Proverbios 22:5 - Dios Iwene

⁵ Ja̧danö, ju'wibi yötawa, wanedö: Sulabenö ja̧badö tji̧'yobe manama sulama. Jobadö tji̧'yamanö ba̧ja̧ yei̧ jo̧be, ja̧danö 'daliwabi lo̧be. Ja̧ ba̧ja̧ yȩi̧ ji̧, ja̧danö 'daliwa lö̧ji̧ idöda wene tju̧juna̧li̧ma wanekwachobe. Isabenö, jobadöma sulabenö ja̧böda tji̧'yobetjö̧ jojodökwö wene nöinö tju̧juna̧lakwedö. Ja̧danö, bakwo̧ itedada ö'wiyawakwawönö omukwatö te'ada̧lo̧ma jobadö sulabenö ja̧badö tji̧'yobekwö 'yö̧könö, ödökwönönöda ö̧jakwo̧.

Proverbios 22:5 Iomraidhean Croise

Diosnö ösödo̧ Job mikwo̧ usula emawina jawa 18:8

—Jau Job, isabenö suli̧ waekwadö, ökwödanö sulabedöma, baikwö wanedö yötawa: Sulabo̧ma iteda ömasapiya suli̧ waedökwe: Otiwanö kwebacho̧sa jö̧a̧lijayonö, 'daliwanö li̧bo̧. Edökönö, 'daliwa jawa ja̧to̧ sulabo̧ma, ja̧danö ömasapiyanö di̧achibökwe, jobe 'daliwanöda lo̧.

Proverbios 13:15

Ja̧danö, ju'wibi yötawa: Jojodöma otiwanö omukwato̧nö ösödadö, waiso̧, jö̧ba̧lö. Ja̧danö, ju'wibi yötawa: Jojodö tjo̧ma'apekwönö omöna yöba̧lo̧ma itedada wene jwöekwakwo̧.

Proverbios 13:3

Ja̧danö, ju'wibi yötawa: Yöa̧lakwa̧ abönö ö'wiyawakwawönö omukwato̧ma iteda otiwanö ö̧ji̧ te'ada̧lo̧danö te'ada̧lobe, lekwe ö̧jakobetjö̧. Jobekwö ö̧jokobe yöa̧lakwa̧ abönö omukwatö̧kö̧ma. Jo̧bama omukwatökönö nöinö yöa̧lobetjö̧ usulaso̧da ö̧ja̧kwo̧.

Proverbios 15:19

Ju'wibi yötawa, du̧ju̧tajanö wanedö, 'du̧wekwo̧nöbi, Dios wei̧ a̧ja̧kwo̧nöbi: Ja̧danö, 'du̧wekwo̧ma otidobö ji̧jayonö, dakwö chotidakwa̧jö nöa, jö̧ba̧lö, chotidökena, jö̧ba̧lö otidokobe. Jo̧ba 'du̧wekwo̧ma sȩa'wonö kwebachö, ba̧ja̧ ö̧'i̧ya tjöeba̧lökwedanö wanekwacho̧, dakwö kwetachakwa̧jö sȩa, jö̧ba̧lö. Okobe jwiinö, chotidoböma waiya jö̧ba̧lö omukwatobetjö̧ otidokobe. Jo̧kwaijayonö, Dios wei̧ a̧ja̧kwo̧ma dösölö̧jino otidobetjö̧ jweamanö, suli̧ tjöeba̧lakwawa jwii̧ mananö jweinöda kweachobedanö wanekwacho̧.

Proverbios 16:17

Ja̧danö, ju'wibi yötawa: Otiwanö omukwatö jo̧ma jwaikwöda 'yo̧, sulabenö baledi̧tjö jelobekwö 'ya̧nö. Jo̧bama jwaikwöda 'ya̧nö, suli̧ jawatjö ö̧jibinö 'yo̧.

Proverbios 19:16

Ja̧danö, ju'wibi yötawa: Bakwo̧ Dios wei̧ a̧ja̧kwo̧ma lekwe ö̧jakwo̧. Jobekwö ö̧jokobe Dios wei̧ öpöjödo̧ma. Dios wei̧ öpöjödo̧ma iteda omukwati̧da ösödo̧. Ja̧danö iteda omukwati̧da ösödö ö̧jobetjö̧ lekwe jö̧könö debö i̧'yakwo̧.

