1 पतरस 1:3 - काँगड़ी

³ अहां परमात्मे दा धन्यावाद करदे हन, जेह्ड़ा अहां दे प्रभु यीशु मसीह दा पिता ऐ, जिन्हीं अपणी बड़ी दया नैं अहां जो नौई ज़िन्दगी दित्ती, क्जोकि परमात्मे यीशु मसीह जो मरेयां ते जिन्दा कित्ता, कने तिन्हीं अहां जो निडर होई नैं जीणे दे काबल बणाया, सैह़ एह़ कि अहां नैं तिन्हीं जिन्हां चीज्जां जो दैणे दा वादा कित्या ऐ, तिन्हां जो हासल करणे तांई अहां पूरी आस रखी सकन,

1 पतरस 1:3 Iomraidhean Croise

यूहन्ना 1:13

सैह़ ना तां माँ-बुढ़े ते, ना तां सरीरे दिया इच्छा ते, ना तां माणुये दिया मर्जिया ते अपर परमात्मे दिया इच्छा दे मताबक पैदा होएया ऐ।

रोमियो 12:12

जेह्ड़ी आसा अहां अल्ल ऐ तिसा आसा दिया बज़ाह ते खुस रेह्आ; मुसीबता च सबर रखा; कने हर बग्त प्रार्थना करदे रेह्आ।

रोमियो 15:13

मैं प्रार्थना करदा ऐ, कि परमात्मा जेह्ड़ा आसा दा दाता ऐ, तुहां जो बसुआस करणे च हर तरीके नैं खुसी कने सांतिया नैं भरैं, कि पवित्र आत्मा दिया सामर्थी ते तुहां दी उम्मीद बधदी जां।

रोमियो 4:25

यीशु मसीह अहां दे अपराधां तांई पकड़ुआया गेआ, कने अहां जो धर्मी बणाणे तांई परमात्मे तिसियो मरेयां ते जिन्दा भी कित्ता।

रोमियो 5:10

क्जोकि जाह़लू अहां परमात्मे दे बैरी होणे दिया हालता च थे, तां तिसदे पुत्तरे दे मरने दे जरिये अहां दा मेल-जोल परमात्मे सौगी होएया, तां भिरी मेल-जोल होई जाणे पर तिसदिया ज़िन्दगिया दिया बज़ाह ते अहां उद्धार क्जो नीं पांगे?

रोमियो 8:11

कने जे परमात्मे दिया आत्मा जिन्नै यीशु मसीह जो मरेयां ते जिन्दा कित्या, तुहां च वास करदी ऐ; तां जिन्हीं मसीह जो मरेयां ते जिन्दा कित्या, सैह़ तुहां दे नास होणे आल़े सरीरां जो भी अपणिया आत्मा दे जरिये जेह्ड़ी तुहां च वास करदी ऐ, जिन्दा करगा।

रोमियो 8:24

इसा उम्मीदा सौगी तां अहां दा उद्धार होएया ऐ; अपर जिसा चीज्जा दी उम्मीद कित्ती जांदी ऐ, जाह़लू सैह़ दुस्सी जां तां भिरी आस कुत्थू रेई? क्जोकि जिसा चीज्जा जो कोई दिक्खा दा ऐ, तिसा चीज्जा दी उम्मीद क्या करणी?

1 कुरिन्थियों 13:13

अपर हुण बसुआस, आसा, कने प्यार एह़ त्रीनो हमेसा बणी रैंह्दे हन, अपर इन्हां सबना ते ऊपर प्यार ऐ।

1 कुरिन्थियों 15:20

अपर सच्च तां एह़ ऐ कि मसीह मरेयां ते जिन्दा होई गेआ ऐ, कने सैह़ अहां जो इसा गल्ला च पक्का करदा ऐ कि दूयेयां जो भी सैह़ मरेयां ते जिन्दा करगा।

2 कुरिन्थियों 1:3

अहां दे प्रभु यीशु मसीह दे पिता परमात्मे दा धन्यावाद होयैं। परमात्मा दया दा पिता कने हर किस्मां दा सुख-सांति दैणे आल़ा ऐ।

गलातियों 6:16

परमात्मा तिन्हां सारेयां जो सांति कने आसीष दिंगा, जेह्ड़े इन्हां नियमां पर चलदे हन, क्जोकि सैह़ परमात्मे दे लोक हन।

इफिसियों 1:17

कि अहां दे प्रभु यीशु मसीह दा परमात्मा जेह्ड़ा महिमा दा पिता ऐ, तुहां जो अपणा आत्मिक ज्ञान कने समझ दैं,

इफिसियों 1:3

अहां दे प्रभु यीशु मसीह दे पिता परमात्मे दी स्तुति होयैं, क्जोकि तिन्हीं अहां जो सुअर्गे ते मसीह सौगी अहां दे रिस्ते दिया बज़ाह ते हर किस्मां दियां आत्मिक आसीषां दित्तियां हन।

