Zozué 1:8 - ꞌRe Ihâimana Uꞌâsi Mono Zadawa Wasuꞌu

⁸ Ma'ãpé ãma irob'ui'éré na hã õne u'â ãma 're aimreme mono. Bâtâ na hã duré mara na hã ãhã ibaihâ na ãma 're romnhoré mono, ãma 're asiptete mono wa, uburé ãma irob'ui'éré zarina asina ãma 're uwaimrami mono da. Tawapsi, te za 're i'aihâimana mono wẽ zé hã asina 're i'uwaimrami mo.

Zozué 1:8 Iomraidhean Croise

Zenezi 24:63

Tawamhã hâiwahâ pesere nherẽ, ma tô watobro, ro hã te te 're awaimrami mono da. Tahawa, 'rãi wahutu wi, ma tô awaru ba'õmore we isi'aba'ré hã sãmri za'ra.

Salmu 119:11

Aimreme hã wa tô ĩsima te 're tété ĩpẽ'ẽ 'remhã, ĩwasédé te aiwi 're 'manharĩ tõ mono da.

Salmu 119:15

Asimiroti na te 're romnhoré mono wa, wa aimreme hã te 're 'madâ'â u'âsi.

Salmu 119:97

Asimiroti hã wa te te 're sawi pese. Tahawa, wa bâtâ bâre õne u'â te ĩsima ãma 're rosa'rata u'âsi.

Salmu 119:99

Wa tô te 're waihu'u wẽ pese, ĩma romnhoré'wa norĩ nhipai u, asimiroti na te ĩsima ãma 're rosa'rata zei u'âsi mono wa, ĩma iwẽ zarina.

Salmu 19:14

Uburé Danhib'apito, ẽtẽ tõmo wawẽ ne ĩma 're i'aihâimana mono hã, duré ĩ'wawi 're i'aimapa mono, ĩmreme hã, duré ĩnhimirosa'rada hã 're iwẽsãmri mono da si, ĩma iwẽ hã.

Salmu 40:10

Asiminho'reptuzé wasu'u hã, ĩsima si te 're tété mono õ di. Õne u'â ai'umnhasizém na hã wa tô te ãma 're robzanhamri u'âsi, duré asiminho'reptu nhiptetezém na zama. Asib'a'uwẽ 're isi'rã'õtõ mono zéb ãma hã, 're ida'azawi mono zé wasu'u na hã, duré ai'umnhasizém na hã, ĩmreme ãna ari'iwi 're ĩhâimana mono õ di.

Provébiu 3:1

Ĩ'ra, ĩnhimiroti na hã aipo're si'âri tõ. Aipẽ'ẽ 're asima tété.

Mateu 12:35

Ni'wa hã 're morĩ wẽ wamhã, tipẽ'ẽ 're tinhimirosa'rata wẽ hawim na te za 're mreme wẽ u'âsi. Duré ni'wa hã 're morĩ wasété wamhã, tinhimirosa'rata wasété hawim na te za duré 're mreme wasété u'âsi.

Mateu 28:20

Te za duré dama 're iroti za'ra wa'aba mo, uburé te aima 're iroti za'ra wa'aba mono zéb zarina, ĩnhimiroti si da te 're 'madâ'â u'âsi za'ra mono da. Õne u'âsi, wa za asiré 're ĩmorĩ u'âsi za'ra wa'wa, ro isi'utõrĩzéb u. Ãne na aipo're si'âri za'ra wa'aba õ di za.

Mateu 7:21

— Ãté ni'wam norĩ hã te za dama 're siwasu'u za'ra, ãne: “Zezusi hã ta hã Ĩnhib'apito. Wa hã tãma romhuri'wa na, wa tô 're ĩhâimana u'âsi.” Ãne ni'wam norĩ hã dama 're siwasu'u za'ra mono nherẽ, uburé 're sisisi mono õ di za, 'Re ihâimana u'âsi mono, da'ãma 're isib'a'uwẽ mono zéb u hã. Ni'wam norĩ si te za 'Re ihâimana u'âsi mono nhib'a'uwẽ, 're hâimana za'ra, Ĩmama hã hâiwa ãma 're isãmra mono hã te te sima 're i'awẽ mono zéb zarina, marĩ iwẽ si te te 're i'manharĩ za'ra mono norĩ si hã.

Mateu 7:24

— Ãne, wa za duré ãma aima simiré'é za'ra wa'wa, 'ri'wai wasu'u na. 'Ri'wa hã tãma ãma rosa'rata waihu'u pese wa, ma tô ẽtẽ nhisiwi 'ri hã 'manha, siptete na 're sa mono da. Tawamhã tã hã pĩni za'ẽtẽ na 're ta'a mono wamhã, ma tô 're âpré. Duré 're âpré mono wamhã, ma tô 'ri u â hã 're praba. Rowa'u'u za'ẽne hã ma tô duré 're pusi, 'ri uwaibaba, te te aré ime da hã. Tane nherẽ, 'ri hã simei õ di, ẽtẽ nhisiwi te te sima 'ri wa, aibâ hã. Tane duré, ã hã te irotizé, ni'wam norĩ te te 're wapari za'ra mono wa, te te oto 're 'madâ'â pese za'ra mono wamhã, ta norĩ si te za rowẽ na 're hâimana u'âsi za'ra, 'Re ihâimana u'âsi mono 'ratamhã.

