2 Kolin 7:1 - Kamula

¹ Epedeme mikadepe dle so namkadulo, Godtapo yu itiyapo hatitimale hapuloma iye di watle ma-hapiwapo. Epapedeme di ka꞉dena, God wowota꞉mama di moto dla epo dita malamale dla ullu hutiye hapulomaye alikili a꞉ma pololepame woloma God mila꞉pi tle ka꞉depo ha꞉ha꞉lowa.

2 Kolin 7:1 Iomraidhean Croise

Ma꞉tiyu 12:33

“Epedeme dlomoko dali ka꞉dletapo dlomoko ka꞉ka꞉dle mimdepo. Epame dlomoko dali batalimaletapo dlomoko batalimale mimdepo. Epedeme dlomoko dali hapulomaye yia꞉ dlomoko tle malanatimdepo.

Ma꞉tiyu 5:48

Epedeme wua꞉ A Godta opa hapuloma sikemte bokotiyapo malamhalaye, mepammama wua꞉ ma opa hapulomaye bokotiyapo malamha꞉ha꞉iya.”

Ma꞉tiyu 5:8

Epame opa anawolotapo yia꞉ dupa dulu tle ullu pa꞉po ha꞉ha꞉ma꞉, wua꞉ sisiyeiya. Adipalati, wua꞉tapo God natilipe.

Taiya dle so 9:31

Mo hapuloma Yudiya dla epo Ga꞉lili dla epo Samaliya dla mikadepe dle so dla wotiyalle hapilowe kokota mo-pa꞉lati alikili so mate epo mikadepe dle so mate ma yimkata sadepo ha꞉ha꞉iyo. Epammama yia꞉ sosta itiyamama mikadepe dle sota pasataiyo. Adipalati, Hela꞉dle Sokota yia꞉ gadlati yia꞉tapo God wowota꞉mama ya꞉ yu dla salladepo ha꞉ha꞉iyo.

Loum 5:20

Epapedeme Godtapo opa dla ya꞉ aiyalma kokoye hamiwapo, yia꞉tapo yia꞉ta batalimale koko sikemte halomha꞉ha꞉ye malanatilipo depame. Epapele dulu dla batalimale kokotapo sikemte ta꞉mtlati asiyama Godta bokotiyapo malamale mape sikemte ma-a꞉ma ta꞉mtapo.

1 Kolin 6:20

Adipalati, Godtapo wua꞉ye asiyama pato mate me-elemuwapo. Epapedeme dita di moto mate koko halomdetapo God dla siyele hamilowe tlo ka꞉pi.

2 Kolin 1:20

Epedeme Godta di gadlowedeme yu itiyapo hatitimale hapulomaye Keliso tle mo-wowoyamuwapo. Epapedeme di God hi di dla ta꞉demama Yesu Keliso hi tle atlema, “eye ikadepepo,” demdepo.

Epeses 2:3

Epedeme ka꞉yapa dita hapulomatapo epapele so some ha꞉ha꞉mama mota solotamale koko halomolowe kokota dia꞉ye dokopala depo haluwapo. Epapele koko tle batalimale sotapo Godta kasilamale umula tamaluwa api edla di ma medla tamaluwapo.

1 Tesalonika 3:13

Epame di ma inoma sumale yu hale himima, di Lod Yesuta ya꞉ta sesa꞉le opa mate puale oloma edla wua꞉tapo mikadepe dle dulu dla kokalepo ha꞉ha꞉mama di A God mila꞉pi tle ullu pa꞉po ka꞉ka꞉dle so depo ha꞉ha꞉lepo depame.

1 Tesalonika 4:7

Ame adipalati, Godtapo di sisilamuwaye, ditapo batalimale dulu dla ha꞉ha꞉lepo depo po-apena. Amasiyama ditapo God mila꞉pi tle woloma ka꞉ka꞉depo ha꞉ha꞉lepo depame ya꞉ta di sisilamuwapo.

1 Tesalonika 5:23

Epedeme di inoma sumale yu himima, sadle hapilalo Godta meyelo wua꞉ye woloma aiyalma depo hallowe kokoye hamilipo depame. Epame di ma inoma sumale yu himima, di Lod Yesu Kelisota puale dla omtamama wua꞉tapo wua꞉ soko tle epo wua꞉ moto tle epo wua꞉ta malamale tle ullu pa꞉po ha꞉ha꞉lepo depame.

Hibulu 12:23

Epame mo edla Godta ka꞉yapa hohomale akimlala Pepele dimo dla yia꞉ hi hutiye so ma medla me-ha꞉ha꞉po. Epame opa hapuloma koko gladlalo God ma edla halapo. Epame God mila꞉pi tle ka꞉ka꞉depo ha꞉ha꞉mama palli so yia꞉nasama mape mo edla ha꞉ha꞉po. Adipalati, yia꞉ mape mo edla God tle pasakalo gadle halopo ha꞉ha꞉po.