इफिसियों 1:7

मसीयैं अहां दे छुटकारे तांई अपणा खून बहाई नैं अपणी ज़िन्दगी बलिदान करी दित्ती, जिसदा मतलब एह़ ऐ, कि हुण अहां दे पाप ते माफ होई गियो हन। कने परमात्मे दा अनुग्रह कितणा म्हान ऐ, जेह्ड़ा तिन्हीं अहां जो बड़ा भरी दित्या ऐ।

इफिसियों 2:4

अपर परमात्मा जेह्ड़ा दया दा धनी ऐ, अपणे तिस बड्डे प्यारे दिया बज़ाह ते जिसते तिन्हीं अहां नैं प्यार कित्ता,

इफिसियों 3:20

जितणा अहां परमात्मे ते मंगदे कने सोचदे हन, तिसते भी जादा करी सकदा ऐ, क्जोकि तिसदी सामर्थ अहां च कम्म करदी ऐ। कलीसिया च कने यीशु मसीह च तिसदी महिमा पीढ़ी ते पीढ़ी तिकर जुगा-जुग हुंदी रैंह्। आमीन।

कुलुस्सियों 1:23

जे तुहां मसीह च बसुआस करदे हन, तां तुहां दा बसुआस तिस पर मजबूत रैहणा चाइदा, ठीक तिस घरे साइआं जेह्ड़ा मजबूत नीआं पर बणाया ऐ। कने अहां तिस सुसमाचारे जो सुणी करी जेह्ड़ी आसा अहां जो मिलदी ऐ तिसा जो मत छड्डा। जिसदा प्रचार इस संसारे दे लोकां च कित्ता गेआ, कने सुसमाचारे दा प्रचार करणे तांई मैं पौलुस सेवक बणेया ऐ।

कुलुस्सियों 1:27

परमात्मैं एह़ फैसला लेआ कि तिसदे लोक इस सानदार कने महिमा आल़े रहस्य जो जाणी सकन, जेह्ड़ा सारे लोकां तांई तिस अल्ल ऐ। एह़ रहस्य मसीह अप्पु ई ऐ जेह्ड़ा तुहां च रैंह्दा ऐ, सिर्फ सैई महिमा तांई अहां दी उम्मीद ऐ।

1 थिस्सलुनीकियों 1:3

अहां हमेसा ई पिता परमात्मे दे सामणै तुहां दे बसुआसे दे कम्म, कने प्यारे दी मेहनत, कने अहां दे प्रभु यीशु मसीह च तुहां दी आसा दा सबर याद करदे हन।

1 थिस्सलुनीकियों 4:13

हे प्यारे साथी बसुआसियो, अहां नीं चांह़दे हन, कि तुहां तिन्हां दे बारे च अणजाण रेह्आ। जेह्ड़े मसीह च इस संसारे जो छड्डी करी चली गियो हन, इआं ना होयैं, कि तुहां दूयेयां साइआं सोक करन जिन्हां जो उम्मीद नीं ऐ।

2 थिस्सलुनीकियों 2:16

अहां अपणे प्रभु यीशु मसीह नैं कने पिता परमात्मे नैं जिन्हीं अहां नैं प्यार कित्ता विणती करदे हन, जिन्हीं अहां जो अपणे अनुग्रह दे जरिये सदा तांई हौंसला कने पक्की आसा दित्ती ऐ।

1 तीमुथियुस 1:14

यीशु मसीह च अहां दे प्रभु दा मता सारा अनुग्रह बसुआसे कने प्यारे नैं मिन्जो पर होएया।

तीतुस 2:13

कने तिसा खरिया आसा दा मतलब अपणे म्हान परमात्मे कने उद्धार करणे आल़े यीशु मसीह दी महिमा दे प्रगट होणे दा इन्तजार करदे रैह़न।

इब्रानियों 3:6

अपर मसीह इक्क पुत्तरे साइआं परमात्मे दे घरे दा हक्कदार ऐ; कने तिसदा घर अहां हन। जे अहां अपणे मजबूत बसुआसे कने आसा जो आखरी तिकर हिम्मता नैं थमी रखदे हन।

याकूब 1:18

तिन्हीं अपणिया इच्छा दे मताबक अहां जो सच्चाई दे वचनां दे जरिये नौई ज़िन्दगी दित्तियो ऐ, तांजे अहां सारियां चीज्जां च जेह्ड़ियां परमात्मे बणाईयां हन तिन्हां च खास होन, जिंआं फसला दा पैहल्ला फल़ खास हुंदा ऐ।

1 पतरस 1:13

इसतांई अपणे-अपणे मनां जो त्यार करा, ठीक तिंआं ई जिंआं लोक कम्म करणे तांई अपणे लक्के जो बैल्टा नैं कसदे हन, कने तिस उद्धारे दी आस करदे रेह्आ, जेह्ड़ा अनुग्रह दे जरिये तुहां जो दित्ता जांगा, जाह़लू यीशु मसीह इस संसारे च बापस ओंगा।

1 पतरस 1:21

यीशु मसीह दे जरिये तुहां परमात्मे पर बसुआस करदे हन, तांजे तुहां दा बसुआस कने आसा तिस परमात्मे पर होयैं, जिन्हीं मसीह जो मरेयां ते जिन्दा कित्ता कने तिसियो महिमा दित्ती।

