Naipagtek 3:7 - Kalin Apo Dios

⁷ Danat ibaga abes nan isolatko isnan mangipangpango isnan mamati id Filadelfia. Kanana, “Sak-en ay mangtongtongpal ken Apo Dios ya tet-ewa ay matalek isnan am-in et wada nan ibagak ken dakayo. Sak-en gedan nan nangbanes isnan lebbeng din si Ali David ay mentolay isnan am-in. Et mabalin ay ikkak nan am-in ay kayatko ay ikkan ay maiwed makasopla.

Naipagtek 3:7 Iomraidhean Croise

Salmo 145:17

Nalinteg nan apo isnan am-in ay ikkana ya managseg-ang gedan siya.

Salmo 16:10

tay getkek ay adika mangkalkalingking isnan kad-an di natey ya adim ipalobos ay madonot nan awak di napateg ay pinilim.

Salmo 89:18

tay sik-a apo nan salidami. Sik-a ay maid polos kangawina ay Dios di Israel nan mentolay ken dakami.

Isaias 41:20

tapno no ilaen nan ipogaw dana et getkenda ay sak-en ay apo nan nang-ikkan et maawatanda ay nan tet-ewa ay Dios di Israel nan nang-ikkan is dana.”

Isaias 49:7

Wada nan kinwanin nan Dios ay kangatowan ay mang-isalsalakan isnan Israel. Kinwanina isnan baana ay maoy-oyaw ya liligten di il-ili ya baan gedan nan mentotolay en, “Awnit ilaen nan aali sik-a dadat tomakdeg ay mang-ipaila isnan panangdayawda ken sik-a. Awnit gedan ilaen nan tap-in di mentotolay sik-a dadat abes menlokbob ay mangdayaw ken sik-a. Awnit ommat na tay nan apo ay Dios di Israel et pinilina nan baana et tongtongpalena nan inkalina.”

Isaias 55:5

Id wani et ipaayagmo nan ado ay baken Israelita tay isnan namingsan et egayda gin-gintek sik-a ngem id wani et mentagtagda ay omali ay maitapi ken sik-a. Sak-en nan apo ay Diosmo ay Dios gedan di Israel et awnitak ipaikkan am-in dana daket agtan sik-a is dayaw ya ipangatok sik-a.”

Isaias 6:3

Idayday-engda isnan wasdin esa en, “Maiwed polos makaiso ken Apo Dios. Siya et kedeng nan kangatowan ya kaostowan. Am-in ay binoliwna et ipailada nan kinaostona ya nan kinangatona.”

Mateo 16:19

Et agtak sik-a is lebbengem ay kaneg mamanggen isnan tolbek ay manglokat isnan mentolayan Apo Dios. Et am-in ay iyadim ay maikkan isnan batawa et maiyadi abes id daya. Ya am-in ay ipalobosmo ay maikkan isnan batawa et maipalobos abes id daya.”

Mateo 24:35

Olay no mamaid nan batawa ya nan wada id daya ngem nan am-in ay kankanak et mawawada kayet ay eng-enggana.”

Marcos 1:24

ay mangwani, “Jesus ay iNazaret, ay ngan di ngotom ken dakami? Ay dadaelem dakami? Getkek sik-a. Sik-a nan napateg ay inbaan Apo Dios.”

Lucas 1:32

Awnit kangangatowan siya ay makwani en Anak Apo Dios ay kangatowan ya patolayen Apo Dios siya ay kaneg din alapona ay si Ali David id kasin

Lucas 4:34

“Ine. Jesus ay iNazaret, ay ngan di ngotom ken dakami? Ay dadaelem dakami? Getkek sik-a. Sik-a nan nasantowan ay inbaan Apo Dios.”

Juan 14:6

Dat kanan Jesus, “Sak-en nan daan tay kedengak is kagapowan di biyag ya kedengak is mangibagbaga isnan tet-ewa et maiwed makaey ken Ama no adi mendaan ken sak-en.

Aapostolis 3:14

Ay apo kayo, inadyanyo nan gawigawis ay ipogaw ay maid polos basolna dayopay aped piliyen nan ninpatey is ipogaw is kayatyo ay mapalobosan.

1 Juan 5:20

Getken tako gedan ay ninbalin is ipogaw nan Anak Apo Dios et intedna ken datako nan osto ay nemnem tapno getken tako nan tet-ewa ay Dios. Maitatapi tako ken siya ya ken Jesu Kristo ay Anakna. Et si Apo Dios nan tet-ewa ay Dios ay kagapowan nan biyag ay maid patenggana.

