Tito 2:14 - Dios Iwene

¹⁴ Jo̧ba Jesucristoma midawö woinobe, okobe jwiinö sulabetjö dö̧jibinö pjaatobö, ja̧danö ökwödö do̧'wo̧ luwo̧nö sulabe dujuna̧li̧ dichö loobö, sulabe jwibadö iteda ömöledö badibanö dö̧jobö, ja̧danö otiwanö ja̧bö dö̧jo jö̧ba̧ladö badibanö dö̧jobö.

Tito 2:14 Iomraidhean Croise

Génesis 48:16

Jo̧ba Diosma ángeldanö ichö ötjönö sulabenö baleditjö chö̧jibinö pjaatinobe. Jao chitji̧ cha'dömine Abraham, chabe'domine Isaac, ötjö Duluwo̧ Diosma isabenö otiwanö pjabatö te'ada̧liainobe ötjönö. Ja̧danö jo̧banöda, ötjönö otiwanö te'ada̧liabina Diosnöda ateba bidönö kwi̧tji̧munö ösödanö edö pjaatobö. Ja̧danö Diosnö ateba, jojodöma kwi̧tji̧munö edö tjomukwatobö, bidöma Israel i̧tji̧mu, ja̧danö Isaac ö'dö̧dö, ja̧danö Abrahamnötjö̧ tupadanö jojodö, jö̧ba̧lö. Ja̧danö Diosnö ateba bidö kwi̧tji̧munö dösölö̧jinö edö pjaatobö ba̧jekwadönö 'yatjebobö, jobadötjö tupadanö jojodöma tjö̧bajekwachakobetjö̧— jejenö yöba̧lijetö Jacobma, José i̧tji̧munö Dios dösölö̧jinö edö pjaatakwa̧ junö.

Éxodo 15:16

¡Ayö! jö̧ba̧lö, okobe deinö Canaán nijinö ju̧kwadöma yebabidöda tjuju̧kwobe, kwujulu kwisȩbaja̧ yötjawi̧ tja̧ja̧kwajabetjö̧, jwiinö juluwo̧, jö̧ba̧lö. Jejenö, yebabinö tjuju̧kwobetjö̧ jobadö tjuju̧kwemi döbaledena wi̧inö tjö̧jobe, inawa wi̧achawa ji̧danö. Isabenö Jo̧, ökwödö, ökwö kwömöledö, Egiptotjö dö̧jibinö pjabatö lakebinawö̧ma jobadö tjuju̧kwemi döbaledenanö kabatö jejenö, wi̧inö tjö̧jobe.

Mateo 1:21

Maríama jitji̧ iso̧nö jemakobe, ja̧danö jemakwo̧nö Jesús jö̧ba̧lö kwimidonö, iteda ömöledönö tjusulatjö tjö̧jibanö ja̧akwo̧obetjö̧— jö̧ba̧lö yöawinobe Dios weökwe ángelma.

Mateo 20:28

ötjö jojo baibanö jeminökwe ju'wedönö pjabatö chö̧ji̧danö. Jau chömöledö, ju'wedö ötjönö pjatjato jö̧ba̧löma ichinö̧kö̧sa. Ötjöda jojodönö pjabatö ichinasa, ja̧danö ba̧jekwadö tjö̧jibo jö̧ba̧lö midawö wotobö ichinasa— jö̧ba̧lö yöawinobe Jesúsma.

Mateo 3:12

Jo̧bama sulabedönö otiwadötjö böjö 'da̧batö ujunakobe, batjo otidadö kwakwawa sula'wotjö böjö 'da̧batö kwakwawa lödawejunö tjödi̧danö. Ja̧danö, böjö 'da̧batö junajo̧, okobe deinö sula'wodanö ichejekwadö sulabedönö, sula'wo ko̧ko̧dö juwö lotji̧danö ökwöla tiibokolanö juwö loakobe— jö̧ba̧lö yöawinobe Juanma.

Juan 10:15

Jejenö ötjökwö, Chabe'dokwö jo̧be. Ötjö Chabe'doma ötjönö öwaisobe, ja̧danö, ötjöma Chabe'donö chöwaisobe. Ja̧danö, ötjöma cha̧jwi̧mu o̧bȩja̧dö tjö̧jibinö ö'wöchö midawö lotakwo̧sa.

