Proverbios 18:6 - Dios Iwene

⁶ Ja̧danö, ju'wibi yötawa: Jweinö omukwatö̧kö̧ma yöa̧lena yöa̧lawö̧ma jo̧bakwö nöinö wene tju̧juna̧lobe. Yelösöda, ölakwabikwawö, ja̧danö jo̧banö jwöbeba̧lö tjöpöjödobe, sulabenö yöba̧lo̧, jö̧ba̧lö. Isabenö, jo̧ba jweinö omukwatö̧kö̧ma sulabenö yöa̧lobetjö̧ itedada wene jwöbekwo̧. Yöa̧lawö̧ma jwiinö öpöjödö tjo̧'wo̧ sulachibobetjö̧ kwakwatjobö aeba̧li̧danö itedada AEKWOBEDANÖ abeba̧lo̧, jweinö omukwatö̧kö̧ma.

Proverbios 18:6 Iomraidhean Croise

Proverbios 12:16

Ja̧danö, ju'wibi yötawa: Jweinö omukwatö̧kö̧ma juluwanö dameakwo̧, ödameakwi̧ma tjöbeba̧lökönö. Jobekwö i̧sekwokobe ö'wiyawakwawönö omukwato̧ma. Ö'wiyawakwawönö omukwato̧ma jelo̧ jo̧banö sulabenö jö̧a̧lena öpöjödijayonö 'wiinöda atadökönö jo̧.

Proverbios 13:10

Ja̧danö, ju'wibi yötawa: Ju'wedötjö bajalekwönönö waisadösa, jö̧ba̧lö, omukwatadöma ba̧kwȩlö̧jatebö ju'wedökwö wene tju̧juna̧lakwedö. Ju'wibi yötawa: Jweinö omukwatö ju̧kwadöma ju'wedö jwebebö yötjawi̧ma a̧ja̧kwö ösödadö, otiwa jö̧ba̧lö.

Proverbios 14:16

Ja̧danö, ju'wibi yötawa: Jweinö omukwato̧ma, ö'wiyawakwawönö omukwatö suli̧ jawatjö, lö̧jibapji jö̧ba̧lö ödökwönönö jo̧. Jobekwö ö̧jokobe jweinö omukwatö̧kö̧ma. Jweinö omukwatö̧kö̧ma omukwatökönö, sulökena, jö̧ba̧lö jo̧kwada labebö 'yo̧, suli̧ jawa baledobekwö.

Proverbios 14:3

Ja̧danö, ju'wibi yötawa: Jweinö omukwatö jo̧ma jweinö yöba̧lo̧. Ja̧danö, jweinö omukwatö yöa̧lobetjö̧ iteda yöa̧li̧ma te'ada̧lo̧danö pjaatakwo̧, wenetjö̧ ö̧jibinö. Jobekwö baledokobe jweinö omukwatö̧kö̧nöma. Jweinö omukwatö̧kö̧ma ötjöda otiwo̧sa jö̧ba̧lö, ötjöda waiso̧sa jö̧ba̧lö nöinö yöa̧lobetjö̧ lȩtjebakwo̧.

Proverbios 17:14

Ja̧danö, ju'wibi yötawa, wanedö: Ojwe tjöekwemi ojwiyo ja'yubeda ebawobe. Ja̧danö, jemi dadö tju̧tumökötjö̧ma ojwiyoma nöinö ebawibö pjolachaibakobe ¿jö̧tö̧? Te'ada̧lökönö jemima dadö tju̧tumobö jo̧be. Isabenö yötawa: Ja̧ tju̧tumi̧danö jojodöma jamatö jwöjwötjakwawena te'ada̧lökönö katjatakwawobö jo̧be jwiinö tjölakwabikwawapji jö̧ba̧lö. Isabenö, ojwe pjolachibapji jö̧ba̧lö juluwanö tju̧tumi̧danö jojodöma jamatö jwöjwötjakwawena juluwanö katjatakwawobö jo̧be, jwiinö tjölakwabikwawapji jö̧ba̧lö.

