2 तीमुथियुस 4:18 - काँगड़ी

¹⁸ कने प्रभु मिन्जो हर इक्क बुरे कम्मां ते छड्डांदा ऐ, कने अपणे सुअर्गीय राज्जे च मिन्जो सम्भाल़ी नैं पज्जांगा। तिसदी महिमा जुगा-जुग हुंदी रैंह्। आमीन।

2 तीमुथियुस 4:18 Iomraidhean Croise

मत्ती 13:43

तिस बग्त धर्मी माणु अपणे पिता दे राज्जे च सूरजे साइआं चमकगे। जेह्ड़े समझी सकदे हन, तिसियो ध्याने नैं सुणन कने मन्नी भी लैन।

मत्ती 25:34

ताह़लू मैं जेह्ड़ा राजा ऐ, अपणे सज्जे पास्से आल़ेआं नैं ग्लांगा, ‘हे मेरे पिता दे धन लोको, ओआ, तिस राज्जे दे अधिकारी होई जा, जेह्ड़ा संसारे दे सुरू ते लेई नैं तुहां तांई त्यार कित्या ऐ।

मत्ती 6:13

कने अहां जो परीक्षा च मत पा, अपर दुष्ट सैताने ते बचा। (क्जोकि राज्ज, शक्ति कने महिमा सदा तेरे ई हन।’ आमीन।)

लूका 11:4

कने अहां दे पापां जो माफ कर, क्जोकि अहां भी अपणे हर इक्की अपराधियै जो माफ करदे हन, कने अहां जो परीक्षा च मत पा’।”

लूका 12:32

“हे भेड्डां साइआं झुंड, मत डर; क्जोकि तुहां दे पिता परमात्मे तुहां जो राज्ज दैणे दी दया कित्ती ऐ।

लूका 22:29

कने जिंआं मेरे पितैं मेरे तांई इक्क राज्ज ठैहराया ऐ, तिंआं ई मैं तुहां तांई ठैहरांदा ऐ,

यूहन्ना 17:15

मैं एह़ विणती नीं करदा ऐ, कि तू तिन्हां जो संसारे ते चुक्की लेआ, अपर एह़ कि तिन्हां जो तिस सैताने ते बचाई रख।

रोमियो 11:36

क्जोकि सारी चीज्जां परमात्मे दे पास्से ते हन। तिन्हीं सब कुच्छ बणाया ऐ, कने तिस तांई सब कुच्छ ऐ। तिसदी महिमा जुगा-जुग हुंदी रैंह्। आमीन।

रोमियो 16:27

यीशु मसीह दे जरिये तिस इकमात्र अक्लमंद परमात्मे दी महिमा जुगा-जुग हुंदी रैंह्। आमीन।

1 कुरिन्थियों 1:21

क्जोकि परमात्मे अपणे ज्ञाने मताबक एह़ दिख्या ऐ, कि एह़ संसार माणुये दे ज्ञाने दे जरिये तिसियो नीं जाणी सकदा, तिन्हीं अहां दे सुसमाचारे दे प्रचारे जो तिन्हां लोकां दे उद्धारे तांई इस्तेमाल कित्ता, जेह्ड़े बसुआस करदे हन, हलांकि कुच्छ इसियो मूर्खता दी गल्ल समझदे हन।

1 कुरिन्थियों 10:13

तुहां कुसी ऐदई परीक्षा च नीं पै, जेह्ड़ी माणुये दे झेलणे ते बाहर ऐ। परमात्मा सच्चा ऐ कने सैह़ तुहां जो सामर्थ ते बाहर परीक्षा च नीं पोणा दिंगा, अपर परीक्षा ते बाहर निकल़णे दा रस्ता कड्डगा कि तुहां झेली सकन।

1 कुरिन्थियों 15:50

हे मेरे प्यारे साथी बसुआसियो, मैं एह़ ग्लांदा ऐ, कि अहां दे धरतिया दे सरीर जेह्ड़े मांस कने खूने नैं बणोयो हन, सैह़ परमात्मे दे राज्जे च नीं रेई सकदे, इसदा मतलब एह़ ऐ कि एह़ सरीर नास होई जांदे हन, क्जोकि सुअर्गे च मौत्त ऐ ई नीं।

2 कुरिन्थियों 1:10

तिन्हीं अहां जो मौत्ती दे देहय् बड्डे खतरे ते बचाया, कने बचांदा भी ऐ। कने तिस पर अहां दा एह़ बसुआस ऐ, कि सैह़ गांह भी बचांदा रैंह्गा।

गलातियों 1:5

तिसदी स्तुति कने बड़ेयाई जुगा-जुग हुंदी रैंह्। आमीन।

1 थिस्सलुनीकियों 5:23

परमात्मा जेह्ड़ा सांति दिंदा ऐ, सैई तुहां जो पूरे तरीके नैं पवित्र करगा। कने तुहां दिया आत्मा, प्राण, कने सरीर अहां दे प्रभु यीशु मसीह दे बापस ओणे तिकर पूरी रीतिया नैं बेकसूर कने सम्भाल़ी नैं रखगा।

