Zozué 6:23 - ꞌRe Ihâimana Uꞌâsi Mono Zadawa Wasuꞌu

²³ Ãne te te tãma nharĩ zahuré wamhã, ma tô wapsãi'a'wa norĩ hã Ra'abihi nhorõwa u tizasi zahuré. Tawamhã Ra'abi hã ma tô wazere zahuré, imama, ina, isisãnawã norĩ, duré uburé isõrõwa 're, 're ihâimana za'ra mono norĩ hã. Uburé pese isõrõwa 're, 're ihâimana za'ra mono norĩ, 'ri hawi te te azani zahuré wamhã, ma tô duré Izaraéu nhihudu norĩ te, romhâ 'manharĩ na 'ri mana u hã da'a'ãwisi zahuré.

Zozué 6:23 Iomraidhean Croise

Zenezi 12:2

Tawamhã asihudu sidâpâsi ahâ uptabi na 're hâimana za'ra mono da hã, wa hã wa za pisutu, a'uwẽ misi ãma isitom na dama siptete na 're hâimana za'ra mono da. Duré iwẽ uptabi hã wa za te aima 're anhomri u'âsi. Duré uburé dama hã asisi wasu'u za'ẽtẽ di za. Tawamhã iwẽ hã te aima 're i'apisutu mono zéb u'âbâ, te za duré a hã iwẽ na hã 're ida'apawapto mo.

Zenezi 18:24

Bété 50 na 'ri nho'õmo 're, dawẽ norĩ dahâimana za'ra wamhã. E tane nherẽ, te za 'ri nho'u hã iré i'uprosi za'ra. E 50 na dawẽ norĩ aima isawi pe ihâimana za'ra zéb zarina, asimihâzé hã bété 'ri nho'õmo ma, ba'a õ di za.

Zenezi 19:29

Ãne 'Re ihâimana u'âsi mono, romharé na 'ri nho'õmo norĩ ãma ma tô da'uprosi. Tane nherẽ, ma tô Abra'ã ãma hã po're puru. Tahawa Lo, 'ri nho'õmo 're, 're ihâimana mono zéb ãma te te da'uprosi wamhã, dazu dâ'â tõ da hã, ma tô tinhimihâzé wi hã waze.

Zezusihi zadawa wasuꞌuꞌwa norĩ nhimiromhuri na robꞌuiꞌéré 10:28

Tawamhã Pedru hã te te da'madâ'â wamhã, te dama tinha, ãne: — A norĩ wa'wa hã ma tô iwaihu'u pese za'ra wa'wa, 're iwahâimana za'ra mono zém na hã. Wa norĩ hã zudeu norĩ hã, zudeu'õ norĩ nhorõwa u 're wanhisisi waihu'u mono õ di. Wa norĩ hã 'Re ihâimana u'âsi mono nhib'a'uwẽ 're wahâimana za'ra mono wa, wa tiwi 're wasi'uwati pese za'ra, zudeu'õ norĩ wi. Ãne 're iwahâimana za'ra mono zé hã. Tane nherẽ, 'Re ihâimana u'âsi mono hã ma tô ĩma waihu'u pese oto, ni'wa, iwẽ na 'Re ihâimana u'âsi mono te te ĩma wasu'u wamhã, zudeu'õ nherẽ, te ĩsiwi wẽ'õ tõ da. Ãne ma tô ĩma waihu'u.

Zezusihi zadawa wasuꞌuꞌwa norĩ nhimiromhuri na robꞌuiꞌéré 27:24

Te ĩma tinha, ãne: “Paulu, aipahi tõ. Tô sena Roma ãma apito Sézaha nho're te za asa, asi'uihâ na tãma asiwasu'u da. 'Re ihâimana u'âsi mono hã aima isõprubzéb zarina ma tô pisutu, aihĩni asiré isi'aba'ré norĩ hã aiwi dâ'â za'ra tõ da.” Ãne ma tô ĩma tinha.