1 पतरस 1:23

तुहां एह़ ज़िन्दगी परमात्मे दे पास्से ते नौई हासल कित्तियो ऐ, क्जोकि तुहां जो एह़ ज़िन्दगी तिसा चीज्जा दे जरिये हासल नीं कित्ती, जेह्ड़ी नास होई जांदी ऐ, अपर तिसा चीज्जा जरिये जेह्ड़ी सदा बणी रैंह्दी ऐ, कने सैह़ चीज्ज परमात्मे दा जिन्दा कने हमेसा रैहणे आल़ा वचन ऐ।

1 पतरस 2:2

तुहां च परमात्मे दे वचने जो सीखणे दी इच्छा होणी चाइदी, ठीक तिंआं ई जिंआं इक्क दुद पीणे आल़ा बच्चा अपणिया माँऊ ते दूदे दी इच्छा रखदा ऐ, तांजे तुहां आत्मिकता च मजबूत होई जान। ताह़लू परमात्मा तुहां जो इस संसारे दे बुरे कम्मां ते पूरे तरीके नैं बचाई लैंगा।

1 पतरस 3:15

अपर मसीह जो प्रभु समझी नैं अपणे-अपणे मने च पवित्र समझा। जेह्ड़ा कोई तुहां ते तुहां दी आसा दे बारे च कुच्छ पुछैं, जेह्ड़ी अहां सारे बसुआसी अप्पु च साझी करदे हन, तां हमेसा तिसादे बारे च नम्रता कने डरे सौगी जवाब दैणे तांई त्यार रेह्आ,

1 पतरस 3:21

पराणे बग्ते च तिन्हां दा उद्धार अहां दे इस बग्ते दे उद्धारे दा उदारण ऐ, जाह़लू अहां बपतिस्मा लेआ था। जिस पांणिये च अहां बपतिस्मा लेआ था, अहां दे सरीरां दे मैल्ले जो दूर नीं करदा, अपर एह़ इसा गल्ला जो दस्सदा ऐ, कि अहां परमात्मे ते माफी मंगियो ऐ, तांजे गांह तांई अहां दा मन दुखी नीं रैंह्। अहां जो माफी मिल्ली सकदी ऐ, क्जोकि यीशु मसीह दुवारी भिरी जिन्दा होई गेआ ऐ।

1 पतरस 3:5

पराणे जमाने च पवित्र जणासा भी, जेह्ड़ियां परमात्मे पर आस रखदियां थियां, अपणे आप्पे जो इसी तरीके नैं सवांरदियां कने अपणे-अपणे लाड़े दे अधीन रैंह्दियां थियां।

1 यूहन्ना 2:29

जे तुहां जाणदे हन, कि मसीह धर्मी ऐ, तां एह़ भी जाणदे हन, कि जेह्ड़ा कोई धार्मिकता दे कम्म करदा ऐ, सैह़ परमात्मे दे बच्चे हन।

1 यूहन्ना 3:3

कने जेह्ड़ा कोई मसीह पर एह़ आस रखदा ऐ, सैह़ अपणे आप्पे जो तिंआं ई पवित्र करदा ऐ, जिंआं सैह़ पवित्र ऐ।

1 यूहन्ना 3:9

जेह्ड़े कोई भी परमात्मे दे बच्चे हन, सैह़ लगातार पाप नीं करदे; क्जोकि तिसदी ज़िन्दगी तिन्हां च बणी रैंह्दी ऐ, कने सैह़ लगातार पाप करी ई नीं सकदे, क्जोकि सैह़ परमात्मे दे बच्चे हन।

1 यूहन्ना 4:7

हे मेरे प्यारे साथी बसुआसियो, अहां अप्पु च प्यार रखन; क्जोकि प्यार परमात्मे ते ऐ। कने जेह्ड़ा कोई दूयेयां नैं प्यार करदा ऐ, सैह़ परमात्मे दा बच्चा ऐ, कने परमात्मे जो जाणदा ऐ।

1 यूहन्ना 5:1

जिस माणु दा एह़ बसुआस ऐ कि यीशु ई मसीह ऐ, सैह़ परमात्मे दा बच्चा ऐ; कने जेह्ड़ा कोई पिता परमात्मे नैं प्यार रखदा ऐ, तां सैह़ दूयेयां नैं भी प्यार रखदा ऐ, जेह्ड़े तिसदे बच्चे हन।

1 यूहन्ना 5:18

अहां जाणदे हन, कि जेह्ड़ा कोई परमात्मे दा बच्चा ऐ, सैह़ लगातार पाप नीं करदा; अपर जेह्ड़े परमात्मे दे पुत्तर यीशु मसीह दे बच्चे हन, तिन्हां जो सैह़ बचाई रखदा ऐ, कने सैह़ सैतान तिन्हां जो छुई नीं पांदा।

1 यूहन्ना 5:4

क्जोकि जेह्ड़ा कोई परमात्मे दा बच्चा ऐ, तिन्हीं संसारे पर जीत्त हासल कित्ती ऐ; कने सैह़ जीत्त जेह्ड़ी संसारे जो हराई दिंदी ऐ, सैह़ अहां दा बसुआस ऐ।