Proverbios 23:23 - Dios Iwene

²³ Chitji̧, kwö̧jima baikwö kwö̧jo: Omöna yötjawi̧ jawa a̧ja̧kwökönö isabenö ji̧ jawa yötjawi̧ma ösödö kwomajadenö kwanawo. Ja̧danö, jweinö omukwatö ja̧kwawa yötjawi̧ ösödö kwomajadenö kwanawo. Ja̧danö, jwebebö yötjawi̧ ösödö kwomajadönö kwanawo, jobekwöda chö̧jobö jo̧be jö̧ba̧lö. Ja̧danö, di̧ya sulojobö jö̧ba̧lö, di̧ya otiwojobö jö̧ba̧lö waisakwawama ösödö kwomajadenö kwanawo. Jobekwö omukwatö kwö̧jo chitji̧, ja̧ waisakwawa la'akatjöda kakatiboko.

Proverbios 23:23 Iomraidhean Croise

Proverbios 10:1

Ju'wi Salomón jwebebö yöawina jawa baikwö laebobe: Isabenö yötawa: Tji̧tji̧mu̧ma jweinö omukwatö tjö̧jitjö̧ma tjabe'do tjojo'do tjo̧'wo̧ ösöwanö tjö̧jakwedö. Jo̧kwaijayonö tji̧tji̧mu̧ma jweinö omukwatökönö tjö̧jitjö̧ma tjabe'do tjojo'do tjo̧'wo̧ tjo̧bekwöda tjö̧jakwedö.

Proverbios 16:16

Ja̧danö, ju'wibi yötawa: Chömöledö döwaisa, oroma nöinö mikwawi̧ jawa ¿jö̧tö̧? Isabenö yötawa: Oro mikwawi̧tjö bajalekwönönö mikwawobe jweinö omukwatö kwö̧jaduwi̧ma. Ja̧danö, döwaisa, platabi nöinö mikwawi̧ jawa ¿jö̧tö̧? Isabenö yötawa: Kwöwaisaduwi̧ma di̧ya sulojobö jö̧ba̧lö, di̧ya otiwojobö jö̧ba̧lö jwiinö mikwawobe, plata mikwawi̧tjö̧ bajalekwönönö.

Proverbios 17:16

Ja̧danö, ju'wibi yötawa: Jweinö omukwatö̧kö̧ma öwaisachobö imiditjö̧ma ¿öwaisachibakwa̧ji̧ jweinö omukwatobö? Öwaisachibökakwo̧. Jo̧bama jweinö omukwatö yötjawi̧ omajadenö öpöjödobetjö̧ la'akatjöda jweinö omukwatobö öwaisachibökakwo̧.

Proverbios 18:15

Ja̧danö, ju'wibi yötawa: Waisanö omukwato̧ma iteda ida̧ökö öwaisi̧tjö bajalekwönönö öwaisachibakwo̧. Jao, jo̧ba jweinö omukwato̧ma ba̧kwȩlö̧jatebö jemi bajalekwönönö öwaisachibobö isakwo̧.

Proverbios 9:8

Jo̧kwaobetjö̧, jwebebö yötawaduwakwö: Jelo̧nö edö obo̧nöma jwebebö yökawaduwoko, o̧'wo̧ sulinö edöda ökwödönö jwiinö öpöjödakwo̧. Jo̧banö jwebebö yökawaduwoböma jwiyobe. Jobekwö omukwatokobe jweinö omukwato̧ma. Jweinö omukwato̧nö jwebebö yökawaduwitjö̧ma ökwödönöma otiwanö edö ösödakwo̧, otiwanö pjakataduwobe, jö̧ba̧lö.

Isaías 55:1

Baikwö yöa̧lobe Diosma: A̧ja̧kwaduwi, okobe deinö o̧ti̧ tjöbadöma, chö̧jobekwö kwichaduwo, ojwiyo jȩmibe. Ja̧danö ökwödö balada jwibadöma, ichö kwakwawa emö kwukwaduwo. Ichaduwi, ubasobu o̧'do̧bubi, lechebi kwemaduwo, balada midökönö, mikwa jwiinö ichö kwemaduwo.

