङी चेक तेतिन। ख्‍युरुङ वानी ङ ताङ मुला गा की।’ सिनी सिक्‍यासुङ।

मत्ती 25:23

तमा ज्‍यिन्‍दाक तीकी तीला ‘को छ्‍येसुङ, खोङ्‍तेर्मु ताङ लावा ल्‍यामु! ख्‍युरुङ ताम्‍ङे चेयीला खोङ्‍तेर्मु च्‍युङ्‍सुङ, तुक क्‍यानी ङ ख्‍युरुङला ताम्‍ङे बङी चेक तेतिन। ख्‍युरुङ साङ वानी ङ ताङ मुला गा की।’ सिनी सिक्‍यासुङ।

लूका 12:33

ख्‍यिरा टोङ्‍बातिवा चोनी कतुकारला ख्‍येलुपतिवाला बिन। तमा ख्‍यिरा थोक्‍ला मरलुप छयीतिवा जो, तमा नाम्‍साङ मिसिन्‍दुप टोङ्‍बा ति देवाच्‍येनला शम्‍नी ज्‍योक। ते कुर्मेन साङ मोफोकिवी, बु साङ मग्‍यकिवी।

लूका 17:30

ङ मी पुज्‍युङ वुङ्‍गुप पेला साङ तुकै राङ डितो।

यूहन्‍ना 12:26

चुका मी तीकी ङला शब्‍ज्‍यी कितुप नो किवे, ती ति ङे तिङ्‍ला तिङ्‍योक गोकिवी। तमा ङ कनी नोके, ङला शब्‍ज्‍यी कितुप ती साङ ङे मुला राङ तेराङ गिवितो। सी ङला शब्‍ज्‍यी किवे, तीला ङे पपी छ्‍ये जेवितो।”

यूहन्‍ना 5:44

ख्‍यिराङ च्‍यिककी च्‍यिक नेमा ताङ्‍देन ङ्‍येतुपला गा किवी, यिने च्‍यिक राङ वोतुप कोन्‍छ्‍योक नेमा वुङ्‍गुप मोवा ति मोछोली सिसिन ख्‍यिरा चुक क्‍यानी तेपा कि थुप्‍किवी रो?

लोमा छ्‍येतिवी लाका 8:20

ती थोसिमा पत्रुसकी दुक सिक्‍यासुङ, “ख्‍योरो टोङ्‍बा याङ ख्‍योरो लोला राङ ना डोशी, च्‍यिलासिसिन कोन्‍छ्‍योककी कटिन ति टङ्‍गा तेनी ङ्‍यो थुप्‍किवी सिनी ख्‍योरो नासाम ताङ्‍नोक।

रोमी 2:10

यिने लाका ल्‍यामु कितुपतिवाला खोकी मोवा ताङ ताङ्‍देन ताङ लोदिमु नङ्‍गिवी। ती मोवा ताङ ताङ्‍देन ताङ लोदिमु ति गोमाला यहूदीतिवाला नङ्‍गिवी, ती ज्‍युक्‍ला यहूदी मिन्‍दुप मिरिक यम्‍बाकी मीतिवाला नङ्‍गिवी।

रोमी 2:29

यिने वुतुङ्‍की यहूदी टेङ्‍बु ति खोरो सेमगी दिङ नेज्‍युनी कोन्‍छ्‍योककी ठिमला युकिवी। तमा वुतुङ्‍की च्‍येतुप लुक्‍सु क्‍यावु ति ठिमला सिक्‍यावु दोके जुला तिराङ कितुप मिन, कोन्‍छ्‍योककी थु चाङ्‍मा नेमा सेमला क्‍यावु यिन। तुका मीतिवाला मी नेसुर मिन, कोन्‍छ्‍योक नेमा ताङ्‍देन ङ्‍येकिवी।

रोमी 2:7

छेटाङ ख्‍येल्‍सिनाङ हम क्‍यानी लाका ल्‍यामु कितुप ताङ कोन्‍छ्‍योककी थोक्‍ला मोवा ताङ ताङ्‍देन क्‍यानी खोकी मिङला नाम्‍साङ मिशिवु मिजी छोलुपतिवाला खोकी नाम्‍साङ मिशिवु मिजी नङ्‍गिवी।

रोमी 8:19

कोन्‍छ्‍योककी ज्‍ये नङ्‍गुपतिवा तेरीकी खोकी पेजातिवा वुङ्‍गुप ति ल्‍हापला छासे रेवा क्‍यानी गुनी देन वे।

