2 तीमुथियुस 3:6 - काँगड़ी

⁶ क्जोकि इन्हां च कुच्छ लोक ऐदेय भी हन जेह्ड़े लोकां दे घरां च गुप चुप जाई नैं मूर्ख जणासां जो बसे च करी लैंदे हन, जिन्हां दे मन पापां दे थल्लैं दबोयो हन कने हर किस्मां दियां इच्छां दे बसे च हन।

2 तीमुथियुस 3:6 Iomraidhean Croise

मत्ती 11:28

“हे सारे मेहनत करणे आल़ेयो कने थके मान्दे लोको, मिन्जो अल्ल ओआ; मैं तुहां जो अराम दिंगा।

मत्ती 23:13

“हे पाखंडी सास्त्री कने फरीसी माणुओ, तुहां पर हाय। तुहां माणुआं तांई सुअर्गे दे राज्जे दा रस्ता बंद करदे हन, ना तां तुहां अप्पु तिस च जांदे हन कने ना तिस च जाणे आल़ेआं जो जाणा दिंदे।

मत्ती 23:14

हे पाखंडी सास्त्री कने फरीसी माणुओ, तुहां पर हाय। तुहां बिधवां दे घरां जो चलाकिया नैं हड़पी लेई जांदे हन, कने दस्सणे तांई लमियां-लमियां प्रार्थना करदे हन। इसतांई तुहां जो मती सज़ा मिलणी ऐ।

मत्ती 4:24

कने सारे सीरिया प्रदेसे च तिसदा नां फैलदा गेआ; कने लोक सारे बमारां जो, जेह्ड़े कई किस्मां दियां बमारियां कने दुखां च जकड़ुयो थे, कने जिन्हां च दुष्टआत्मां थियां, कने मिर्गी आल़ेआं कने अधरंगे दे रोगियां जो तिस अल्ल लेई आये कने तिन्हीं तिन्हां जो खरा कित्ता।

मरकुस 4:19

अपर संसार दी फिकर, कने धन दौलत कने दूईआं चीज्जां दा लालच वचने जो दबाई दिंदा ऐ। कने सैह़ आत्मिक फल़ पाणे च नाकामयाब होई जांदे हन।

1 कुरिन्थियों 12:2

तुहां जाणदे हन कि जाह़लू तुहां मसीह पर बसुआस नीं करदे थे, तां कोई तुहां जो गूंगी मूर्तियां दे पचांह़ चलणे कने तिन्हां दी अराधना करणे तांई भटकाई दिंदा था।

1 तीमुथियुस 5:6

अपर जेह्ड़ी बिधवा भोग बलासे तांई ज़िन्दगी जींदी ऐ, सैह़ मरेयो माणुये साइआं ऐ, हलांकि सैह़ बिधवा जिन्दा ऐ।

1 तीमुथियुस 6:9

अपर जेह्ड़े लोक अमीर होणा चांह़दे हन, सैह़ ऐदई परीक्षा कने फंदे कने बड़ियां नकसान करणे आल़िआं इच्छां च जानवरां साइआं फंसदे हन, जेह्ड़ियां माणुआं जो बिगाड़ी कने पूरे तरीके नैं नास करी दिंदियां हन।

तीतुस 1:11

ऐदेयां लोकां जो सिक्षा दैणे दी इजाजत मत देआ, क्जोकि जाह़लू सैह़ ऐदई सिक्षा दिंदे हन, जेह्ड़ी तिन्हां जो नीं दैणी चाइदी, क्जोकि एह़ लोक सारे परवारां दा बसुआस नास करदे हन, सैह़ एह़ तां करदे हन कि पैसा हासल करी सकन।

तीतुस 3:3

क्जोकि अहां भी पैहल्ले मूर्ख, कने परमात्मे दे हुक्म जो नीं मन्नणे आल़े, कने लोकां ते धोखा खाणे आल़े, कने बुरी इच्छां च, संसारिक चीज्जां दिया गुलामिया च पैयो थे, बैरभाव, जल़ण करणे च ज़िन्दगी जींदे थे, लोकां नैं नफरत करदे थे कने इक्की दूये नैं बैर रखदे थे।

2 पतरस 2:18

एह़ घमंडे नैं भरोईयां बेकार दियां गल्लां नैं तिन्हां लोकां जो लुचपण दे कम्मां दे जरिये सरीरे दियां इच्छां च फंसाई लैंदे हन, जेह्ड़े रस्ते ते भटकेयां लोकां ते बाल-बाल बची करी निकल़ी आएयो हन।

2 पतरस 3:17

इसतांई हे मेरे प्यारे साथी बसुआसियो, तुहां लोक पैहल्ले ते ई जाणदे हन कि एह़ सारियां गल्लां हुंगियां, इसतांई चौकन्ने रेह्आ, तांजे सैह़ लोक जेह्ड़े व्यबस्था जो नीं मनदे झूठ ग्लाई नैं तुहां जो रस्ते ते नीं भटकाई दैंन, कुत्थी इआं ना होयैं कि तुहां तिन्हां पचांह़ चलदे-चलदे तिसा सच्चाईया पर बसुआस करणा छड्डी दैंन।

यहूदा 1:16

एह़ लोक हमेसा परमात्मे दे खलाफ ग्लांदे हन, कने दूयेयां लोकां च खोट कड्डदे हन, सैह़ हमेसा तिन्हां बुरे कम्मां जो करदे हन, जिन्हां जो सैह़ करणा चांह़दे हन। कने सैह़ अपणे फायदे तांई दूयेयां लोकां सौगी चापलूसियां दियां गल्लां करदे हन।

यहूदा 1:18

सैह़ तुहां नैं ग्लांदे थे, “अहां दे प्रभु यीशु मसीह दे बापस ओणे ते पैहल्ले, ऐदेय लोक हुंगे, प्रभु दा कने तिसदे लोकां दा मजाक डुआंगे। एह़ सैह़ लोक हन, जिन्हां दियां ज़िन्दगियां तिन्हां दियां अपणियां बुरिआं इच्छां दे बसे च हन।”

यहूदा 1:4

मैं तिज्जो एह़ लिखा दा ऐ कि कुच्छ झूठे सिक्षक अहां सौगी मिल्ली गियो हन, जिन्हां दे बारे च परमात्मे बड़ी पैहल्ले ते ई पवित्रशास्त्रे च ग्लाई दित्या था, कि सैह़ तिन्हां जो सज़ा दिंगा। तिन्हां परमात्मे दे प्यारे दे सुसमाचारे जो कने अनुग्रह जो बगाड़ी करी नाजायज रिस्तेयां दे कम्मां च बदली दित्या ऐ। सैह़ यीशु मसीह दा भी इन्कार करदे हन, जेह्ड़ा अहां दा इक्को ई मालक कने प्रभु ऐ।