Epeses 6:19 - Kamula

¹⁹ Epame wua꞉ mape na꞉ yilo inoma sumale yu himme ha꞉ha꞉iya, Godtapo na꞉ta atlamolowe yu hapulomaye na꞉ watle hapilipo depame. Epame na꞉tapo powota꞉lalo itiyamale mate ka꞉dle yu ya꞉ dulu kokoye haliyamale dla botomastlepo depame.

Epeses 6:19 Iomraidhean Croise

Taiya dle so 13:46

Amasiyama Polo mate Banabas mate powowota꞉lalo asiyama yuye yia꞉ watle epo atlamaiyo, “Ka꞉dlepo, wua꞉ tatle dita God yuye wua꞉ dla atlamoloweye. Amasiyama wua꞉ta pasakalo hallowe haloweye allipo. Epedeme di wua꞉ melepame ma po-Yu so watle God yu atlamsiyamolowepo.

Taiya dle so 14:3

Amasiyama dulu edla Polo mate Banabas mate Ikoniyom dla weya alila selemalli ha꞉ha꞉iyo. Yia꞉ edla ha꞉ha꞉mama powota꞉lalo God kokoye opa watle atlamha꞉ha꞉iyo. Epalati opata yia꞉ yu dla mikadepe dlepo depame Lodta Polo mate epo Banabas mate dla ulugiyemale koko halowe itiyamale hamiyo.

Taiya dle so 18:26

Epapeleye Apolosta Yu so inoma sumalalo aya dla hetame powota꞉lalo God yuye itiyamale mate atlemhalaiyo. Epalati Plisila mate Akwila mate ya꞉ yu dalempopa꞉pame ya꞉ye yia꞉ aya dla semtaiyo, God koko hapulomaye ya꞉ watle woloma ka꞉pi imolowedeme.

Taiya dle so 19:8

Epalati Yu sota mikadepe dlepo depame Polotapo yia꞉ta inoma sumalalo aya dla hetame mama dapahatlope dulu dla powota꞉lalo God yu atlemhalemdiyo.

Taiya dle so 2:4

Epammama Hela꞉dle Sokota yia꞉ dla tulume halati yia꞉tapo Hela꞉dle Sokota itiyamale tle yu meyelope meyelope dle yuhamyaiyo.

Taiya dle so 28:31

Epame yia꞉ watle God ya꞉ mo koko imama Lod Yesu Keliso koko atloweye powota꞉mdena. Epapele dulu dla oplami haleta ya꞉ye pohumatlemdena.

Taiya dle so 4:13

Epalati dokopala sota Pita mate Yon mate yia꞉ta powowota꞉lalo asiyama yu ka꞉pi atlamalati dalepame yia꞉ sikemte yiyeliyo. Adipalati, Pita woloye sukulu yeitamale soyo, isikimi mo dulu dla ha꞉ha꞉lalo soyo. Epammama dokopala sota malamaiyo, opa dapiyamte iwoloye Yesu mate siyamale sopo, diyo.

Taiya dle so 4:29

Epedeme Lod, watapo dokopala so iwolota wa꞉ oko so di watle batalimale yu atlamaleye wa꞉ ma-dallepo. Epedeme di watle itiyamale hamine, ditapo wa꞉ yu atlamsiyamama wota꞉le pa꞉po siyamelepo depame.

Taiya dle so 4:31

Amasiyama yia꞉ inoma sumaleta tame gudlati yia꞉ta popa꞉le ayaye holuiyo. Epalati Hela꞉dle Sokota yia꞉ dla halati yia꞉tapo wowota꞉le pa꞉po God yu atlamsiyamaiyo.

Taiya dle so 9:27

Amasiyama Banabasta ya꞉ye gademama Taiya dle so watle Sol semtame epo atlaiyo, “Lodtapo Solye Damasko api duka dla tamhallati woyapame ya꞉ watle yukamaiyo. Epalati Solta mikadepe depame Damasko dla itiyamale mate God yu Yesu Keliso koko atloweye powota꞉iyo,” diyo.

