गलातियों 1:4 - काँगड़ी

⁴ यीशु मसीयैं अपणी ज़िन्दगी अहां दे पापां तांई देई दित्ती, तांजे अहां दे परमात्मे दी कने पिता दिया इच्छा मताबक अहां जो इस बग्ते दे बुरे संसारे ते छड्डां।

गलातियों 1:4 Iomraidhean Croise

मत्ती 13:22

जेह्ड़ा बीई झुड़ां बसुन्टां च बाया, एह़ सैह़ माणु ऐ, जेह्ड़ा वचन तां सुणदा ऐ, अपर इस संसारे दी फिकर कने धन दौलता दा धोखा वचने जो दब्बी दिंदा ऐ, कने सैह़ फल़दा नीं।

मत्ती 20:28

जिंआं कि मैं माणुये दा पुत्तर इसतांई नीं आया कि अपणी सेवा करवां, अपर इसतांई आया कि अप्पु सेवा करैं, कने मतेआं जो छड्डाणे तांई अपणे प्राण दैं।”

मत्ती 26:28

क्जोकि एह़ वादे दा मेरा सैह़ खून ऐ, जेह्ड़ा मतेआं दे पापां दी माफी तांई बहाया जांदा ऐ।

मत्ती 26:42

भिरी तिन्हीं दूई बरी जाई नैं एह़ प्रार्थना कित्ती, “हे मेरे पिता, जे एह़ दुखे दा बग्त मेरे झेलणे बगैर नीं हटी सकदा तां तेरी इच्छा पूरी होयैं।”

मत्ती 6:9

“कने तुहां इस तरीके नैं प्रार्थना करा। ‘हे अहां दे पिता, तू जेह्ड़ा सुअर्गे च ऐ, तेरा नां पवित्र मन्नेया जां।

मरकुस 10:45

क्जोकि मैं माणुये दा पुत्तर सेवा करवाणे तांई नीं, अपर इसतांई आया कि सेवा करैं, कने मतेआं जो छड्डाणे तांई अपणे प्राण दैं।”

लूका 22:19

भिरी तिन्हीं रोटी लेई, कने परमात्मे दा धन्यावाद करी नैं तोड़ी, कने तिन्हां जो एह़ ग्लाई नैं दित्ती, “एह़ रोटी मेरा सरीर ऐ, जेह्ड़ा तुहां तांई दित्ता जांदा ऐ, मेरिया यादा तांई ऐई करा-करा।”

लूका 22:42

“हे पिता, जे तू चां तां इस दुखे दे बग्ते जो मिन्जो ते दूर करी दे, भिरी भी मेरी नीं अपर तेरी ई इच्छा पूरी होयैं।”

यूहन्ना 10:11

खरा गुआल़ा मैं ऐ; खरा गुआल़ा भेड्डां तांई अपणे प्राण दिंदा ऐ।

यूहन्ना 12:31

हुण इस संसारे दा न्याय हुंदा ऐ, हुण इस संसारे दा अधिकारी कड्डी दित्ता जांगा ऐ;

यूहन्ना 5:30

“मैं अप्पु ते कुच्छ नीं करी सकदा; जिंआं पिता परमात्मे ते सुणदा ऐ, तिंआं ई न्याय करदा; कने मेरा न्याय सच्चा ऐ, क्जोकि मैं अपणी इच्छा नीं अपर अपणे घल्लणे आल़े दी इच्छा चांह़दा।

यूहन्ना 6:38

क्जोकि मैं अपणी इच्छा नीं अपर अपणे पिता जिन्हीं मिन्जो घल्लेया ऐ, तिसदी इच्छा पूरी करणे तांई सुअर्गे ते आया।

रोमियो 1:7

एह़ चिठ्ठी रोम सैहरे दे तिन्हां सारेयां दे नां पर ऐ, जेह्ड़े परमात्मे दे प्यारे हन, कने पवित्र लोक होणे तांई सद्देयो हन, मैं प्रार्थना करदा ऐ, कि अहां दे पिता परमात्मा कने प्रभु यीशु मसीह दे पास्से ते तुहां जो अनुग्रह कने सांति मिलदी रैंह्।

