1 तीमुथियुस 1:15 - काँगड़ी

¹⁵ जेह्ड़ी गल्ल मैं तुहां जो दस्सी सैह़ सच्च कने पूरे तरीके नैं बसुआस करणे जोग्गी ऐ। क्जोकि यीशु मसीह अहां पापी लोकां दा उद्धार करणे तांई इस संसारे च आया कने तिन्हां च सबते बड्डा पापी मैं ऐ।

1 तीमुथियुस 1:15 Iomraidhean Croise

मत्ती 1:21

सैह़ जागत जम्मगी कने तू तिसदा नां यीशु रखेयां क्जोकि सैह़ अपणे लोकां दा तिन्हां दे पापां ते उद्धार करगा।”

मत्ती 18:10

“दिक्खा, तुहां इन्हां लोक्केयां च कुसी जो घटिया मत समझा; क्जोकि मैं तुहां नैं ग्लांदा ऐ, कि सुअर्गे च तिन्हां दे सुअर्गदूत सदा मेरे सुअर्गीय पिता दे सौगी रैंह्दे हन।

मत्ती 18:11

क्जोकि मैं माणु दा पुत्तर गुआचेआं जो बचाणा आया ऐ।

मत्ती 20:28

जिंआं कि मैं माणुये दा पुत्तर इसतांई नीं आया कि अपणी सेवा करवां, अपर इसतांई आया कि अप्पु सेवा करैं, कने मतेआं जो छड्डाणे तांई अपणे प्राण दैं।”

मत्ती 9:13

इसतांई तुहां जाई नैं इसदा मतलब सीखी लेआ। मैं बलिदान नीं अपर दया चांह़दा। क्जोकि मैं धर्मियां जो नीं, अपर पापियां जो सदणा आया ऐ तांजे पापी उद्धार पान।”

मरकुस 2:17

यीशु एह़ सुणी करी तिन्हां नैं ग्लाणा लग्गा, “भले चंगेयां जो बैदे दी जरूरत नीं हुंदी, अपर बमारां जो हुंदी ऐ। मैं धर्मियां जो सदणा नीं, अपर पापियां जो सदणा आया ऐ तांजे पापी उद्धार पान।”

लूका 15:2

अपर फरीसी कने सास्त्री कुड़कुड़ाई नैं ग्लाणा लग्गे, “एह़ तां पापियां नैं मिलदा ऐ कने तिन्हां सौगी भी खांदा पींदा ऐ।”

लूका 19:10

क्जोकि मैं माणुये दा पुत्तर गुआचेआं जो तोपणा कने तिन्हां दा उद्धार करणा आया ऐ।”

लूका 5:32

मैं धर्मियां जो नीं, अपर पापियां दा मन बदलणे तांई कने सदणा आया ऐ तांजे पापी उद्धार पान।”

यूहन्ना 1:12

अपर जितणेयां तिसियो अपनाया, तिन्हीं तिन्हां जो परमात्मे दी औलाद होणे दा हक्क दित्ता, मतलब तिन्हां जो जेह्ड़े तिसदे नांऐ पर बसुआस रखदे हन।

यूहन्ना 1:29

दूँये दिने यूहन्ने यीशुये जो अपणे अल्ल ओंदे दिक्खी नैं ग्लाया, “दिक्खा एह़ परमात्मे दा मेम्ना ऐ जेह्ड़ा अपणा बलिदान देई करी संसारे दे पापां जो अप्पु ऊपर लेई लैंदा ऐ,

यूहन्ना 12:47

जे कोई मेरे वचनां जो सुणी नैं नीं मने, तां मैं तिसियो अपराधी नीं ठैहरांदा; क्जोकि मैं संसारे जो अपराधी ठैहराणे तांई नीं, अपर संसारे दे लोकां दा उद्धार करणे तांई आया ऐ।

