Proverbios 4:18 - Dios Iwene

¹⁸ Jobekwömaökö Dios wei̧ a̧ja̧kwadö tjö̧ji̧ma. Dios wei̧ a̧ja̧kwadöma sulabenö omukwatadö tjö̧ji̧danö jö̧kö̧dö. Wanedö yötawakwö chitji̧: Dewachenama, i̧ya̧nö deapjo dewachobe tjo̧'o̧manö, ja̧wo̧ laebaja̧ tupakwö jwiinö dewobe jweinö öjenanö. Jobekwö Dios wei̧ a̧ja̧kwadö kwetjachamanö dewinö dejatobe, ajayinö dejatemitjö̧ tupakwö jwiinö dewinö dejatobe, otiwanö edö, salöamanöda tji̧'yobö.

Proverbios 4:18 Iomraidhean Croise

2 Samuel 23:4

Jau, la'aka luwo̧ otiwo̧ma, jawo̧ yȩayi̧ ojwiyo'wo jwiena dejato̧danö ichejekwo̧, ja̧danö ojwiyo o̧bi̧danö ichejekwo̧, ja̧tjö̧ meje'ye otiwanö pokwi̧danö, iteda ömöayedö otiwanö tjö̧da̧peachobö öibobetjö̧.

Diosnö ösödo̧ Job mikwo̧ usula emawina jawa 11:17

—Jau Job, isabenö otiwanö kwö̧jakwo̧ja, baikwö wanedö yötawa: Jawo̧ jweinö ö̧jena dewi̧tjö bajalekwönönö otiwanö dewemi kwö̧jakwo̧ja, la'akatjöda yȩa'wo kwöjökakwo̧ja, baikwö yöta̧la, kwö̧ji̧ yȩi̧ma, sule yȩayi̧ yȩi̧danö yȩena, ja'yubeda yȩena, isabenö otiwanö kwö̧jakobetjö̧.

Diosnö ösödo̧ Job mikwo̧ usula emawina jawa 17:9

–Dios ösödi̧danö ja̧badösa, –jö̧ba̧ladöma jwaikwöda idöda tjomukwati̧danö tjö̧jakwedö, ja̧danö, –Otiwanö ja̧badösa, –jö̧ba̧ladöma ajayitjö bajalekwönönö, –Jweinö omukwatadösa, –jö̧ba̧lö tjomukwatakwedö.

Diosnö ösödo̧ Job mikwo̧ usula emawina jawa 23:10

—Jo̧kwaijayonö Diosnö chedököjayonö, okobe jwiinö kwetachi̧tenia edö waiso̧ Diosma. Jo̧kwajabetjö̧, otiwanö ja̧bö chö̧jojobö, sulabenö ja̧bö chö̧jojobö jö̧ba̧lö ötjönö badedö editjö̧ma, bakwai̧ oro öwawi̧danö öwawena, isabenö Dios wei̧ a̧ja̧kwö jo̧sa̧, jö̧ba̧lö.

Proverbios 13:9

Ja̧danö, ju'wibi yötawa, wanedö: Dios wei̧ a̧ja̧kwö ju̧kwadöma dȩju̧wa'yu dewinö salöi̧danö dewinö ja̧dö, la'akatjöda tiibököwö̧. Jobekwö tjö̧jokobe sulabenö omukwatadöma. Jobadö sulabenö omukwatadöma dȩju̧wa'yu tiiba'yudanö tiibakwawö̧.

Proverbios 15:24

Ja̧danö, ju'wibi yötawa: Ö'wiyawakwawönö omukwatö jo̧ma lekwe ja̧kwawa mananö 'yo̧, jwaikwöda. Jo̧ba, ö'wiyawakwawönö omukwatö jo̧ma jelema, woawa mananö 'yö̧kö̧, wobinadö tjuju̧kwobekwö 'ya̧kwawamanö.

Proverbios 2:20

Jo̧kwaobetjö̧ chitji̧, otiwanö omukwatadö tji̧’yi̧danö kwi̧’yo. Jao chitji̧, Dios wei̧ a̧ja̧kwadö tji̧'yamanöda kwi̧’yo.

Proverbios 2:9

Ju'wibi yötawakwö chitji̧: Ötjö jwebebö yötawi̧ a̧ja̧kwö kwö̧jitjö̧ma kwöwaisachibakwo̧ja, a̧a̧a̧ Dios wei̧ a̧ja̧kwö chö̧jobö jo̧be, jö̧ba̧lö. Ja̧danö, ju'wibi: Ötjö jwebebö yötawi̧ a̧ja̧kwö kwö̧jitjö̧ma kwöwaisachibakwo̧ja̧, a̧a̧a̧ jojodönö chömöledönöbi ju'wedönöbi jweinöda omukwatö ja̧bö chö̧jobö jo̧be, jö̧ba̧lö. Ja̧danö ju'wibi: Ötjö jwebebö yötawi̧ a̧ja̧kwö kwö̧jitjö̧ma kwöwaisachibakwo̧ja, a̧a̧a̧ chömöledökwö, ju'wedökwöbi otiwanö ja̧nö, jweinöda yöba̧lö chö̧jobö jo̧be, jö̧ba̧lö. Chitji̧ jobekwö, ötjö yötawi̧ a̧ja̧kwö kwö̧jitjö̧ma jwaikwöda kwi̧'yakwo̧ja, otiwanö omukwatö.

