Proverbios 16:4 - Dios Iwene

⁴ Ja̧danö, ju'wibi yötawa: Isabenö Jo̧ma iteda okobe jwiinö otidinabi, okobe deinö otidinawö̧nöbi baledakwa̧ma ajayitjöda omukwatö ujuninobe. Ja̧danö, sulabenö omukwatadönö baledakwa̧bi ajayitjöda omukwatö ujuninobe Isabenö Jo̧ma, jobadönö lȩebakwa̧ mölȩ baibena.

Proverbios 16:4 Iomraidhean Croise

Génesis 1:31

Diosma okobe jwiinö otidaja̧ edinö jwiinö ösödijetö, otiwa, jöba̧lö. Ikenama yi̧böbi yi̧bijetö. Ja̧danö, dewachöbi dewachijetö. Jejenö baibijetö jelemutjö bakwöta mölema.

Diosnö ösödo̧ Job mikwo̧ usula emawina jawa 15:23

juluwanö bo̧lö̧ tjukwakwawö̧sa, –jö̧ba̧lö. Jau, jweinö kwebachökönö, jelobebi, jelobebi kwebachadö, ja̧danö tjöwaisa, –Isabenö juluwanö wene döbaledakwedösa, –jö̧ba̧lö.

Diosnö ösödo̧ Job mikwo̧ usula emawina jawa 21:30

Tjedaja̧ baikwö yöbawadö, –Nöinö wene baledenama, sulabedöma wenetjö ji̧badö, Dios dameakwö lȩebenama, wene jwiinö Dios lȩebi̧tjö döbibajadö, –jö̧ba̧lö yötjawobe.

Éxodo 9:16

Jo̧kwaijayonö 'yaka̧laduwinöda wetijatö chujulu chi̧sebi̧ma kwedaduwobö, ja̧danö böjenö ju̧kwadöma, okobe jwiinö böjenö tjöwaisachibakobetjö̧, Isabenö Jo̧ma jwiinö juluwo̧, jö̧ba̧lö.

Proverbios 16:5

Ju'wibi yötawa: Bakwo̧ma, itedada baikwö omukwatena, ötjöda luwo̧sa, jö̧ba̧lö, ötjöda otiwo̧sa, jö̧ba̧lö, waiso̧sa, jö̧ba̧lö. Isabenö Jo̧ma jwiinö öpöjödobe jo̧ba omukwati̧danö omukwatadönöma, okobe deinö. Isabenö yötawa: Jobekwö omukwatadönöma Isabenö Jo̧ lȩebakwawö̧.

Isaías 43:21

Ökwödö ötjöda chömöledö bakibaduwanö chotidinawö̧nö pjabatö, jobekwö chotidakwo̧sa chömöledö, ja̧ baledi̧ edö, —Diosma isabenö iteda ömöledönö otiwanö pjabato̧, —jö̧ba̧lö ötjönö ösödö yöka̧laduwakobetjö̧, jö̧ba̧lö yöa̧lobe Diosma, ökwödö Israel jojodönö.

Isaías 43:7

Jau, okobe deinö ötjö chiminö ötjabawö̧, —Bidöma Isabenö Jo̧ ömöledö israel jojodö, —jö̧ba̧lö ötjabawö̧nö chichejebakwo̧sa. Ötjöda jobadönö dadö chotidijatö, ötjöda tjitebosaso batjibanö chotidijatö, ötjö Diosnö tjösödakobetjö̧. Jo̧kwajabetjö̧ jobekwö tjebatajö chichejebakwo̧sa, chömöledö pjelekwachibö ja̧dönö, jö̧ba̧lö yöawobe Diosma, israel jojodönö.

Romanos 11:36

Jau chömöledö, Diosda okobe deinöbi, okobe jwiinöbi otidina. Ja̧danö okobe jwiinöbi okobe deinöbi iteda ujulunöda dö̧jobe böjȩnöma, Dios ösödi̧ ja̧bö dö̧jo jö̧ba̧lö. Jo̧banöda dösödo ba̧kwȩlö̧jatebö chömöledö, Otiwo̧ja, juluwo̧ja, jö̧ba̧lö. Jo̧banöda dösödoböma chösöda chömöledö.