रोमियो 12:2

कने इस संसारे दे लोकां साइआं मत बणा; अपर तुहां दे मनां दे पूरे बदली जाणे ते तुहां दा चाल-चलण भी बदलदा जां, जिसते तुहां परमात्मे दी खरी, कने मने जो भाणे आल़ी, कने सिद्ध इच्छा दा तजरबा करी नैं जाणदे रेह्आ।

रोमियो 4:25

यीशु मसीह अहां दे अपराधां तांई पकड़ुआया गेआ, कने अहां जो धर्मी बणाणे तांई परमात्मे तिसियो मरेयां ते जिन्दा भी कित्ता।

रोमियो 8:27

कने मनां जो परखणे आल़ा परमात्मा पवित्र आत्मा दिया मनसा जो जाणदा ऐ। क्जोकि सैह़ परमात्मे दे पवित्र लोकां तांई तिसदिया इच्छा दे मताबक विणती करदा ऐ।

रोमियो 8:3

क्जोकि जेह्ड़े कम्म मूसा दिया व्यबस्था अहां दे पापी सभावे दिया बज़ाह ते कमजोर होई नैं नीं करी सकी। सैह़ कम्म परमात्मैं करी दित्ते हन, मतलब जिन्हीं अहां दे पापां दी माफी तांई अपणे पुत्तरे जो बलिदान होणे तांई घल्लेया, कने जिन्हीं अहां पापी माणुआं साइआं सरीर धारण कित्ता, कने परमात्मैं मसीह दे सरीरे च पापे जो सज़ा दा हुक्म दित्ता।

रोमियो 8:32

जिन्हीं अपणे इकलौते पुत्तरे जो भी नीं रखी छड्डेया, अपर अहां पर दया करी नैं तिसियो भी अहां सबना तांई देई दित्ता। तां इतणा कुच्छ दैणे ते बाद भी सैह़ अहां जो अपणे पुत्तरे सौगी सब कुच्छ क्जो नीं दिंगा?

1 कुरिन्थियों 15:3

इसा बज़ाह ते मैं सबना ते पैहल्लैं तुहां जो सैई जरूरी गल्ल दस्सी दित्ती, जेह्ड़ी मिन्जो प्रभु दे पास्से ते मिलियो थी कि पवित्रशास्त्रे दे वचने मताबक यीशु मसीह अहां दे पापां तांई मरी गेआ,

2 कुरिन्थियों 4:4

इस संसारे दे ईश्वर सैताने तिन्हां बेबसुआसियां दिया अक्ला जो भ्रष्ट करी दित्या ऐ, जिसा बज़ाह ते सैह़ मसीह दे सुसमाचारे कने तिसदिया चमका जो नीं समझी सकदे। क्जोकि मसीह परमात्मे दा स्वरूप ऐ।

गलातियों 2:20

जाह़लू मसीह सूल़िया पर मरेया, तां मैं भी मरी गेआ, कने हुण जेह्ड़ा मिन्जो च जिन्दा ऐ, सैह़ मैं नीं अपर मसीह ऐ; कने हुण जिंआं मैं जीआ दा ऐ तां सिर्फ तिस बसुआसे दे जरिये जेह्ड़ा परमात्मे दे पुत्तरे पर ऐ, जिन्हीं मिन्जो नैं प्यार कित्ता कने मिन्जो तांई अपणे आप्पे जो देई दित्ता।

गलातियों 6:14

जित्थु तिकर मेरा सवाल ऐ, अहां दे प्रभु यीशु मसीह दी सूल़िया पर मौत्ती जो छड्डी करी मैं होर कुसी चीज्जा पर घमंड नीं करणा चांह़दा। हुण संसारे दियां चीज्जां दा मिन्जो पर कोई हक्क नीं ऐ, कने मेरे अंदर एह़ इच्छा नीं रेई, कि इन्हां संसारिक चीज्जां दी होर गुलामी करैं।