Juan 6:51

Ja̧danö, ötjödasa jojodönö ba̧kwȩlö̧jatebö ja̧kwawa chiyobö mölejȩbetjö ichino̧ma. Ötjönö, kwakwawa wanekwacho̧nö kwadöma isabenö ö'wö batjibökakwedö. Ba̧kwȩlö̧jatebö ja̧kwawa tjujuna̧lakwedö jobadöma. Ötjöma ötjödada chiyawakwo̧sa jojodö Dioskwö ba̧kwȩlö̧jatebö tjuju̧kwobö— yöawinobe Jesúsma.

Hechos 15:14

Simón Pedro yöawatö ökwödönöma, Dios judío jojodöböködönö ajayinö ösödi̧ i̧sebinama, jobadötjöbi iteda i̧tji̧mu batjibanö ja̧bö.

Hechos 15:9

Chömöledö, Diosma judío jojodönöbi ja̧danö, judío jojodöböködönöbi bakwainö edo̧. Ja̧danö, bakwainö edobetjö̧ Diosma judío jojodöböködö tjo̧'wo̧ luwo̧nö dewinö baibanö tjusuli̧ma söbebö lobijetö, Jesúsnö tjösödobetjö̧, ökwödö dusuli̧ söbebö loinadanö.

Hechos 20:28

Ina yöbawijetö: —Ju'wi jawabi yötawa ökwödönö, te'ada̧lakwawa jojodönö. Kwö̧jaduwobema otiwanö kwite'ada̧laduwo, kwo̧'wo̧ luwo̧duwi juluwachibanö tupakwö kwi̧'yaduwobö Dioskwö. Ju'wibi yötawa. Ju'wedönöbi kwite'ada̧laduwo Diosnö ösödadönöma. Dios O̧'wo̧ Luwo̧ma ökwödönö 'da̧batö junijetö jobadönö kwite'ada̧laduwobö. Wanedö yötawa: O̧bȩja̧dönö te'ada̧lakwawa jojo a̧jwi̧mu tjöekwanö ite'ada̧li̧danö ökwödöma Jesúsnö ösödadönö kwite'ada̧laduwo. Kwite'ada̧laduwawö̧nöma ida̧ökö Dios ja̧inobe iteda i̧tji̧mu batjibinö. Diosma iteda itji̧ ökwösobu ebawö ö'wöchö imidawinobetjö̧, ida̧ökö Dios ja̧inobe jobadönöma iteda i̧tji̧mu batjibinö, iteda itji̧nö ösödadöma. Jobadönöma kwite'ada̧laduwo— yöbawijetö Pabloma.

Hechos 9:36

Jobetjö Lidanö jejenö baledonö jelobe, Jope mikwobe, jobe jujuma, Tabita mikwujuma ö'wöchaju ö'wö babibijotö. Ja̧danö, jobujuma Jesúsnö ösöduju. Jobujuma, griego tjiwenenö Dorcas mikwuju. Jobujuma ina 'yajayi otiwanö pjabatö ji̧abijotö. Kabatökönö pjabatiabijotö usula jojodönö. Ja̧danö ö'wö baibajajunö ju'wedöma dichijadötö jobujunöma, wobajadönö dichajitjadanö. Dichajadöma mösȩko̧nö lödijadötö, Jojodö edö tjichakobe, jö̧ba̧lö.

Gálatas 1:4

Böjȩ sulaböjȩtjö dö̧jibobö, jo̧ba Jesucristoma ökwödö dusula midawö woinobe, Dabe'do Dios ajayitjöda omukwatö ujuninadanö.

Gálatas 2:20

Jau chömöledö, Cristokwö bakobe towisa'onö la̧nö wotinajayonö, 'yaba̧lo̧ chö̧jobe. Jo̧kwaijayonö, babe chö̧ji̧ma, ötjöma ida̧ökö wotinobetjö̧ babe chö̧ji̧ma ötjö chö̧ji̧maökö chömöledö, Cristo ö̧ji̧da. Ja̧danö, babe chiteba'onö chö̧ji̧ma, Dios itji̧nö ösödö, ötjönö ile nibebö midawö wobinanö ösödö chö̧jobe.

