Exodo 32:15 - Kalin Apo Dios

¹⁵ Dat lomayog si Moses ay nanggegeen issan dowa ay nadadampig ay bato ay naisolatan nan bilin et das-ana si Josue ay menseseed isnan gawan san bilig.

Exodo 32:15 Iomraidhean Croise

Salmo 19:7

Gawigawis nan linteg nan apo tay papigsaena nan nemnem. Matalek nan bilbilin nan apo tay nan kolang nan getkenda et pasilibena.

Exodo 16:34

Et kaneg nan inbagan nan apo ken Moses et inippey tet-ewa Aaron san banga isnan sagang nan baol ay awnit maipay-an san dowa ay nadadampig ay bato ay naisolatan nan linteg Apo Dios ta pangil-ilaan nan aap-oda isdin kinkinanda.

Exodo 24:12

Dat kasin kanan nan apo ken Moses en, “Omalika ken sak-en isnan bilig et no wadaka isna daket idya ken sik-a nan dowa ay nadadampig ay bato ay nangisolatak isnan linteg ya bilbilin ay itdom isnan ipogaw.”

Exodo 24:18

Dat songgep si Moses issan liboo et mentee isdi is epatpoo ay agew ya epatpoo ay labi.

Exodo 31:18

Idi nakwas ay nakikali nan apo ken Moses isnan bilig ay Sinai danat idya ken siya nan dowa ay nadadampig ay bato ay nang-isolatana mismo isnan bilbilina.

Exodo 32:16

Si Apo Dios mismo nan nangsapo isnan nadadampig ay bato ay naay et insolatna san bilin isnan naayda ay bato.

Exodo 34:29

Issan linmayogan Moses isnan bilig ay Sinai ay ginegen-ana san dowa ay nadadampig ay bato ay kasin naisolatan san simpoo ay bilin et mensilsilap nan angasna ay adina getgetken gapo isnan nakikaliyana isnan apo.

2 Corinto 3:3

Mail-ila isnan ik-ikkanyo ay nagapo ken Kristo nan pammatiyo et dakami nan inosalna ay nangibaga isnan pinatiyo. Bakenyo kaneg nan tet-ewa ay solat ay tinta nan naisolat nodi nan Ispiriton Apo Dios ay naleleng-agan ay Dios nan nangisolat. Et baken nan nadadapig ay bato ay kaneg nan naisolatan nan linteg Moses is nangisolatana nodi isnan nemnemyo ay mamati.

2 Corinto 3:7

Wada pay nan ibagak isnan nateknan nan nakitolagan Apo Dios isnan lintegna. Nan linteg ay naisolat isnan bato et naila isdi nan kinangaton Apo Dios. Ya olay si Moses ay nang-itedana et sinmilang ay pilmi nan angasna gapo isnan naisag-enana ken siya. Et olay mamam-aid nan silangna, adi kayet makaila nan Judio ken siya tay nasilida. Isonga no naila nan kinangaton Apo Dios isnan linteg ay nang-ited isnan tetey, ay baken am-am-amed nan kail-an nan kinangaton Apo Dios isnan ik-ikkan nan Ispiritona ay mang-ited isnan biyag ay maid patenggana?

Hebreo 9:4

Nan wada isdi et nan makwani en altar ay kapop-oowan di bangbanglo ay makwani en insinso ay os-osalenda ay mangdayaw ken Apo Dios. Wada abes isdi nan kaneg baol ay mentetean nan doway nadadapig ay bato ay naisolatan nan simpoo ay linteg Apo Dios ay nangipagpagtek isnan nakitolagana ken daida. Nan dowa pay ay wada isnan leem nan kaneg baol et nan balitok ay banga ay kad-an di manna ay makan ay inted Apo Dios id kasikasin ya nan natotobowan ay sokod din si Aaron. Nan baol ya nan kapop-oowan di insinso et napakpakanda is balitok.

Naipagtek 5:1

Nakwas di daket ilaen nan nalololon ay papil ay gegen-an san tomotokdo ay mentolay isnan makanawan ay ledengna. San papil et nasosolatan nan ninsinombangil ya napipilkatan is pito tasiyay adi malokatan.