2 थिस्सलुनीकियों 3:3

अपर तुहां प्रभु पर पूरा बसुआस करी सकदे हन; सैह़ तुहां जो आत्मिक रीतिया नैं मजबूत करगा कने तिस सैताने ते बचाई नैं रखगा।

1 तीमुथियुस 1:17

हुण सदा काल तिकर राज्ज करणे आल़ा राजा मतलब सदा जिन्दा रैहणे आल़ा, जिसियो कोई नीं दिक्खी सकदा कने इकलौते परमात्मे दा आदर कने महिमा जुगा-जुग हुंदी रैंह्। आमीन।

1 तीमुथियुस 6:16

कने सिर्फ सैई ऐ, जेह्ड़ा हमेसा जिन्दा रैंह्दा ऐ, कने सैह़ बड़ी तेज जोत्ती च रैंह्दा ऐ, कि कोई तिसदे नेड़े नीं जाई सकदा, कने ना तिसियो कुणी माणुये दिख्या कने ना कदी दिक्खी सकदा ऐ। तिसदी महिमा कने सामर्थ हमेसा तांई रैंह्गी। आमीन।

2 तीमुथियुस 1:12

इस सुसमाचारे दिया बज़ाह ते मैं ऐत्थु जेला च भी इन्हां दुखां जो झेला दा ऐ, अपर भिरी भी सर्मांदा नीं, क्जोकि मैं मसीह जो जाणदा ऐ; जिस पर मैं बसुआस कित्या ऐ, कने मिन्जो पक्का पता ऐ कि ताह़लू तिकर सैह़ मेरे इस सुसमाचारे दी रखवाल़ी करी सकदा ऐ, जाह़लू तिकर सैह़ बापस नीं ओंदा।

2 तीमुथियुस 4:1

जाह़लू प्रभु यीशु मसीह राजे साइआं राज्ज करणे ओंगा, तां सैह़ जिन्दे कने मरेयां दा न्याय करदा ऐ। मैं परमात्मे सौगी कने मसीह जो गवाह मन्नी करी तुहां नैं विणती करदा ऐ,

इब्रानियों 11:16

अपर सैह़ इक्क खरे मतलब सुअर्गे दे देसे दी आसा करदे थे। इसतांई परमात्मा तिन्हां दा परमात्मा ग्लाणे च खुस हुंदा था, क्जोकि तिन्हीं तिन्हां तांई इक्क सैहर त्यार कित्या ऐ।

इब्रानियों 12:22

तुहां लोक सिय्योने दे प्हाड़े दे बक्खे पुज्जे हन, जेह्ड़ा जिन्दे परमात्मे दा सैहर ऐ। एह़ सैह़ सुअर्गीय यरूशलेम ऐ, जित्थु लखां सुअर्गदूत खुसिया दा त्योहार मनांदे हन।

इब्रानियों 13:21

परमात्मा तुहां जो हर इक्क खरिया गल्ला च सिद्ध करैं, जिसते तुहां तिसदी इच्छा पूरी करन, कने जेह्ड़ा कुच्छ तिसियो खरा लगदा ऐ, तिसियो यीशु मसीह दे जरिये अहां च पूरा करैं। जिसदी महिमा जुगा-जुग हुंदी रैंह्। आमीन।

याकूब 2:5

हे प्यारे साथी बसुआसियो, सुणा। क्या परमात्मैं इस संसारे दे गरीबां जो नीं चुणेया कि सैह़ बसुआसे च अमीर, कने तिस राज्जे दे अधिकारी बणन, जेह्ड़ा वादा परमात्मे तिन्हां नैं कित्ता ऐ, जेह्ड़े तिस नैं प्यार रखदे हन?

1 पतरस 1:5

कने तुहां दे बसुआसे दिया बज़ाह ते परमात्मा तुहां जो अपणी सामर्थी दे जरिये ताह़लू तिकर बचा दा ऐ, जाह़लू तिकर तुहां तिस उद्धारे जो हासल नीं करी लैन, जेह्ड़ा तिस आखरी दिने जो प्रगट होणे तांई त्यार ऐ, तांजे सारे तिसियो दिक्खी सकन।

1 पतरस 5:11

सैह़ हमेसा अपणिया सामर्थी नैं राज्ज करगा। आमीन।

2 पतरस 1:11

कने इस तरीके नैं तुहां अहां दे प्रभु कने उद्धार करणे आल़े यीशु मसीह दे सदा दे राज्जे च बड़े आदरे सौगी दाखल हुंगे।

2 पतरस 3:18

अपर तुहां अहां दे प्रभु, कने उद्धार करणे आल़े यीशु मसीह दे अनुग्रह कने ज्ञाने च बधदे जा। तिसदी महिमा हुण भी होयैं, कने जुगा-जुग हुंदी रैंह्। आमीन।

यहूदा 1:1

मैं यहूदा जेह्ड़ा यीशु मसीह दा दास कने याकूबे दा लोक्का भाऊ ऐ, मैं एह़ चिठ्ठी तिन्हां लोकां दे नांऐ पर लिखा दा ऐ, जेह्ड़े परमात्मे दे जरिये तिस च बसुआस करणे तांई सद्देयो हन। अहां दा पिता परमात्मा तुहां नैं प्यार करदा ऐ कने यीशु मसीह दे जरिये तुहां जो बचांदा ऐ।