Zozué 10:25 - ꞌRe Ihâimana Uꞌâsi Mono Zadawa Wasuꞌu

²⁵ Tawamhã Zozué te duré ãne tãma nharĩ za'ra: — Aipahi za'ra wa'aba tõ. Duré aiwi robzei'õ za'ra wa'aba tõ. Asiptete za'ra wa'aba, duré asib'ru za'ra wa'aba. E marĩ wa. Uburé Danhib'apito te za ãne hã tinhitob'ru norĩ ma te te 're ab'manharĩ, uburé za asiwi 're i'wapé za'ra wa'aba mono norĩ ma.

Zozué 10:25 Iomraidhean Croise

Roma 8:37

E tawamhã, uburé marĩ iwasédé hã wazada 're ihâimana za'ra mono zéb zarina, te za Cristu te te 're iwa'azawi pese mono zé hã wawi 're si'utõrĩ za'ra. Mare di. Uburé marĩ na da te wama 're rob'manharĩ wasété za'ra mono da nherẽ, ta hã te te 're iwa'azawi pese mono, te za te te 're wa'apawapto, Cristuhu si, wanhitob'ru norĩ ãma wa te ãma 're ai'uté pese za'ra mono da.

2 Corĩtu 1:10

Ta hã ma tô wanho'reptu tô, wadâ'âzém hawi, wa te wasina romnhimimnhasi uptabi nherẽ. Taha zarina, te za te te 're wanho'reptu duré, wazada 're iromhâimana wasété mono zém hawimhã. Tahawa, wama umnhasi uptabi di, 'Re ihâimana u'âsi mono hã te te 're iwanho'reptui mono da hã.

Éfézu 6:10

Wa za oto roti na aima 'rãsutu za'ra wa'wa. A norĩ wa'wa hã Wanhib'apito siré si te 're aihâimana za'ra wa'aba mo. Tahawa, Wanhib'apito ma si iwaihu'upe hã sa'ẽtẽ na tãma 're hâimana mono wa, te za iwaihu'u pese zarina aihâimana nhiptete sina 're anomro aba mo.

Zozué 1:6

Asiptete, duré asib'ru na, a hã za ã hã a'uwẽ norĩ hã simroi mono dâ'âsina, ti'a te te siwi âri da hã, ihi'rata norĩ ma, te tãma ãma iropisutu za'ra hã.

Zozué 1:9

Ĩnhimirowaihu'u na aima hã, ma'ãpé ãma aipo're pu'u: “Asiptete, duré asib'ru na! Aiwi robzei'õ tõ, duré aipahi tõ! E marĩ wa. Wa hã Uburé Danhib'apito, ate 'Re ihâimana u'âsi mono, nimomo 're ane mono sidâpâsi, wa za asiré 're ĩhâimana.”

Zozué 10:8

Tawamhã Uburé Danhib'apito, te Zozuéhé ma tinha, ãne: — Ã hã apito norĩ ma hã aipahi za'ra tõ. Wa hã wa tô aima sõmri siromo za'ra, asib'ratamhã. Tahawa ta norĩ hã tihâiba na te te aima wa'rãmi waihu'u za'ra õ di za.

1 Samuéu 17:37

Wanhib'apito 'Re ihâimana u'âsi mono hã ma tô nasi ĩnho'reptu, hu'u zérépa wi, duré ursu wi. Tane te za duré ĩnho'reptu, ã hã filisteu te 'wapéi wamhã. Tawamhã Sau ma tô ãma sada'â ãne: — Wẽ di tô. Aimorĩ. 'Re ihâimana u'âsi mono si asiré hâimana da hã wẽ di, ĩma hã.