1 तीमुथियुस 6:16 - काँगड़ी

¹⁶ कने सिर्फ सैई ऐ, जेह्ड़ा हमेसा जिन्दा रैंह्दा ऐ, कने सैह़ बड़ी तेज जोत्ती च रैंह्दा ऐ, कि कोई तिसदे नेड़े नीं जाई सकदा, कने ना तिसियो कुणी माणुये दिख्या कने ना कदी दिक्खी सकदा ऐ। तिसदी महिमा कने सामर्थ हमेसा तांई रैंह्गी। आमीन।

1 तीमुथियुस 6:16 Iomraidhean Croise

यूहन्ना 1:18

परमात्मे जो कदी कुणी नीं दिख्या, सिर्फ तिसदे इकलौते पुत्तरें जेह्ड़ा अप्पु ई परमात्मा ऐ, कने अपणे पिता दिया गोदी च बैठेया ऐ, कने तिन्हीं परमात्मे जो प्रगट कित्ता।

यूहन्ना 14:9

यीशुयैं तिस नैं ग्लाया, “हे फिलिप्पुस, मैं इतणे दिनां ते तुहां सौगी ऐ, कने क्या तू मिन्जो नीं जाणदा? जिन्हीं मिन्जो दिख्या ऐ तिन्हीं पिता जो दिख्या ऐ। तू क्जो ग्ला दा ऐ कि पिता जो अहां जो दस्स?

यूहन्ना 6:46

कुणी भी पिता जो नीं दिख्या ऐ, अपर मैं जेह्ड़ा परमात्मे दे पास्से ते घल्लेया ऐ, सिर्फ मैंई पिता जो दिख्या ऐ।

यूहन्ना 8:58

यीशुयैं तिन्हां नैं ग्लाया, “मैं तुहां नैं सच्च-सच्च ग्लांदा ऐ, कि पैहल्ले इसते कि अब्राहम पैदा हुंदा, मैं ऐ।”

फिलिप्पियों 4:20

अहां दे परमात्मे कने पिता दी महिमा जुगा-जुग हुंदी रैंह्। आमीन।

कुलुस्सियों 1:15

कोई भी परमात्मे जो नीं दिक्खी सकदा, अपर जाह़लू तिसदा पुत्तर माणु दे रूपे च आया, ताह़लू तिन्हीं अपणे आप्पे जो लोकां पर प्रगट कित्ता, कने सैह़ जेठा ऐ कने सारी सृष्टिया पर परम प्रधान ऐ।

1 तीमुथियुस 1:17

हुण सदा काल तिकर राज्ज करणे आल़ा राजा मतलब सदा जिन्दा रैहणे आल़ा, जिसियो कोई नीं दिक्खी सकदा कने इकलौते परमात्मे दा आदर कने महिमा जुगा-जुग हुंदी रैंह्। आमीन।

इब्रानियों 13:8

यीशु मसीह कल कने अज्ज कने जुगा-जुग कदी नीं बदलदा।

याकूब 1:17

क्जोकि हर इक्क खरा वरदान कने हर इक्क बड़ा उत्तम दान परमात्मे दे पास्से ते मिलदा ऐ, जेह्ड़ा जोतियां दा पिता ऐ। कने परमात्मा हमेसा इक्को देहया ई ऐ, कने सैह़ ढोरे साइआं नीं बदलदा।

1 यूहन्ना 1:5

जेह्ड़ा समाचार अहां यीशु मसीह ते सुणेया, कने तुहां जो सणांदे हन, सैह़ एह़ ऐ कि परमात्मा जोत्ती ऐ कने तिस च जरा भी नेहरा नीं।

1 यूहन्ना 1:7

अपर जिंआं परमात्मा जोतिया च ऐ, तिंआं ई अहां भी जोतिया च चलण, तां इक्की दूये नैं संगति रखदे हन, कने तिसदे पुत्तर यीशु मसीह दा खून अहां जो सारे पापां ते सुद्ध करदा ऐ।

1 यूहन्ना 4:12

परमात्मे जो कदी कुणी नीं दिख्या; जे अहां अप्पु च प्यार रखन, तां परमात्मा अहां च बणी रैंह्दा ऐ कने तिसदा प्यार अहां च सिद्ध होई गेआ ऐ।

यहूदा 1:25

सिर्फ सैई इक्क परमात्मा ऐ, जिन्हीं अहां जो प्रभु यीशु मसीह दे जरिये बचाया। अहां दे प्रभु यीशु मसीह दे जरिये लोक परमात्मे जो आदर दैन, कने तिसदी स्तुति करन। सैह़ इसा गल्ला जो भी समझन, कि सुरू ते ई परमात्मे अल्ल सामर्थ कने अधिकार था, कने ऐ, कने हमेसा रैंह्गा। आमीन।

प्रकाशितवाक्य 1:6

कने अहां जो इक्क राज्ज कने अपणे पिता परमात्मे तांई याजक भी बणाई दित्या; तिसदी महिमा कने राज्ज जुगा-जुग रैंह्। आमीन।

प्रकाशितवाक्य 1:8

प्रभु परमात्मा, जेह्ड़ा ऐ कने जेह्ड़ा हमेसा ते था कने जेह्ड़ा ओणे आल़ा ऐ, जेह्ड़ा सर्वशक्तिमान ऐ, एह़ ग्लांदा ऐ, “मैंई अलफा कने ओमेगा ऐ।” जिसदा मतलब सुरुआत कने अन्त ऐ।

प्रकाशितवाक्य 21:3

भिरी मैं सिंहासणे च कुसी जो जोरे नैं एह़ ग्लांदे सुणेया, “दिक्ख, परमात्मे दा डेरा माणुआं दे बिच्च ऐ। सैह़ तिन्हां सौगी डेरा करगा, कने सैह़ तिसदे लोक हुंगे, कने परमात्मा अप्पु तिन्हां सौगी रैंह्गा कने तिन्हां दा परमात्मा हुंगा।

प्रकाशितवाक्य 22:5

भिरी रात नीं हुंगी, कने तिन्हां जो दीय्ये कने सूरजे दी लौई दी जरूरत नीं हुंगी, क्जोकि प्रभु परमात्मा तिन्हां जो लौ करगा, कने सैह़ जुगा-जुग राज्ज करगे।

प्रकाशितवाक्य 4:11

“अहां दे प्रभु कने परमात्मा, तू ई महिमा कने आदर कने सामर्थी जोग्गा ऐ, क्जोकि तैंईं सारियां चीज्जां बणाईयां कने एह़ सारियां तेरिया इच्छा ते बणाईयां कने इन्हां दा बज्जूद था।”

प्रकाशितवाक्य 7:12

“आमीन। अहां दे परमात्मे दी स्तुति, महिमा, ज्ञान, धन्यावाद, आदर, सामर्थ कने ताकत जुगा-जुग बणी रैंह्। आमीन।”