Mpiin 15:18 - Uwumbɔr aagbaŋ

¹⁸ Nima chee le Uwumbɔr nan puu tipuur tii Abram. U nan bui ke, “M puu ke m ga di kitiŋ kimina tii saamaal, ki yoor Ijipt aatiŋ ki ti saa Yufrates aamɔɔl mɔk,

Mpiin 15:18 Iomraidhean Croise

Mpiin 12:7

Uwumbɔr nan dan Abram chee le ki nan bui u ke, “Kitiŋ kee le m joo m di tii saamaal.” Nima chee le Abram maa kitork aabimbiln tii Uwumbɔr u nan dan u chee na.

Mpiin 13:15

M ban ke m di saah waa kitiŋ kimɔk na ki di tii aa ni saamaal, aan ki li ye nimi aatiŋ n‑yoonn mu kaa kpa ndoon na.

Mpiin 2:14

Bi yin taataa aapaln ke Tigris, li nan puu dii Asiria aawipuul wɔb la; le bi yin linanar ke Yufrates.

Mpiin 24:7

Uwumbɔr u ye paacham aadindaan na, uma le nyan ni mi nte do, ni ndo yaab aatiŋ ni, le ki puu ke u ga di kitiŋ kimina tii m ni n‑yaabitiib. Uma le ga cha waatuun loln aa pu nsan, nima kan, aa ga ti kan upii ki nan tii njapɔɔn.

Mpiin 26:4

M ga cha aa maa ki li kpa yaabitiib bi li wiir ke iŋmabi na, le m ga di kitiŋ kee mɔmɔk tii bi. Aayaabitiib pu le m ga ŋa tinyoor ŋa ŋinibol mɔmɔk pu.

Mpiin 28:4

Uwumbɔr ŋa tinyoor ŋa aa ni aayaabitiib pu, ke waah ŋa tinyoor ŋa aayaaja Abraham pu pu na, aan ki cha aa gaa kitiŋ ki u nan di tii aayaaja Abraham aan aa bi ki ponn ni na.”

Mpiin 35:12

M ga di kitiŋ ki m nan di tii aayaaja Abraham ni aate Aisak na di tii si, ni aayaabitiib bi ga paan ni aapuwɔb na.”

Mpiin 50:24

Le u bui ukpetiib ke, “Ni ŋeer m kpo; Uwumbɔr mu ga sil li joo nimi, ki nyan nimi Ijipt aatiŋ kee ni, ki giin nimi buen kitiŋ ki u nan puu ke u ga di ki tii titetiib Abraham, ni Aisak, ni Jakob na.”

2 Samuel 23:5

Kina le Uwumbɔr ga ŋa waanyoor ŋa n‑yaabitiib pu; ba pu? u puu tipuur ti kaa kpa ndoon na tii mi, kimɔbaan ki kaan bii na, tipuur ti kaan kpeln na. Kina baanja le m ban, nima le ga li ye maanyaŋ, le Uwumbɔr ga sil cha li dan.

2 Samuel 8:3

U nan nyaŋ Siria aatiŋ ki bi yin ki ke Soba na aabɔr Hadadeser u ye Rehob aajapɔɔn na. Hadadeser aah nan cha u ti gaa Yufrates aapaacham aapepel buyoonn na, le u nan ti nyaŋ u.

1 Bibɔrb 4:21

Solomonn le nan joo ŋitimbol aanib bi bi Yufrates Aamɔɔl, ni Filistia, ni Ijipt aatim aakaasisik ni na. Bi nan pa lampoo tii u, le ki ye waatutum, waamɔfal yoonn mɔmɔk.

1 Bibɔrb 5:1

Taya aatiŋ Aabɔr Hiram aajɔ le nan ye David. Waah nan ŋun ke Solomonn le nab ute David aanaan pu na, u nan tun bininkpiib u chee.

1 Bibɔrb Aabɔr 16:16

U nan puu ti tii Abraham le ki puu tii Aisak mu.

1 Bibɔrb Aabɔr 5:9

Bi nan kpa tiwakor sakpen Gilead aatiŋ ni, le ki gaa kitiŋ ngbaan ki nyan nteersakpiin mu bi liwipuul wɔb ki ti saa Yufrates Aamɔɔl chee na.

2 Bibɔrb Aabɔr 7:8

Solomonn ni Israel aanib mɔmɔk nan jin Tikakar Aajim ki ti saa iwiin ilole. Kinipaak nan nyan ni dandar, ki nyan ni Hamaf aasan mu bi ŋŋangan wɔb na, ni Ijipt aatinaanmɔk ŋŋangii wɔb.

