Zezusihi zadawa wasuꞌuꞌwa norĩ nhimiromhuri na robꞌuiꞌéré 1:3 - ꞌRe Ihâimana Uꞌâsi Mono Zadawa Wasuꞌu

³ Zezusi hã dâ'â nherẽ, hâiwa'utu wamhã, tihâiba na u'âsi te tô nasi tãma sihâi'ré za'ra, tizadawa wasu'u'wa norĩ ma hã. Nasi itẽme isihâi'ré za'ra zém na hã, 40 na ma tô bâdâ hã ãma ne. Tô sena, Zezusi hã hâiba ré za oto apâ 're imorĩ na te te ãma waihu'u za'ra da, te nasi itẽme sihâi'ré za'ra, taré newa, te te nasi ãma siwi wawã tõ da. 'Re ihâimana u'âsi mono, da'ãma 're isib'a'uwẽ mono zém na ma tô duré tãma rowasu'u za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 1:3 Iomraidhean Croise

Mateu 21:43

— Ẽtẽ tomhâpâ wẽ hã da te dasiwi iwẽ'õ ne, a norĩ wa'wa hã asiwi 're ĩwẽ'õ za'ra wa'aba mono wa, 'Re ihâimana u'âsi mono nhib'a'uwẽ, 're aihâimana u'âsi za'ra wa'aba mono õ di za. Ai'upana wa'aba si te za oto 'Re ihâimana u'âsi mono hã da'ãma 're sib'a'uwẽ, isimiroti te te 're i'madâ'â pese za'ra mono norĩ ãma. Tô sena, wa ãne na aima waihu'u za'ra wa'wa.

Mateu 28:9

Tawamhã sisamroi ré, ma tô Zezusi hã sõpẽtẽ zahuré, pi'õ norĩ hã. Duré simiza'rese ãna sisamroi ré, ma sõpẽtẽ zahuré. Tawamhã Zezusi hã ma tô sawi zahuré, ãne: — Rowẽ na 're aihâimana aba mono. Tawamhã pi'õ norĩ hã ma tô oto 'râwi itẽme aima'wara zahuré. Tinhib'rata na te te para zawi zahuré sina, ma tô ãma tiwata zahuré, tãma pire zahuré wa.

Mateu 3:2

Taha wamhã, te ãne dama rowasu'u: — Ma'ãpé, aiwasété wi aipizari za'ra wa'aba. 'Re ihâimana u'âsi mono, da'ãma 're isib'a'uwẽ mono zéb u hã romhuture di oto. — Ãne te dama rowahutu, Zuwã Batista hã.

Mateu 4:2

Tawamhã a'ubuni wi sãmra ré, ma tô bâdâ hã 40 na duré 40 mara na hã ãma ai'utõ, sai ãna sãmra ré hã. Tahawa tãma hã mrab uptabi di.

Marcu 16:19

Wanhib'apito Zezusi hã te te tãma rowasu'u za'ra pari, ma tô hâiwa u tiwi âri za'ra, 'Re ihâimana u'âsi mono nhimire niwĩ oto 're sãmra mono da, pire uptabi na.

Zuwã 20:26

Tawamhã romhuri misi ãma si'utõrĩ za'ra pari, ma tô duré Zezusihi siré 're inomro mono norĩ hã si'rã'õtõ, tô dumigu na. Tome hã te oto ime tinhamra za'ra. Tawamhã 'ri nhitop tete nherẽ, ma tô duré wei itẽme tizébré za'ra, Zezusi hã. Iwa'wab za'ra, te duré ãhã wamhã za. Ãne te tawamhã duré sawi za'ra: — Rowẽ na 're aihâimana za'ra wa'aba mono.

Zuwã 21:1

Tawamhã Zezusi hã ma tô duré tãma sihâi'ré za'ra, tisiré 're inomro mono norĩ u. Isõ'u zaihâ u ma tô itẽme sihâi'ré za'ra. Tiberiadi na 'ri nho'õmo nhisi 'rata, isõ'u hã te 're hâimana. Ãne duré itẽme isihâi'ré za'ra zé wasu'u hã.

Zuwã 21:14

Ab're hawi hâiwa'utu pari, te nasi itẽme sihâi'ré za'ra, Zezusi hã, tisiré 're inomro mono norĩ ma. Ãhã na itẽme iwisi za'ra zém na hã, si'ubdatõ oto itẽme isihâi'ré za'ra zé hã, isiré 're inomro mono norĩ u hã.

Zezusihi zadawa wasuꞌuꞌwa norĩ nhimiromhuri na robꞌuiꞌéré 13:31

Tawamhã apâ hâiwa'utu pari, ma tô nasi dama sihâi'ré, bâtâ ahâ na, Zezusi hã. Galiléa hawi, Zeruzalẽ u aré isiré isi'aba'ré norĩ ma, ma tô nasi tãma sihâi'ré za'ra. Ta norĩ hã te oto te te dama 're wasu'u wẽ za'ra Zezusi hã, Izaraéu nhihudu norĩ ma.

