Proverbios 19:8 - Dios Iwene

⁸ Ja̧danö, ju'wibi yötawa: Bakwo̧ jweinö omukwatö ö̧jobö öwaisachibena otiwanö waisö jo̧. Jobekwö waisanö omukwatö ö̧ji̧ma itedada pjaati̧danö pjaatobe otiwanö ö̧jobö. Jelo̧nöbi yötawa: Bakwo̧ ¿di̧ya sulojobö jö̧ba̧lö, di̧ya otiwojobö jö̧ba̧lö waiso̧ma otiwanö ö̧jakwo̧.

Proverbios 19:8 Iomraidhean Croise

Proverbios 16:20

Ja̧danö, ju'wibi yötawa: Bakwo̧, jweinö yötjawi̧ a̧ja̧kwo̧ma otiwanö ö̧jakwo̧. Ja̧danö, bakwo̧, Isabenö Jo̧nö o̧'wo̧ wa̧na̧lö jo̧ma o̧'wo̧ ösöwanö ö̧jakwo̧.

Proverbios 17:16

Ja̧danö, ju'wibi yötawa: Jweinö omukwatö̧kö̧ma öwaisachobö imiditjö̧ma ¿öwaisachibakwa̧ji̧ jweinö omukwatobö? Öwaisachibökakwo̧. Jo̧bama jweinö omukwatö yötjawi̧ omajadenö öpöjödobetjö̧ la'akatjöda jweinö omukwatobö öwaisachibökakwo̧.

Proverbios 19:9

Ja̧danö, ju'wibi yötawa wanedö: Bakwo̧ lȩekwa yöbawo̧ öba a'o ja̧nö iteda edinatjö̧bi, a̧ja̧kwinatjö̧bi yöawobö wetjökwe. Isabenö yötawa: Jo̧bama lȩekwa yöbawo̧nö yöawena jweinö yöawobö jo̧be. Omöna yöbawo̧nö isabenö lȩtjebakwo̧. Yelösöda omöna yöbawo̧nöma lȩtjebakwa̧tjö ö̧jibobö jwiobe, ja̧danö döibajoböbi jwiobe.

Proverbios 22:18

Jobadö jweinö omukwatadö jwebebö yötjawina jawama kwomajadeduwi okwanö anawaduwi, ja̧ yötjawina ba̧kwȩlö̧jatebö kwomukwataduwobö. Jobekwö kwomukwataduwobetjö̧ ju'wedönö yöbawö pjakataduwakwedöja̧. Ja̧danö, ju'wedönö yöbawö pjakataduwobetjö̧ kwo̧'wo ösöwanö kwö̧jaduwakwedöja.

Proverbios 3:18

Chitji̧, jweinö omukwatö ja̧kwawa wanekwachujuma jojodönö lekwe tjö̧ji̧ iyuju, yöjawi̧ ösödö a̧ja̧kwadönöma. Jao chitji̧, jobuju yöjawi̧ 'diinö do̧ba̧lö kwö̧jitjö̧ma kwo̧'wo̧ ösöwanö kwö̧jakwo̧ja.

Proverbios 3:21

Ja̧danö, ju'wibi jwebebö yötawakwö chitji̧: Ba̧kwȩlö̧jatebö jweinö omukwatö kwö̧jo. Ja̧danö, ba̧kwȩlö̧jatebö ajayinö otiwanö kwomukwato jweinö kwomukwatina badekwachinö.

Proverbios 3:22

Ja̧danö, jobekwö kwö̧jitjö̧ma kwo̧'wo̧ ösöwanö lekwe kwö̧jakwo̧ja. Wanedö yötawakwö: La̧wo̧sopja jwiinö otiwopja kwölawobe otiwanö öwawi̧danö ökwö jweinö omukwatö kwö̧ji̧ma öwawinö kwö̧jakwo̧ja, jweinö omukwatö jo̧ jö̧ba̧lö.

Proverbios 4:21

Ja̧ yötawi̧ma kabatibökönö kwomukwato, ba̧kwȩlö̧jatebö. Ja̧danö, kwomajadenö kwanawo ba̧kwȩlö̧jatebö kwomukwatakobetjö̧.

Proverbios 4:4

ötjönö chabe'do baikwö yöbawiaijatö ötjönöma: —Chitji̧, ötjö yötawi̧ma kwomajadenö kwanawo kwomukwatakobetjö̧. Ja̧danö, jwebebö yötawi̧ma a̧ja̧kwö kwö̧jo lekwe mölȩ kwö̧jakobetjö̧ kwo̧'wo ösöwanö.

Proverbios 4:6

Ja̧danö, ju'wi jawabi jwebebö yöawijatö chabe'doma ötjönöma, baikwö: —Chitji̧, jweinö omukwatö kwö̧jo, jwaikwöda. Ja̧ kwö̧ji̧ma kakatiboko otiwanö kwö̧jakobetjö̧. Wanedö yötawakwö: Jobekwö jweinö omukwatö kwö̧ji̧ma isuju te'ada̧lujudanö ji̧. Jobuju jweinö omukwatö kwö̧ji̧ wanekwachujunö a̧ja̧kwö kakatibökötjö̧ma otiwanö jite'ada̧lobe ökwönöma otiwanö kwö̧jobö. Ja̧danö, tjöbeba̧lö jite'ada̧lobe ökwönöma jobujunö kwösöditjö̧ma, jweinö omukwatö kwö̧ji̧ wanekwachujunöma. Jobekwö jö̧ba̧löma ökwö jweinö omukwatö kwö̧ji̧ma ökwönö te'ada̧lobe, jö̧ba̧lö wanekwachobe— yöawijatö chabe'doma ötjönöma.

Juan 12:25

Ina yöawinobe: —Ja̧danö, jojodö, böjȩ jawada omukwatö ju̧kwadöma, Diosnö ichibökönö wotjakwedö. Jo̧kwaijayonö böjȩ jawa omukwatökönö, Diosnö omukwatö ju̧kwadöma Diosnö ichibö ba̧kwȩlö̧jatebö Dioskwö tjuju̧kwakwedö— yöawinobe—.

Juan 14:21

Ötjö weti̧ a̧ja̧kwadöma isabenö ötjönö ile nibebö ju̧kwadö. Ja̧danö, ötjö Chabe'doma ötjönö ile nibebö ju̧kwadönö ile nibebö jo̧. Ja̧danö ötjöbi, ötjönö ile nibebö ju̧kwadönö ile nibebö jo̧sa. Jobadönö chi̧sekwakwo̧sa ötjönö tjöwaisachibanö—yöawinobe Jesúsma.

1 Pedro 3:10

Jau chömöledö, isabenö jwaikwöda otiwanö ja̧bö dö̧jobö jo̧be, Dios iwene jejenö laebobetjö̧, baikwö laebobe Dios iwene: Bakwo̧ o̧'wo̧ ösöwanö ö̧jobö jö̧a̧litjö̧ma, ja̧danö otiwanö ja̧kwawa ö̧jobö ösöditjö̧ma, sulabenöma yöa̧loko, ja̧danö omönama yöa̧loko.