Proverbios 15:23 - Dios Iwene

²³ Ja̧danö, ju'wibi yötawa, wanedö: Bakwo̧ma jelo̧nö abebö a̧ja̧kwobe, ju'wi jawabi ju'wi jawa öwaisobö. Ja̧danö, abebö a̧ja̧kwajökwema otiwanö atadobetjö̧ jwiinö pjaatobe abebö a̧ja̧kwo̧nöma, ja̧danö nöinö ösödobe abebö a̧ja̧kwo̧ma, otiwanö kwatadajabe, jö̧ba̧lö. Isabenö yötawa: Okobe deinö tjösödobe jweinö atadakwawama. Isabenö, abebö a̧ja̧kwökwema pjabatö yöbawö otiwanö ataditjö̧ma abebö a̧ja̧kwo̧ma nöinö ösödakwo̧, babema chöwaisobö chisakwaja̧ma otiwanö yökawajabe, jö̧ba̧lö.

Proverbios 15:23 Iomraidhean Croise

Diosnö ösödo̧ Job mikwo̧ usula emawina jawa 6:25

—Jau chömöledö, otiwanö jwebebö yötjawi̧ma isabenö otiwa, a̧ja̧kwadö jweinö tjomukwatobö pjaati̧, jweinö yötjawobetjö̧. Jo̧kwaijayonö jejenömaökö ökwödö yökawaduwi̧ma, –Sulabenö ja̧bo̧ja, –jö̧ba̧lö yöka̧laduwijayonö, suli̧ma di̧yajö jö̧ba̧lö i̧sȩböködöja.

Proverbios 12:14

Ja̧danö, ju'wibi yötawa: Bakwo̧ jojodönö otiwanö omukwatö yöbawo̧ma, iteda otiwanö omukwatö yöawi̧ mikwa baibanö böjȩnö ja̧nö otiwanö juna̧lo̧. Ja̧danö, dösölö̧jinö otido̧ma iteda dösölö̧jinö otidi̧ mikwa baibanö böjȩnö ja̧nö otiwanö juna̧lo̧.

Proverbios 12:25

Ja̧danö, ju'wibi yötawa: O̧'wo̧ tjo̧bekwö jo̧ma ime'dawachobe. Ja̧danö, o̧'wo̧ tjo̧bekwö ime'dawachijayonö ömöledöma pjabatö yötja̧lena jo̧banö o̧'wo̧ tjo̧bekwö ö̧jelö o̧'wo ösöwachibanö pjatjatobe.

Proverbios 15:22

Ja̧danö, ju'wibi yötawa, wanedö: Bakwo̧ma ju'wi jawabi ju'wi jawa otidakwa̧ omukwatobe. Ja̧danö, jo̧bama otidakwa̧ abönö ja̧ otikwa waisadönöma abebö a̧ja̧kwobö jo̧be, otiwanö chotidobö yöbawö pjabataduwitjö jö̧ba̧lö. Waisadöma ba̧jȩkwadö pjabatö yötjawitjö̧ma ja̧ otidakwa̧ma otiwanö laebakobe. Jobekwö baledökena waisadö pjabatadö deitjö̧ma. Jo̧ba otido̧ma otidobö omukwatijayonö waekwakobe, otikwa waisadöma pjabatö yötjawokobetjö̧.

Proverbios 16:13

Ja̧danö, ju'wibi yötawa: Inesö la'aka luwo̧ma nöinö ösödobe Dios wei̧ a̧ja̧kwo̧ yöawi̧ma, otiwa jö̧ba̧lö. Isabenö, otiwanö omukwatö jweinö yöbawo̧nö jwiinö ösödobe inesö la'aka luwo̧ma.

Proverbios 16:24

Ja̧danö, ju'wibi yötawa: Tjo̧'omanö ösödö yöba̧lo̧ma yöa̧li̧ a̧ja̧kwadöma tjösödobe, otiwanö yöba̧lo̧, jö̧ba̧lö. Wanedö yötawa: Wa̧yo̧ nebö tjösödi̧danö, o̧ta, jö̧ba̧lö, tjo̧'omanö ösödö yöba̧lo̧ yöa̧li̧ma jwiinö tjösödobe. Ja̧danö, wa̧yo̧ netjaja̧ tjujuluwobö pjaati̧danö pjaatobe tjo̧'o̧manö ösödö yöba̧lo̧ yöa̧li̧ma jojodö tjujuluwachibanö.

Proverbios 24:26

Ju'wibi yötawakwö chitji̧: Kwömöledöso̧ ba̧kwȩlö̧jatebö ökwönö jweinö atada̧litjö̧ma otiwanö i̧sekwobe, isabenö kwömöledöso̧sa, jö̧ba̧lö.

Isaías 50:4

Chuluwo̧ Isabenö Jo̧ Diosma ötjönö öba̧ja̧dajabe, iteda waisanö yöa̧li̧ yöta̧lobö, me'dawachibadönö tjujuluwachibanö yöta̧lakwa̧ chöwaisakobetjö̧. Ötjönö ba̧ja̧dö, yȩayikwena ötjönö wiludö, ö̧ba̧ja̧di̧ cha̧ja̧kwobö webo̧, waisachadö tjöwaisachi̧danö, Dios öba̧ja̧di̧ jawa a̧ja̧kwö chöwaisachakobetjö̧.

Juan 1:37

Jejenö jö̧a̧lawö̧, Juan ömöayedötjö du̧ju̧tajama Jesús ökömanö lutjibinobe.

Juan 11:29

Maríama, jejenö yöjawi̧ a̧ja̧kwö omönanö labeibö Jesúsnö edö ji̧'yinobe.

Efesios 4:29

Ja̧danö, sulabema yöka̧laduwa chömöledö. Pjabatö yöa̧lakwawada yöka̧laduwo, bakwo̧ o̧'wo̧ tjo̧bekwö jo̧nö pjabatö. Jejenö yöka̧laduwi̧ a̧ja̧kwadönö pjakataduwakobe, tjo̧'wo̧ luwo̧ ösöwachibawö̧ jö̧tja̧lobö, Bidöma otiwanö pjabatö yöba̧ladö, jö̧ba̧lö.