Proverbios 13:3 - Dios Iwene

³ Ja̧danö, ju'wibi yötawa: Yöa̧lakwa̧ abönö ö'wiyawakwawönö omukwato̧ma iteda otiwanö ö̧ji̧ te'ada̧lo̧danö te'ada̧lobe, lekwe ö̧jakobetjö̧. Jobekwö ö̧jokobe yöa̧lakwa̧ abönö omukwatö̧kö̧ma. Jo̧bama omukwatökönö nöinö yöa̧lobetjö̧ usulaso̧da ö̧ja̧kwo̧.

Proverbios 13:3 Iomraidhean Croise

Proverbios 10:14

Ja̧danö, ju'wibi yötawa: Jweinö omukwatö ju̧kwadöma tjöwaisi̧ma tjo̧majadenö anawadö tjo̧mukwatakobetjö̧. Ja̧danö, ju'wibi: Jweinö omukwatö̧kö̧ma nöinö omukwatökönö yöa̧lobetjö̧ wene jwöebakwo̧.

Proverbios 10:19

Ja̧danö, ju'wibi yötawa, wanedö: Bakwo̧, nöinö yöba̧lo̧ma, iteda yöa̧li̧tjö sulabe jawa laebena, nöinö yöa̧lobetjö̧. Isabenö yötawa: Jweinö omukwatö jo̧ma nöinöma yöba̧lö̧kö̧.

Proverbios 10:8

Ja̧danö, ju'wibi yötawa: Jweinö omukwatö jo̧ma jo̧banö jwebebö yötjawi̧ma ösödo̧ otiwa jö̧ba̧lö. Jwebebö yötjawi̧danö a̧ja̧kwö ö̧jakwo̧. Jo̧kwaijwayonö, jweinö omukwatö̧kö̧ma jo̧banö jwebebö yötjawi̧ a̧ja̧kwökönö iteda omukwati̧ nöinö yöba̧lo̧. Jobekwö ö̧jobetjö̧ itedada wene jwöekwakwo̧.

Proverbios 12:13

Ju'wibi yötawa: Sulabenö omukwato̧ma sulabenö yöa̧lobetjö̧ iteda wene jwöbekwo̧. 'Daliwanö tjö̧libi̧danö li̧bo̧ wene jwöebi̧tjö̧ ji̧bökönö. Jobekwö baledökökwe Dios wei̧ a̧ja̧kwö jo̧nöma. Dios wei̧ a̧ja̧kwö jo̧ma wenetjö ji̧bo̧, 'daliwatjö tjö̧jibi̧danö, li̧bö̧kö̧.

Proverbios 13:4

Ja̧danö, ju'wibi yötawa 'du̧wekwo̧nöbi dösökwö otido̧nöbi wanedöma: 'Du̧wekwo̧ma ju'wi jawabi ju'wi jawa emobö ösödijayonö emökakwo̧. Jobekwö ö̧jokobe dösölö̧jinö otido̧ma. Jo̧bama dösölö̧jinö otidobetjö̧ ösödi̧ jawa nöinö emakwo̧.

Proverbios 14:3

Ja̧danö, ju'wibi yötawa: Jweinö omukwatö jo̧ma jweinö yöba̧lo̧. Ja̧danö, jweinö omukwatö yöa̧lobetjö̧ iteda yöa̧li̧ma te'ada̧lo̧danö pjaatakwo̧, wenetjö̧ ö̧jibinö. Jobekwö baledokobe jweinö omukwatö̧kö̧nöma. Jweinö omukwatö̧kö̧ma ötjöda otiwo̧sa jö̧ba̧lö, ötjöda waiso̧sa jö̧ba̧lö nöinö yöa̧lobetjö̧ lȩtjebakwo̧.

Proverbios 18:21

Ja̧danö, ju'wibi yötawa: Jojo yöa̧li̧ma juluwobe, ju'wedönö kwabö loi̧danöbi, tjö̧jibinö pjaati̧danöbi. Jo̧kwaobetjö̧ nöinö yöba̧lo̧ma baikwö omukwatobö jo̧be: Nöinö yöta̧li̧tjö jelo̧nö niatibitjö̧ma ötjöda jawa, jö̧ba̧lö.