Hibulu 12:28

Epedeme ditapo Godta di watle kokó hallalo mo hamilowe koko dla sisiyemama God dla wota꞉le mate ya꞉ hi di dla ta꞉dloweye ka꞉pi.

Hibulu 4:1

Epedeme Godtapo yu itiyapo himimama ya꞉ opatapo ya꞉ta hedlowe mo dinapele dla u-ulapo tulupo depo yu himiwata ala me-kokalepo elapo. Epapedeme wolomape, wua꞉ dulu dla oplami haleta po-ulatulalo wekelala.

Hibulu 6:9

Mikadepe dle so namkadulo, na꞉ mikadepe dema, na꞉ta yu ipo atlamale dulu dla na꞉ wua꞉ koko po-atlamasema. Adipalati, na꞉malamana, wua꞉ye God tle pasakalo gadle halowe so opata koko halomalalo epapele some halomha꞉ha꞉po.

Yeims 4:8

Epedeme wua꞉ God mateka꞉pi dla pumulaiya, epalati God mape wua꞉ mateka꞉pi dla pulupe. Epedeme bobtalimale so wua꞉, oplamitapo ya꞉ do ullu howahamdiye, wua꞉ ma epammama wua꞉ bobtalimale tle God dla heheletimaiya. Epame momalamale tatlalimale so wua꞉, wua꞉ dupa duluye howahalomaiya.

1 Pita 1:15

Epedeme wua꞉ sisilamuwa Godye aiyalmapo. Epapedeme wua꞉ mape koko hapuloma dulu dla mepo aiyalma depo ha꞉ha꞉iya.

1 Pita 1:17

Epapedeme wua꞉tapo God dla inoma sumha꞉ha꞉mama ya꞉ watle A demha꞉ha꞉mdepo. Amasiyama ya꞉tapo opa hapuloma yia꞉ kokoye glademama isikimi yia꞉ta halomha꞉ha꞉le koko mate ala꞉po gladlepe. Epapedeme wua꞉tapo ta꞉lamo hema asepe so some ha꞉ha꞉mama God wowota꞉le mate ha꞉ha꞉iya.

1 Pita 1:22

Epapedeme wua꞉ye watapo ka꞉dle yu dla salladepo ha꞉ha꞉ koko tle wua꞉ye mo-ullu pa꞉po ha꞉ha꞉po. Epedeme wua꞉ watapo bokotiyapo malamale dulu dla ha꞉ha꞉mama wua꞉ dupa dulu tle wua꞉ amkadulo mikadepe dle soye asiyama malama asiyama malama demha꞉ha꞉iya.

1 Pita 2:11

Mikadepe dle so namkadulo, wua꞉tapo ta꞉lamo hema ha꞉ha꞉mama asepe so some ha꞉ha꞉po. Epapedeme na꞉tapo wua꞉ye sikemte itiyamale mate atlema, wua꞉tapo wua꞉ mota solotamale koko dolumsiyamolowe dla aiyalma depo ha꞉ha꞉iya. Adipalati, mota solotamale kokotapo wua꞉ sokota solotamale koko mate opahale demhalapo.

1 Pita 5:10

Epedeme wua꞉ta alila kiyele dla wotiyalle dulu dla ha꞉ha꞉po gudlepiye, Godtapo wua꞉ye gademama kokalepo melepame itiyamale hamilipe. Adipalati, ya꞉tapo wua꞉ye sikemte bokotiyapo malamama Yesu Keliso tle kokó halepo hallalo hela꞉dle dulu dla ha꞉ha꞉lepo depame sisilamuwapo.

1 Yon 1:7

Amasiyama Godta hela꞉dle dulu dla halaye, epammama di ma hela꞉dle dulu dla ha꞉ha꞉lepiye, eta di mikadepe dle so hapulomaye hatlope depo ha꞉ha꞉mama apelepe. Epapalati Yami Yesu omalitapo di bobtalimale hapulomaye howahapame hiyostlepe.

1 Yon 1:9

Amasiyama epapele dulu dla dita di bobtalimaleye God dla bobotimatimelepiye, ya꞉tapo di bobtalimale hapulomaye howahapo wellipe. Adipalati, ya꞉tapo ya꞉ yu itiyapo himili e dolumama woloma ikadepe koko tlo halepe.

1 Yon 3:3

Epedeme koko hema opa anawolotapo dalemha꞉ha꞉mama omha꞉ha꞉ma꞉, ka꞉dena, yia꞉ta ullu pa꞉po Keliso some ha꞉ha꞉loweye.