1 Samuel 4:3 - Uwumbɔr aagbaŋ

³ Bijab bi nan ŋmar na aah nan fuu ni baah nan tiŋ ka nin chee na, le Israel aayidam bui ke, “Ni ŋa kinye aan Uwumbɔr cha Filistia yaab ngbaan nyaŋ timi din wee? Cha ti buen Silo man, ki ti yoor ni Uwumbɔr Aakaal Aadakaa, aan u dii timi buen ki ti gaa timi lii timi aadim chee.”

1 Samuel 4:3 Iomraidhean Croise

2 Samuel 15:25

Le ubɔr David bui Sadok ke, “Yoor Uwumbɔr Aakaal Aadakaa ngbaan giin kitiŋ ponn ni. Uwumbɔr yaa lik ki faar mi kan, daalbaadaal u ga nan cha m ki dan, ki nan kan Dakaa ngbaan, ni nin chee u si na.

1 Bibɔrb Aabɔr 17:1

Ubɔr David nan gur kaa waabɔrdichal ni la. Daalbaadaal le u nan tun ti yin ni Uwumbɔr aabɔnabr Natann ki nan bui u ke, “Min le ka do, lidichal li bi di santina aadɔ maa li na ponn ni na, le Uwumbɔr Aakaal Aadakaa tee bi igban aabool ponn ni.”

Ilahn 74:1

Uwumbɔr, ba ŋa aa san cha mi kina? Aa gee aabaa aanib pu liŋuul li kaa kpa ndoon na la aa?

Ilahn 74:11

Ba ŋa aa yii kaa ter timi? Ba ŋa aa di aaŋaal bɔɔb aabaa ki si?

Aisaya 50:1

Uwumbɔr bui ke, “Ni dak ke m jenn maanib lii ke uja aah jenni upuu lir pu na la aa? Seeraa aagbann ti ga mɔk ke m jenn bi lii na bi la? Ni dak ke m di nimi kooh ŋa tinaagbiir ni ke uja aah kooh waabim ŋani tinaagbiir ni pu na la aa? Aayii, ni nan buen tinaagbiir ni nimi aatunwanbir pu la; nimi aabakaa pu le m nan jenn nimi buen.

Aisaya 58:3

Binib ngbaan baa ke, “Ba ŋa ti lulni bumɔb, le Uwumbɔr aatafal aa bi ti ni? Ba ŋa ti sunn tibaa taab, le waa pel ti chee?” Uwumbɔr bui bi ke, “Mbamɔn aah ye pu na le ye ke n‑yoonn mu ni lul bumɔb na, le ni bi ban nibaa aageehn le ki muk nimi aatutum.

Aisaya 59:1

Taa dak man ke Uwumbɔr aa kpa mpɔɔn ke u gaa nimi lii, bee u kpaa sakpen, kaan ki ŋun naah yin u pu ki ban nterm na.

Aisaya 59:2

Ni ye nimi aatunwanbir pu le waa ŋun nimi aayim ngbaan. Nimi aatunwanbir le yakr nimi Uwumbɔr chee naa ŋmaa dooni u.

Jeremia 3:16

Le ni yaa nan wiir kitiŋ ngbaan pu kan, binib aan ki len Maakaal Aadakaa bɔr. Baan ki len waabɔr, kaan ki teer u bɔr; baan ki li ban u, kaan ki ŋa uken teen waabuul ni.

Jeremia 7:4

Taa ki len n‑yoonn mɔmɔk ‘Uwumbɔr Aadichal sɔ, Uwumbɔr Aadichal sɔ, nima pu le ti kpa ŋŋmarm.’ Ni ŋmanni nibaa la. Uwumbɔr Aadichal aan nya nimi ntafadaan ni.

Nkahm 10:33

N‑yoonn mu Israel yaab nan nyan Uwumbɔr Aajool Sainai chee na, bi nan chuun iwiin itaa la. N‑yoonn mɔmɔk Uwumbɔr Aakaal Aadakaa le bi nan joo lolni nsan, le u mɔk bi baah ga kal nin chee na.

Nkahm 10:35

N‑yoonn mu bi ti piin ki joo Uwumbɔr Aakaal Aadakaa cha na, le Moses bui ke, “Uwumbɔr, fiin ki yaa saadim, ki jenn binib bi nan si na.”

Nkahm 31:6

Moses nan cha utotoor Eleasar aajapɔɔn, u bi nan yin u ke Fineas na, di bi buen butɔb ngbaan yaan. Uma le nan joo Uwumbɔr aawan, ni kakaan tiib bi bi joo yin tɔb na.