Proverbios 18:7

Ja̧danö, ju'wibi yötawa: Isabenö, jweinö omukwatökönö yöba̧lo̧ma itedada wene jwöbekwo̧ omukwatökönö yöa̧lobetjö̧. Isabenö, itedada 'daliwa önaja̧nö ö̧libakwo̧, jweinö omukwatökönö yöa̧lobetjö̧.

Proverbios 20:19

Ja̧danö, ju'wibi yötawa: Isabenö, bakwo̧ sulabenö tja̧ja̧kwokonö sewoba̧lö yöba̧lo̧ma omukwatökönö yöba̧lo̧. Ja̧danö, jelo̧ jo̧banö yöa̧lina, ju'wedö wajwitji̧ jawa, ja̧ jawa yöka̧loko jö̧ba̧lö weinajayonö tja̧ja̧kwokonö sewoba̧lö yöba̧lo̧ma ju'wedönöbi ju'wedönö omukwatökönö yöba̧lo̧. Jo̧kwaobetjö̧ jwebebö yötawaduwakwö: Jo̧ba omukwatökönö yöba̧lo̧ ö̧jelöma ödökwönönö kwö̧jaduwo, jo̧banö yöba̧lökönö, sulabenö omukwatökönöda yöba̧lo̧obetjö̧.

Proverbios 21:23

Ja̧danö, ju'wibi yötawa: Bakwo̧ yöa̧lakwa̧ abönö ö'wiyawakwawönö omukwato̧ma ju'wedökwö wene jwiinö ö̧jakwo̧.

Santiago 1:26

Chö̧ja̧wo̧dö Diosnö ösödadöma, ju'wedönö otiwanö yötja̧lobö jo̧be. Bakwo̧, Ötjöma Diosnö ösödo̧sa, jo̧banö ba̧kwȩlö̧jatebö abebö, ja̧danö jo̧ba wei̧ a̧ja̧kwö, jö̧ba̧lö, yöa̧lijayonö jojodönö sulabenö yöa̧litjö̧ma ¿isabenö otiwanö ö̧jobeji̧, Dios ösödi̧danö? Otiwanö jö̧kö̧. Ja̧danö, jo̧ba Dios iwene yöawakwawejube i̧'yi̧ma, ¿mikwawobeji̧? Mikwaokobe. Ja̧danö, Diosnö ösödo̧sa, jö̧ba̧lö, yöa̧li̧ma ¿mikwawobeji̧? Mikwawokobe. Chö̧ja̧wo̧dö, jojodönö sulabenö yöba̧lo̧ma itenöda omöna yöba̧lo̧danö itedada omajadenö jelobekwö omukwatobö öibökwe, Otiwanö jo̧sa, jö̧ba̧lö. Jo̧kwaobetjö̧ jo̧ba Diosnö ösödi̧ma mikwawokobe chö̧ja̧wo̧dö. Ja̧ Diosnö ösödi̧ma inesö ösödi̧maökö.

Jueces 16:11

Ajebökwe, —A̧la̧chi'bo 'yaya'bo, la'akatjöda tjotidinökö'bonö tjunu'yitjö̧ma, chujulu jwibo̧ batibena, ju'wedö jojodödanö, —jö̧ba̧lö atadinobe.

Jueces 16:17

Ja̧danö bajaliyanö jweinö yöawinobe Sansonma Dalilanö, —Ötjöma Dios wei̧ chotidobö 'da̧batö ujuninökwesa, nazareo jojo batibanö. Chojo'do metu'wo jö̧jinemi baikwö bajalenö, nazareo jojo batibanö 'da̧batö ujuninökwesa, ja̧danö jejenö 'da̧batö ujuninökwechobetjö̧, chöwö'ye la'akatjöda 'witjekwökökwesa, nazareobedö tjöwö'ye 'witjobö jwiobetjö̧. Jo̧kwajabetjö̧, chöwö'ye jwobö lotjitjö̧ma, isabenö chujulu jwiamachena, ja̧danö sule ju'wedö jojodö tjujuluwi̧danöda chujuluwena, —jö̧ba̧lö yöawinobe.