इफिसियों 1:11

इसते अलावा क्जोकि अहां मसीह सौगी इक्क हन, अहां जो परमात्मे दे पास्से ते विरासत मिलियो ऐ। क्जोकि तिन्हीं अहां जो पैहल्ले ते चुणी लेआ ऐ, कने तिसदिया मर्जिया मताबक ई सारियां चीज्जां कम्म करदियां हन।

इफिसियों 2:2

तिस बग्ते च तुहां इस संसारे दे लोकां पचांह़ चलदे थे, जेह्ड़े परमात्मे जो नीं जाणदे, कने तुहां सैताने पचांह़ चल्ले जेह्ड़ा अम्बरे च दुष्टआत्मां पर राज्ज करणे आल़ा प्रधान ऐ। जेह्ड़ा हुण भी परमात्मे दा हुक्म नीं मन्नणे आल़ेआं च कम्म करदा ऐ।

इफिसियों 5:16

अपणे हर इक्क मौके जो अक्ला नैं इस्तेमाल कर, क्जोकि दिन बुरे हन।

इफिसियों 5:2

कने तुहां इक्की दूये नैं प्यार करा, जिंआं मसीयैं भी तुहां नैं कित्या ऐ, कने अहां दे पापां जो दूर करणे तांई अप्पु जो बलिदान करी दित्ता, कने परमात्मा खुस होएया, क्जोकि एह़ बलिदान तिस तांई मिठ्ठी खुसबुया साइआं होएया।

फिलिप्पियों 4:20

अहां दे परमात्मे कने पिता दी महिमा जुगा-जुग हुंदी रैंह्। आमीन।

1 थिस्सलुनीकियों 1:3

अहां हमेसा ई पिता परमात्मे दे सामणै तुहां दे बसुआसे दे कम्म, कने प्यारे दी मेहनत, कने अहां दे प्रभु यीशु मसीह च तुहां दी आसा दा सबर याद करदे हन।

1 थिस्सलुनीकियों 3:11

अहां प्रार्थना करदे हन, कि अहां दा पिता परमात्मा कने अहां दा प्रभु यीशु, तुहां अल्ल ओणे च अहां दी मदत कने अगुआई करैं।

1 थिस्सलुनीकियों 3:13

तांजे सैह़ तुहां दे मनां जो ऐदेया मजबूत करैं, कि जाह़लू अहां दा प्रभु यीशु अपणे सारे परमात्मे दे लोकां सौगी दुवारी बापस औयें, तां तुहां अहां दे पिता परमात्मे दे सामणै पवित्रता च बेकसूर ठैह़रन।

2 थिस्सलुनीकियों 2:16

अहां अपणे प्रभु यीशु मसीह नैं कने पिता परमात्मे नैं जिन्हीं अहां नैं प्यार कित्ता विणती करदे हन, जिन्हीं अहां जो अपणे अनुग्रह दे जरिये सदा तांई हौंसला कने पक्की आसा दित्ती ऐ।

1 तीमुथियुस 2:6

सारे लोकां जो सैतान कने पापे दे बसे ते छड्डाणे तांई मसीयैं अप्पु जो बलिदान करी दित्ता कने तिसदा बलिदान ठीक बग्ते पर इसा गल्ला दा सबूत था कि परमात्मा सारे लोकां जो छुटकारा दैणा चांह़दा था।

तीतुस 2:14

जेह्ड़ा अप्पु अहां तांई सूल़िया पर चढ़ी गिया, कि अहां जो हर किस्मा दिया बुराईया ते छड्डाई लैं, कने पापां ते सुद्ध करी नैं अप्पु तांई इक्क ऐदई प्रजा बणां जेह्ड़ी खरे कम्मां तांई पूरे जोशे नैं हमेसा त्यार रैंह्।

इब्रानियों 2:5

परमात्मैं तिस ओणे आल़े संसारे जो, जिसदे बारे च अहां ग्लांदे हन, सुअर्गदूतां जो नीं, अपर प्रभु यीशु मसीह जो हक्क दित्या ऐ।

इब्रानियों 6:5

कने तिन्हां परमात्मे दे पास्से ते ओणे आल़े संदेसे जो मसूस कित्ता ऐ, जेह्ड़ा खरा ऐ, कने तिन्हां ओणे आल़े बग्ते दिया सामर्थी जो भी मसूस कित्ता ऐ।

इब्रानियों 9:14

तां मसीह दा खून, जिन्हीं अपणे आप्पे जो सदा जिन्दा रैहणे आल़ी आत्मा दे जरिये परमात्मे सामणै बेकसूर बल़िया दे रूपे च चढ़ाई दित्ता, जिन्दे परमात्मे दी सेवा करणे तांई अहां दे जमीरे जो पापी कम्मां ते क्जो नीं सुद्ध करगा?