2 Bibɔrb Aabɔr 8:7

Solomonn nan cha Kanaann yaab aayaabitiib bi Israel yaab aa nan ku bi buyoonn bi nan gaa baatiŋ na tun ntamaam mumina aatuln ke binaagbiib na. Bima le nan ye Hef yaab, ni Amor yaab, ni Peres yaab, ni Hif yaab, ni Jebus yaab. Biyaabitiib beenin ye binaagbiib le ki nan saa din.

2 Bibɔrb Aabɔr 9:26

Uma le nan ye bibɔrb bi mɔmɔk nan bi Yufrates Aamɔɔl wɔb ki ti saa Filistia ni Ijipt aatinaanmɔk na aabɔrkpaan.

Esra 4:20

Bibɔrb bi kpa mpɔɔn sakpen na nan joo Jerusalem ni Yufrates aamɔɔl aawilir aapepel mɔmɔk, ki gaal lampoo ni ŋimombil,

Nehemia 9:8

Aa nan kan ke u kpa gaakii tii si, le aa nan puu tipuur tii u. Aa nan puu ke aa ga di Kanaann yaab aatiŋ tii u, ki kpee Hef yaab, ni Amor yaab aatim, ni Peris yaab, ni Jebus yaab, ni Girgas yaab aatim ke mu li ye uyaabitiib aatim. Saah ŋani saah len pu na n‑yoonn mɔmɔk na, aa joo saah puu pu na mbamɔm.

Ilahn 105:11

U bui ke, “M ga di Kanaann aatiŋ tii si, ki ga li ye saatiŋ la.”

Nnyam 13:11

“Uwumbɔr ga di nimi buen Kanaann aatiŋ ki u nan puu tii nimi ni niyaajatiib na ni. Ni yaa bi nima chee kan,

Nnyam 2:24

le ni nan chuu u kinimbaak, le u teer tipuur ti u nan puu tii Abraham, ni Aisak, ni Jakob na.

Nnyam 23:23

Maatuun le ga loln ni pu nsan ki di nimi buen kitiŋ ki ye Amor yaab, ni Hef yaab, ni Peris yaab, ni Kanaann yaab, ni Hif yaab, ni Jebus yaab aatiŋ na, le m ga kuln bi mɔmɔk.

Nnyam 3:8

Nima pu le m sunn ni ki dan ke m nan gaa bi lii, ki nyan bi Ijipt yaab aatiŋ ni, ki tii bi kitiŋ ki ŋan, ki wiir, ki kpa tiwakor aamoŋmɔpaan ni ŋisubil sakpen na; kitiŋ ngbaan le Kanaann yaab, ni Hef yaab, ni Amor yaab, ni Peris yaab, ni Hif yaab, ni Jebus yaab laa bi ki ponn ni na.

Nnyam 32:13

Teer saanaagbiib Abraham, ni Aisak, ni Jakob bɔr. Teer tipuur bamɔnn ti aa nan puu, ke aa ga cha bi maa ki pɔr, ki li wiir ke iŋmabi i bi kitaapaak na, ki di kitiŋ ki aa nan puu ke aa ga di tii bi, aan bi li yeh ki n‑yoonn mu kaa kpa ndoon na bɔr.”

Nnyam 34:11

Ni li kpa ŋuntii ki joo cha ikaal i m di mɔk nimi din wee na wɔb. M ga jenn nyan Amor yaab, ni Kanaann yaab, ni Hef yaab, ni Peris yaab, ni Hif yaab, ni Jebus yaab, naah ga li tur koo bi ponn ni pu na.

Nnyam 34:24

Buyoonn m ti jenn nyan ŋinibol ŋimɔk bi ni chee aan ki taln nimi aatiŋ na, ubaa aan ki tak nimi njim mutaa mue aayoonn.

Nnyam 6:4

M nan ki puu tipuur tii bi ke m ga di Kanaann aatiŋ ki bi nan ye biwɔwɔm ki ponn ni na tii bi.

Nnyam 6:8

M ga di nimi buen kitiŋ ki m nan puu ke m ga di ki tii Abraham, ni Aisak, ni Jakob na, m ga di ki tii nimi, ki li ye nimi aatiŋ. Min le ye Uwumbɔr.’”

Aisaya 27:12

Nwiin ngbaan daal, ki nya Yufrates aamɔɔl ki ti saa Ijipt yaab aatiŋ aanaanmɔk, Uwumbɔr ga kuun ni waanib ubaabaa, ke unii aah ganni mmuubim ki cha timuupɔkr pu na.

Aisaya 55:3

Maanib, li pel dandana man, ki dan m chee man, dan man m chee ki nan kan limɔfal. M ga puu tipuur ti kaan doo na tii nimi, ki tii nimi tinyoor ti m nan puu Ubɔr David ke m ga tii u na.

Jeremia 32:22

Aa nan tii bi kitiŋ kimina, kitiŋ ki nyuun ki kpa liwangol na, ke saah nan puu tii biyaajatiib pu na.