Mateo 13:44

Tupakwö wanedö yöawinobe Jesúsma: —Baikwö wanedö yötawa mölejȩbe jo̧ la'aka luwo̧ ö̧jena jawama: Jojoma ka̧putjö inesö mikwawi̧ jawa öbadekwajinobe, ju'wedö ajayinö tojö tjujunina jawama. Jejenö badekwajo̧, yemidanö tojö, o̧'wo̧ ösöwachibanö okobe jwiinö ujuna̧li̧ mikwanö iyö lobajo̧, ja̧ ka̧pu midö eminobe, öbadekwajina jawa, inesö mikwawi̧ jawa ujuna̧lakobetjö̧.

Mateo 13:46

Jelenetjö bajalekwönönö inesö otiwane badekwajo̧, okobe jwiinö ujuna̧li̧ mikwanö iyö lobajo̧, ja̧ne midö eminobe, ja̧neda nöinö mikwawi̧ jö̧ba̧lö.

Mateo 16:26

Jau chömöledö, bakwo̧ okobe jwiinö böjȩ jawa juna̧lo̧ woitjö̧ma, ¿okobe jwiinö böjȩ jawa ujuna̧li̧ma jo̧banö pjaatenaji̧? Pjaatokobe, ¿jö̧tö? Jau chömöledö, okobe jwiinö ujuna̧li̧ iyitjö̧böbi, yemidanö ja̧kwawa emobö jwiena.

Hechos 20:23

Sulabenö baledena chömöledö. Ja̧danö, okobe jwiinö kwetachenama Dios O̧'wo̧ Luwo̧ma ötjö cho̧'wo̧ luwo̧ okwa i̧sebijatö ötjö usula chemawakwa̧ma. Baikwö i̧sebijatö chömöledö: Ökwönöma ka̧lena ba̧kwaweju okwa tjödakobe, jö̧ba̧lö, i̧sebijatö Dios O̧'wo̧ Luwo̧ma. Jejenö lödö inia tjököbinö ja̧tjakobe ökwönöma, jö̧ba̧lö, i̧sebijatö.

Hebreos 11:26

Jejenö omukwatö ujuninobe Moisésma, Dios jojodönö tjö̧jibinö pjabatö weakwo̧nö ite'ada̧lobetjö̧, Israel jojodötjö öbötjachakwo̧nöma. Ja̧danö, jejenö te'ada̧lö ja̧nö, Moisésma Dios ömöledökwö usula emawinobe. Jejenö ja̧nö omukwatinobe, Usula emawö chö̧jijayonö, usula emawö Dios ömöledökwö Dios weakwo̧nö te'ada̧lö chö̧ji̧ma ajayinö Egiptonö okobe jwiinö juna̧lö chö̧jinatjö o̧penönö mikwawobe, jö̧ba̧lö. Moisésma jejenö omukwatinobe iteda ö̧ji̧ möle jawa omukwatokobetjö̧. Moisésma ju'wi möle mölejȩbe ö̧jakwa̧ omukwatinobe, Dios jwiinö mikwawi̧ iyakwa̧ möle. Isabenö, Moisésma ja̧ möle te'ada̧lö Diosnö o̧'wo̧ wana̧lö ö̧jinobe.

Apocalipsis 12:11

Dios ömöledö babibinadö wobinadöma Awetja weelö ji̧binadö, Obeja Itji̧danö Jo̧ ökwösobutjö tjidichawobetjö̧. Ja̧danö, Dios iwene yötjawinobetjö̧ Awetjanö juluwinadö. Jobadöma tjo̧'wo̧ 'dibachibö ja̧nö yöbawinadö, jobadönö kwabö lotjenabi.

Apocalipsis 3:18

Chömöledö, jejenö usulasedödanö kwö̧jaduwobetjö̧ ökwödönö pjabatö yötawaduwakwö, wanedö yöbawö. Ötjötjö orotjö kwemaduwo juna̧ladödanö bakibaduwakobetjö̧. Ja̧ oro, ökwölatjö laebaja̧ bakwai̧ oro, jwiinö mikwawi̧ oroma. Ja̧danö, ja̧ oro, ötjötjö kwemaduwi̧ oroma, Dios isabenö mikwawi̧ iyi̧ jawa wanekwachobe. Ja̧danö, kamisi̧ dewi̧ o̧di̧juma ötjötjö emibö 'dukawaduwo, otiwanö taba jwiinö kwekachaduwakobetjö̧. Ja̧danö, jowobu'be ötjötjö emö, kwöbajalebiyaduwi kwa̧bekwaduwo yemidanö otiwanö kwedaduwakobetjö̧.