Proverbios 16:18 - Dios Iwene

¹⁸ Ja̧danö, ju'wibi yötawa: Bakwo̧ma itedada omukwatena, ötjödasa ju'wedötjö bajalekwönönö waiso̧ma, jö̧ba̧lö. Isabenö yötawa: Ötjödasa waiso̧ma, jö̧ba̧lö, omukwato̧nöma ju'wi mölȩ jwiinö labi̧ jawa baledakwo̧. Ja̧danö, ju'wibi yötawa: Bakwo̧ma ju'wedönö nijakwönönö edö omukwatena, bidöma mikwawöködö jö̧ba̧lö. Isabenö yötawa: Jobekwö omukwato̧ma ju'wi mölȩ itedada usulaso̧da ö̧jakwo̧.

Proverbios 16:18 Iomraidhean Croise

Proverbios 11:2

Ja̧danö, ju'wibi yötawa: Isabenö, bakwo̧ ju'wedönötjö o̧penönö otiwo̧sa, jö̧ba̧lö omukwato̧ma ju'wi mölȩ tabakwö ö̧jakwo̧. Jokwaijayonö jobekwö baledokobe ju'wedönötjö baikwönönö jo̧sa, jö̧ba̧lö, omukwato̧nöma. Jo̧bama, ju'wedönötjö̧ baikwönönö jo̧sa jö̧ba̧lö, omukwatö ö̧jobetjö̧ jweinö omukwatö, tabakwökönö ö̧jakwo̧.

Proverbios 17:19

Ja̧danö, ju'wibi yötawa: Isabenö, jojodötjö ju'wedöma sulabenö ja̧tjo̧böma ösödadö. Jobadöma ju'wedökwö wene satjebobö isakwadö. Ja̧danö, ju'wibi yötawa, wanedö: Bakwo̧ iteda eju apjude jwiinö otiwade, yelösöda jwiinö mikwawade ujuninobe, chömöledötjö bajalekwönönö juna̧lo̧sa, jö̧ba̧lö, i̧sekwobö. Isabenö yötawa: Jobekwö iteda ujuna̧li̧ öwawinö i̧sekwobetjö̧ itedada wene jwöekwakwo̧, naukwabidö ichö tjö̧naukwobö. Isabenö jo̧bama tjö̧naukwobö jwöbebo̧, jwiinö mikwawade ujuninobetjö̧.

Proverbios 18:12

Ja̧danö, ju'wibi yötawa: Bakwo̧ itedada omukwatena, ötjödasa ju'wedötjö o̧penönö waiso̧ma, jö̧ba̧lö. Isabenö yötawa: Ötjödasa waiso̧ma, jö̧ba̧lö, omukwato̧nöma Dios lȩebakwo̧, labi̧ jawa baledinö jo̧banöma. Ja̧danö, jelo̧nö yötawa: Bakwo̧ itedada baikwökönö jo̧sa jö̧ba̧lö omukwato̧nöma, jojodö otiwanö tjedakwo̧, otiwanö omukwatö jo̧ jö̧ba̧lö.

Proverbios 29:23

Ja̧danö, ju'wibi yötawa: Bakwo̧ ju'wedönötjö bajalekwönönö otiwanö jo̧sa, jö̧ba̧lö omukwato̧ma ju'wi mölȩ tabakwöda ö̧jakwo̧. Ja̧danö, jelo̧ma ju'wedönötjö baikwönönö jo̧sa, jö̧ba̧lö, ju'wi mölȩ tabakwökönö ö̧jakwo̧. Ja̧danö, jo̧ba baikwönönö jo̧sa jö̧ba̧lö omukwato̧nö edö jojodöma otiwanö tjöwaisachibakwo̧kwo̧, otiwanö omukwato̧, jö̧ba̧lö.

Proverbios 8:13

Ju'wibi yöbawuju: —Chömöledö, Isabenö Jo̧nö yebabinö omukwatö kwö̧jaduwobö jö̧ka̧laduwitjö̧ma suli̧ jawa kwöpöjödaduwobö jo̧be. Ötjöma suli̧ jawa öpöjödujusa, jojodö sulabenö tjo̧mukwati̧ma. Baikwö jojodö sulabenö tjo̧mukwati̧ jwiinö chöpöjödobe: Bakwo̧, ötjödasa waiso̧ma, jö̧ba̧lö omukwato̧nöma jwiinö chöpöjödobe. Ja̧danö, ju'wibi jojodö tjo̧mukwati̧ma jwiinö chöpöjödobe: Bakwo̧ ju'wedönötjö o̧penönö inesö luwo̧ jo̧sa, jö̧ba̧lö, omukwato̧nöma jwiinö chöpöjödobe. Ja̧danö ju'wi jawabi ju'wi jawa chöpöjödobe: Sulabenöda omukwatö jo̧nö jwiinö chöpöjödobe. Ja̧danö, jelo̧nöbi jwiinö chöpöjödobe, jojodönö jelobekwö tjo̧mukwatobö ö'öbönö yöba̧lo̧nöma. Ja̧ jawa jwiinö chöpöjödobe— yöbawuju, jweinö omukwatö ja̧kwawa wanekwachujuma, isudada.