Isaías 26:7

Jo̧kwaijayonö otiwadösa jö̧ba̧ladö tjitebo comunidad pjolö loijayonö, Dios wei̧ a̧ja̧kwö ja̧dönö pjabato̧ Diosma, ba̧ba̧lawobe kwetjachobö pjabato̧. Jau chuluwo̧ Dios, weköbi̧ a̧ja̧kwadönö pjabatö, mana ba̧ba̧lawamanö kwetjachobö pjabato̧ja.

Daniel 12:3

Waisanö omukwatadöbinadöma, isabenö otiwanö mölejȩ dewinö dejatobedanö tjidejatakwedö, ja̧danö ju'wedö Diosnö tjösödobö pjabatadöbinadöma si̧li̧'idö tjidejatidanö ba̧kwȩlö̧jatebö tjidejatakwedö.

Mateo 5:14

Ja̧danö, ökwödöma dejewa'yu̧danö ichejekwadöja böjȩtjöma, otiwanö ja̧bö ja̧nö kwidejataduwo jö̧ba̧lö. Kwöwaisaduwa chömöledö, comunidad mö'ösa'o wa̧pekwa'otjö tjotiditjö̧ma, otiwanö öwawobe, ja̧danö tojawa jwii̧, ¿jö̧tö?

Mateo 5:16

Ökwödöbi ja̧danö chömöledö. Ökwödö böjȩ jojodö tjö'da̧de ja̧nö, otiwanö ja̧bö ja̧nö kwidejataduwo, okobe deinö otiwanö ja̧bö kwö̧jaduwi̧ tjedakobetjö̧, ja̧danö jejenö edö, okobe deinö mölejȩbe jo̧ kwabe'doduwinö tjösödakobetjö̧— jö̧ba̧lö yöawinobe Jesúsma.

Mateo 5:45

Jejenö ja̧köbaduwo, mölejȩbe jo̧ kwabe'doduwi i̧tji̧mu otiwanö ja̧bö tjö̧ji̧danö otiwanö ja̧bö kwö̧jaduwakobetjö̧. Jau chömöledö, kwabe'doduwima, sulabedönöbi, otiwadönöbi pjabatö bakweminö möle jawo̧nö idejatobö webo̧, ¿jö̧tö? Ja̧danö, sulabenö ja̧badönöbi, otiwanö ja̧badönöbi pjabatö, ojwiyo o̧bobö webo̧, ¿jö̧tö? Jau chömöledö, kwabe'doduwima okobe deinö jojodönö pjabato̧.

Juan 8:12

Ikenama, Jesúsma yemidanö yöawinobe jojodönö: —Wanedö yötawa: Ötjödasa dewinö jo̧ma. Ja̧danö, ötjödasa jojodönö öbibo̧ma, dewa'wo okwanö kwetjachobö. Ja̧danö, böjȩ jojodö tjo̧'wo̧ luwo̧ okwanö dewinö chidejatobe, tjo̧'wo̧ luwo̧ jawa tjöwaisachibanö. Ja̧danö, ötjökwö ichadöma yȩa'wo okwanö kwebachöködö, kwetjachobema dewinö chidejatobetjö̧. Ja̧danö, ötjökwö ichadönöma, tjo̧'wo̧ luwo̧ okwanö dewinö dejatö chi̧sebakwo̧sa, ba̧kwȩlö̧jatebö ja̧kwawa tjujuna̧lobö tjöwaisachibanö— yöawinobe Jesúsma.

2 Corintios 3:18

Jo̧kwaijayonö okobe deinö ökwödö Jesúsnö ösödadöma tjöekwado̧ jwibadösa chömöledö, öwaetjöda Dios dejatinö ujulu edadösa. Jau chömöledö, Duluwo̧ salöinö ujulu edadösa, ja̧danö tjöbadekwawöte öwawinö i̧sebi̧danö ja̧ ujulu i̧sebadösa ju'wedönö, jobadöbi tjedakobetjö̧. Ja̧danö ju'wibi chömöledö, Duluwo̧ salöinö ujulu dedenama, Duluwo̧ Dios O̧'wo̧ Luwo̧ma, Duluwo̧danö ichejekwadö badibanö otido̧, jo̧ba salöinö dejatinö juluwo̧danö bakwainö dichejekwakobetjö̧. Jejenö jo̧be chömöledö, jo̧kwajabetjö̧ yödawi̧ wene 'yayi̧ wenema inesö mikwawi̧ jö̧ba̧lö, ja'yubebi salöi̧ dotojoböma omukwatöködösa. Jau chömöledö, jojodö ja̧ salöi̧ öwawinö tjedakobetjö̧, inesö mikwawi̧ wene 'yayi̧ wenema yöbawadösa.