Ikaal 29:24

Le dulnyaa aanib mɔmɔk ga baa ke, ‘Ba ŋa Uwumbɔr ŋa baatiŋ ngbaan kina? Ba ŋa waaŋuul nan fii bi pu sakpen aan u ŋa bi kina?’

Ikaal 31:26

“Yoor man kigbaŋ ki Uwumbɔr Aakaal bi ki ponn ni na, ki di bil gbaŋ Nidindaan Uwumbɔr Aakaal Aadakaa, aan ki li bi nima ki ye seeraa ki tii waanib.

2 Timoti 3:5

Bi ga li ŋmanni ke bi dii Uwumbɔr aasan, ki ga lann Uwumbɔr aapɔɔn. Aa taa dii binib ngbaan.

Hiibru Yaab 9:4

Salmaa aatork aabimbiln nan bi ni ponn ni. Libimbiln ngbaan paab le bi seer tulalee aayon tii Uwumbɔr. Uwumbɔr aakaal aah nan bi dakaa u ponn ni na, mu nan bi ni ni. Bi nan di salmaa aakur le biin dakaa ngbaan pu. Tijikaar ti bi yin ti ke mana na, nan bi salmaa aasambil ponn ni, dakaa ngbaan ponn ni. Aaronn aadabil li nan ŋeen nsupuun na mu nan bi u ponn ni. Uwumbɔr aakaal aah nan ŋmee ŋitakpapapan ŋilee ŋi pu na, mu nan bi u ponn ni.

Josua 4:7

ni tuk bi ke bundaal bi nan di Uwumbɔr Aakaal Aadakaa koo sil Jɔɔdann Aamɔɔl ni na, limɔɔl ngbaan aanyun nan sil kaa ki puu. Ŋitakpal ŋee le ga li teer Israel yaab tiwan ni nan ŋa do na, n‑yoonn mɔmɔk.”

Josua 6:6

Josua nan yin bitotoorb ngbaan, le ki nan bui bi ke, “Yoor Uwumbɔr Aakaal Aadakaa ngbaan, aan ni ponn ni bilole loln ni pu nsan, ki li joo ikpiinja aayiin.”

Josua 7:7

Josua nan bui ke, “Tidindaan Uwumbɔr u kaa kpa ŋeen aatɔ na, ba ŋa aa di timi puur ni Jɔɔdann aamɔɔl? Aa ban aa nan di timi tii Amor yaab la aa? Aa ban aa bii timi la aa? Ba ŋa saa cha ti bee Jɔɔdann Aamɔɔdapuul lima na wɔb?

Josua 7:8

Tidindaan, Israel yaab aadim aah nyaŋ bi pu na, m ga ki len kinye?

1 Piita 3:21

Nnyun ngbaan le ye baah muini binib nnyun ni na aamɔkl. Dandana wee, bi yaa muin nimi nnyun ni kan, ni ŋmar a; ba pu? Yesu Kristo nan fikr nkun ni. Nima le cha ni ŋmar. Bi yaa muin nimi nnyun ni kan, naa ye ke bi fu nimi aawon nnyun tiwon aajɔŋ pu la. Ni ye ke ni di titunwanbir di lii, ki puu tipuur ke ni ga dii Uwumbɔr.

Juud 1:5

Ni nyi maah ga tuk nimi pu na mɔmɔk. Le m ban m teer nimi. Uwumbɔr nan nyan Israel yaab Ijipt aatiŋ ni ki gaa bi lii. Le u mu nan ku bi ponn ni binib bi kaa gaa u ki kii na.

1 Samuel 1:24

Waah nan giin u libiil na, le u di u buen Silo, ki joo ŋibin ŋitaa aanaaja, ni n‑yon kuruwaa kipiik, ni ŋisubil aadaan lidabuul libaa. Samuel nan laa par, le u di u buen Silo, Uwumbɔr Aadichal ponn ni.

1 Samuel 14:18

Sɔɔl nan bui Ahija u nan ye utotoor na ke, “Li joo ni tiwan ni bi joo beer Uwumbɔr aageehn na do.” Tɔ, liyaadaal ngbaan Ahija nan joo ni tiwan ngbaan ki loln Israel yaab aajab pu nsan.

1 Samuel 4:2

Filistia yaab le nan puen buen ti tak Israel yaab, le bi too butɔb sakpem nima, le bi nyaŋ Israel yaab ki ku binib ŋichur ŋinaa butɔb ngbaan ponn ni.