Zozué 7:21 - ꞌRe Ihâimana Uꞌâsi Mono Zadawa Wasuꞌu

²¹ Marĩ hã te iwaibu za'ra 'remhã, wa tô Babilonia hawi da'uza ihâpa iwẽ hã 'madâ. Duré ẽtẽ waipo prã prata zama wa tô 200 na iwa'õno hã 'madâ, duré ẽtẽ waipo pré oru aiwa ãma isipo'o na ipire pibuzém na hã. Ã norĩ hã ĩma 'ruiwapari za'ẽtẽ wa, wa tô ĩsima sa'ra za'ra. Ĩte romhâ 'manharĩ na 'ri 're, te daba'wara simi'uri pese na, ti'ai 'rowi. Da'rowimhã prata hã te duré daba'wara.

Zozué 7:21 Iomraidhean Croise

Zenezi 10:10

Tawamhã dama i'rãnho'õmo na 're ihâimana mono na hã ma tô sãna'rata, 'rinho'u Babilonia ãma, duré Erequi na 'ri nho'õmo nhisi ãma, duré Acade na 'ri nho'õmo nhisi ãma, tô Sina na romnhisi ãma si'ubdatõ 'ri nho'u 're ihâimana za'ra mono ãma hã.

Zenezi 3:6

Tawamhã pi'õ te rowede iwẽ na hã 'madâ. Duré i'rã da te 're ihuri mono da hã te 'madâ'â ze na hã sima 'madâ. Tahawa, ma tô 'râwi duré sina rosa'rata, te te 'rẽne wamhã, za simiza'rese na rowaihu'u wẽ na 're ihâimana mono na hã. Tahawa, ma tô 'mata. Ma tô ti'rẽ. Taha pari, ma tô timro ma tisõ. Tawamhã taha zama ma tô duré oto ti'rẽ.

Zenezi 34:27

Tawamhã dapãrĩ hâimana pari, Zacoho 'ra hâiba amo norĩ, ma tô 'ri nho'õmo 're marĩ iwa'âbâ za'ẽne 're ihâimana za'ra mono hã siwi waibu, ihidiba za'ra, aibâ te te ihâiba wamnarĩ wa'rãmimhã.

Zenezi 6:2

ma tô 'Re ihâimana u'âsi mono 'ra norĩ, pi'õ wẽ uptabi na 're ihâimana za'ra mono na te te sima 're 'madâ'â ze za'ra. Tahawa ma tô duré te te sima 're iwẽ za'ra mono zéb zarina te te sima 're pisutu za'ra, ãma 're mro za'ra mono da.

Salmu 119:37

Ma'ãpé tarére marĩ 're ihâimana za'ra mono te 're a'madâ'â tõ mono da, ĩtõmo ré, 're ĩ'rã pizari mono. Iwẽ hã ĩma 're 'manharĩ u'âsi mono, iropisutuzéb zarina.

Ezodu 20:17

— Asiré nhorõwa hã 're 'ruiwapari za'ra wa'aba mono tõ. Duré asiré mro hã 're 'ruiwapari za'ra wa'aba mono tõ, pawa'âbâ ãna tãma romhuri'wa norĩ zama, ite powawẽ hã, duré ite awaru po're pore hã. Siwa'ru uburé marĩ tãma 're ihâimana za'ra mono hã 're 'ruiwapari za'ra wa'aba mono tõ.

Provébiu 1:19

Ãne te za tinhipãrĩ zarina isisimarĩ pese ma hã tiromhâiba: Te za tô 'râwi tihâimanazé hã siwi uprosi.

Provébiu 23:31

Uwa 'rãi wa'u isé hã asima 'madâ'â ze tõ, wa'u pré wẽ nherẽ, hâsizé 're si'ubuzi wẽ nherẽ, duré dazadai'ré 'remhã wara wẽ nherẽ.

Provébiu 28:22

Isõti hã te waptu na 're isisimarĩ pese za'ra mono da si, tinhimarĩ zô sima 're sõpré. Tane nherẽ, sisõwamhã te te rob'madâ'â waihu'u õ di, za isimarĩ'õzé bâdâ ipire, sô iwisizé hã.

Provébiu 4:23

Ma'ãpé marĩ na asimirosa'rata na hã ãma 're pibui pese mono. E marĩ wa. Asimirosa'rada hã aihâimanazé zaprõni'wai wa.

Luca 12:15

Tawamhã te uburé dama tinha, ãne: — Ma'ãpé, ĩwapari pese za'ra wa'aba. 'Râwi te za 're asi'madâ'â za'ra wa'aba mo, asimarĩ ahâ zô, 're rob'ruiwapari za'ra wa'aba mono tõ da. Danhimarĩ ahâ uptabi nherẽ, robze u'âsi, ãma 're danomro mono õ di za, rowẽzéb õ wa, ta hã.

