Mpiin 36:2 - Uwumbɔr aagbaŋ

² Esɔ nan yoor Kanaann aanib aapiibim la. Bi nan yin ubaa ke Ada, u nan ye Hef aanii Elonn aabisal na, ki yin uken mu ke Oholibama, u nan ye Ana aabisal na la. Ana aate nan ye Sibeonn u nan ye Hif aanii na la.

Mpiin 36:2 Iomraidhean Croise

Mpiin 27:46

Le Rebeka bui uchal Aisak ke, “Esɔ aapuutiib aabimbin aah bi pu na muk mi sakpen, ki cha naa mɔ mi n‑yoonn mɔmɔk. Jakob mu yaa ki yoor Hef yaab aapiibo ubaa kan, naan ki li mɔ kpala.”

Mpiin 28:9

Nima pu na, u nan buen Ismael, u nan ye Abraham aajapɔɔn na chee, le ki ti yoor ubisal Mahalaf u nan ye Nebayof aaninkpan na, ki di kpee upuutiib biken na pu.

Mpiin 36:14

Le Esɔ aapuu Oholibama, u nan ye Ana aabisal ki mu ye Sibeonn aayaabil na, mu nan ma mbijabim bitaa, bi yin bi ke Jeus, ni Jalam, ni Kora.

Mpiin 36:24

Sibeonn nan kpa mbijabim bilee, Aya ni Ana. Ana ngbaan le nan ti kan inyunbun i aanyun ton na ibaa, waah nan joo ute aabon timoor ni buyoonn na.

Mpiin 36:25

Ana nan ye Disonn aate la, uma le nan ye Hemdann, ni Esbann, ni Itrann, ni Kerann aayaaja. Le Ana nan ki kpa bisal ubaa bi yin u ke Oholibama.

Mpiin 36:3

Le bi yin uken mu ke Basemaf, u nan ye Ismael aabisal aan uninja ye Nebayof na.

Mpiin 9:25

le Nowa puun lii u pu le ki bui ke, “M puun lii Kanaann pu. U ga li ye una aabitiib aanaagbiija la.