Proverbios 19:12 - Dios Iwene

¹² Ja̧danö, ju'wibi yötawa, wanedö, inesö la'aka luwo̧nö dötölataja jawa wanedö: Ju'wikwenama inesö la'aka luwo̧ma o̧'wo̧ sulekwö ö̧jena. Jobekwö o̧'wo̧ suliawö̧ itebonö ju̧kwadöma yebabidö, didiba labinö tuluiawö̧ yetjabi̧danö. Isabenö, didibama jwiinö labo̧, ¿jö̧tö̧? Jojodöma didiba labinö tuluobe tja̧ja̧kwena jwiinö yebabidö, ökwödönö ukwobö icha, jö̧ba̧lö. Ja̧ yetjabi̧danö yebabidö jojodöma, tjuluwo̧ inesö la'aka luwo̧ma o̧'wo̧ sulekwö jo̧nöma, jwiinö labo̧, jö̧ba̧lö. Jobekwö baledokobe inesö la'aka luwo̧ lȩlö̧jinö edo̧ yöbawö weitjö̧ma. Jao, ju'wikwenama inesö la'aka luwo̧ma itebonö ju̧kwadönö lȩlö̧jinö edö pjabato̧. Jobekwö pjaatiawö̧ itebonö ju̧kwadöma jwiinö tjösödena. Wanedö yötawa: Kwöwaisaduwobe, yȩayi̧ a̧delö tjo'yoli̧ lo̧be edö tjösödobe jojodöma, otiwa, jö̧ba̧lö. Ja̧ tjösödi̧danö ösödadö jojodöma tjuluwo̧ inesö la'aka luwo̧ma lȩlöjinö edö pjaatena, otiwa jö̧ba̧lö.

Proverbios 19:12 Iomraidhean Croise

Génesis 27:28

Chitji̧, Diosma si̧li̧'i̧dö tjo'yoli weakwo̧, ku̧kwa pokwi̧ tiyudobö. Ja̧danö, kwöbatjonö otiwanö pökwi̧bi pokwobö pjaatakwo̧. Kwakwawabi nöinö, ubabi, ubasobu yu'yöawobubi nöinö pokwinö baibanö pjaatakwo̧.

2 Samuel 23:4

Jau, la'aka luwo̧ otiwo̧ma, jawo̧ yȩayi̧ ojwiyo'wo jwiena dejato̧danö ichejekwo̧, ja̧danö ojwiyo o̧bi̧danö ichejekwo̧, ja̧tjö̧ meje'ye otiwanö pokwi̧danö, iteda ömöayedö otiwanö tjö̧da̧peachobö öibobetjö̧.

Proverbios 20:2

Ja̧danö, ju'wibi yötawa: Inesö la'aka luwo̧ma o̧'wo̧ sulachibinö ö̧jena itebonö ju̧kwadöma jo̧banö yebabidö. Wanedö yötawa: Didibama jwiinö labo̧ ¿jö̧tö̧? Jojodöma didiba labinö tuluobe tja̧ja̧kwena jwiinö yebabidö, ökwödönö ukwobö icha, jö̧ba̧lö. Ja̧ yetjabi̧danö yebabidö jojodöma, o̧'wo̧ sulachibinö inesö la'aka luwo̧nöma. Isabenö yötawa: Jo̧banö, inesö la'aka luwo̧nö o̧'wo̧ sulachibinö ja̧bajo̧nöma kwabö lotjobö weökwe inesö la'aka luwo̧ma.

Proverbios 28:15

Ja̧danö, ju'wibi yötawa: Inesö la̧'aka luwo̧ o̧'wo̧ sulinö edo̧ma usulasedönö jwiinö labo̧, jobadönö usula tjȩmawinö webo̧. Wanedö yötawa: Jo̧ba inesö la'aka luwo̧ o̧'wo̧ sulinö edo̧ma didiba tulubö labo̧danö labo̧. Ja̧danö, nöbo̧ waya jojodönö wo̧atotö jö̧ba̧lö juluwanö ö'öbakwawö icho̧danö labo̧, inesö la'aka luwo̧ usulasedönö o̧'wo̧ sulinö edo̧ma. Yelösöda, jobadönö usula tjȩmawobö labo̧.

Isaías 18:4

Jau, jobekwö isabenö baledakobe, Isabenö Jo̧ma baledakwa̧ ötjönö yöawinobetjö̧, baikwö: —Ötjö Diosma wi̧inö janö, chöjelö edö chö̧jakwo̧sa, möle jawo̧ wi̧inö tjo̧'omanö utubedi̧danö, ja̧danö wa̧ji̧ emajitjena si̧li̧'idö tji'oli wi̧inö yoliwi̧danö, wi̧inö ba̧nö cheda̧lakwo̧sa.

Daniel 5:19

Ja̧danö, jejenö iyiawö̧, okobe deinö böjȩnö ju̧kwadöma jo̧ba Nabucodonosornö yetjaibinobe, tjitebokwena ju̧kwadöbi, tjiwenekwena yöba̧ladöbi. Ja̧danö kwabe'doma isabenö juluwo̧ ö̧jinobe, iteda ösödi̧danö ju'wedönö kwabö loinobe, ja̧danö ju'wedönö kwabö lobökönö lȩlö̧jinö edinobe, iteda ösödi̧danö. Iteda ösödi̧danö ösödawö̧nö otiwanö tjomukwatobö kabebö ujuninobe, ja̧danö öpöjödawö̧nö nija̧kwönönö ujuninobe, jobadönö mikwawöködö jö̧ba̧lö tjomukwatobö.

Daniel 6:24

Jemi ikenama la'aka luwo̧ Daríoma weinobe okobe deinö iteda öba a'o ichibö tjo̧'wo̧ sulinö Danielnö wene jwöbebajadönö tjichejebobö, ja̧danö jobadönöbi, tji̧lȩkwa̧munöbi, tji̧tji̧munöbi okobe deinö i̧lȩdo̧ okwa ikwö lotjinobe, didibadö tjukwobö. Ja̧danö, jejenö tjikwenama, didibadöma juluwanö mebibö tjukwinobe, ina nijinö metja̧pjinö, jwiinö tji'delachajinö mebibö tjukwibinobe jobadönö.

Deuteronomio 33:28

Jo̧kwajabetjö̧, israel jojodöma wene jwiinö tjö̧jobe, Jacob itji̧mu tupadanö jojodöma labokobe otiwanö tjö̧jobe. Israel nijima, si̧li̧'idö ti'oli otiwanö tjoduwemi, ja̧danö trigojaye waji̧bi, ubasobubi nöinö jȩmi niji̧.