Proverbios 22:4

Ja̧danö, ju'wibi yötawa: Isabenö Jo̧ma jojodötjö ju'wedönö pjabatö iyo̧, baikwö dötölataja jawa omukwatadönö: Jojodötjö ju'wedöma, ökwödöma baikwönönöbedösa jö̧ba̧lö omukwatadö. Isabenö Jo̧ma jobekwö omukwatadönö pjabatö iyo̧ balada, tjitea tju̧juna̧lobö. Ja̧danö, jojodötjö ju'wedöma Isabenö Jo̧nö yebabinö omukwatadö. Isabenö Jo̧ma jobekwö omukwatadönöbi pjabatö iyo̧ balada, tjitea tju̧juna̧lobö. Ja̧danö, Isabenö Jo̧ma jobadönöma, baikwönönöbedösa jö̧ba̧lö omukwatadönöbi, ja̧danö jo̧banö yebabinö omukwatadönöbi pjabato̧, jojodöma jobadönö edö tjöwaisachibobö, jweinö omukwatadö jö̧ba̧lö. Ja̧danö ju'wibi pjaatobe jobadönöma Isabenö Jo̧ma. Lekwe tjö̧joböbi pjabato̧ baikwönönöbedösa jö̧ba̧lö omukwatadönö, ja̧danö jo̧banö yebabinö omukwatadönö. Jobekwö Isabenö Jo̧ jobadönö pjabatö iyi̧ma otiwanö omukwatö tjö̧ji̧ mikwa baibanö ji̧.

Proverbios 29:6

Ja̧danö, ju'wibi yötawa, wanedö: Sulabenö omukwato̧ma itedada sulabenö ja̧i̧ jawama 'daliwadanö ji̧, iteda ö̧libobö, ö̧jibobö jwiinö. Jobekwö baledokobe Dios wei̧ a̧ja̧kwo̧nöma. Dios wei̧ a̧ja̧kwo̧ma o̧'wo̧ ösöwanö lo̧bo̧.

Proverbios 4:19

Ja̧danö, jobekwö 'yö̧kö̧dö sulabenö omukwatadöma. Jobadöma yȩa'wo okwa kwetjachi̧danö kwebachadö, edökönö. Ja̧danö, mebabinöda kwebachadö, tjöbajale tjewawadödanö.

Josué 23:13

Jejenö kakatibaduwiökwe, kwuluwo̧duwi Isabenö Jo̧ Diosma pjaatökakobe chömöledö, kwöpöjojodöduwinö a'dewö loböma, ja̧danö jobadöma 'daliwadanö tjö̧jakwedö ökwödönöma, nöinö usula kwemaduwakobetjö̧. Jau chömöledö, bemi niji ajayinö ji̧nadökwö bakibaduwitjö̧ma, wanedö yötawa: jobadöma kwakwaakwawadanö batjibakwedö ökwödönö, ja̧danö sȩakadanö batjibakwedö, kwöbajaleduwi tjewawadö bakibaduwanö. Jejenö baleditjö̧ma, kwiteboduwitjö okobe deinö debö kwi̧'yaduwakwedöja chömöledö. Jau chömöledö, Kwuluwo̧duwi Isabenö Jo̧ma isabenö inesö otiwemi niji iyinobe ökwödönö, kwiteboduwi baibanö, jo̧kwaijayonö jo̧banö kabatibö bemi niji ju̧kwadökwö bakibaduwitjö̧ma, jwiinö kwöwaekwaduwakwedöja.

1 Juan 5:18

Chö̧ja̧wo̧dö döwaisa. Dios i̧tji̧mu babibinadöma suli̧ jawa ja̧bö 'yö̧ködö. Ja̧danö, Dios Itji̧ Jesúsma jobadö Dios i̧tji̧mu babibinadönö Awetjatjö tjöbeba̧lö te'ada̧lo̧, Awetjama jobadönö jelobekwö tjomukwatobö öibökönö.