2 तीमुथियुस 1:9 - काँगड़ी

⁹ जिन्हीं अहां दा उद्धार कित्ता कने पवित्र ज़िन्दगी जीणे तांई अहां जो सद्देया। अहां दे खरेया कम्मां दिया बज़ाह ते तिन्हीं अहां जो नीं सद्देया, अपर अपणे मकसदे कने तिस अनुग्रह मताबक सद्देया ऐ, जिसदी योजना परमात्मे पैहल्ले ते ई यीशु मसीह जो इस संसारे च घल्लणे दे जरिये बणाईयो थी,

2 तीमुथियुस 1:9 Iomraidhean Croise

मत्ती 1:21

सैह़ जागत जम्मगी कने तू तिसदा नां यीशु रखेयां क्जोकि सैह़ अपणे लोकां दा तिन्हां दे पापां ते उद्धार करगा।”

लूका 10:21

तिसा घड़िया सैह़ पवित्र आत्मा च होई नैं खुसिया कने भरोई गेआ, कने ग्लाणा लग्गा, “हे पिता, सुअर्ग कने धरतिया दे प्रभु, मैं तेरा धन्यावाद करदा ऐ, कि तैं इन्हां गल्लां जो अक्लमंद कने समझदार माणुआं ते छुपाई नैं रखेया, कने जागतां पर प्रगट कित्ता। हाँ, हे पिता, क्जोकि तुहां जो ऐई खरा लग्गा।

यूहन्ना 17:24

हे पिता, मैं चांह़दा कि जिन्हां जो तैं मिन्जो दित्या ऐ, जित्थु मैं ऐ तित्थु सैह़ भी मिन्जो सौगी होन, कि सैह़ मेरी तिसा महिमा जो दिक्खन जेह्ड़ी तैं मिन्जो दित्ती ऐ, क्जोकि तैं संसारे दी सृष्टिया ते पैहल्ले मिन्जो नैं प्यार रखेया।

यूहन्ना 17:9

मैं तिन्हां तांई विणती करदा ऐ, जिन्हां जो तैं मिन्जो दित्या ऐ, क्जोकि सैह़ तेरे हन; अपर संसारे दे लोकां तांई विणती नीं करदा जेह्ड़े संसारे दे हन,

यूहन्ना 6:37

जेह्ड़ा कुच्छ पिता मिन्जो दिंदा ऐ, सैह़ सब कुच्छ मिन्जो अल्ल ओंगा, कने जेह्ड़ा कोई मिन्जो अल्ल ओंगा तिसियो मैं अप्पु सौगी रखगा।

प्रेरितां दे कम्म 15:18

एह़ सैई प्रभु ग्लांदा ऐ जेह्ड़ा संसारे दी सृष्टिया ते इन्हां गल्लां दा समाचार दिंदा आया ऐ।’

प्रेरितां दे कम्म 2:47

कने परमात्मे दी स्तुति करदे थे, कने सारे लोक तिन्हां ते खुस थे; कने जेह्ड़ा उद्धार पांदे थे, तिन्हां जो प्रभु हर रोज तिन्हां च मिल्लाई दिंदा था।

रोमियो 11:14

तांजे कुस तरीके नैं मैं अपणी जाति दे लोकां च जल़ण पैदा करवाई नैं तिन्हां च कईआं दा उद्धार करवां।

रोमियो 11:29

क्जोकि परमात्मा ना तां अपणे वरदान बापस लैंदा कने ना बुलाहटा ते अपणे मने बदलदा ऐ।

रोमियो 16:25

हुण तुहां जो मेरा सुसमाचार जेह्ड़ा यीशु मसीह दे बारे च ऐ, तुहां जो प्रचार करी नैं बसुआसे च मजबूत करी सकदा ऐ। क्जोकि एह़ सुसमाचार सदियां ते छुपाई करी रखेया था।

रोमियो 3:20

क्जोकि मूसा दिया व्यबस्था जो मन्नणे दे जरिये कोई भी माणु तिस सामणै धर्मी साबित नीं हुंगा, क्जोकि व्यबस्था अहां जो साफ-साफ दस्सदी ऐ कि अहां पापी हन।

रोमियो 9:11

कने अह्ल्ली तिकर तिन्हां दे दून्नी जागतां दा जन्म भी नीं होएया था, कने तिन्हां तिस बग्त तिकर कोई बुरा या खरा कम्म नीं कित्या था, जाह़लू रिबका नैं एह़ ग्लाया गेआ, “कि जेठा जागत लोक्के जागते दा दास बणगा।” एह़ इसतांई होएया कि परमात्मे दा मकसद तिन्हां दे चुणी लैणे दे मताबक बणी रेह्आ। जेह्ड़ा माणुआं दे कम्मां दिया बज़ाह ते नीं, अपर सदणे आल़े दे फैसले दिया बज़ाह ते ऐ।

रोमियो 9:24

मतलब दया दे भांडे अहां लोक हन, जिन्हां जो तिन्हीं ना सिर्फ यहूदियां ते, अपर होरनी जातिआं ते भी चुणेया।