१ कोरिन्‍थी 3:13

तुका मीतिवा रे रेकी लाका ति कोन्‍छ्‍योककी छ्‍या देन्‍गिवी। च्‍यिलासिसिन खोकी ठिम क्‍या नङ्‍गुप तुजेला तिवी क्‍यावु लाका ति ठछ्‍येली थोङ्‍गिवी। तमा सु सुकी चुका चुका लाका क्‍यानोक सिनी मे थ्‍वोनी र्‍हेनी ल्‍हेवी।

१ कोरिन्‍थी 4:5

तुक क्‍यानी ख्‍यिराङ कोन्‍छ्‍योककी ठिम क्‍या नङ्‍गुप सिनाङ गोमाला के सुला साङ ठिम माकी। चोवो येशू फेपुप पर सेक गुसा। दाक्‍पी सी साङ हाक्‍माकोवा क्‍यानी क्‍यावु लाका ल्‍यामु मेलोवा ति तेरी खोकी ठछ्‍येली थोङ्‍गिवी। मी सेमगी नोवातिवा साङ ठछ्‍येली छ्‍या देन्‍गिवी। ती पेला मीतिवा रे रेला कोन्‍छ्‍योककी “ख्‍यिरा छासे को छ्‍येसुङ।” सिनी सुङ्‍गिवी।

याकूब 1:12

चुका मी ति खोक्‍पा ल्‍हापला ख्‍येलुप पेला छेटाङ ख्‍येल्‍सिनाङ हम क्‍यानी दे थुप्‍किवे, ती मी ति मोलाम थोपुप यिनो। च्‍यिलासिसिन तीला मिजीकी उशाक थोप्‍कितो। ती छ्‍यक्‍तक ति कोन्‍छ्‍योककी खोला ङ्‍यिङ्‍ज्‍येवु कितुपतिवाला तेरिन सिनी थाक्‍छ्‍येन नङ्‍गुप नाम्‍साङ मिशिवु मिजी यिन।

१ पत्रुस 1:13

तुक क्‍यानी रङगी सेम ति थिला ज्‍याक्‍नी डेकला दे। तमा येशू ख्रीष्‍ट फेवु पेला खोकी ख्‍यिराङला नङ्‍गुप कटिन थोपुपला ख्‍यिराङ रेवा की।

१ पत्रुस 1:5

ख्‍यिरा कोन्‍छ्‍योकला तेपा क्‍यावु तप्‍की खोकी ख्‍यिराङला थर्वा नङ्‍गुप पर सेक खोकी ङार नेसुर ख्‍यिराङला र्‍होक्‍नी वे। ती थर्वा ति खोकी मी तेरीला ठिम क्‍या नङ्‍गुपला फेवु पेला खोकी ख्‍यिराङला छ्‍या देन्दुपला टडिक क्‍या वे।

१ पत्रुस 2:4

ख्‍यिराङ चोवो येशूकी चिप्‍ला शोक। खो ति खाङ्‍बा जोप मीतिवी फेन मोथोवु यिन सिनी तेन्‍नी क्‍युरुप दो यिन, यिन्‍सिनाङ कोन्‍छ्‍योककी ती दो ति पेनी मीतिवी थोक्‍ला मिजी नङ्‍गुप गोङ छ्‍येन्‍बु वोतुप दो जो नाङ्‍सुङ।

१ पत्रुस 2:7

तुक क्‍यानी ख्‍यिराङ सी खोला तेपा किवे, तीकी थोक्‍ला खो गोङ नावु वे, यिने तेपा मिकिवुतिवी थोक्‍ला ति कोन्‍छ्‍योककी सुङला साङ दुक सिनी टि वे, “ती दो ति खाङ्‍बा जोप मीतिवी फेन मोथोवु सिनी क्‍युर वे, यिन्‍सिनाङ ती ति सुरकी दो च्‍युङ्‍गिवी।”

१ पत्रुस 4:12

ङ्‍यिङ्‍ज्‍येवु अच्‍युनुपतिवा, ख्‍यिराङला तेपा रम्‍बु जोपला छासे खोक्‍पा ल्‍हाप छेटाङतिवा ख्‍येलुप पेला ख्‍यिराङ मिच्‍यिक्‍पा च्‍युङ्‍सुङ सिनी हलेवा माकी,

१ पत्रुस 4:13

यिने ख्‍यिराङ ख्रीष्‍टकी थोक्‍ला छेटाङ खुरुपतिवा यिन्‍दुप तप्‍की ती पेला गा की। तुक क्‍यासिन खोकी मोवा छ्‍या देन्‍दुप पेला ख्‍यिराङला मङ लोदिमु ताङ गा लङ्‍गिवी।