Gálatas 3:13

Ja̧danö, Dios weina Moisés iwȩyudinatjö Dios lȩebi̧ma demo jö̧da̧linobe chömöledö, okobe jwiinö laebi̧danö ja̧dokobetjö̧. Jo̧kwaijayonö ökwödö Dios lȩebi̧tjö demo jö̧da̧linama, Cristonöda baibinobe. Dios lȩebi̧ma Cristonö baibinobe Dios iwene laebi̧danö. Baikwö laebobe Dios iwenema: Okobe deinö towinö la̧dönöma, Dios lȩebawö̧, jö̧ba̧lö laebobe.

Efesios 1:11

Chömöledö, Diosma okobe jwiinö baledobö ösödi̧ma badekwachinö ja̧bo̧. Ja̧danö, ökwödönö, judío jojodönö omudawö junijetö Cristokwö bakobe dötewinö badibobö, jejenö badibobö omukwatö ösödinobetjö̧.

Efesios 2:10

Chömöledö, Diosma ökwödönö otiwanö pjabatijetö yemidanö do̧'wo̧ luwo̧nö 'yabibajadö badibanö. Ja̧danö, otiwanö pjabatijetö, Cristo Jesúskwö bakobe dötewadö badibanöma. Diosma jejenö pjabatijetö ökwödönöma, otiwanö ja̧bö dö̧jobö. Ajayitjöda omukwatijetö ökwödönöma, do̧'wo̧ luwo̧nö 'yabibajadö, Cristo Jesúskwö dötewadö otiwanö ja̧bö dö̧jakwa̧ma.

Efesios 5:2

Cristoma ökwödönö ile niebobetjö̧ dumusidi̧ midawö ö'wöchijetö, dö̧jibinö pjabatö. Jejenö pjabatö, Diosnö söinö nöekwi̧ jawa juwö tjiyinadanö Cristoma midawö iyijetö Diosnöma. Ja̧danö chömöledö, Cristo ökwödönö ile niebi̧danö ökwödöbi kwömöledöduwinö ile nibebö ja̧duwi.

Deuteronomio 14:2

Jau chömöledö, ökwödö israel jojodöma ju'wedö bö̧jȩ jojodötjö kwuluwo̧duwi Isabenö Jo̧ Dios wainö 'da̧batö ujuninawö̧ja, iteda ömöledö bakibaduwobö. Okobe deinö bö̧jȩnö ju̧kwadötjö ökwödö israel jojodönöda omudawö ujuninobe Diosma, iteda ömöledö, iteda ile niebawö̧ ömöledö kwö̧jaduwobö, jo̧kwajabetjö̧ ju'wedö bö̧jȩ jojodö ja̧bö tjö̧ji̧danöma kwö̧jaduwoko chömöledö, —jö̧balö yöawinobe Moisesma.

Deuteronomio 26:18

Ja̧danö Isabenö Jo̧ma ökwödönö yöawajabe, –Israel jojodönö yöbawö chujuninadanö, ötjöda chömöledö ile nitebawö̧ tjö̧jobe, –jö̧ba̧lö ökwödönö yöawajabe. Ja̧danö, ju'wibi ökwödönö yöawajabe, –Okobe jwiinö weti̧tenia a̧ja̧kwö tjö̧jobö jo̧be, –jö̧ba̧lö.

Deuteronomio 4:20

Jau chömöledö, damötjö̧ ökwödö israel jojodöma Egipto nijinö ja̧nö usula emawö kwotidinaduwobe, 'dii jawa otikweju otidadö tubinö usula emawö otidö tjö̧ji̧danö, jö̧tö? Jo̧kwaijayonö jejenö usula emawö kwö̧jinaduwelö lakebaduwinö ichejebinobe Isabenö Jo̧ma, ökwödö israel jojodöma iteda ömöledö bakibaduwakobetjö̧, ja̧danö babe möle ökwödöma jo̧ba Isabenö Jo̧ Diosda ömöledöja, —jö̧ba̧lö yöawinobe Moisesma, israel jojodönö.

Deuteronomio 7:6

Ja̧ tjösödi̧ jawa söbebö lobö, wainö kwö̧jaduwobö jo̧be chömöledö, ökwödöma kwuluwo̧duwi Isabenö Jo̧ Dios ömöledököbaduwobetjö̧. Jau chömöledö, okobe deinö bö̧jȩ ba̧kwemeachibanö ju̧kwadötjö, kwuluwo̧duwi Isabenö Jo̧ Diosma ökwödö israel jojodönöda 'da̧batö ujuninobe, iteda ömöledö, ile niebawö̧ ömöledö bakibaduwobö, jo̧kwajabetjö̧ ju'wedö sulabenö tjösödi̧tjö wainö 'da̧bachibö kwö̧jaduwobö jo̧be.