Naipagtek 1:11

Kinwanina en, “Isolatmo nan awnitmo il-ilaen ya dengdengngen ta ipa-eymo isnan mamati ay madagdagop isnan naay ay pito ay ili; id Efeso, id Esmirna, id Pergamo, id Tiatira, id Sardis, id Filadelfia ya id Laodicea.”

Naipagtek 1:18

Matatatatagowak tay olay no nateyak id kasin ngem kasinak natago et mawawawadaak ay eng-enggana. Sak-en gedan nan kalebbeng isnan mateyan di ipogaw ya isnan pagbalodan nan ab-abiikda ay makwani en Hades.

Naipagtek 15:3

et kankantaenda nan kantan Moses ay esay baan Apo Dios id kasin ay kantan gedan nan makwani en Kalnilo. Siya na nan kankantaenda. “Apo Dios ay manakabalin isnan am-in ay wada, kaskasdaaw ya kadadayaw nan ik-ikkam. Sik-a nan Apon di am-in ay ili, et ostoosto ya gawigawis nan am-in ay ik-ikkam.

Naipagtek 16:7

Daket dengngen nan kali ay nagapo isnan altar ay mangwani en, “Apo Dios ay manakabalin, tet-ewa ay tongpalem nan kalim ay mendosa ya ostoosto nan mang-ikkanam.”

Naipagtek 19:11

Maaw-awni pay daket ilaen ay menlokat nan daya dat bomala nan polaw ay kabayo. Et wada nan mensasakay ay kangadan is Matalek ya Tet-ewa tay nan ik-ikkana ay menbanag et ostoosto ya nalinteg nan ikkana ay manggobat isnan mang-ap-apos ken siya.

Naipagtek 19:2

Ostoosto ya tet-ewa nan ikkana ay mangbanag isnan ipogaw tay dinosana san mendindinamag ay babai ay nang-awis isnan kaipoipogaw ay maitapi isnan ngawi ay ik-ikkana. Inbaes Apo Dios issan ngawi ay babai nan nangpatpateyana isnan baan Apo Dios.”

Naipagtek 2:1

Danat ibaga nan isolatko isnan mangipangpango isnan mamati id Efeso. Et kanana en, “Sak-en ay mamanggen isnan pito ay talaw isnan makanawan ay ledengko ya wawawawada isnan tengan di pito ay balitok ay maig-igwaan di silaw et siya na nan ibagak ken dakayo.

Naipagtek 21:5

Dat kanan nan tomotokdo isnan tokdowan di ali en, “Id wani et ipabalok am-in ay wada.” Kinwanina gedan ken sak-en en, “Isolatmo nan naayda ay kanak tay tet-ewa ay awnit ommat.”

Naipagtek 3:14

Danat ibaga abes nan isolatko isnan mangipangpango isnan mamati id Laodicea. Kanana, “Sak-en ay makwani en Tet-ewa tay matalekak ya am-in ay ipagtekko ay maipanggep ken Apo Dios et tet-etet-ewa et wada nan ibagak ken dakayo. Sak-en gedan nan nangipaboliwan Apo Dios isnan am-in ay wada.

Naipagtek 4:8

Am-inda et napapayakanda is sag-en-em et nakikilop nan ninsinombangil ay payakda is kamatamata. Inagew ya linabi et adida isalsaldeng ay menkankanta ay mangmangwani en, “Maiwed polos makaiso ken Apo Dios isnan kinangatona ya nan kinaostona. Mawawawawada siya ay maid logina wenno patenggana.”

Naipagtek 5:9

Dadat kantaen nan balo ay kanta ay mangwani en, “Kedkedengka is maibagay ay mang-ala isnan nalololon ay papil ya mangkaan isnan pilkatna. Tay napateyka et nan nateyam nan naisbot isnan basbasol di ipogaw ta waday menbalin is ipogaw Apo Dios isnan magapo isnan am-in ay ili ay natkenatken nan kalida ya kaiilaanda.

Naipagtek 6:10

Inbobogawda ay mangwani en, “Manakabalin ay Dios, tet-ewa nan am-in ay kanam ya osto nan ik-ikkam. Isonga tongona pay di mangbanagam isnan ipogaw isnan batawa ta baesam nan nangpatey ken dakami?”