Zezusihi zadawa wasuꞌuꞌwa norĩ nhimiromhuri na robꞌuiꞌéré 19:8

Tawamhã Paulu hã te nasi ãza, zudeu norĩ te, rowahutuzéb u, te te dama rowahutu da. A'amo si'ubdatõ, ma tô ãma ai'utõ, tame te te dama 're rowahutu mono ré hã. Da te tãma 're nharĩ za'ra mono nherẽ, pahi ãna ma tô te te dama 're rowasu'u, da te 're saze za'ra mono da. 'Re ihâimana u'âsi mono, za da'ãma 're isib'a'uwẽ mono zém na da te 're saze za'ra mono da, ma tô te te dama 're roti. Tahawa, ni'wam norĩ hã ma tô saze za'ra.

Zezusihi zadawa wasuꞌuꞌwa norĩ nhimiromhuri na robꞌuiꞌéré 28:23

Tawamhã ma tô sima pisutu za'ra, nimahã bâtâ na itẽme dasi'rã'õtõ da. Tahawa, ma tô da'ahâ na itẽme tasi'rã'õtõ ni, Paulu hã isãmrazéb u. Bâtâ bâ ma tô dama romhu, 'Re ihâimana u'âsi mono, da'ãma 're isib'a'uwẽ mono zé wasu'u na. Mozésihi nhimi'ui'éré zarina, duré 'Re ihâimana u'âsi mono zadawa 'mahârâ'wa norĩ nhimi'ui'éré 'rata zarina, ma tô tãma ãma rowasu'u pese za'ra, Zezusi hã Danho'reptui'wa da, 'Re ihâimana u'âsi mono te te ipisutu na da te saze za'ra da.

Zezusihi zadawa wasuꞌuꞌwa norĩ nhimiromhuri na robꞌuiꞌéré 28:31

Pahi ãna, duré da te tiwi 're sadawa uwati za'ra mono ãna, ma tô te te dama 're rowasu'u, 'Re ihâimana u'âsi mono, da'ãma 're isib'a'uwẽ mono zé wasu'u na hã, duré Wanhib'apito Zezu Cristuhu wasu'u na zama.

Zezusihi zadawa wasuꞌuꞌwa norĩ nhimiromhuri na robꞌuiꞌéré 8:12

Tane nherẽ, 'Re ihâimana u'âsi mono, da'ãma 're isib'a'uwẽ mono zé wasu'u na, duré Zezu Cristuhu wasu'u na, Filipi hã te te dama rowasu'u wamhã, ma tô saze za'ra ni. Isimirowasu'u hã da te saze za'ra wamhã, â dawabzuri ma tô 'manharĩ za'ra ni, aibâ norĩ hã, duré pi'õ norĩ zama.

Roma 14:17

E marĩ wa. 'Re ihâimana u'âsi mono hã isazei'wa norĩ ãma 're isib'a'uwẽ mono zé hã, dasa hã da te 're iwẽ'õ za'ra mono zé, te te wasu'u õ di. Uburé marĩ hã da te 're i'âhuri mono zéb zama te te wasu'u õ di duré. E marĩ te wasu'u tawamhã, 'Re ihâimana u'âsi mono, da'ãma 're isib'a'uwẽ mono zé hã. Ta hã 'Re ihâimana u'âsi mono nhimiroti zarina 're idanomro wẽ mono zé, te wasu'u. Duré 'Re ihâimana u'âsi mono, Tipẽ'ẽzani na te te 're ida'apawapto mono zéb zarina, rowẽ uptabi na 're idanomro mono zé, te wasu'u, dato sina.

Colosu 1:13

Ta hã ma tô wa'anho'reptu tô, robra hawi, Satanasihi nhiptetezém hawi. Ta hawi ma tô te te 're wa'awaibu, i'ra nhimi'madâ'â si oto tãma 're wahâimana za'ra mono da, tãma isawi uptabi nhimi'madâ'â si.

1 Tesalonita 2:12

Duré da te aima 're amhâzépa za'ra wa'aba mono nherẽ, wa tô ãma aima robze za'ra wa'aba ni iwasu'uwẽ na, aiwi 're robzei'õ tõ za'ra wa'aba mono da. Wa tô aima roti pese za'ra wa'aba ni, 'Re ihâimana u'âsi mono nho'a 're anomro wẽ wa'aba mono da, toi uptabi na te te 're ai'madâ'â za'ra wa'aba mono da. Ta hã ma tô te te sima 're aiwẽ za'ra wa'wa, hâiwa ãma ihâiba na rowa'a na isiré 're aihâimana u'âsi za'ra wa'aba mono da, rowẽ uptabi na.

1 Zuwã 1:1

Wa hã Zuwã, wa za oto aima ãma rob'ui'éré za'ra wa'wa, Wanhib'apito zazei'wa, 're i'aihâimana za'ra wa'aba mono norĩ ma. Duréihã marĩ õ uptabi ré, 're ihâimana mono ãma, wa za aima ãma rob'ui'éré za'ra wa'wa. Ta hã ma tô si'a'uwẽ, ti'ai ãma hã. Ta hã wa tô wa te 're wapari za'ra, ti'ai ãma 're morĩ ré, isiré 're iwanomro mono norĩ hã. Wa tô duré wa te 're hâiba 'madâ'â u'âsi za'ra, watõmo na. Dâ'â pari, hâiwa'utu wa, wa tô duré wanhib'rata na hâiba upi za'ra ni. Ta hã 'Re ihâimana u'âsi mono mreme na isisi hã, duré 're idanomro mono zép téb da hã, te te dama 're i'apisutu mono.