Proverbios 26:17 - Dios Iwene

¹⁷ Ja̧danö, ju'wibi yötawa: Bakwo̧ ju'wedö wene juna̧la̧dö jwötjeba̧lakwawena, iteda jawamaököjayonö jwöbeba̧lö teachitjö̧ma jweinö omukwatokobe. Jo̧ba jawamaököobetjö̧ ¿dakwö jwöbeba̧lö teachoböda? Jwiyobe, teachoböma. Wanedö yötawa: Jo̧ba wene juna̧ladö jwötjeba̧lemi tebacho̧ma yelösöda jweinö omukwatokobe. Bakwo̧ awilinö, mananö baledibo̧nö ölakiyunö bö'ödo̧ jweinö omukwatöködanö jweinö omukwatokobe.

Proverbios 26:17 Iomraidhean Croise

Proverbios 17:11

Ja̧danö, ju'wibi yötawa: Sulabenö omukwato̧ma Dios wei̧bi, la'aka luwedö wetji̧bi öpöjödö a̧ja̧kwökönö jo̧. Sule itedada sulabenö omukwati̧danöda omukwatö jo̧. Jo̧kwaobetjö̧ Diosma weakobe lȩ lö̧jökönö lȩbebo̧nöma sulabenö omukwato̧nö lȩebobö.

Proverbios 18:6

Ja̧danö, ju'wibi yötawa: Jweinö omukwatö̧kö̧ma yöa̧lena yöa̧lawö̧ma jo̧bakwö nöinö wene tju̧juna̧lobe. Yelösöda, ölakwabikwawö, ja̧danö jo̧banö jwöbeba̧lö tjöpöjödobe, sulabenö yöba̧lo̧, jö̧ba̧lö. Isabenö, jo̧ba jweinö omukwatö̧kö̧ma sulabenö yöa̧lobetjö̧ itedada wene jwöbekwo̧. Yöa̧lawö̧ma jwiinö öpöjödö tjo̧'wo̧ sulachibobetjö̧ kwakwatjobö aeba̧li̧danö itedada AEKWOBEDANÖ abeba̧lo̧, jweinö omukwatö̧kö̧ma.

Proverbios 20:3

Ja̧danö, ju'wibi yötawa, wanedö: Jojodötjö ju'wedöma ju'wedökwö wene tju̧juna̧lakwawobe. Ja̧danö, jobadö wene juna̧ladöma labinö jwöbeba̧lö tjölakwabikwawobe. Ja̧danö, jelo̧ wene jwibo̧ma labidö tjölakwabikwawobekwö i̧'yokobe tjölakwabikwawoböma öpöjödobetjö̧. Isabenö yötawa: Jo̧bama otiwanö omukwatö jo̧ tjölakwabikwawobekwö i̧'yokobetjö̧. Ja̧danö, ju'wedöma jo̧banö edö, jweinö omukwato̧, jö̧ba̧lö, yöba̧ladö wene juna̧ladö tjölakwabikwawobekwö i̧'yokobetjö̧. Jobekwö tjo̧mukwatokobe jweinö omukwatöködöma. Jweinö omukwatöködöma tjölakwabikwawoböma ösödö isakwadö.

Proverbios 26:18

Ju'wibi yötawa, wanedö: Na̧yu̧nu̧ sȩanu̧, ubanu̧ jojodönö 'böbö loobö 'böbo̧ma o̧'wo̧ jwibo̧, yelösöda sulabenö omukwato̧. Ja̧ sulabenö omukwati̧ ji̧danö sulabenö omukwatobe baikwö obo̧ma: Bakwo̧ ömöledöso̧nö omöna jelobe omukwatobö yöa̧lijayonö yöa̧laja̧ ikena, omönada yöta̧la, jö̧ba̧lö obo̧. Isabenö, jo̧ba obo̧ma bakwemiinö, na̧yu̧nu̧ 'böbö loobö 'böbo̧ sulabenö omukwati̧danö sulabenö omukwato̧.

Proverbios 3:30

Ju'wibi jwebebö yötawakwö: Bakwo̧ ökwönö suli̧ öwaedokobetjö̧ ölakwabikwawönö jwökeba̧loko jo̧banöma. Jo̧banö jwökeba̧lobö jwiya chitji̧, ökwönö sulabenö öwaedokobetjö̧.

Lucas 12:14

Yöa̧lökwe Jesúsma atadinobe: —Chömöledöso̧, jejenö webö̧kö̧sa ötjöma. Ötjöma ja̧ weawa luwo̧ baibanöma tjujuninökökwesa— jö̧ba̧lö.