Taiya dle so 9:29

Epammama ya꞉ta Guliki yuhalalo Yu so mate Yesu koko dla yu topulolemdiyo. Epapele koko tle yia꞉tapo ya꞉ye yumuluwe solotamaiyo.

Loum 15:30

Epapedeme mikadepe dle so namkadulo, Lod Yesu Keliso hi tle epo Sokota bokotiyapo malamale tle na꞉ wua꞉ dla otele pato himima, wua꞉tapo na꞉ oko ipiye gademama na꞉ yilo God dla inoma sumale himha꞉ha꞉lepo depame.

Loum 16:25

Epapedeme God hi di dla ta꞉diya. Adipalati, ya꞉tapo na꞉ta atlamsela꞉ ka꞉dle yu itle wua꞉ta mikadepe dle itiyamale hamiloweye ala꞉na. Ka꞉dle yu Yesu Keliso koko iye ka꞉yapa mo-powataliya hemele hatiyomeleme eluwapo.

1 Kolin 1:5

Epapedeme wua꞉tapo Keliso dulu dla ha꞉ha꞉lati Godtapo wua꞉ye sikemte gadle tle wua꞉ta ka꞉dle yu ka꞉pi atlowe mate epo ka꞉dle malamale halowe mateye wua꞉ dla hapiwapo.

1 Kolin 2:7

Di asiyama Godtapo hemele hatiyomelle malamaleye atlamsiyamapo. Ta꞉lamo ala pomita꞉plalo halemama Godtapo malamale i mate dia꞉ye hela꞉dle dla eleme tlowedeme yu himiwapo.

1 Kolin 4:1

Epedeme wua꞉tapo na꞉ mate epo Apolos mateye Keliso ya꞉ oko sopo dloweye ka꞉dena. Adipalati, Godta meyelo hemele hatiyomelle kokoye ma haliyamale opa dla atlepo depame dia꞉ye hohomuwapo.

2 Kolin 1:11

Adipalati, wua꞉ mape wua꞉ta inoma sumale tle na꞉ gademha꞉ha꞉po. Epedeme opa hapulomatapo Godta dia꞉ dla gadle himila natipame asiyama yia꞉tapo God dla siyele ta꞉dlepe. Adipalati, ya꞉tapo yia꞉ta inoma sumale yu dla asiyama ma-hamimdepo.

2 Kolin 3:12

Epedeme amko kokota dia꞉ dla ellati ditapo ka꞉dle yuye wowota꞉le pa꞉po itiyamale mate atlamsiyamapo.

2 Kolin 6:11

Epapedeme Kolin mo dla ha꞉ha꞉lalo so namkadulo, ditapo ikadepe kokoye wua꞉ watle atlamapo. Ditapo di dupa dulu tle wua꞉ye sikemte bokotiyapo malaha꞉ha꞉ma. Amasiyama wua꞉tapo dia꞉ye pase malaha꞉ha꞉sema.

2 Kolin 7:4

Epedeme na꞉ta wua꞉ watle koko iye haliyamale dla atlapo. Na꞉tapo wotiyalle hapuloma dulu dla halemama wua꞉ koko dalepame sikemte siyeuwa.

2 Kolin 8:7

Epedeme wua꞉ natiya, wua꞉tapo ka꞉dle yuye ka꞉pi atlamha꞉ha꞉po. Epame ikadepe kokoye ka꞉pi malapo ha꞉ha꞉po. Epame koko hapulomaye itiyamale mate halomha꞉ha꞉po. Epame wua꞉ dia꞉ye sikemte bokotiyapo malamha꞉ha꞉po. Wua꞉ta koko hapuloma ipapele halomha꞉ha꞉ tle itapu so depo ha꞉ha꞉po. Epedeme na꞉ solotama, hamili dulu hema wua꞉tapo mepo itapu so depo ha꞉ha꞉lepo depame.

Epeses 1:9

Epame Godtapo ya꞉ta hemele dinapopo himili kokoye di watle mo-botomastauwapo. Epapedeme ya꞉ta hemele dinapopo himili koko eye ipo. Ya꞉ta sale alila dla tame umulupiye, ya꞉tapo koko hapuloma Pepele dimo dla hutiye mate epo ta꞉lamo dla hutiye mate hatlo alupame Kelisota dokopala depo hala isili dla puame ipila꞉lepe.

