Proverbios 21:23 - Dios Iwene

²³ Ja̧danö, ju'wibi yötawa: Bakwo̧ yöa̧lakwa̧ abönö ö'wiyawakwawönö omukwato̧ma ju'wedökwö wene jwiinö ö̧jakwo̧.

Proverbios 21:23 Iomraidhean Croise

Proverbios 10:19

Ja̧danö, ju'wibi yötawa, wanedö: Bakwo̧, nöinö yöba̧lo̧ma, iteda yöa̧li̧tjö sulabe jawa laebena, nöinö yöa̧lobetjö̧. Isabenö yötawa: Jweinö omukwatö jo̧ma nöinöma yöba̧lö̧kö̧.

Proverbios 12:13

Ju'wibi yötawa: Sulabenö omukwato̧ma sulabenö yöa̧lobetjö̧ iteda wene jwöbekwo̧. 'Daliwanö tjö̧libi̧danö li̧bo̧ wene jwöebi̧tjö̧ ji̧bökönö. Jobekwö baledökökwe Dios wei̧ a̧ja̧kwö jo̧nöma. Dios wei̧ a̧ja̧kwö jo̧ma wenetjö ji̧bo̧, 'daliwatjö tjö̧jibi̧danö, li̧bö̧kö̧.

Proverbios 13:3

Ja̧danö, ju'wibi yötawa: Yöa̧lakwa̧ abönö ö'wiyawakwawönö omukwato̧ma iteda otiwanö ö̧ji̧ te'ada̧lo̧danö te'ada̧lobe, lekwe ö̧jakobetjö̧. Jobekwö ö̧jokobe yöa̧lakwa̧ abönö omukwatö̧kö̧ma. Jo̧bama omukwatökönö nöinö yöa̧lobetjö̧ usulaso̧da ö̧ja̧kwo̧.

Proverbios 16:17

Ja̧danö, ju'wibi yötawa: Otiwanö omukwatö jo̧ma jwaikwöda 'yo̧, sulabenö baledi̧tjö jelobekwö 'ya̧nö. Jo̧bama jwaikwöda 'ya̧nö, suli̧ jawatjö ö̧jibinö 'yo̧.

Proverbios 18:21

Ja̧danö, ju'wibi yötawa: Jojo yöa̧li̧ma juluwobe, ju'wedönö kwabö loi̧danöbi, tjö̧jibinö pjaati̧danöbi. Jo̧kwaobetjö̧ nöinö yöba̧lo̧ma baikwö omukwatobö jo̧be: Nöinö yöta̧li̧tjö jelo̧nö niatibitjö̧ma ötjöda jawa, jö̧ba̧lö.

Santiago 1:26

Chö̧ja̧wo̧dö Diosnö ösödadöma, ju'wedönö otiwanö yötja̧lobö jo̧be. Bakwo̧, Ötjöma Diosnö ösödo̧sa, jo̧banö ba̧kwȩlö̧jatebö abebö, ja̧danö jo̧ba wei̧ a̧ja̧kwö, jö̧ba̧lö, yöa̧lijayonö jojodönö sulabenö yöa̧litjö̧ma ¿isabenö otiwanö ö̧jobeji̧, Dios ösödi̧danö? Otiwanö jö̧kö̧. Ja̧danö, jo̧ba Dios iwene yöawakwawejube i̧'yi̧ma, ¿mikwawobeji̧? Mikwaokobe. Ja̧danö, Diosnö ösödo̧sa, jö̧ba̧lö, yöa̧li̧ma ¿mikwawobeji̧? Mikwawokobe. Chö̧ja̧wo̧dö, jojodönö sulabenö yöba̧lo̧ma itenöda omöna yöba̧lo̧danö itedada omajadenö jelobekwö omukwatobö öibökwe, Otiwanö jo̧sa, jö̧ba̧lö. Jo̧kwaobetjö̧ jo̧ba Diosnö ösödi̧ma mikwawokobe chö̧ja̧wo̧dö. Ja̧ Diosnö ösödi̧ma inesö ösödi̧maökö.