Mpiin 21:4 - Uwumbɔr aagbaŋ

⁴ le ubopɔɔn ngbaan aah nan ti saa iwiin iniin na, le ute Abraham gii uchakpaln, Uwumbɔr aah nan tuk u ke u ŋa pu na.

Mpiin 21:4 Iomraidhean Croise

Nnyam 12:48

le unii u kaa gii uchakpaln na aan ŋmaa ji kitork ngbaan aajikaar. Uwɔwɔnii yaa nan kal ni chee ki ban u kpaan toor Lakr‑jer aatork ngbaan ki nyuŋ Uwumbɔr kan, see ni pue gii bijab bi bi baamaal ponn ni na aachakpan. N‑yoonn ngbaan na, u kpaln Israel yaab ponn ni ubaa le na, ki ga ŋmaa kpaan ni chee ki toor kitork ngbaan.

Liifai Yaab 12:3

Winiin daal kan, ni gii ubo ngbaan aachakpaln.

Tibɔnyaan ti Luk ŋmee ti na 1:59

Waabo aawiin iniin daal, le bi dan bi nan gii uchakpaln, le ki ban bi yin u ke Sekaria ke baah yin ute pu na.

Tibɔnyaan ti Luk ŋmee ti na 1:6

Sekaria ni upuu mɔmɔk nan ye bininyaam Uwumbɔr chee, ki dii waakaal mɔmɔk, ki ŋani waah ban pu na, kaa kpa taani ubaa.

Tibɔnyaan ti Luk ŋmee ti na 2:21

Ubo ngbaan aawiin iniin daal le ni ŋeer bi gii uchakpaln. Le bi yin u ke Yesu. Buyoonn Mari aa nan kee dek lipuul na, le Uwumbɔr aatuun ngbaan nan bui u ke bi yin u kina.

Lituln 7:8

Le Uwumbɔr puu tipuur tii Abraham, ki tii u nkaal, ke u ni uyaabitiib mɔmɔk gii ŋichakpan, aan ni mɔk ke bi kii uma Uwumbɔr aah puu tipuur ti na. Le Abraham ma ubijabo, ki yin u ke Aisak, le ki gii uchakpaln, u nan laa ye iwiin iniin aabo la. Le Aisak ma waabo Jakob. Jakob mu ma japɔtiib kipiik ni bilee bi ye tiyaajaninkpiib na. Le bi mɔmɔk gii ŋichakpan.

Ikaal 12:32

“Ni pɔɔn nibaa ki ŋa maah bui nimi pu na mɔmɔk, ni taa di tiwan nibaa kpee maah mɔk nimi pu na, ki mu taa nyan nibaa mu.