1 Timoteo 1:15

Jau Timoteo, Cristo Jesúsma böjȩkwö ichinobe sulabenö ja̧badönö tjö̧jibinö ja̧obö. Ja̧ wenema isabenö wene Timoteo, okobe deinö ja̧ wene tjösödobö jo̧be. Ja̧danö, ökwönö yötawa, jobadö sulabenö ja̧badötjö, o̧penönö sulabenö ja̧bö ji̧achijatö ötjöma.

1 Timoteo 2:6

Jo̧bada midawö woinobe, okobe deinö jojodö tjö̧jibobö. Jau, Dios badedö ujunina möle badekwachenama, Cristo Jesúsma midawö woinobe, ja̧danö jejenö Diosma öwaetjöda i̧sebinobe, okobe deinö tjö̧jibobö chösöda jö̧ba̧lö.

1 Timoteo 6:18

Ja̧danö, balada luwedönö otiwanö ja̧tjobö yöbawidönö, baikwö wanedö yötawa: Otiwanö ja̧awa luwedö baibanö tjuju̧kwobö yöbawidönö, a̧'dȩlökönö ju'wedönö pjabatö.

Tito 2:7

Jau Tito, ökwöbi okobe jwiinö ökwö ja̧bö kwö̧ji̧ma, otiwanö ja̧bö ja̧kwawa i̧sebö kwö̧jo, ju'wedö edö tjöwaisakobetjö̧ otiwanö ja̧bö ja̧kwawama. Ja̧danö, jojodönö yöbawö kwö̧ji̧ma, bakwainö otiwanö omukwatö, obökönö yökawo,

Tito 3:8

Jau Tito, biya̧ yötawaja̧ma, jweinö yötawajabe. Tito, biya̧ ökwönö yötawaja̧ma, Jesúsnö ösödadönö yökawobö chösöda. Ja̧danö, otiwanö tja̧ja̧kwobö webidönö, jobadö Diosnö ösödadöma jwaikwöda otiwanö ja̧awa ja̧badö batjibanö tjuju̧kwakobetjö̧. Jejenö ja̧bö ja̧kwawama otiwa, ja̧danö jojodönö pjaatakwawa ji̧.

Hebreos 10:24

Ja̧danö chö̧ja̧wo̧dö, ökwödöma dömöledökwö ja̧nö domajadenö budekwabinö yödawakwawobö jo̧be, Dömöledönö ösödabikwawö dö̧jaduwo, bakwelajatebö pjabatö, jö̧ba̧lö.

Santiago 4:8

Ja̧danö chö̧ja̧wo̧dö, kwomukwataduwi̧ balewachö, böjȩ jawatjö 'da̧bachibö Diosnö tjekachajaduwo, kwo̧'wo̧ luwo̧duwi okwanö jo̧bakwö 'dötewinö ja̧nö. Ja̧danö, jo̧banö tjekachajaduwiökwe Diosma ökwödökwö 'dötewinö ö̧jobe. Chö̧ja̧wo̧dö, ökwödöma sulabenö ja̧bö ju̧kwadöja. Ja̧ sulabenö ja̧köbaduwi̧ kabatibö otiwanö ja̧bö kwö̧jaduwo. Yelösöda ökwödöma dötölatajanö omukwatadöja, Diosnö ösödöbi, böjȩ jawa ösödöbi. Ja̧ kwomajadeduwinö sulabenö kwomukwataduwi̧ma kabatibö otiwanöda kwomukwataduwo.

1 Pedro 1:18

Jau chömöledö, kwöwaisaduwa, Diosma ja̧ suli̧ jawatjö kwö̧jibaduwinö midö eminobe jö̧ba̧lö, jo̧kwajabetjö̧ ja̧ jawa ja̧bökönö kwö̧jaduwo. Jau chömöledö, kwa'dödöminetjö sule mikwa jwii̧ ja̧awada kweminaduwobe, jo̧kwaijayonö Diosma ja̧tjö kwö̧jibaduwinö midö eminawö̧ja chömöledö. Ja̧danö, tupakwö mikwa jwiakwa̧ jawanöma, platanöbi, oronöbi midö eminokobe chömöledö,