१ पत्रुस 5:1

तमा ख्‍यिराङ चर्चकी मीतिवी पर्ला गोमा कितुपतिवाला ङ गोङ्‍बा शोयी। ङ साङ चर्चकी गोमा कितुप मी यिन, तमा ख्रीष्‍टकी छेटाङ खुरुप थोक्‍ला साङ पङ्‍बु तेरुप मी यिन। ज्‍युक्‍ला ख्रीष्‍टकी मोवा छ्‍या देन्‍दुप पेला ख्‍यिरा मुला राङ ङला साङ ती मोवा ति थोप्‍किवी।

२ पत्रुस 1:1

येशू ख्रीष्‍टकी थोक्‍ला शब्‍ज्‍यी कितुप लोमा छ्‍ये ङ सिमोन पत्रुसकी छ्‍योक नेमा टसी देलेक! दी यिकी ति टेङ्‍बु वोतुप दाक्‍पी कोन्‍छ्‍योक ताङ दिक्‍पा ने थर ज्‍यितुप येशू ख्रीष्‍ट नेमा ङ्‍यिरा दोके खक्‍छ्‍येवु तेपा कितुप मीतिवाला टिवु यिनो।

२ पत्रुस 1:4

खो ति मोवा ताङ च्‍यङ्‍च्‍यु सेम्‍बा वोतुप तप्‍की दाक्‍पुला छासे चोछ्‍येवु ताङ खक्‍छ्‍येवु ताम्‍ङे थाक्‍छ्‍येन नङ वे। तीकी तेन्‍दोक ति दाक्‍पु दुक्‍टा वोतुप सेम नेसुर वुङ्‍गुप दी जम्‍बुलिङकी नोवा मेलोवा नेसुर थर्नी कोन्‍छ्‍योक दोके टेङ्‍बु वोतुप मिजी क्‍योङ्‍गुपला यिन।

२ पत्रुस 3:14

ती तप्‍की ङे ङ्‍यिङ्‍ज्‍येवु अच्‍युनुपतिवा, ख्‍यिराङ ती तुजेला गुनी देतुप तप्‍की खोकी थोङ्‍दाङला ख्‍यिराङ मङ टेङ्‍बु ताङ क्‍येन मेतुप ताङ खोकी मुला तम्‍जी ल्‍यामु वोतुप मिजी क्‍योङ।

यहूदा 1:24

दाक्‍पी कोन्‍छ्‍योककी ख्‍यिराङला दिक्‍पा ने र्‍होकुप ताङ क्‍येन मेतुप जोनी खोकी मोवाकी चिप्‍ला लोदिमु क्‍यानी टिनी डिवी।

ज्‍यल्‍का 1:7

ल्‍होसा, खो मुक्‍पी ख नेमा फेप्‍कितो। खो फेवु ति मी तेरीकी मिककी थोङ्‍गितो। खोला दुङ सुरुप मीतिवी साङ खो फेवु ति थोङ्‍गितो। तमा जम्‍बुलिङला वोतुप तेरी मिरिककी मीतिवा खो फेपुप तप्‍की ङुप्‍राङ कितो। तुकै राङ वुङ्‍शिता। आमिन।

ज्‍यल्‍का 2:10

ख्‍युरुङला ख्‍येल वुङ्‍गुप छेटाङकी थोक्‍ला ज्‍यिवा माकी। ल्‍होसा, शैतानकी खोक्‍पा ल्‍हापला ख्‍यिरा पर्ला ललाइ ललाइला चोन्‍खाङला ख्‍येल ज्‍यितुप छल वोतो। यिन्‍सिनाङ ख्‍युरुङला ती छेटाङ ति ङ्‍यिमा च्‍यिथम्‍बा सेक तिराङ ख्‍येल्‍गितो। ख्‍युरुङ शिता सेक ङला तेपा रम्‍बु क्‍यानी दे, तमा ङ ख्‍युरुङला नाम्‍साङ मिशिवु मिजीकी छ्‍यक्‍तक तेरिनो।

ज्‍यल्‍का 3:10

ख्‍योरो ङे कला ङ्‍येन्‍नी हम क्‍या देसुङ। ती तप्‍की जम्‍बुलिङकी मीतिवा तेरीला खोक्‍पा ल्‍हापला छेटाङ ख्‍येल वुङ्‍गुप पेला ङ ख्‍युरुङला ती छेटाङ नेसुर र्‍होकिनो।

ज्‍यल्‍का 3:18

तुक क्‍यानी ङ ख्‍युरुङला टोङ्‍गु तेरिन, ख्‍युरुङ छ्‍युक्‍पु डोप गा वोसिन, ङे नेसुर मेला र्‍हेनी ङोमा जोवु सेर ङ्‍यो। तमा ङोछा लङ्‍गुप ताङ पेर्तुङ्‍बा वोतुप जु उपुपला मज्‍या कर्मु ङ्‍योनी कोन। ख्‍योरो मिक थोङ थुपुपला मिकला मेन ङ्‍योनी कु।