Epeses 3:9

Epedeme koko hapuloma mimita꞉plalo Godtapo mo-powataliya hemele dinapopo hatiyomeleme haluwa kokoye na꞉tapo botomastlepo depame na꞉ye ma-sauwapo.

Kolosi 2:2

Adipalati, na꞉ta solotamale koko patoye epo elema, mikadepe dle soye gadle yu mate itiyamale hamilowedeme. Epame yia꞉tapo yimkata ha꞉ha꞉le dulu dla asiyama bokotiyapo malama asiyama bokotiyapo malama dlowe kokotapo yia꞉ye hatlo alupo dea some yupo hallepo depo ammde. Epame na꞉ ma solotama, yia꞉tapo ka꞉dle yuye sikemte malastepo ha꞉ha꞉mama wota꞉le pa꞉po siyele mate ha꞉ha꞉lepo depame. Epame na꞉ ma solotama, yia꞉ta Godta hemele hatiyomelle ela kokoye malastlepo depame. Adipalati, Godta hemele hatiyomelle ela koko eye Kelisopo.

Kolosi 4:3

Wua꞉ta epamha꞉ha꞉mama dia꞉ yilo inoma sumha꞉ha꞉loweye welimiya. Adipalati, di solotama, Godtapo dita ka꞉dle yu hamsiyamolowe kokolomaye gowaladlepo depame. Epame ditapo Keliso koko hemele elaye ma opa dla atlamelepo depame. Epedeme na꞉tapo Keliso yilo amtuwale aya dulu hema halapo.

1 Tesalonika 2:2

Wua꞉malamana, dita ka꞉yapa wua꞉ hala dla puluwedeme Pilipi mo dla ha꞉ha꞉lati opata dia꞉ dla mala-atlamyemama wotiyalle hamiwaye. Amasiyama epapele dulu dla di Lodta di gadle tle opata di alli dulu medla ditapo wota꞉le pa꞉po wua꞉ watle God tle puale ka꞉dle yuye atlamuwapo.

1 Tesalonika 5:25

Mikadepe dle so namkadulo, wua꞉ dia꞉ yilo inoma sumale yu himha꞉ha꞉iya.

2 Tesalonika 3:1

Mikadepe dle so namkadulo, God yuta mo hapuloma dla ma-hapele dlalemtlepo depame wua꞉ta dia꞉ yilo inoma sumale yu himme ha꞉ha꞉iya. Adipalati, di solotama, wua꞉tapo God yuye pato depame siyele mate hamuwaye, opa mo hapuloma dla ha꞉ha꞉ so ma epapelepo depame.

1 Timoti 3:16

Epedeme dita Yesu Keliso dla mikadepe depo ta kokoye pta koko pato. Adipalati, Ya꞉tapo oplami ikadepe moto hamsela꞉lati opata ya꞉ natiwapo. Epame Hela꞉dle Sokota ya꞉ye ka꞉dle oplami duwapo. Epame banakaka sota ya꞉ natiwapo. Epame opatapo ta꞉lamo hapuloma dla ya꞉ kokoye atlamsiyamalati opata ya꞉ dla mikadepe duwapo. Epame Godtapo ya꞉ye Pepele dimo dla ta꞉duwapo.

Palimon 1:22

Epame koko haleye ipo. Wua꞉tapo na꞉ta amtuwale aya tle alikili dla woyamelepo depame God dla inoma sumha꞉ha꞉mdepo. Epedeme Godta solotamelepiye, na꞉ alikili dla woyapame ma wua꞉ hala dla puluwepo. Epapedeme na꞉ta edla tame hallowe moye dinapene.

Hibulu 13:18

Epapedeme wua꞉tapo dia꞉ yilo God watle inoma sumale himme ha꞉ha꞉ kokoye melemiya. Epame di ma mikadepe dema, dita malamale sitalita dia꞉ dla dita batalimale koko halë halaye po-atlasema. Adipalati, di solotamde, alila hapuloma dulu dla woloma ka꞉ka꞉dle koko siyapo tlo halomha꞉ha꞉lowedeme.