Éfézu 5:3

A norĩ wa'wa hã 'Re ihâimana u'âsi mono nhib'a'uwẽ 're anomro aba mono nherẽ, siwa'ru aiwasédé hã 're 'manharĩ za'ra wa'aba mono õ di za, pi'õ na, duré aibâ na zama. Duré aihâimana nhiséb'õ na 're anomro aba mono õ di za. Duré danhibrom na 're da'ruiwapari za'ra wa'aba mono õ di za, ta hã i'uwaibaba õ wa 're idahâimana wasété za'ra mono zé hã.

Éfézu 5:5

Tahawa, te za oto iwaihu'u za'ra wa'wa, ãne: Sina 're isimisaihuri za'ra mono norĩ hã, duré dahâimana nhiséb'õ na 're inomro mono norĩ hã itẽme 're sisisi mono õ di za, 'Re ihâimana u'âsi mono u hã, duré Cristuhu u hã, da'ãma 're isib'a'uwẽ zahuré mono zéb u hã. Duré danhibrom na te te 're ida'ruiwapari za'ra mono norĩ zama itẽme 're sisisi mono õ di za, marĩ zô si te te sima 're rosa'rata u'âsi za'ra mono wa ta norĩ hã, 'Re ihâimana u'âsi mono upana. Tahawa, duré ta norĩ hã marĩ iwẽ na tinhib'a'uwẽ norĩ ma te te iropisutuzéb ré, 're hâimana za'ra mono õ di za.

Colosu 3:5

Ti'ai ãma isazei'õ'wa norĩ hâimanazéb zarina, marĩ wasété zô 're irob'ruiwapari za'ra wa'aba mono zé hã te za 'râwi asiwi 're i'uprosi pese za'ra wa'aba mo, 're dadâ'â za'ra mono wa, marĩ zô da te oto 're irob'ruiwapari za'ra mono õ ne. Pi'õ na aibâ na zama siwa'ru aiwasédé, 're i'manharĩ za'ra wa'aba mono zé hã te za 'râwi 're i'uprosi pese za'ra wa'aba mo asiwi, duré asisô 're irowasutu za'ra wa'aba mono zé hã, duré marĩ wasété zô si asima 're irob'ruiwapari za'ra wa'aba mono zé hã, duré danhipai u asibro pese na 're aihâimana za'ra wa'aba mono da, marĩ zô si asima 're i'asõpré wa'aba mono zé hã. Ãne hã 'Re ihâimana u'âsi mono ma, wẽ õ di, marĩ zô i'upana asima 're irob'ruiwapari za'ra wa'aba mono zé hã. Tahawa, te za tô uburé aiwasédé hã asiwi 're i'uprosi pese za'ra wa'aba mo, aiwi 're si'utõrĩ pese za'ra wa'aba mono wa, 're anomro wẽ wa'aba mono da oto.

Hebreu 13:5

Rob'uiprazéb zawizé, te te aima 're roti za'ra wa'aba mono tõ da, tãma asina 're rowairébé za'ra wa'aba mono õ di za. Asibro hã aima 're ihâimana za'ra wa'aba mono na si, te za asima 're irowẽ za'ra wa'aba mo. Duréihã 'Re ihâimana u'âsi mono hã ma tô ãne dama sina ropisutu: “Niwamhã te airẽme za'ra wa'aba õ di za. Duré asiwaprosi 're aihâimana za'ra wa'aba mono da, asiti za'ra wa'aba 're ĩhâimana waihu'u mono õ di za.”

Tiagu 1:15

Tawamhã dawasété na da te dasima ãma 're rosa'rata wasété za'ra mono wamhã, dawasédé hã dasi'uihâ na te za da te 're 'manharĩ za'ra. Tawamhã õne u'âsi 're danomro mono wamhã, te za 'Re ihâimana u'âsi mono nhiti 're dahâimana u'âsi za'ra, rowẽ isi'utõrĩ'õ nhiti.

Zozué 7:20

Tawamhã Acã, ma tô sada'â, ãne: — Ĩhe, tô sena wa tô ĩwasété, Uburé Danhib'apito Izaraéu nhihudu norĩ te 'Re ihâimana u'âsi mono wi. Tahawa wa za tô aima wasu'u, marĩ te i'manharĩzé hã.

Zozué 7:22

Tawamhã Zozué, Acãhã nhorõwa u sa'ẽtẽ sisa'rei mono da hã, ma tô ni'wam norĩ aibâ ma hã, rob'ru za'ra. Tahawa, ta norĩ hã ma tô sena na marĩ ti'ai 'rowi isimi'wara hã siwi tisã, duré da'rowi prata isimi'wara hã.

2 Pedru 2:15

Ta norĩ hã ma tô 're idanomro wẽ mono zé hã rẽme za'ra, Balaã hã 're imorĩzéb zarina, oto 're nomro mono da. Balaã hã Be'oho 'ra. Duréihã ma tô Balaã hã sima wẽ, rob'uiprazé hã da te tãma sõmri da, isimiromhuri wasété wa'rãmi.