1 Yon 2:23 - Kamula

²³ Epapedeme oplami antapo God Yami Yesuye pokoko demhalema꞉, ya꞉ dulu dla A God ma pohalasema. Amasiyama oplami antapo God Yami Yesuye ya꞉ dupa dulu dla ma-hamuwa, ya꞉ A God ma ma-hamuwapo.

1 Yon 2:23 Iomraidhean Croise

Ma꞉tiyu 11:27

Yesu ma opa watle epo atlaiyo, “Na꞉ Atapo koko hapulomaye na꞉ watle ma-halopiwapo. Oplami haletapo Yamiye poya꞉malamana. Amasiyama hatlo A tlo Yamiye ya꞉malamana. Epame oplami haletapo Aye poya꞉malamana. Amasiyama hatlo Yami tlo Aye ya꞉malamana. Epame opa anawolo dla Yamita A kokoye botomastlowe solotamelepiye, opa ewoloye A kokoye yia꞉ ma malamelepe.

Ka꞉dle molo atlale yu Lukta ilimale 10:22

Na꞉ Atapo koko hapulomaye na꞉ watle ma-halopiwapo. Epedeme oplami haletapo Yamiye poya꞉malamana. Amasiyama hatlo A tlo Yamiye ya꞉malamana. Epame oplami haletapo Aye poya꞉malamana. Amasiyama hatlo Yami tlo Aye ya꞉malamana. Epame opa anawolo dla Yamita A koko botomastlowe solotamelepiye, opa ewoloye A kokoye yia꞉ ma malamelepe.”

Ka꞉dle molo atlale yu Yonta ilimale 10:30

Epapele dulu dla na꞉ mate epo A mateye hatlopepo.”

Ka꞉dle molo atlale yu Yonta ilimale 16:3

Epedeme yia꞉tapo koko ipapeleye wua꞉ dla halomha꞉ha꞉lepe. Adipalati, yia꞉ye na꞉ A koko mate epo na꞉ koko mate poyia꞉malamana.

Ka꞉dle molo atlale yu Yonta ilimale 17:3

Epapedeme halepo halepo pasakalo kokoye wa꞉ koko malamolowe kokopo. Adipalati, wa꞉ye God ikadepe halapo. Epame halepo halepo pasakalo eye wa꞉ta tane dle oplami Yesu Keliso koko malamolowe kokopo.

Ka꞉dle molo atlale yu Yonta ilimale 5:23

Epapele dulu dla Atapo koko i hauwapo, opatapo A dla heodemama sisiyemdiye, epammama yia꞉ta Maseyemala dla ma heodepo sisiyelepo depame. Epapedeme oplami antapo Maseyemala dla heodepo siyele pohamilalo halema꞉, ya꞉ye A God ya꞉ tane dle oplami dla mape heodepo siyele pohamimhalasema.

Ka꞉dle molo atlale yu Yonta ilimale 8:19

Epalati asiyama Pa꞉lisi sota ya꞉ watle epo atlaiyo, “Wa꞉ a da꞉?” diyo. Amasiyama Yesutapo yia꞉ watle epo atlaiyo, “Wua꞉ ala na꞉ A koko mate epo na꞉ koko mate pomalamalalo ha꞉ha꞉pa? Wua꞉ na꞉ koko malamaleta ammatiye, eta na꞉ A koko mape wua꞉malamelemla,” diyo.

1 Yon 2:22

Epapele dulu dla anaye isikimi mala-atlalo oplami demdi? Eye oplami antapo Yesuye po-Keliso dlalo halema꞉, epapele oplamiye isikimi mala-atlalo oplami demdepo. Epedeme ya꞉tapo Keliso dla humatlalo oplami halapo. Adipalati, ya꞉tapo A God mate Yami mate dla pokoko desemde.

1 Yon 4:15

Epedeme oplami antapo Yesuye God Yami dlepiye, Godta ya꞉ mate halapo. Epalati ya꞉ mape God mate halapo.

1 Yon 4:2

Amasiyama wua꞉ yia꞉ta imale dulu dla God ya꞉ Soko kokoye ipo malanatilipe. Yia꞉ta imaleta atlemama, Yesuye God tle malame oplami moto hame ta꞉lamo hema haluwa, dlepiye, eta yia꞉ta imale kokoye ikadepe God tle puapo.

1 Yon 5:1

Epedeme oplami antapo Yesuye Godta sale Keliso dlepiye, ya꞉ye God yamipo. Epame oplami antapo Aye sikemte malahallepiye, ya꞉ mape A Yamiye sikemte malahalapo.

1 Yon 5:20

Epame di ma dimalamana, God Yamitapo mo-puwapo. Epame ya꞉tapo di watle ka꞉depo malamaleye ma-hamiwapo, ditapo ikadepe God koko tlo malastlepo depame. Epedeme ditapo ikadepe God mate epo Yami Keliso mate hatlope depo ha꞉ha꞉po. Epedeme Yesuye ikadepe Godpo. Epapedeme ya꞉ dla halepo halepo hallowe pasakalo kokoye elapo.