1 तीमुथियुस 5:6 - काँगड़ी

⁶ अपर जेह्ड़ी बिधवा भोग बलासे तांई ज़िन्दगी जींदी ऐ, सैह़ मरेयो माणुये साइआं ऐ, हलांकि सैह़ बिधवा जिन्दा ऐ।

1 तीमुथियुस 5:6 Iomraidhean Croise

मत्ती 8:22

यीशुयैं तिस नैं ग्लाया, “तू मिन्जो पचांह़ चली पो, कने जेह्ड़े आत्मिक रूप ते मुड़दे हन, तिन्हां जो अपणे मुड़दे दब्बणा दे।”

लूका 12:19

तिसते बाद सैह़ अपणे आप्पे नैं ग्लांगा, हे मेरे सरीर, तिज्जो अल्ल मते साल्लां तांई खाणे तांई बड़ा अनाज कने मती धन दौलत रखियो ऐ। आरामें नैं खा पी कने मौजा नैं रैह्।’

लूका 15:13

कुच्छ दिनां बाद लोक्का जागत सब कुच्छ किठ्ठा करी नैं दूर देसे जो चली गेआ, कने तित्थु बुरे कम्मां च अपणी पूरी धन दौलत बरबाद करी दित्ती।

लूका 15:24

क्जोकि मैं एह़ सोचेया था कि मेरा जागत मरी गेआ, मरेया नीं अपर गुआची गेआ था, जेह्ड़ा हुण मिल्ली गेआ ऐ।’ कने सैह़ सारे तिसदे मिलणे दी खुसी मनाणा लग्गे।

लूका 15:32

अपर अहां जो हुण खुसी मनाणा कने खुस होणा चाइदा क्जोकि मैं एह़ सोचेया था कि मेरा जागत मरी गेआ; मरेया नीं अपर गुआची गेआ था, जेह्ड़ा हुण मिल्ली गेआ ऐ।’ ”

लूका 16:19

“इक्क अमीर माणु था जेह्ड़ा मैंह्गे कपड़े पैहणदा कने हर रोज सुख-विलासे च कने बड़ी ठाट बाट नैं रैंह्दा था।

लूका 7:25

तां भिरी तुहां क्या दिक्खणा गियो थे? मैंह्गे कपड़े लगाणे आल़े माणुआं जो? दिक्खा जेह्ड़े चमकीले कपड़े पैहणदे, कने सुख विलासे च जींदे हन, सैह़ मैहलां च रैंह्दे हन।

इफिसियों 2:1

अतीत च तुहां मरेयो थे, क्जोकि तुहां परमात्मे दे खलाफ बगाबत कने पाप कित्ता।

इफिसियों 2:5

जाह़लू अहां अपराधां दिया बज़ाह ते मरेयो थे तां तिन्हीं अहां जो अहां दे मसीह सौगी रिस्ते दिया बज़ाह ते सदा दी ज़िन्दगी हासल करणे जोग्गा बणाया। (परमात्मे दे अनुग्रह ते ई तुहां दा उद्धार होएया ऐ),

इफिसियों 5:14

इसतांई इक्क काहवत ऐ, जेह्ड़ी एह़ दस्सदी ऐ, “हे सोणे आल़े, जाग! कने मुड़देयां ते जिन्दा होई जा; तां मसीह अपणिया जोतिया जो तिज्जो पर चमकांगा।”

कुलुस्सियों 2:13

तुहां जाह़लू अपणे अपराधां कने बगैर खतणे ते मतलब बपतिस्मे ते पैहल्ले तुहां दा खरा सभाव मरेया था, परमात्मे तुहां दे सारे अपराधां जो माफ करदे होये तुहां जो मसीह सौगी जिन्दा करी दित्या ऐ।

2 तीमुथियुस 3:6

क्जोकि इन्हां च कुच्छ लोक ऐदेय भी हन जेह्ड़े लोकां दे घरां च गुप चुप जाई नैं मूर्ख जणासां जो बसे च करी लैंदे हन, जिन्हां दे मन पापां दे थल्लैं दबोयो हन कने हर किस्मां दियां इच्छां दे बसे च हन।

याकूब 5:5

तुहां धरतिया पर सोक पूरे करणे च लग्गी रैह्, कने तुहां बड़ा ई सुख पाया; कने तुहां अपणे पापे दा घड़ा भरी लेआ, कने इसतांई तुहां अपणे आप्पे जो पाल़ी पोसी परमात्मे दे न्याय तांई त्यार करी लेआ ऐ।

प्रकाशितवाक्य 18:7

जितणी तिन्हीं अपणी तारीफ कित्ती कने सुख विलास कित्ता, तितणी तिसियो पीड़ा कने दुख देआ; क्जोकि सैह़ अपणे मने च ग्लांदी ऐ, ‘मैं राणिया साइआं विराजमान ऐ, बिधवा नीं, कने सोग कदी नीं मनांगी।’

प्रकाशितवाक्य 3:1

भिरी तिन्हीं मिन्जो नैं एह़ भी ग्लाया, कि “सरदीस सैहरे दी कलीसिया दे सुअर्गदूते जो एह़ लिख: मैं सैई ऐ जिस अल्ल परमात्मे दियां सत आत्मां कने सत तारे हन, सैह़ एह़ ग्लांदा ऐ कि मैं तेरे कम्मां जो जाणदा ऐ, कि तू अप्पु जो मिन्जो पचांह़ चलणे आल़ा सच्चा बसुआसी तां दस्सदा ऐ, अपर असल च तू ऐ नीं।