Isaías 37:38

Jo̧kwaijayonö, jobe ö̧jemi ja'ötjö, baikwö baledinobe: Ju'wi möle iteda ösödökwe Nisroc eju okwa tebachö, ösödökwe o̧'wo jawa ösödemi ja'ötjö, itji̧mu Adramelec mikwo̧bi, Sarezer mikwo̧bi kwölöte'onö dȩdȩbö lotjinobe tjabe'donö, ja̧danö dȩdȩbö lobajadö, jobetjö labebö dötjibajinobe Ararat nijibe. Jemi ikenama Senaquerib itji̧ Esarjadon mikwo̧ma, abe'do ö̧jinemi Asiria jojodötjö inesö la'aka luwo̧ baibinobe.

Daniel 11:12

Jejenö yelösöda ba̧jekwadönö ujuluwobetjö̧, Egipto la'aka luwo̧ma, Aaa, isabenö juluwo̧sa, yelösöda ba̧jekwadönö kwabö lotajabe jö̧ba̧lö omukwatakobe. Jo̧kwaijayonö, jemi tupakwö ujuluwökakobe Egipto la'aka luwo̧ma.

Daniel 5:22

Ja̧ baledina jawa waiso̧ja chuluwo̧ Belsasar, jo̧kwaijayonö ja̧ baledina kwöwaisijayonö, Dios öba a'otjö nija̧kwönönöbo̧sa̧ jö̧ba̧löma omukwatökönö jo̧ja.

Daniel 5:24

Ja̧danö jejenö ja̧bö kwö̧jiökwe, Diosma ömamu kwedaduwajamu weatö, ökwönö yöawo jö̧a̧li̧ma.

Mateo 26:74

Yötja̧lökwe, Pedroma atadinobe: —Dios öba a'otjö isabenö yötawaduwakwö, ja̧danö omöna yöta̧litjö̧ma Dios lȩebobö jo̧be: ¡Isabenö jo̧banö wajwitökwe!— jö̧ba̧lö atadinobe. Jejenö atadaja̧ ikena, akalama juluwanö jwöinobe,

Lucas 14:9

jo̧ba inesö mikwawo̧ teachenama pjiesta luwo̧ma ökwönö weena: A̧laibö pjolachibi, bite otiwanö chösödökweda jobe öbamatakobetjö̧, jö̧ba̧lö. Ja̧danö, jejenö baleditjö̧ma, tabakwö jo̧kwadabedö tjö̧bemida kwöbamatena, ¿jö̧tö?

Romanos 11:20

Chömöledö, isabenö jobadönö tjebö loinobe, ja̧danö ajayi tjö̧jinemitjö balekwedönö ökwödönö ujuninobe. Biya̧ yötawa chömöledö: Dios iwene tjöpöjödiökwe, jobadönö tjebö loinobe, ja̧danö Dios iwene kwösödaduwobetjö̧, tjö̧jinemi kwö̧jaduwobe. Ja̧danö, Aaa, otiwadösa, jö̧ba̧lö kwomukwataduwoko chömöledö. Wainö kwomukwataduwo chömöledö, Isabenö Diosma iteda iwene öpöjödadönöma lȩbebo̧, jö̧ba̧lö kwomukwataduwo chömöledö.

1 Timoteo 3:6

Ja̧danö, te'ada̧lakwawa luwo̧ baibanö otidakwo̧ma, iya̧nö Jesúsnö ösödo̧maökö, ida̧ökö o̧'wo̧ luwo̧nö da̧peachinada. Baikwö yötawa: Bakwo̧ iya̧nö Jesúsnö ösödo̧nö te'ada̧lakwawa luwo̧ baibanö otidobö weköbitjö̧ma, damötjö la'aka omöna yöba̧lina omukwatinadanö omukwatena, Aaa, ötjöma otiwo̧sa, jö̧ba̧lö. Jo̧kwajabetjö̧, iya̧nö Jesúsnö ösödo̧nö weköba, te'ada̧lakwawa luwo̧ baibanö otidoböma, Awetja omukwatinadanö omukwatapji jö̧ba̧lö, ja̧danö Awetja omukwatinadanö omukwatiökwe, Dios lȩebapji jö̧ba̧lö.

Jueces 11:28

Jo̧kwaijayonö jweinö yöawijayonö, amonitas jojodötjö la'aka luwo̧ma Jefte yöawaja̧ a̧ja̧kwinokobe, jwaikwöda tjölakwabikwawobö omukwatinobe.

1 Samuel 17:42

Ja̧danö yö̧ne ichibö, Davidnö edö öpöjödinobe, —Bitema juluwö̧kö̧, möayo̧, —jö̧ba̧lö. Davidnö edö, otiwo̧nö edinobe, öba otiwanö duwo̧nö edinobe, ina möayo̧.