Jeremia 32:40

M ga puu tipuur ti kaa kpa ndoon na tii bi. M ga li ŋani tiwan ni ŋan na tii bi n‑yoonn mɔmɔk, le ki ga cha bi li san mi bisui mɔmɔk ni, aan bi taa ki fenn bipuwɔb tii mi daalbaadaal.

Liifai Yaab 26:42

m ga teer tipuur ti m nan puu tii Jakob, ni Aisak, ni Abraham na, ki ki fikr tipuur ngbaan, ki giin maanib aatiŋ tii bi.

Liifai Yaab 26:45

M ga fikr tipuur ti m nan puu tii biyaajatiib n‑yoonn mu m nan di maapɔɔn mɔk ŋinibol mɔmɔk aan ki nyan ni maanib Ijipt aatiŋ ni na, ke min Uwumbɔr li ye Bidindaan.”

Nkahm 34:5

nima chee le ki ga fenn toŋ kifataŋ ki bi Ijipt aanaanmɔk na, ki ti doo Kaasisik ni Aanyusakpem chee.

Lituln 7:5

N‑yoonn ngbaan, Uwumbɔr aa nan tii u kitiŋ kibaa do chee na. Waa nan po tii u lisaŋ libaa. U nan puu tipuur tii u ke u ga di kitiŋ kee tii u ni uyaabitiib. N‑yoonn mu Uwumbɔr nan puu tipuur tee tii u na, Abraham aa nan kee kpa ubo.

Ikaal 11:24

Nitaa aah taa kitiŋ ki mɔmɔk pu na ga li ye nimi yaan la. Nimi aatiŋ mɔk ga yoor nteersakpiin aaŋangii wɔb ki ti nya Lebanonn Aajool chee, ŋŋangan wɔb, le ki ga ki yoor Yufrates Aamɔɔl chee, liwipuul wɔb, ki ti ker Kaasisik ni Aanyusakpem chee, liwilir wɔb.

Ikaal 12:20

“N‑yoonn mu Nidindaan Uwumbɔr moo tii nimi kitiŋ kpee, ke waah nan puu pu na kan, ni ga ŋmaa ŋmɔ tinann, naah ban pu na.

Ikaal 19:8

“N‑yoonn mu Nidindaan Uwumbɔr cha ni pɔr kpee, ke waah nan bui niyaajatiib ke u ga ŋa pu, ki di kitiŋ ngbaan mɔmɔk tii nimi doo na kan,

Ikaal 34:4

Le Uwumbɔr bui Moses ke, “Kitiŋ kee le m nan puu tii Abraham, ni Aisak, ni Jakob, ke m ga di ki tii biyaabitiib na. M cha aanimbil le kan ki, maan cha aa koo ki ni.”

Ikaal 7:1

“Nidindaan Uwumbɔr le ga di nimi koon kitiŋ ki ni cha ni ti gaa ki na ponn ni. Le ni yaa tur koo ki ponn ni kan, u ga jenn nyan ŋinibol pam. U ga jenn nyan Hef yaab, ni Girgas yaab, ni Amor yaab, ni Kanaann yaab, ni Peris yaab, ni Hif yaab, ni Jebus yaab. Ŋinibol ŋilole ngbaan wiir, ki kpa mpɔɔn jer nimi.

Hiibru Yaab 13:20

Uwumbɔr nan fikr Tidindaan Yesu u ye waanib mɔmɔk aayidaan na nkun ni. Waasin pu, le Uwumbɔr puu tipuupɔln tii timi. Tipuur ngbaan ga li bi n‑yoonn mu kaa kpa ndoon na.

Josua 13:3

ki kpee Afim yaab aatiŋ ki bi ŋŋangii wɔb na. (Kitiŋ ki dɔ Sihor aabun chee, ki bi Ijipt yaab aatiŋ aanaanmɔk na, ki yoor ti ker ŋŋangan wɔb, Ekronn aatiŋ mɔk na ye Kanaann yaab aatiŋ la; Filistia yaab aabɔrb le nan bi Gasa, ni Asdod, ni Askelonn, ni Gaf, ni Ekronn aatim ni.)

Josua 15:4

ki di buen Asmonn aatiŋ wɔb, le ki dii mbun mu bi Ijipt aatiŋ mɔk na, ki ti saa Kaasisik ni Aanyusakpem nin chee kitiŋ mɔk doo na. Juda yaab aatiŋ, ŋŋangii wɔb aanaanmɔk le na.

Tibɔkpiirkaan 9:14

Le nneel ngbaan tuk Uwumbɔr aatuun loloob u joo kakaan na ke, “Chuu gbiln Uwumbɔr aatuuntiib binaa bi bi limɔɔsakpeln li bi yin li ke Yufrates na chee lii.”