1 कुरिन्थियों 1:18

क्जोकि जेह्ड़े लोक परमात्मे दिया सज़ा तांई तिसते लग्ग कित्ते जांगे, तिन्हां तांई सूल़िया दा सुसमाचार कोई मायने नीं रखदा, अपर अहां उद्धार पाणे आल़ेआं तांई एह़ परमात्मे दी सामर्थ ऐ।

इफिसियों 1:11

इसते अलावा क्जोकि अहां मसीह सौगी इक्क हन, अहां जो परमात्मे दे पास्से ते विरासत मिलियो ऐ। क्जोकि तिन्हीं अहां जो पैहल्ले ते चुणी लेआ ऐ, कने तिसदिया मर्जिया मताबक ई सारियां चीज्जां कम्म करदियां हन।

इफिसियों 1:9

क्जोकि तिन्हीं अपणिया इच्छा दा भेत अहां पर अपणे खरे मकसदे मताबक प्रगट कित्ता, जिसदी नीई तिन्हीं अप्पु ई मसीह च रखी।

इफिसियों 2:5

जाह़लू अहां अपराधां दिया बज़ाह ते मरेयो थे तां तिन्हीं अहां जो अहां दे मसीह सौगी रिस्ते दिया बज़ाह ते सदा दी ज़िन्दगी हासल करणे जोग्गा बणाया। (परमात्मे दे अनुग्रह ते ई तुहां दा उद्धार होएया ऐ),

इफिसियों 3:11

परमात्मे इसदी योजना सृष्टिया जो बणाणे ते पैहल्ले कित्तियो थी, जिसा जो तिन्हीं प्रभु यीशु मसीह दे जरिये पूरा कित्ता।

फिलिप्पियों 3:14

मैं लक्ष्य दे पास्से दौड़दा चली जांदा ऐ, तांजे सुअर्गीय इनाम पाई सकैं, जिस तांई परमात्मैं मिन्जो यीशु मसीह दे जरिये सुअर्गे जो सद्देया ऐ।

1 थिस्सलुनीकियों 4:7

क्जोकि परमात्मैं अहां जो असुद्ध ज़िन्दगी जीणे तांई नीं, अपर पवित्र ज़िन्दगी जीणे तांई सद्देया ऐ।

1 तीमुथियुस 1:1

मैं पौलुस जेह्ड़ा अहां दे उद्धार करणे आल़े परमात्मे कने यीशु मसीह जिस पर अहां आसा रखदे हन, तिन्हां दे हक्के दे जरिये यीशु मसीह दा प्रेरित ऐ, तुहां जो एह़ चिठ्ठी लिखा दा ऐ।

2 तीमुथियुस 1:1

मैं पौलुस जेह्ड़ा परमात्मे दी इच्छा ते यीशु मसीह दा प्रेरित ऐ; कने तिसा सदा दी ज़िन्दगिया दे वादे मताबक जेह्ड़ी यीशु मसीह पर बसुआस करणे दे जरिये मिलदी ऐ।

तीतुस 1:2

तिसा सदा दी ज़िन्दगिया दिया आसा पर जिसदा वादा परमात्मैं जेह्ड़ा झूठ नीं ग्लाई सकदा, बड़ी पैहल्ले ते कित्या ऐ।

इब्रानियों 3:1

इसतांई हे प्यारे साथी बसुआसियो, तुहां परमात्मे नैं मिलणे तांई सद्देयो गै हन, यीशु पर ध्यान देआ, जेह्ड़ा अहां तांई परमात्मे दा संदेस लेई करी ओणे आल़ा दूत कने महायाजक ऐ।

1 पतरस 1:20

इस संसारे जो बणाणे ते पैहल्ले ई परमात्मे यीशु मसीह दे बारे एह़ फैसला पैहल्ले ई करी लेआ, कि सैह़ इस संसारे दा उद्धारकर्ता हुंगा, अपर सैह़ हुण इन्हां आखरी दिनां च तुहां तांई प्रगट होएया।

1 पतरस 2:9

अपर तुहां इन्हां साइआं नीं हन, क्जोकि तुहां इक्क चुणेया वंश, साही परवार, याजकां दा समाज, पवित्र लोक, कने परमात्मे दे खास लोक हन, क्जोकि तिन्हीं तुहां जो नेहरे ते सद्दी करी जोतिया च लंदेया ऐ, तांजे तुहां परमात्मे दे म्हान कम्मां जो दस्सी सकन।

प्रकाशितवाक्य 13:8

संसारे दे लोक तिस जंगली जानवरे दी पूजा करगे। सैह़ सारे लोक जिन्हां दे नां सृष्टिया दे सुरू होणे ते ई तिस मेम्ने दिया ज़िन्दगिया दिया कताबा च लिखे नीं गै, जिसदा बलिदान कित्या था।

प्रकाशितवाक्य 17:8

जेह्ड़ा जंगली जानवर तैं दिख्या ऐ, सैह़ पैहल्लैं तां था पर हुण नीं ऐ, कने अथाह कुंडे ते निकल़ी करी विनाशे च पोंगा; कने संसारे दे लोक जिन्हां दे नां सृष्टिया दे सुरू होणे दे बग्ते ते तिसा ज़िन्दगिया दिया कताबा च लिखे नीं गै, इस जंगली जानवरे दी एह़ हालत दिक्खी करी कि पैहल्ले था कने हुण नीं ऐ कने भिरी आई जांगा, हरान हुंगे।