Jeremia 2:5 - Uwumbɔr aagbaŋ

⁵ Uwumbɔr bui ke: “Ngalm mulamu aan niyaajatiib nan di galn mi? Ba nan cha bi fenn bipuwɔb tii mi? Bi nan dooni ŋiwaa ŋi kaa bi tibaa ni na le ki mu kpaln maabitibaanidam bibaa.

Jeremia 2:5 Iomraidhean Croise

2 Bibɔrb 17:15

Bi nan yii kaa kii waamɔkm, baa nan joo tipuur ti u nan puu tii biyaajatiib na, le kaa di waah nan sak bi pu na yin nibaa. Bi nan dooni waafam tiib, le ki mu ŋa fam bibaa, le ki nan dii ŋitimbol ŋi mann goln bi na aakaal ki yiil Uwumbɔr aah bui ke bi taa li ŋani ŋitimbol ngbaan aah ŋani pu na.

Ilahn 115:8

Cha binib bi mɔmɔk naan ŋi ki kpa ŋi pu limakl na li gur bi ke ŋiwaa ŋi bi naan na.

Aisaya 29:13

Uwumbɔr bui ke, “Binib bimina bui ke bi dooni mi la, le baadoon aa kpa tataa, bisui bi nibaa wɔb la. Bi joo biyaajatiib aakaal i bi di ŋa bisui ni ki ŋmaa teer i n‑yoonn mɔmɔk na la, ke ni ye Uwumbɔr aakaal la.

Aisaya 44:9

Binib bimɔk naani ŋiwaa na aa kpa tinyoor tibaa, le ŋiwaa ŋi mu bi naan ŋi na ye fam. Binib bi dooni ŋiwaa ngbaan na ye bijoom le kaa nyi nibaa, le ki ga nan ji inimɔɔn.

Aisaya 46:12

Nimi binib bi aatafal pɔɔ aan ni dak ke linyaŋ chee daa na, li pel ni m chee man.

Jeremia 10:8

Bi mɔmɔk jɔr le ki ye bilatiirb. Baan ŋmaa bae nibaa ŋiwaa chee, ŋi ye ŋisugen la.

Jeremia 12:2

Sin le naan bi, le bi fii ki kpa inyaan; bi muuni le ki pɔr. N‑yoonn mɔmɔk kan, bi len aa pu tibɔnyaan la, le kaa tee dak aa pu kpala.

Jeremia 14:22

Ŋitimbol aawaal libaa aan ŋmaa cha utaal nu; kitaapaak kibaa aan ŋmaa cha titaapupur dan. Tidindaan Uwumbɔr, ti di timi aamakl ŋa sin ni la, ba pu? sin baanja le ŋani tiwan mɔmɔk.

Jeremia 2:31

Israel aanib, li pel maah len pu na man. M bi ke nteersakpiin mu bɔɔn ki kpa tiwanbir na le ni chee ee? Tɔ, ni ŋa kinye aan ni bui ke ni ga ŋa naah gee pu na, ke naan ki gir ni m chee kpala?

Jeremia 2:4

Nimi Jakob aayaabitiib, Israel aanibol, pel Uwumbɔr aabɔr man.

Jeremia 8:19

Li pel man, m ŋun maanib aawiil pu kitiŋ kee mɔmɔk pu, “Uwumbɔr aa ki bi Sionn aatiŋ ni la aa? Sionn aatiŋ aabɔr aa ki bi la aa?” Le Bidindaan Uwumbɔr, u ye baabɔr na gar ke, “Ba ŋa ni dooni nimi aawaa ki gbaani biwɔwɔm aawaa ŋi kaa kpa tinyoor tibaa na aanimbiin ni ki fiini maaŋuul?”

Esekiel 11:15

ki bui ke, “Unibɔn, binib bi koo Jerusalem ponn ni na bi len aa ni Israel yaab biken bi bi tinaagbiir ni na aabɔr la. Bi len le ke, ‘Binib bi bi tinaagbiir ni na aah bi kitiŋ ki daa sakpen na, baan ki ŋmaa li dooni Uwumbɔr. U di kitiŋ kee tii timi la.’

Esekiel 14:5

Ŋiwaa ngbaan mɔmɔk gaa Israel yaab m chee a, le maah ga tii ngarm mu na, m dak ke bi ga ki giin ni baamɔkiil nan tii mi.

Jona 2:8

Binib bi dooni ŋiwaa ŋi kaa po kpa tinyoor tibaa na yii saanimbaasaln.

Matiu 15:8

‘Binib ngbaan pak Uwumbɔr bumɔb ni la. Bisui daa u chee.

Lituln 14:15

“Njɔtiib, ba pu ni ŋani kina? Ti po ye binibɔm ke naah ye pu na la. Ti dan ti nan tuk nimi tibɔnyaan la. Di cha man, ki taa ki dii ŋiwaa man. Ŋi ye fam la. Ni li dii Uwumbɔr u fu na. Uma le nan naan paacham ni kitiŋ, ni nnyusakpem, ni tiwan mɔmɔk.

Rom Yaab 1:21

Bi nyi ke u bi, ki mu aa nyuŋni u waah ŋeer pu na, ki mu aa dooni u waaterm pu. Nima le baalandak bee fam. Bisui ni bɔɔn la, kaa kpa nlan.

Ikaal 32:21

Baah dii ŋiwaa ŋi na le cha liŋuul chuu mi. Baawaa ŋi kaa ye nibaa aan bi dii ŋi na le cha lipiipoln chuu mi. Nima pu na, m mu ga cha litimbol li kaa ye nibaa na le ŋa bi liŋuul. M ga cha bi li kpa lipiipoln litimbol li aanib ye bijɔrb na pu.

1 Samuel 12:21

Taa chuun dii ŋiwaa man, ŋi ye yɔli la. Ŋiwaa aan ŋmaa ter nimi, kaan ŋmaa gaa nimi lii mu, ba pu? ŋaa fu.