1 Pedro 1:22

Ja̧danö chömöledö, ökwödöma ida̧ökö isabenö wene ösödö kwidichawinaduwobetjö̧, kwömöledöduwi Jesúsnö ösödadönö ösödadöja, yöne dömöledö jö̧ba̧lö. Jo̧kwajabetjö̧ jwaikwöda tupakwönönö ösödabikwawö kwö̧jaduwo chömöledö,

1 Pedro 2:12

Jau chömöledö, ökwödöma Diosnö ösödöködö tjö'da̧de ja̧nö, otiwanö ja̧bö kwö̧jaduwo, otiwanö ja̧bö kwö̧ja̧duwi̧ tjedakobetjö̧. Ajayinöma isabenö ökwödönö wanedö sulabenö ja̧badö jö̧ba̧lö yötja̧lena chömöledö, jo̧kwaijayonö jwaikwöda otiwanö ja̧bö kwö̧jaduwitjö̧ma, otiwanö ja̧bö kwö̧jaduwi̧ edö tjöwaisachibena, Aaa, Jesúsnö ösödadöma isabenö otiwanö ja̧bö ju̧kwadö, jö̧ba̧lö. Ja̧danö chömöledö, jejenö tjöwaisachibobetjö̧, 'dö̧ibaji̧ möle Dios ichakwa̧ möle badekwachenama, jo̧banö tjösödena, Otiwo̧ja, jö̧ba̧lö.

1 Pedro 2:9

Jo̧kwaijayonö jobadö Jesúsnö öpöjödö töbö metjijayonö, töböma meböködöja chömöledö, Dios omudawö ujuninawö̧ja, ja̧danö La'aka Duluwo̧ wei̧ otidadöja, ja̧danö mölejȩ jojodöja, ja̧danö Diosda ömöledöja chömöledö. Jau chömöledö, isabenö Dios wei̧ otidadö kwö̧jaduwobe. Diosma ökwödönöda 'da̧batö ujuninobe, jo̧ba inesö otiwanö pjaati̧ wene jojodönö yökawaduwobö. Jau chömöledö, Diosma isabenö otiwanö ökwödönö pjaatinobe, ökwödönö yȩa'wo okwatjö labeibö, iteda inesö idejatobekwö tekachaduwobö jwöinobe Diosma, ja̧danö jo̧ba inesö otiwanö pjaati̧ wene yökawaduwo jö̧ba̧lö, ökwödönö omudawö ujuninobe.

1 Pedro 3:18

Jau chömöledö, Diosma isabenö ökwödö usula kwemawaduwobö weena, baikwö yötawa: Duluwo̧ Cristo usula emawobö weinobe, ¿jö̧tö? Ja̧danö Duluwo̧ Cristo usula emawobö ji̧natjö̧ma, ¿ökwödö usula demawobö jwienaji̧? Jȩna chömöledö. Jau chömöledö, sulabe dujuna̧li̧ imidawo jö̧ba̧lö, Cristoma bakwötanöda midawö woinobe, okobe deinö tjusula midawö. Sulabe jwibo̧da midawö woinobe chömöledö, ökwödö dusula juna̧ladö Dioskwö dichibobö ja̧bö. Jau chömöledö, iteba'oma kwabö lotjinobe, jo̧kwaijayonö Diosma o̧'wo̧ luwo̧nö 'yaibajinö ja̧inobe.

1 Juan 1:7

Jo̧kwaijayonö ökwödötjö bakwo̧ otiwanö ja̧bö, dewinö jo̧ Dios omukwati̧danö omukwatö jo̧ma, dewa'wo okwa kwebachö jo̧, Dios ö̧jobema. Jejenö kwebacho̧ma isabenö omajadenö Dioskwö bakobe dötekwö jo̧, Dios iwene, isabenö ji̧ wene ösödö. Ja̧danö, jejenö ja̧nö jo̧ba dewa'wo okwa kwebacho̧ma Cristotjö ö̧ja̧wo̧dönö ile nibebö ö̧jobe. Ja̧danö, jo̧bama Dios öba a'otjö okobe jwiinö suli̧tjö dichö loinökwe, Dios Itji̧ Jesús ökwösobu ebawinö imidawinobetjö̧. Chö̧ja̧wo̧dö, ökwödöma jejenö kwi̧'yaduwobö jo̧be, kwomajadeduwinö Dioskwöbi, kwö̧ja̧wo̧dökwöbi bakobe dötekwö ja̧nö.

