इफिसियों 1:11 - काँगड़ी

¹¹ इसते अलावा क्जोकि अहां मसीह सौगी इक्क हन, अहां जो परमात्मे दे पास्से ते विरासत मिलियो ऐ। क्जोकि तिन्हीं अहां जो पैहल्ले ते चुणी लेआ ऐ, कने तिसदिया मर्जिया मताबक ई सारियां चीज्जां कम्म करदियां हन।

इफिसियों 1:11 Iomraidhean Croise

प्रेरितां दे कम्म 13:48

एह़ सुणी करी होर जातिआं खुस होईयां, कने परमात्मे दे वचन दी महिमा करणा लग्गे; कने जितणे भी सदा दी ज़िन्दगिया तांई ठैहराये गियो थे, तिन्हां बसुआस कित्ता।

प्रेरितां दे कम्म 2:23

तिसी यीशुये जो, जेह्ड़ा परमात्मे दी बणाई होई योजना कने पैहल्ले दे ज्ञानां मताबक पकड़ुवाया गेआ। तुहां अधर्मियां दे हत्थां नैं सूल़िया पर टुंगी करी मारी दित्ता।

प्रेरितां दे कम्म 20:27

क्जोकि मैं परमात्मे दे सारे मकसद तुहां जो खुली नैं कने पूरे तरीके नैं दस्सी दित्ते।

प्रेरितां दे कम्म 20:32

हुण मैं तुहां जो परमात्मे कने तिसदे अनुग्रह दे वचन दी देखभाल च हुआले करा दा ऐ, जिस च तुहां दी तरक्की कने तुहां जो तिन्हां सबना सौगी विरासत देई सकदा ऐ, जेह्ड़े प्रभु तांई अलग कित्यो हन।

प्रेरितां दे कम्म 26:18

कि तिन्हां दी अखीं खोलणे, कने नेहरे ते कड्डी करी जोतिया च कने सैताने दे हक्के ते परमात्मे दे राज्जे च लेई ओन। कि सैह़ पापां ते माफी पाई सकन, कने तिन्हां सामणै आई जान, जेह्ड़े मिन्जो च बसुआस दे जरिये परमात्मे तांई लग्ग कित्यो हन।’

प्रेरितां दे कम्म 4:28

कि जेह्ड़ा कुच्छ पैहल्ले ते तेरिया समर्था नैं कने इच्छा दे मताबक पक्का होई चुकेया था सैई होयैं।

रोमियो 11:34

“भला कुण जाणी सकदा ऐ परमात्मे दे मने जो? या कुण बणी सकदा ऐ, तिसदा सलाहकार?

रोमियो 8:17

कने जे अहां औलाद हन, तां वारस भी, अपर परमात्मे दे वारस कने मसीह दे संगी वारस हन, जाह़लू अहां तिस सौगी दुख झेलन तां तिस सौगी महिमा भी पान।

रोमियो 8:28

अहां जाणदे हन, कि जेह्ड़े लोक परमात्मे नैं प्यार रखदे हन, तिन्हां तांई सारियां गल्लां मिल्ली नैं भलाई ई पैदा करदियां हन, मतलब तिन्हां ई तांई जेह्ड़े तिसदिया इच्छा दे मताबक चुणेयो हन।

रोमियो 8:29

क्जोकि जिन्हां जो तिन्हीं पैहल्ले ते चुणी लेआ ऐ, तिन्हां दे बारे च ऐदेया इरादा भी करी लेआ ऐ कि तिसदे पुत्तर यीशु मसीह साइआं होन, तांजे यीशु मसीह सारे बसुआसियां च जेठा पुत्तर बणी सकैं।

रोमियो 8:30

भिरी जिन्हां जो परमात्मे पैहल्ले ते चुणेया ऐ, तिन्हां जो सद्देया भी, कने जिन्हां जो तिन्हीं सद्देया ऐ, तिन्हां जो धर्मी बणाया भी, जिन्हां जो तिन्हीं धर्मी बणाया ऐ, तिन्हां जो महिमा भी दित्ती ऐ।

रोमियो 9:11

कने अह्ल्ली तिकर तिन्हां दे दून्नी जागतां दा जन्म भी नीं होएया था, कने तिन्हां तिस बग्त तिकर कोई बुरा या खरा कम्म नीं कित्या था, जाह़लू रिबका नैं एह़ ग्लाया गेआ, “कि जेठा जागत लोक्के जागते दा दास बणगा।” एह़ इसतांई होएया कि परमात्मे दा मकसद तिन्हां दे चुणी लैणे दे मताबक बणी रेह्आ। जेह्ड़ा माणुआं दे कम्मां दिया बज़ाह ते नीं, अपर सदणे आल़े दे फैसले दिया बज़ाह ते ऐ।

