Zozué 8:1 - ꞌRe Ihâimana Uꞌâsi Mono Zadawa Wasuꞌu

¹ Tawamhã te Uburé Danhib'apito hã tinha ãne, Zozuéhé ma: — Aipahi tõ! Sada asib'ru na! Uburé ate dasi'wapéi 'manharĩ'wa norĩ me, 'ri nho'u Ai zada, asõré pese na ai'aba'réi wa'aba. Wa hã wa za ta norĩ nhib'apito ãma i'ai'uté za'ra wa'aba zéb da hã aipawaptob za'ra wa'wa. Tahawa asib'ratab za'ra wa'aba, wa za Ai ãma a'uwẽ norĩ hã duré 'ri nho'u hã, duré isipti'a za'ra zama aima sõmri za'ra wa'wa.

Zozué 8:1 Iomraidhean Croise

Salmu 44:3

Wahi'rata norĩ hã sib'ézé i'wa pa nai õ di, ti'a te te siwi dawi i'âri hã. Duré tinhiptete nai õ di, te te da'ãma i'ai'uté za'ra hã. Ta norĩ hã aiwaihu'u pese na si, duré asiptete na si duré ai'ãma rowa'a na si ma tô da'ãma ai'uté za'ra. Ãne zarina, ma tô a hã asimizawizé hã ãma ihâi'ré za'ra.

Daniéu 2:21

Õhõ si te za niha hã we 're iromhâimana mono zém na hã te te ãma 're azaprĩ. Õhõ si te za duré apito da hã te te 're da'a'maza. Õhõ si te za duré apâ te te 're da'azani. Duré õhõ si te za rowaihu'u pese 'wa norĩ ma hã rowaihu iwẽ hã te te tãma 're anhomri. Õhõ si te za duré i'rã nhimiza'rese norĩ ma hã isimiza'rese wẽ hã te te tãma 're anhomri.

Daniéu 4:25

Tawamhã a'uwẽ 're ihâimana za'ra mono zém hawimhã te za aiwazere ni. Tahawa, te za oto abaze norĩ siré 're aihâimana mo. Te za du na 're asai mo oto, powawẽ du te te 're ihuri mono ne. Duré romnhiwasi te za 're asõtõ mo. Te za atébré hã te te 're aihâiba waihi. Ãne na 're aihâimana mono ré hã, te za 7 na ai'ãma tiwahu. Taha parip si, te za a hã asimirosa'rata na apâ asina isi, uburé danhipai u isiptede 'Re ihâimana u'âsi mono, daro mono bâ uburé da'rãnho'õmo norĩ nhimi'madâ'âzém nhipai u siptete na te te 're ida'a'madâ'â mono na hã, duré da'rãnho'õmo norĩ nhimi'madâ'âzéb da, te te sima iwẽzéb zarina te te dama 're i'apisutu mono na hã.

Daniéu 4:35

Õhõ nhiptetezé ma hã tarére marĩ dai õ di, daro mono bâ 're idahâimana za'ra mono hã. Ta hã te duré uburé hâiwa ãma romhuri'wa norĩ hã, duré ti'ai ãma 're idahâimana za'ra mono norĩ hã pire na te te 're ab'madâ'â. Ni'wa hã te te duré tiwi 're rosawi waihu'u mono õ di, te te sima iwẽzéb zarina marĩ te te 're i'a'manharĩ mono da hã. Duré ni'wa hã te te tãma 're a'rui waihu'u mono õ di, marĩ te te 're i'ab'manharĩ mono zé hã te te ãma dama 're i'arowasu'u mono da hã.”

Mateu 8:26

Tawamhã Zezusi te tãma nharĩ za'ra ãne: — E marĩ da, ma aipahi za'ra wa'wa. E ĩ'umnhasi za'ra wa'aba ãna. Tawamhã ma tô wahudu, Zezusi hã. Wahutu wamhã, ma tô rowa'u'u ma, duré â sisasisi ma zama hã tinha, te te sazâri da hã. Taha wamhã, ma tô sazâ, rowa'u hã. Ma tô duré oto ti'âtu.

Zozué 1:9

Ĩnhimirowaihu'u na aima hã, ma'ãpé ãma aipo're pu'u: “Asiptete, duré asib'ru na! Aiwi robzei'õ tõ, duré aipahi tõ! E marĩ wa. Wa hã Uburé Danhib'apito, ate 'Re ihâimana u'âsi mono, nimomo 're ane mono sidâpâsi, wa za asiré 're ĩhâimana.”

Zozué 10:7

Tawamhã Zozué, tite dasi'wapéi 'manharĩ'wa norĩ me Gilga hawi ma tô uburé tipra.

Zozué 10:8

Tawamhã Uburé Danhib'apito, te Zozuéhé ma tinha, ãne: — Ã hã apito norĩ ma hã aipahi za'ra tõ. Wa hã wa tô aima sõmri siromo za'ra, asib'ratamhã. Tahawa ta norĩ hã tihâiba na te te aima wa'rãmi waihu'u za'ra õ di za.

Zozué 2:24

Ãne ma te rowasu'u na hã ãma tãma 'rãsutu zahuré: — Uburé Danhib'apito hã, õ hã ti'a uburé te te wama isõmri za'ra zém na hã wa tô wa norĩ hã sena na waihu'u ni. Tahawa ma tô õmemhã uburé pese wama tapahi pese za'ra ni.

Zozué 6:2

Tawamhã Zozuéhé ma, te Uburé Danhib'apito hã tinha, ãne: — Ma'ãpé waihu'u! Zerico hã wa tô aima tisõ asib'rata, isib'apito hã, duré ite dasi'wapéi 'manharĩ'wa isib'ru norĩ hã.

Zozué 7:9

Cananeu norĩ hã duré uburé ã hã ti'ai 're, 're idahâimana za'ra mono norĩ hã ãne na te te waihu'u za'ra wamhã, te za siwi wa'uirĩ. Duré te za tawamhã uburé siwi wa'uprosi za. Ãne wamhã, e marĩ te za asisi za'ẽtẽ ma ropibu ma hã i'manha.