Filipenses 2:15

ökwödöma wene jwiinö, ja̧danö sulabe jwiinö böjȩnö kwö̧jaduwakobetjö̧. Jau chömöledö, ökwödöma sulabedö tjö'da̧detjö, jwaikwöda sulabenö ja̧badö tjö'da̧detjö kwö̧jaduwijayonö, Dios i̧tji̧mu sulabe jwibadö kwö̧jaduwo. Jau chömöledö, wanedö yötawa, böjȩ jojodö tjö'da̧de ja̧nö, ökwödöma dejewa'yu̧ ubi̧danö kwidejataduwo,

2 Pedro 1:19

Ja̧danö jejenö dedinobetjö̧, ajayitjö bajalekwönönö isabenö döwaisobe chömöledö, Duluwo̧ma isabenö iteda ujulu i̧sebö yemidanö ichakwo̧ jö̧ba̧lö. Jau chömöledö, Dios yöawi̧ yöbawadöma tjiwȩyudinobe, Duluwo̧ 'dö̧ibaji̧ möle yemidanö ichakwa̧ wenema, ja̧danö ida̧ökö jobadö tjiwȩyudi̧ dösödinobe. Ja̧danö, jemi ikenama ökwödöma jo̧ba ujulu i̧sebina dedijatö chömöledö. Ja̧danö jejenö dedinobetjö̧, ajayitjö o̧penönö döwaisobe, Dios yöawi̧ yöbawinadö tjiwȩyudinadanö iteda ujulu i̧sebö ichakobe jö̧ba̧lö. Isabenö jweinö tjiwȩyudinobe chömöledö, jo̧kwajabetjö̧ jobadö tjiwȩyudina otiwanö omukwatö kwösödaduwo chömöledö, jweinö kwomukwataduwakobetjö̧. Jau chömöledö, jobadö tjiwȩyudinama isabenö otiwanö domukwatobö pjaati̧, wanedö yötawa: Jobadö tjiwȩyudinama dejewa'yu̧ ubö dejati̧danö jo̧be, ichakwo̧nö jweinö kwomukwataduwobö, ja̧danö jejenö dejatakobe, inesö möle Cristo yemidanö ichakwa̧ möle dewachena kabatö. Ja̧danö ja̧ möle salöinö dejato̧ Cristoda ichö kwomajadeduwinö idejatakobe chömöledö, damötjö tjiwȩyudinadanö.

2 Pedro 3:18

Jau chömöledö, jobadö sulabenö yötjawi̧ ösödökönö, ökwödö Jesúsnö ösödadöma jo̧ba mikwa jwiinö iyi̧tjö kwöda̧peachaduwobö jo̧be, ja̧danö tupakwönönö Duluwo̧ dö̧jibinö pjabato̧ Jesucristonö döwaisachibobö jo̧be. Jo̧banöda otiwo̧ja jö̧ba̧lö dösödobö jo̧be chömöledö, babebi, ja̧danö ba̧kwȩlö̧jateböbi dösödobö jo̧be, jejenö otiwa. Biya̧da ötjö Simón Pedroma ökwödönö pjabatö wȩyudö wetaduwakwö chömöledö. Biya̧data.

Apocalipsis 21:23

Ja̧danö, 'yayi̧ Jerusalénnöma möle jawo̧bi yö̧te ja̧wo̧bi tjö̧lajokobe, detjobe. Dios ujulu dewinö idejati̧da dewobe jojodö tjedoböma. Ja̧danö, Obeja Itji̧danö Jo̧ma la̧pa̧la̧yu̧danö, dewinö idejati̧da dewo̧, 'yayi̧ Jerusalénnöma.

Apocalipsis 22:5

Ja̧danö, yö̧tebi jwiobe jobema, möledanö dewinö dejatobetjö̧. Ja̧danö, la̧pa̧la̧yu̧bi̧yabi jwiobe, dewinö dejatobetjö̧. Ja̧danö, ja̧wo̧bi idejatokobe, Duluwo̧ Diosda dewinö idejatobetjö̧. Jobe ju̧kwadöma la'aka luwedödanö webö tjö̧jobe, ba̧kwȩlö̧jatebö.

Jueces 5:31

Döpöjojo Sisaranö baledinadanö, okobe deinö chuluwo̧ Isabenö Jo̧ öpöjojodö debö tji̧'yobö chösöda, jo̧kwaijayonö Isabenö Jo̧nö ösödadöma möle jawo̧ ujulunö kaekwaji̧danö tjujuluwachibobö chösöda, jö̧ba̧lö lo̧tjinobe Deborabi, Baracbi, Diosnö ösödö. Ja̧danö jemi ikenama cuarenta o̧bia baledibanö israel jojodöma wene jwiinö tjitebonö tjö̧jinobe.