गलातियों 3:18

क्जोकि परमात्मैं अहां जो आसीष मूसा दिया व्यबस्था जो मन्नणे दिया बज़ाह ते नीं दित्ती, अपर तिन्हीं अब्राहमे जो एह़ मुफ्ते च दित्ती, क्जोकि परमात्मैं तिस नैं दैणे दा वादा कित्या था।

इफिसियों 1:14

जेह्ड़ा इक्क बयाना ऐ, कने सैह़ जमानत दिंदा ऐ कि परमात्मा अहां जो सैह़ विरासत दिंगा, जिसा जो दैणे दा तिन्हीं अहां नैं वादा कित्या ऐ, कने तिन्हीं अहां जो अपणे लोक होणे तांई खरीदी लेआ, कि तिसदी महिमा तांई स्तुति दी बज़ाह होन।

इफिसियों 1:18

मैं प्रार्थना करदा ऐ, कि परमात्मा तुहां दे मनां जो खोलें, तांजे तुहां तिसदी सदणे दिया आसा जो समझी सकन। जिसते तुहां जाणगे, कि सैह़ आसीषां कितणियां म्हान कने महिमा आल़िआं हन, जिन्हां दा परमात्मे अपणे लोकां सौगी वादा कित्या ऐ,

इफिसियों 1:5

क्जोकि परमात्मे अहां नैं प्यार कित्ता, कने एह़ फैसला कित्ता, कि सैह़ अहां जो यीशु मसीह दे जरिये अपणे बच्चेयां साइआं गोद लैं।

इफिसियों 1:8

जिसियो तिन्हीं सारिया समझा कने ज्ञाने सौगी अहां पर मता सारा कित्ता।

इफिसियों 1:9

क्जोकि तिन्हीं अपणिया इच्छा दा भेत अहां पर अपणे खरे मकसदे मताबक प्रगट कित्ता, जिसदी नीई तिन्हीं अप्पु ई मसीह च रखी।

इफिसियों 3:11

परमात्मे इसदी योजना सृष्टिया जो बणाणे ते पैहल्ले कित्तियो थी, जिसा जो तिन्हीं प्रभु यीशु मसीह दे जरिये पूरा कित्ता।

कुलुस्सियों 1:12

तुहां लोक लगातार पिता परमात्मे दा धन्यावाद करदे रेह्आ, जिन्हीं अहां जो इस जोग्गा बणाया, कि जोत्ती दे राज्जे च परमात्मे लोकां सौगी विरासता च हिस्सेदार होन।

कुलुस्सियों 3:24

क्जोकि तुहां जाणदे हन, कि तुहां जो इसदे बदले प्रभुये ते इनाम मिलगा। तुहां प्रभु यीशु मसीह दी सेवा करदे हन।

तीतुस 2:14

जेह्ड़ा अप्पु अहां तांई सूल़िया पर चढ़ी गिया, कि अहां जो हर किस्मा दिया बुराईया ते छड्डाई लैं, कने पापां ते सुद्ध करी नैं अप्पु तांई इक्क ऐदई प्रजा बणां जेह्ड़ी खरे कम्मां तांई पूरे जोशे नैं हमेसा त्यार रैंह्।

तीतुस 3:7

जिसते अहां तिसदे अनुग्रह दे जरिये धर्मी बणी करी सदा दी ज़िन्दगिया दी आसा दे मताबक हक्कदार बणन।

इब्रानियों 6:17

इसतांई परमात्मैं भी कसम खादी। इआं करणे ते सैह़ लोकां जो जिन्हां सौगी वादा कित्या था, तिन्हां जो दस्सणा चांह़दा था, जेह्ड़ा वादा तिन्हीं तिन्हां नैं कित्या था, तिसियो पूरा करगा।

याकूब 2:5

हे प्यारे साथी बसुआसियो, सुणा। क्या परमात्मैं इस संसारे दे गरीबां जो नीं चुणेया कि सैह़ बसुआसे च अमीर, कने तिस राज्जे दे अधिकारी बणन, जेह्ड़ा वादा परमात्मे तिन्हां नैं कित्ता ऐ, जेह्ड़े तिस नैं प्यार रखदे हन?

1 पतरस 1:4

ग्लाणे दा मतलब ऐ कि जेह्ड़ियां चीज्जां तुहां तांई सुअर्गे च रखियां हन, सैह़ ना तां कदी खराब, ना नास, कने ना गायब हुंगिया;

1 पतरस 3:9

बुराईया दे बदले बुराई मत करा कने ना गाल़ी दे बदले गाल़ी देआ; अपर इसदे बदले आसीष ई देआ, क्जोकि परमात्मे तुहां जो इसतांई सद्देया ऐ, कि तुहां दूयेयां जो आसीष देई सकन, जे तुहां इआं करदे हन, तां परमात्मा तुहां जो आसीष दिंगा।