1 Corĩtu 5:12

Wa norĩ hã wasiré isazei'wa norĩ hã, isazei'õ'wa norĩ hâimanazé, wa te wasiwi 're waihu'u za'ra mono wa, wa te wasiwi 're iwẽ'õ za'ra mono da hã, 'râwi 're wasipisutu za'ra mono õ di za. Mare di. 'Re ihâimana u'âsi mono si, te za Zezusihi zazei'õ'wa norĩ hã te te 're awaihu'u, te te siwi 're i'awẽ'õ mono da hã. E tawamhã, ni'wam norĩ hã rowahutu u asiré 're asi'rã'õtõ aba mono nherẽ, marĩ iwasédé hã te te 're i'manharĩ za'ra mono zéb zarina, asiwi 're wẽ'õ za'ra wa'aba mono õ di za. Te za tô asiwi 're iwẽ'õ za'ra wa'aba mo, asiré 're aihâimana za'ra wa'aba mono wa. Duréihã 'Re ihâimana u'âsi mono zadawa 'mahârâ'wa hã ma tô ãne na ãma rob'ui'éré, ibaihâ na hã: “Ni'wam norĩ hã 're nomro wasété mono wamhã, te za oto asisiti tãma 're irob'ru za'ra wa'aba mo, asiré wa'aba 're hâimana za'ra mono tõ da.”

Hebreu 11:31

Duré Ra'abi hã pi'õ aré iwa'âbâ zô 're isisõmri mono hã, 'Re ihâimana u'âsi mono si te te sina 're i'umnhasi mono zéb zarina, ma tô wapsãi'a'wa norĩ hã tinhorõwa u 'mazasi wẽ zahuré, ti'ai wẽ zô pi'uriwi dama robzabui'wa norĩ hã. Tahawa, 'Re ihâimana u'âsi mono hã te te dazu wĩrĩ õ di Ra'abi hã, 'ri nho'õmo ãma uburé 'Re ihâimana u'âsi mono nhimiroti 'madâ'â'õ'wa norĩ zu hã.

Hebreu 11:7

Nowé hã, 'Re ihâimana u'âsi mono si te te sina 're i'umnhasi mono zéb zarina, ma tô duré ãma saze, ropipa hã za dazô iwatobrozém na 'Re ihâimana u'âsi mono hã romhâ ré te te ãma ipo're pu'uzém na, zahadu marĩ hã titõmo na te te 'madâ'â õ nherẽ, Nowé hã. Tahawa, isimiroti zarina ma tô uba're za'ẽne hã 'manha, ti'ra norĩ hã te te ãma sõ'reptu za'ra da, duré timro zama hã, duré tisani'aba norĩ zama hã te te ãma sõ'reptu za'ra da. Taha zarina, ma tô 'Re ihâimana u'âsi mono hã siwi da'awẽ'õ pese, dawasété na si 're dahâimana za'ra mono wa, Nowéhé si isimiroti hã te te 're 'madâ'â pese mono wa. Tawamhã Nowé hã, 'Re ihâimana u'âsi mono si te te sina 're umnhasi mono wa, ma tô 'Re ihâimana u'âsi mono hã ãma tiwata, ãne: “Ãhã si te 're timorĩ wẽ.” Ãne 'Re ihâimana u'âsi mono hã, Nowéhé ãma iwatazé wasu'u hã.

Zozué 2:13

Ma'ãpé ĩmama hã sõ'reptui wa'aba, ĩna me, ĩsisãnawã norĩ hã, ĩsisãnawã sipi'õ norĩ hã, duré i'ra za'ra norĩ hã. Da te wa'uprosi tõ da ma'ãpé wa'madâ'â pese aba za.

Zozué 2:16

Tahawa, te ãne tãma nharĩ zahuré: — Ẽtẽ u ane wa'aba. Ane wa'aba õ wamhã, aibâ norĩ, asô wa'aba isõpré mono hã te za siwi asãmri 'wa. Õme si'ubdatõ bâtâ na aima'uri aba sina aihâimana aba, we apâ isi'aba'rézéb u. Taha parip si te za oto ane wa'wa.

Zozué 2:18

Nimahã na oto asipti'ai u wanhisisi wamhã, te za zazahâ hâiwaré ihâpré hã zanela 'ri zadazâri ãma iwasi, wa te isi'razéb ãma. Duré asõrõwa 're, ubumro na za aimama norĩ hã, ana, asisãnawã norĩ hã, duré uburé aimama sisãnawã siwadi norĩ hã. Ãne wapsi, wa za ãma aima uwaimrami ni, wanhimiropisutuzé hã.

Zuize 1:25

Tawamhã 'ri nho'õmo tẽme 're idanhisisi mono zé hã, ma tô tãma hâi'ré za'ra. Ãhã wa, ta norĩ oto sisisi wamhã, ma tô uburé 'ri nho'õmo 're, 're ihâimana za'ra mono norĩ hã siwi uprosi. Ãhã wa, õhõ si aibâ te te siwi wĩrĩ õ di, ime ihâimana za'ra me.