1 Juan 1:9

Jo̧kwaijayonö bakwo̧, Ötjöma sulabenö ja̧tajabe, jö̧ba̧lö, yöba̧lo̧ma jweinö omukwato̧. Ja̧danö, jo̧bama sulabenö ja̧ena Diosnö yöbawö lobo̧, Dios, sulabenö ja̧tajabe, jö̧ba̧lö. Jejenö Diosnö sulabenö ja̧aja̧ yöbawö loiökwe Diosma ja̧ sulabenö ja̧aja̧ma söbebö loobe. Jejenö yöbawö loobetjö̧ jo̧bama Dios öba a'otjö suli̧tjö dichö lobawo̧da jo̧. Chö̧ja̧wo̧dö, Diosma jejenö yöbawö ujuninobe, Bakwo̧ sulabenö ja̧aja̧ yöbawö loena ja̧ sulabenö ja̧aja̧ söbebö lotocha, jö̧ba̧lö. Ja̧danö, Diosma yöbawö ujuni̧danö ja̧bo̧ ¿jö̧tö? Jau chö̧ja̧wo̧dö. Diosma jweinö yöba̧lo̧. Jejenöobetjö̧ döwaisa jo̧banö yöbawö lodena sulabenö ja̧di̧ma söbebö loobe. Jejenö ökwödöma sulabenö ja̧di̧tjö dichö loawö̧da babibadösa. Jo̧kwaobetjö̧ chö̧ja̧wo̧dö, sulabenö ja̧köbaduwena Diosnö yöbawö loköbaduwo.

1 Juan 3:2

Chö̧ja̧wo̧dö chösödawö̧, yötawaduwakwö. Isabenö, ökwödöma Dios i̧tji̧musa. Jo̧kwaijayonö Diosma ökwödönö ina öwawinö i̧sebokobe mölejȩbe ichibö balewachibö dö̧jakwa̧ma. Ina waiya. Wajwidobe ¿dakwö dichejekwakwa̧jö, jö̧ba̧lö? Ja̧danö, domajadenö ¿dakwö omukwatö dö̧jakwa̧jö? jö̧ba̧lö, ina waiya. Jo̧kwaijayonö ja'yubeda döwaisa, biya̧: Cristo yemidanö ichena ökwödöma jo̧badanö babibö dö̧jakwedösa. Ja̧ mölema Cristoma ökwödönö wajuwanö öwawachobetjö̧ jo̧badanö ichejekwadö dö̧jakwedösa.

Apocalipsis 1:5

Ja̧danö, Jesucristoma ökwödönö lȩlö̧jino edobö chösöda, kwo̧'wo̧ luwo̧duwi ösöwachibanö kwö̧jaduwobö. Jesucristoma Dios omukwati̧ jweinö yöbawo̧. Ja̧danö, jo̧bama wobinadötjö abönö tjebachajina. Ja̧danö, okobe deinö böjȩ la'aka luwedönö webö jo̧ Jesucristoma, inesö la'aka luwo̧obetjö̧. Chömöledö, Jesúsma ökwödönö jwiinö ile nibebo̧. Jo̧bama iteda ökwösobu ebawinö imidawinobetjö̧, sulabe wei̧ a̧ja̧kwökönö, otiwanö dö̧jobö jo̧be.

Apocalipsis 5:9

Ja̧danö, tjöbajalebiya a̧tja̧bayedöda ju̧kwawö̧ma, damö la'aka luwedökwö Obeja Itji̧danö Jo̧nö ösödö lo̧tjijatö. Lo̧tji̧ma 'yayi̧ lo̧awa, biya̧: Ökwöda jwiinö mikwawo̧ja, böja ösöja tö'awa'be kabebö kwedoböma. Ökwö, kwabö lotjinökweda, jwiinö mikwawo̧ja, kwökwösobu ebawinö kwimidawinobetjö̧. Ökwöda jwiinö mikwawo̧ja, jojodö Dios ömöledö batjibanö kwimidawinobetjö̧. Böjȩ bakwameachibanö ju̧kwadönö midawinaja, Dios ömöledö batjibanö. Bakwasokwena ju̧kwadönöbi, wainökwena tjiwene yöba̧ladönöbi, jelobebi, jelobe ju̧kwadönöbi, okobe deinö böjȩnö ju̧kwadönö midawinaja.