Proverbios 2:11 - Dios Iwene

¹¹ Juwibi yötawa chitji̧: Ötjö jwebebö yötawi̧ a̧ja̧kwö, jweinö omukwatö kwö̧jobetjö̧ kwö̧jakwa̧ jawa ajayinö kwo̧'wo̧nö kwomukwatakwo̧ja. Wanedö yötawakwö: Jobekwö kwö̧jakwa̧ jawa ajayinö kwo̧'wo̧nö kwomukwati̧ma isabenö ökwönö te'ada̧lo̧danö ja̧kobe, ökwönö te'ada̧lö, otiwanö kwö̧jobö. Ju'wibi yötawa chitji̧, wanedö: Ötjö jwebebö yötawi̧ a̧ja̧kwö jweinö omukwatö kwö̧jobetjö̧ otiwanö kwomukwatakwo̧ja, di̧ya sulojobö jö̧ba̧lö, di̧ya otiwojobö jö̧ba̧lö. Ja̧ kwomukwati̧ma tjöeba̧lobedanö suli̧ jawatjö ö̧jibanö tjöeba̧lobe.

Proverbios 2:11 Iomraidhean Croise

Proverbios 1:4

Ja̧danö ju'wibi yötawaduwakwö: Ökwödötjö ju'wedöma ina jweinö kwomukwataduwobö wajwibadöja. Salomón jwebebö yöawakwawa jawanö wanekwachi̧ jawa a̧ja̧kwö kwomajadeduwinö meitjö̧ma ökwödönö pjaatakobe ö'wiyawakwawönö kwö̧jaduwobö. Ja̧danö, Salomón jwebebö yöawakwawa jawanö wanekwachi̧ jawama ökwödötjö möayedönö öbibo̧danö jweinö öibakobe tjöwaisachibakobetjö̧ ju'wi jawabi ju'wi jawa. Ja̧danö, jobadönö jweinö öibakobe ja̧tjakwa̧ma ajayinö otiwanö tjo̧'wo̧nö tjo̧mukwatobö.

Proverbios 4:6

Ja̧danö, ju'wi jawabi jwebebö yöawijatö chabe'doma ötjönöma, baikwö: —Chitji̧, jweinö omukwatö kwö̧jo, jwaikwöda. Ja̧ kwö̧ji̧ma kakatiboko otiwanö kwö̧jakobetjö̧. Wanedö yötawakwö: Jobekwö jweinö omukwatö kwö̧ji̧ma isuju te'ada̧lujudanö ji̧. Jobuju jweinö omukwatö kwö̧ji̧ wanekwachujunö a̧ja̧kwö kakatibökötjö̧ma otiwanö jite'ada̧lobe ökwönöma otiwanö kwö̧jobö. Ja̧danö, tjöbeba̧lö jite'ada̧lobe ökwönöma jobujunö kwösöditjö̧ma, jweinö omukwatö kwö̧ji̧ wanekwachujunöma. Jobekwö jö̧ba̧löma ökwö jweinö omukwatö kwö̧ji̧ma ökwönö te'ada̧lobe, jö̧ba̧lö wanekwachobe— yöawijatö chabe'doma ötjönöma.

Efesios 5:15

Jo̧kwaobetjö̧ chömöledö kwo̧'wo̧ luwo̧duwi okwanö otiwanö omukwatö jweinö 'ya̧duwi. Ökwödöma Dios iwene kwöwaisaduwobe. Jo̧kwaobetjö̧ ju'wedö Dios iwene wajwibadö tjuju̧kwi̧danöma kwuju̧kwaduwa.