Proverbios 19:19

Ja̧danö, ju'wibi jwebebö yötawaduwakwö: Bakwo̧ juluwanö dameakwo̧ma, ba̧kwȩlö̧jatebö juluwanö dameakwo̧obetjö̧ ba̧kwȩlö̧jatebö wene ujuna̧lakwo̧, yemidanöbi yemidanö. Ja̧danö, ökwödöma kwomukwataduwena, wene ujuna̧li̧tjö̧ ö̧jibobö pjadatena, jö̧ba̧lö. Chömöledö, isabenö yötawa: Jo̧ba wene ujuna̧li̧tjö ö̧jibinö pjakataduwitjö̧ma yemidanö yemidanöbi ba̧kwȩlö̧jatebö pjakataduwobö jena, jo̧bama kabatökönö wene ujuna̧lakwobetjö̧. Jo̧kwaobetjö̧ jwebebö yötawaduwakwö: Pjakataduwobö jwiyobe, pjakataduwokonö.

Proverbios 19:29

Ja̧danö, ju'wibi yötawa: Diosma itenöda obadönöma lȩebakwa̧ ida̧ökö ujuninobe. Ja̧danö ju'wibi yötawa: Jweinö omukwatökönö ja̧badönö kwakwabö lȩtjebobö jo̧be.

Proverbios 20:3

Ja̧danö, ju'wibi yötawa, wanedö: Jojodötjö ju'wedöma ju'wedökwö wene tju̧juna̧lakwawobe. Ja̧danö, jobadö wene juna̧ladöma labinö jwöbeba̧lö tjölakwabikwawobe. Ja̧danö, jelo̧ wene jwibo̧ma labidö tjölakwabikwawobekwö i̧'yokobe tjölakwabikwawoböma öpöjödobetjö̧. Isabenö yötawa: Jo̧bama otiwanö omukwatö jo̧ tjölakwabikwawobekwö i̧'yokobetjö̧. Ja̧danö, ju'wedöma jo̧banö edö, jweinö omukwato̧, jö̧ba̧lö, yöba̧ladö wene juna̧ladö tjölakwabikwawobekwö i̧'yokobetjö̧. Jobekwö tjo̧mukwatokobe jweinö omukwatöködöma. Jweinö omukwatöködöma tjölakwabikwawoböma ösödö isakwadö.

Proverbios 22:10

Ja̧danö, ju'wibi yötawa: Isabenö, jojodönö sulabenö yöba̧lö obadöma deitjö̧ma otiwena. Jao, jobadö obadönö a'dewö loköbaduwobetjö̧ ölakwabikwawabi, wenebi, jelo̧nö jwöjwöakwawabi jwiena.

Proverbios 25:24

Ju'wibi yötawa: Bakwo̧, ilekwo̧ ba̧kwȩlö̧jatebö jwöbeba̧lu̧jukwö ö̧ji̧ma waiyobe. Isabenö, jobujukwö ö̧ji̧tjö̧ bajalekwönönö otiwobe jo̧dawa'ye ejutjö mö 'do̧'do̧kwetenia ba̧nö ö̧ji̧ma.

Proverbios 27:3

Ja̧danö, ju'wibi yötawa, wanedö: Bakwo̧ inawa ömökawa e'ewö jwöbo̧, jwu'we, chime'dawachiba ömöka jö̧ba̧lö. Ja̧danö, so̧bi̧ya̧pu̧ bade'donö su̧'bȩinö anibö e'ewo̧ma jwöbo̧, jwu'we, chime'dawachiba ömöka jö̧ba̧lö jö̧ba̧lö. Ja̧danö, jweinö omukwatö̧kö̧ma jelo̧nö wene nöinö jwöebobetjö̧, wene jwöebökwema ömöki̧ e'ewi̧danö jwöbo̧, jwu'we, me'dawachibo̧sa, jö̧ba̧lö. Isabenö, ömöki̧ e'ewi̧ ime'dawachibi̧tjö̧ bajalekwönönö ime'dawachibobe wene nöinö jwöebökwema, jweinö omukwatö̧kö̧ jo̧banö wene jwöebobetjö̧.

Proverbios 29:9

Ja̧danö, ju'wibi yötawa, wanedö: Bakwo̧ jweinö omukwato̧ma jelo̧nö jweinö omukwatö̧kö̧kwö wene ujuna̧lakwawobe. Ja̧danö, lȩekwa yöbawo̧nö yöbawö 'ya̧jadö jweinö omukwato̧ma yöawobe lȩekwa yöbawo̧nö, bitema sulabenö ja̧inobe ötjönöma, jö̧ba̧lö. Jobekwö yöawonö jweinö omukwatö̧kö̧ma sulabenö a̧ja̧kwökönö ö̧jobe, labinö jwöbeba̧lö, ja̧danö oböda obö, 'wiinö jö̧könö. Jo̧kwaobetjö̧ lȩekwa yöbawo̧ ¿dakwö otiwanö yöawoböda? Jwiobe.