Nehemia 4:2 - Uwumbɔr aagbaŋ

² U nan sil uŋeen aatɔtiib ni Samaria aajab aanimbiin ni ki len ke, “Juu yaab, bifalaadam bee, dak ke bi bi ŋani ba na? Bi ŋa nlandak ke bi ki gir maa kitiŋ ngbaan aa? Bi dak ke baah toor kitork ki na ga ŋmaa cha bi doo lituln ngbaan liwinbaal la aa? Bi ga ŋmaa di ŋilangbentanjal ŋi ber ki dɔ ki wun mmii na maa aa?”

Nehemia 4:2 Iomraidhean Croise

Esra 4:4

Le baadim, bi nan puen koo kitiŋ ngbaan pu na, pɔɔn bibaa ke bi faan Juda yaab ngbaan ki yɔl bitaakpab, aan bi di cha ki taa ki maa.

Nehemia 12:27

Buyoonn bi nan di Jerusalem aatiŋ aagoln ŋa Uwumbɔr aaŋaal ni na, bi nan yin ni Liifai yaab baah bi nin chee na mɔmɔk, ke bi nan kpaan kitork ngbaan, ki li gaa ilahn ki dooni Uwumbɔr, ki gbaa tibar ni ichayakrtuun.

Nehemia 12:43

Bi nan toor titoor pam liyaadaal ngbaan, le binib ngbaan nan kpa mpopiin sakpen, Uwumbɔr aah nan tii bi mmɔɔn pu na. Bipiib ni mbim mu nan bi njim ngbaan ponn ni, le kifuuk ki bi mɔmɔk nan ŋani na nan buen dandar.

Nehemia 4:10

Juda aanib nan gaa nlahn ke: “Ti tun ŋitun ki ti bak. Tibir pam le dɔ ke ti yoor ti mee. Ti ga ŋa kinye aan ki maa ligoln ngbaan din wee?”

Nehemia 6:15

Joo cha iwiin piiŋmu ni ilee ti jer, Elul aaŋmal aawiin moninko ni iŋmu daal na, ligoln ngbaan aatuln mɔmɔk nan doo.

Ilahn 83:4

Bi len le ke, “Dan man aan ti ti bii doo Israel yaab aatimbol, aan ubaa taa ki teer bi pu ki ti saa n‑yoonn mu kaa kpa ndoon na.”

Jeremia 26:18

“Hesekia aah nan ye Juda aabɔr na, Uwumbɔr aabɔnabr Maika u nan bi Moresef aatiŋ ni na nan tuk binib mɔmɔk ke Uwumbɔr Mpɔɔnsakpiindaan len ke, ‘Bi ga kpar Sionn ke lisikpel na, le Jerusalem kpaln tilangbenn aakpuk, le Uwumbɔr Aadichal aagongoln ga kpaln kichook.’

Jeremia 33:24

“Saa kan binib aah bi len ke m yii ŋidichal ŋilee, ŋi ye Israel ni Juda aanib bi min mbaa nan lee bi na aa? Kina pu le bi lik maanib fam, kaa ki kahn bi sakni ŋitimbol ni.

Daniel 9:25

Chuu tibɔr timina ki bee taatataa: Ki nyan n‑yoonn mu bi ga lii bumɔb ke bi ki gir maa Jerusalem aatiŋ na, ki ti saa buyoonn Uwumbɔr aah lee usaloln u na fuu ni na, ga li ye ŋibin ŋilole nfum mulole pu la. Bi ga ki gir maa Jerusalem aatiŋ, le isan ga li bi ki ponn ni, le ki li kpa tiwan ni kiir ki aan ki pɔɔ na; le ki ga sil ki ti saa ŋibin imonko itaa ni ŋilee nfum mulole pu; n‑yoonn ngbaan tee ga li ye tibɔbir aayoonn la.

Habakuk 3:2

Uwumbɔr, m ŋun saah tun lituln li na pu, le ijawaan chuu mi sakpen. Tɔ, ŋa timi aayoonn mumina ŋitukpaan ŋi aa nan ŋani na. Hali saaŋuul ponn ni kan, san timi kinimbaak.

Sekaria 12:8

N‑yoonn ngbaan kan, Uwumbɔr ga li kii binib bi bi Jerusalem ponn ni na, le ki cha udaburdaan u ŋmal bi ni na pɔɔk, ke David aah nan bi pu na. David aayaabitiib le ga loln bi pu nsan ke Uwumbɔr aatuun na. U ga loln bi pu nsan ke Uwumbɔr ubaa na la.

1 Korenti 1:27

Uwumbɔr nyan binib bi ye bijɔrb dulnyaa ni aanib aanimbil ni na, le ki tee cha binib bi kpa nlan na ji inimɔɔn. U nyan binib bi ye bigiim dulnyaa ni aanib aanimbil ni na, le ki tee cha bipɔɔndam ji inimɔɔn.