Luca 11:28

Tahawa, te Zezusi hã asa tãma tinha, ãne: — Tane tô. Tãma 're rowẽ mono nherẽ, isipai u ni'wam norĩ ma, 're rowẽ uptabi za'ra mono di za. Ni'wam norĩ hã, 'Re ihâimana u'âsi mono zadawa wasu'u hã tipo're na te te 're wapari za'ra mono wamhã, duré te te 're 'madâ'â pese za'ra mono wamhã, tãma 're rowẽ uptabi za'ra mono di za.

Zuwã 13:17

— Ãne wa tô aima rowasu'u za'ra wa'wa, waihu'u za'ra wa'aba da. Ĩnhimiroti hã 're 'madâ'â pese za'ra wa'aba mono wamhã, aima 're rowẽ za'ra wa'aba mono di za, uburé aima 're rowẽ za'ra wa'aba mono õ nherẽ. Asimirosa'rata na, wa tô aiwaihu'u za'ra wa'wa. Ĩsiré 're anomro aba mono da, te aipisutu za'ra wa'wa hã, misire ma tô ĩ'maiwẽ'õ wa'wa. Ta hã wa tô pisutu, ĩsiré 're morĩ da, 'Re ihâimana u'âsi mono mreme ui'éré te te sina uwaimrami da. Ãne ma tô wahi'rada hã tinha, aré: “Wasiré 're iwasai mono, ma tô ĩwẽ'õ.” Ãne ma tô duré ĩwẽ'õ'wa na rob'ui'éré siro, poto õ ré, wahi'rada hã. Tahawa, te za oto sina uwaimrami su'u, ĩwẽ'õ'wa hã.

Zuwã 14:21

— Ni'wam norĩ hã ĩnhimiroti si te te 're 'madâ'â pese za'ra mono wamhã, ta norĩ si ĩzawi pese 'wa, te za 're nomro. Te te 're ĩzawi pese za'ra mono wamhã, te za duré Ĩmama zama asa hã te te 're sawi pese za'ra. Wa hã wa za duré te 're sawi pese za'ra, ĩzawi pese 'wa norĩ hã. Ta norĩ ma si, wa za 're ĩhâimana mono zém na tãma 're ĩsiwaihu'u za'ra.

Éfézu 4:29

Aimreme wasété na dama 're aimreme zusi aba mono õ di za oto. Aimreme wẽ na si te za oto dama 're aimreme zusi aba mo, asimiroti wẽ na si 're dapawaptob za'ra wa'aba mono da ãma.

Colosu 3:16

Cristuhu wasu'uwẽ na te za ãma 're asipo're pu'u u'âsi za'ra wa'aba mo, aipẽ'ẽ 're aima 're hâimana u'âsi za'ra wa'aba mono da, taha zarina aihâimana wẽ na 're anomro aba mono zé hã asima 're sa'ẽtẽ za'ra wa'aba mono da oto. 'Re ihâimana u'âsi mono hawi, dahâimanazém na rowaihu iwẽ hã ãma 're iwaihu'u za'ra wa'aba mono zéb zarina, te za dama ãma 're iroti pese za'ra wa'aba mo. 'Re ihâimana u'âsi mono hã sõprub uptabi wa, te za tãma 're asõ're u'âsi za'ra wa'aba mo, aipẽ'ẽ 're ãma 're aiwata za'ra wa'aba mono sina. Ipẽ'ẽzani te te aima 're iwaihu'u za'ra wa'aba mono zém na, te za rowẽ zarina tãma 're asõ're za'ra wa'aba mo, Wanhib'apito ãma 're idanho're za'ra mono na zama.

Zozué 1:7

Tô asiptete, sada asib'ru uptabi duré. Taré oto ãma pibui pese, ĩma romhuri'wa Mozési, ĩnhimiroti uburé te te aima isõmrizéb zarina si ãma 're aihâimana mono da. Ĩnhimiroti te te aima isõmri wi hã 're aipizari mono tõ. Tawamhã ãne wamhã nimomo 're ane mono sidâpâsi, te za 're i'aihâimana mono wẽ zé hã asina 're i'a'uwaimrami mo za.

Zozué 8:34

Tawamhã Zozué, te mreme 'rãihâ na uburé sõré ibaihâ na ãma irob'ui'érézéb zarina 'Re ihâimana u'âsi mono, rowẽ te te dama 're i'apisutu mono zém na hã, ro iwasédé te te duré dama 're i'apisutu mono zém na zama.

Apocalipsi 22:14

Duré, ni'wam norĩ hã ti'uzazé hâirã da, te te 're i'upsõi pese za'ra mono norĩ ma si hã tãma 're rowẽ uptabi za'ra mono di za. Tane tiwasété wi, 're isipizari za'ra mono hã, 'Re ihâimana u'âsi mono, iwasédé te te tãma 're i'a'upsõi mono zé, te wasu'u, i'uza hâirã hã. Ta norĩ si te za rob'rãi u'â hã te te 're huri, da te 're huri mono wa, 'Re ihâimana u'âsi mono 'rata ãma 're idanomro u'âsi mono zé hã. Ta norĩ si te za duré õne haré 'ri nho'õmo u 're sisisi, 'ridawa za'ẽtẽ na, ni'wa te te tiwi sitob za'ra ãna.