Zozué 7:24 - ꞌRe Ihâimana Uꞌâsi Mono Zadawa Wasuꞌu

²⁴ Tawamhã Zozué, uburé Izaraéu nhihudu norĩ me hã ma tô siwi pa'ubumro, Acã hã. Duré ẽtẽ waipo prã prata, da'uza ihâpa, ẽtẽ waipo pré oru, i'ra si'aibâ norĩ, i'ra sipi'õ norĩ, duré ite powawẽ norĩ, awaru po're pore norĩ, pone'ẽrebâire norĩ, isib'ri, duré uburé pese isimarĩ norĩ hã ma tô siwi 'wasa, Aco na romharé nhisi u hã.

Zozué 7:24 Iomraidhean Croise

Zenezi 18:25

'Re idanomro wasété mono zu, dawẽ na 're idahâimana za'ra mono i'uprosi da hã te ãma rosa'rata waihu'u õ di, dasine tiwasédé te te 're 'manharĩ za'ra mono õ nherẽ. Asimirob'manharĩzéb uwaibaba õ di, ãne hã. E marĩ wa. A hã uburé pese da'ãma 're irowairébé mono 'wa te 're aihâimana mo. Tahawa te za i'uwaibaba na si niha na dama 're i'ab'manharĩ mo.

Ezodu 20:5

Romhâiba nho're aihi'rãtitõ tãma 're asimroi wa'aba mono tõ. Ãma 're aiwata za'ra wa'aba mono tõ. E marĩ wa. Wa hã Uburé Danhib'apito, ate wa'wa 'Re ihâimana u'âsi mono. Ĩ'upana aimawi ihâiba'õ norĩ ãma dawata da hã ĩma 'ru ti. Ĩzada 're isiti'rui wairébé za'ra mono norĩ hã, wa te te 're hâ za'ra, isihudu 'ra norĩ hã, duré isihudu 'ra i'ra norĩ u zama, maparane si'uiwa na dapodo ihâimana u hã.

Provébiu 15:27

Ni'wa senai õ na 're ihâimana mono zéb zarina, marĩ zô si sima 're rĩtĩ mono wamhã, te za ropire hã isõrõwa 're, 're ihâimana za'ra mono norĩ ma hã te te 're azani. Tane nherẽ, ni'wa dama rowairébézéb da, dama ipire norĩ ma, pi'uriwi danhibzari te te siwi 're awẽ'õ mono wapsi, te za tô rowẽ na hã 're hâimana hâ.

Zozué 6:18

Tane nherẽ, marĩ hã asiwi uprosi aba da, te aima i'ru za'ra wa'wa hã asiwi waibui wa'aba õ di za. 'Mai'âri aba wamhã, te za ropire hã duré ropsi'utõrĩzé hã asina i'mai'ãwisi 'wa, Izaraéu nhihudu norĩ te 'ri nhoré u hã.

Zozué 6:21

Ma tô duré tinhi'wa na aibâ norĩ hã, pi'õ norĩ hã, ai'uté norĩ hã duré ihi norĩ hã te te siwi simro, 'ri nho'õmo wa, uburé 're ihâimana za'ra mono norĩ hã. Ma tô duré te te siwi simro, powawẽ norĩ zama hã, pone'ẽrebâire, duré awaru po're pore.

Zozué 7:1

'Re ihâimana u'âsi mono ma tô aré tãma roti siromo za'ra, Izaraéu nhihudu norĩ ma, 'ri nho'õmo 're uburé marĩ za te te iprub za'ra hã ni'wa te te sima 'maihiri tõ da. Tane nherẽ, aihĩni pese te te ãne hã sima tété za'ra õ di. Acã hã ma tô marĩ simi'u. Tahawa ma tô Izaraéu nhihudu norĩ zada Uburé Danhib'apito hã tinhiti'ru za'ra. Acã hã, Carmihi 'ra, Zabdihi nhihudu, duré Zeraha nhihudu, Zudaha nhihudu norĩ hawi a'uwẽ.

Zozué 7:23

Tawamhã romhâ 'manharĩ na 'ri hawi te te siwi sani za'ra wamhã, Zozuéhé ma, duré uburé Izaraéu nhihudu norĩ ma, te te siwi 'wasari wamhã, ma tô siwi sa'ra, 'Re ihâimana u'âsi mono Uburé Danhib'apito nho'remhã.

Zozué 7:26

Taha parimhã ma tô isisiwimhã ẽne siwi sa'ra 'rãihâ pese. Zahadu te ãhã na tamemhã ẽtẽ za'ra 'rãihâ hã 're hâimana. Tahawa taha romnhisi hã, “Dama marĩ 'manharĩ wasétézém na Romharé” te zahadu ãhã na da te ãma 're rowamri za'ra. Tawamhã Uburé Danhib'apito nhiti'ruzé hã ma tô oto sa're.