याकूब 4:4

हे बेबसुआसी लोको, तुहां नीं जाणदे कि संसारे नैं मित्र चारा रखणे ते परमात्मे नैं बैर रखणा ऐ? इसतांई जे कोई संसारे दा मित्र बणना चांह़दा ऐ, तां सैह़ अपणे आप्पे जो परमात्मे दा बैरी बणांदा ऐ।

1 पतरस 2:24

मसीयैं सूल़िया पर अप्पु ई अपणे सरीरे च अहां दे पाप लेई लै, तांजे अहां पापां तांई मरी नैं धार्मिकता तांई ज़िन्दगी जीन, कने तिसदे ई जख्मां दे जरिये अहां खरे होये।

1 पतरस 3:18

मैं एह़ ग्लांदा ऐ, कि यीशु मसीयैं भी अहां दे पापां तांई दुख झेलेया कने मारा गेआ, सैह़ सिर्फ इक्क बरी ई मरेया, कने एह़ दुवारी भिरी करणे दी जरूरत नीं ऐ। सैह़ धर्मी माणु था जेह्ड़ा पापी लोकां तांई मरेया, तांजे तिन्हां जो परमात्मे नेड़े लेई औयें तिन्हां तिसदे सरीरे जो मारेया अपर सैह़ पवित्र आत्मा दिया सामर्थी दे जरिये दुवारी भिरी जिन्दा होई गेआ।

1 यूहन्ना 2:2

कने तिन्हीं ई अहां दे पापां दी माफी तांई बलिदान दित्या ऐ, कने सिर्फ अहां तांई नीं अपर सारे संसारे दे लोकां दे पापां तांई भी।

1 यूहन्ना 3:16

अहां प्यार इसते जाणेया, कि यीशु मसीयैं अहां तांई अपणे प्राण देई दित्ते; इसतांई अहां जो भी भाऊआं तांई अपणे प्राण दैणा चाइदे।

प्रकाशितवाक्य 1:5

कने यीशु मसीह दे पास्से ते जेह्ड़ा बसुआसे जोग्गा गवाह कने मरेयां ते जिन्दा होणे आल़ेआं च जेठा कने धरतिया दे राजेयां दा हाकम ऐ, तुहां जो अनुग्रह कने सांति मिलदी रैंह्। जेह्ड़ा अहां नैं प्यार रखदा ऐ, कने तिन्हीं अपणे खूने दे जरिये अहां जो पापां ते छड्डाया ऐ।

प्रकाशितवाक्य 5:9

सैह़ एह़ नौआं गीत गा थे, “इसा कताब जो लैणे दा, कने इसा दियां सील्लां खोलणे दा हक्क तिज्जो अल्ल ऐ, क्जोकि तू इक्क मेम्ने साइआं बलिदान होई करी अपणे खूने नैं हर इक्क गोत्र, भासा, देस कने जातिया ते परमात्मे तांई लोकां जो खरीदी लेआ ऐ;

प्रकाशितवाक्य 7:9

इसते बाद मैं दिख्या, कि लोकां दी इतणी बड्डी भीड़ थी, कने कोई भी तिसा जो गिणी नीं सकदा था, तिसा भीड़ा च हर इक्क देस, गोत्र, जाति कने भासा दे लोक थे, कने सैह़ चिट्टे कपड़े पैहनी करी कने अपणे हत्थां च खजूरे दियां डाल़िआं लेई करी सिंहासणे सामणै कने मेम्ने सामणै खड़ोत्यो थे।