Romanos 9:22

Diosbi ja̧danö chömöledö, iteda omukwati̧danö ja̧bo̧. Jo̧bama iteda ujulu i̧sebobö jö̧a̧linobe, ja̧danö, Jojodö sulabenö ja̧tji̧ma öpöjödö lȩbebo̧sa, jö̧ba̧lö i̧sebobö jö̧a̧linobe. Jejenö i̧sebobö jö̧a̧lijayonö, lekwe o̧'wo̧ 'dibachibö ite'ada̧linobe, lȩbebökönö. Lekwe lȩebakwawö̧nö lȩbebökönö ite'ada̧linobe chömöledö. Ja̧danö, ju'wibi i̧sebobö jö̧a̧linobe chömöledö. Iteda dejatinö ujulu i̧sebobö jö̧a̧linobe, ökwödö lȩlö̧jinö edawö̧nö. Ja̧danö, ökwödönö 'da̧batö ujuninobe, Bidönö chujulu chiyocha, idöbi tjujuna̧lobö, jö̧ba̧lö.

1 Pedro 2:8

Ja̧danö jelobe baikwö laebobe Dios iwene: Biwa inawama jojodö töbö metjakwawa baibanö ja̧kobe, jö̧ba̧lö laebobe. Jau chömöledö, jobadö Jesúsnö tjöpöjödijayonö, Diosma jo̧banöda ujuninobe inesö la'aka luwo̧ baibanö, ja̧danö jo̧banö öpöjödadöma Dios lȩebakwawö̧ tjö̧jobe. Jau chömöledö, Dios iwene tjöpöjödinobetjö̧, Jesúsnö öpöjödö töbö metjinobe, iteda iwene öpöjödadö töbö metjobö Dios omukwatö ujuninadanö.

2 Pedro 2:3

Ja̧danö, idöda tjemotö jö̧ba̧lö tjösödobetjö̧, jobadö sulabenö yöbawadöma ökwödönö omöna yötja̧lakobe, ökwödötjö balada tjemo jö̧ba̧lö. Jo̧kwaijayonö Diosma damötjö jobadönö lȩebobö omukwatö ujuninobe chömöledö, ja̧danö isabenö jobadönö lȩebakobe.

2 Pedro 2:9

Ja̧danö baikwö yötawaduwakwö chömöledö, ja̧ wene edö, baikwö döwaisachibobö jo̧be, Diosma ökwödö jo̧banö ösödadönö isabenö usula demawi̧tjö dö̧jibinö pjaatobö waiso̧, jö̧ba̧lö. Ja̧danö, ju'wibi waiso̧ chömöledö, Diosnö öpöjödadö iteda lȩebakwa̧tjö dötjibapji jö̧ba̧lö ite'ada̧lobö waiso̧, inesö jojodö ja̧tji̧ otiwojobö sulojobö jö̧ba̧lö yöawakwa̧ möle baibenanö kabatö.

Apocalipsis 4:11

Dios, ökwöda ökwödö Duluwo̧, ökwödö do̧'wo̧ döwana̧lökwe Dios. Ökwöda jwiinö mikwawo̧ja. Ökwöda jwiinö mikwawo̧köbobetjö̧ ökwönö dösödobö jo̧be, Jwiinö mikwawo̧ja, jwiinö waiso̧ja, jwiinö juluwo̧ja, jö̧ba̧lö, dösödoböma. Ökwöda okobe jwiinö otidinaköbobetjö̧ ökwönö dösödobö jo̧be, Otiwanö otidinaja, jö̧ba̧lö, dösödoböma. Ökwö kwomukwati̧tjöda okobe jwiinö baibinobetjö̧ ökwönö dösödobö jo̧be. Ökwö kwomukwati̧tjöda, okobe jwiinö kwotidinobetjö̧ ökwönö dösödobö jo̧be. Duluwo̧ Dios, ökwöda jwiinö mikwawo̧köbobetjö̧ ökwönö dösödobö jo̧be, jö̧ba̧lö lo̧tjijatö jobadö veinticuatronö damö la'aka luwedöma inesö la'aka luwo̧ bo̧nö ösödö.