यूहन्ना 3:36

जेह्ड़ा परमात्मे दे पुत्तरे पर बसुआस करदा ऐ, सदा दी ज़िन्दगी तिसदी ऐ; अपर जेह्ड़ा पुत्तरे दी नीं मनदा, सैह़ सदा दी ज़िन्दगिया जो नीं पांगा, अपर परमात्मे दी सज़ा तिस पर रैंह्दी ऐ।”

प्रेरितां दे कम्म 11:1

भिरी प्रेरितां कने बसुआसी भाऊआं जेह्ड़ा यहूदिया प्रदेसे च थे तिन्हां सुणेया, कि होरनी जातिआं दे लोकां भी परमात्मे दा वचन मन्नी लेआ ऐ।

प्रेरितां दे कम्म 11:18

एह़ सुणी करी यहूदी बसुआसी चुप रैह्, कने परमात्मे दी तरीफ करणा लग्गे, “ताह़लू तां परमात्मैं होरनी जातिआं जो भी सदा दी ज़िन्दगी तांई पापां ते मन बदलणे दा कने यीशु मसीह पर बसुआस करणे दा दान दित्ता ऐ।”

प्रेरितां दे कम्म 3:26

परमात्मैं यीशुये जो मरेयां ते जिन्दा करी नैं सबते पैहल्लैं तुहां अल्ल घल्लेया, तांजे तुहां च हर इक्क जो पापे दिया ज़िन्दगिया ते परमात्मे पास्से फेरी दैं।”

रोमियो 11:14

तांजे कुस तरीके नैं मैं अपणी जाति दे लोकां च जल़ण पैदा करवाई नैं तिन्हां च कईआं दा उद्धार करवां।

रोमियो 5:6

क्जोकि जाह़लू अहां कमजोर थे, ताह़लू यीशु मसीह तिस बग्त जाह़लू लोक पापी थे, तिन्हां तांई मरेया।

1 कुरिन्थियों 15:9

क्जोकि मैं सारे प्रेरितां च जादा खास नीं ऐ, अपर प्रेरित कैहलाणे जोग्गा भी नीं ऐ, क्जोकि मैं परमात्मे दिया कलीसिया च बसुआसी लोकां जो बड़ा सताया था।

इफिसियों 3:8

मिन्जो पर जेह्ड़ा सारे परमात्मे दे लोकां च लोक्के ते भी लोक्का ऐ, परमात्मे दा एह़ अनुग्रह मिन्जो पर होएया, मैं होरनी जातिआं जो सैह़ सुसमाचार सणा, कि यीशु मसीह ऐदिआं आसीषां दा जरिया ऐ, जिन्हां दी कोई सीमा नीं ऐ,

1 तीमुथियुस 1:13

मसीह च बसुआस करणे ते पैहल्लैं मैं मसीह दी निंदा करदा था, कने बसुआसी लोकां पर जुल्म करी नैं बड़ी बेरैहमिया नैं तिन्हां दा नकसान करदा था। अपर भिरी भी परमात्मे मिन्जो पर दया कित्ती, क्जोकि मिन्जो नीं पता था कि मैं क्या करा दा ऐ, कने तिस बग्ते तिकर मैं यीशु मसीह पर बसुआस नीं करदा था।

1 तीमुथियुस 1:19

तुहां यीशु मसीह च अपणे बसुआसे जो बणाई कने अपणिया अन्तर आत्मा जो साफ रखा। कुच्छ लोकां तां अपणिया साफ अन्तर आत्मा जो छड्डी दित्या ऐ, जिसदिया बज़ाह ते यीशु मसीह च तिन्हां दा बसुआस मुक्की गेआ ऐ।

1 तीमुथियुस 3:1

एह़ गल्ल सच्च ऐ कि जेह्ड़ा कलीसिया दा अगुआ बणना चांह़दा ऐ, सैह़ खरे कम्मां करणे दी इच्छा करदा ऐ,

1 तीमुथियुस 4:9

एह़ गल्ल सच्च ऐ कने हर तरीके नैं मन्नणे जोग्गी ऐ।

1 तीमुथियुस 6:13

परमात्मे जो गवाह मन्नी करी जेह्ड़ा सबना जो ज़िन्दगी दिंदा ऐ, कने यीशु मसीह जो भी गवाह मन्नी करी, जिन्हीं पुन्तियुस पिलातुसे दे सामणै अपणे बारे च सच्च ग्लाया था, मैं तिज्जो हुक्म दिंदा ऐ।

2 तीमुथियुस 2:11

एह़ गल्ल सच्च ऐ, कि जे अहां मसीह सौगी मरी गियो हन, तां तिस सौगी जिन्दे भी हुंगे;

तीतुस 3:8

एह़ गल्लां सच्चियां हन, कने मैं चांह़दा ऐ कि तू इन्हां गल्लां दे बारे च मजबूतिया नैं सखा। इसतांई कि जिन्हां परमात्मे दे रस्ते जो दिख्या कने बसुआस कित्या ऐ, सैह़ खरे-खरे कम्मां च लग्गी रैहणे दा ध्यान रखन। एह़ गल्लां खरियां कने लोकां दे फायदे दियां हन।

इब्रानियों 7:25

इसतांई जेह्ड़े यीशुये दे जरिये परमात्मे अल्ल ओंदे हन, सैह़ तिन्हां दा पूरा-पूरा उद्धार करी सकदा ऐ, क्जोकि सैह़ तिन्हां तांई विणती करणे जो सदा जिन्दा ऐ।

1 यूहन्ना 3:5

कने तुहां जाणदे हन, कि यीशु मसीह इसतांई आया ऐ, कि पापां जो दूर करैं; कने तिस च कोई पाप नीं ऐ।

1 यूहन्ना 3:8

जेह्ड़ा कोई लगातार पाप करदा ऐ, सैह़ सैताने दे पास्से ते ऐ, क्जोकि सैतान सुरू ते ई लगातार पाप करदा आया ऐ। परमात्मे दा पुत्तर इसतांई आया ऐ, कि सैताने दे कम्मां दा नास करैं।

1 यूहन्ना 5:11

कने सैह़ गवाही एह़ ऐ, कि परमात्मैं अहां जो सदा दी ज़िन्दगी दित्ती ऐ, कने एह़ परमात्मे दे पुत्तरे दे जरिये ऐ, जिसते अहां जो सदा दी ज़िन्दगी मिलियो ऐ।

प्रकाशितवाक्य 21:5

जेह्ड़ा सिंहासणे पर बैठेया था, तिन्हीं ग्लाया, “दिक्ख, मैं सब कुच्छ नौआं करी दिंदा।” भिरी तिन्हीं ग्लाया, “लिखी लै, क्जोकि एह़ वचन बसुआसे जोग्गे कने सच्चे हन।”

प्रकाशितवाक्य 22:6

भिरी तिन्हीं मिन्जो नैं ग्लाया, “एह़ गल्लां बसुआसे जोग्गियां कने सच्च हन। प्रभुयैं, जेह्ड़ा भविष्यवक्तां दियां आत्मां दा परमात्मा ऐ, अपणे सुअर्गदूते जो इसतांई घल्लेया कि अपणे दासां जो सैह़ गल्लां, जिन्हां दा तौल़ी पूरा होणा जरूरी ऐ दस्सें।”

प्रकाशितवाक्य 5:9

सैह़ एह़ नौआं गीत गा थे, “इसा कताब जो लैणे दा, कने इसा दियां सील्लां खोलणे दा हक्क तिज्जो अल्ल ऐ, क्जोकि तू इक्क मेम्ने साइआं बलिदान होई करी अपणे खूने नैं हर इक्क गोत्र, भासा, देस कने जातिया ते परमात्मे तांई लोकां जो खरीदी लेआ ऐ;