Proverbios 12:14 - Dios Iwene

¹⁴ Ja̧danö, ju'wibi yötawa: Bakwo̧ jojodönö otiwanö omukwatö yöbawo̧ma, iteda otiwanö omukwatö yöawi̧ mikwa baibanö böjȩnö ja̧nö otiwanö juna̧lo̧. Ja̧danö, dösölö̧jinö otido̧ma iteda dösölö̧jinö otidi̧ mikwa baibanö böjȩnö ja̧nö otiwanö juna̧lo̧.

Proverbios 12:14 Iomraidhean Croise

Diosnö ösödo̧ Job mikwo̧ usula emawina jawa 34:11

Jau chömöledö, jojodö otidö tjö̧ji̧danö, tjö̧ji̧ mikwawi̧danö iyo̧ Diosma, otiwanö ja̧bö tjö̧jojobö, sulabenö ja̧bö tjö̧jojobö jö̧ba̧lö edajo̧, ja̧tjaja̧ mikwawi̧danö jweinö lȩekwa yöbawö, jobadönö baledakwa̧ webo̧ Diosma.

Proverbios 1:31

Jobekwö, ötjö jwebebö yötawi̧ öpöjödö, sulabenö omukwatö kwö̧jaduwobetjö̧ yelösöda usula kwemawaduwakwedöja, sulabenö omukwatö kwö̧jaduwi̧ mikwa baibanö. Isabenö, ökwödö kwo̧'woduwi̧ okwa suli̧da su̧'bȩ ji̧danö kwana̧laduwobe, sulabenö kwomukwataduwi̧ma.

Proverbios 13:2

Ja̧danö, ju'wibi yötawa: Bakwo̧ jojodönö otiwanö omukwatö yöbawo̧ma, iteda otiwanö omukwatö yöawi̧ mikwa baibanö böjȩnö ja̧nö otiwanö ö̧jakwo̧. Ju'wibi yötawa: Jojodönö o̧'wo̧ sulinö edö omöna yöbawo̧ma ölakwabikwawö ö̧jobö isakwo̧.

Proverbios 14:14

Ja̧danö, ju'wibi yötawa: Bakwo̧ jweinö omukwatö ö̧jaja̧ kabatibö sulabenö omukwato̧ma Dios balekwa mikwa iyö lȩebakwo̧. Ja̧danö, ba̧kwȩlö̧jatebö otiwanö omukwatö ja̧bo̧ma Dios balekwa mikwa iyö pjaatakwo̧, o̧'wo̧ ösöwanö ö̧jobö.

Proverbios 15:23

Ja̧danö, ju'wibi yötawa, wanedö: Bakwo̧ma jelo̧nö abebö a̧ja̧kwobe, ju'wi jawabi ju'wi jawa öwaisobö. Ja̧danö, abebö a̧ja̧kwajökwema otiwanö atadobetjö̧ jwiinö pjaatobe abebö a̧ja̧kwo̧nöma, ja̧danö nöinö ösödobe abebö a̧ja̧kwo̧ma, otiwanö kwatadajabe, jö̧ba̧lö. Isabenö yötawa: Okobe deinö tjösödobe jweinö atadakwawama. Isabenö, abebö a̧ja̧kwökwema pjabatö yöbawö otiwanö ataditjö̧ma abebö a̧ja̧kwo̧ma nöinö ösödakwo̧, babema chöwaisobö chisakwaja̧ma otiwanö yökawajabe, jö̧ba̧lö.

Proverbios 19:17

Ja̧danö, ju'wibi yötawa wanedö: Bakwo̧ma jwibo̧nö lȩ lö̧jinö edö iyobe. Ja̧danö, jo̧ba jwibo̧nö iyi̧ma Isabenö Jo̧nöda öbalewobedanö jo̧be. Ja̧danö, ja̧ öbalewaja̧tjö̧ mikwa baibanö tjebatö iyakwo̧ Isabenö Jo̧ma iyo̧nöma.

Proverbios 24:12

Jao chitji̧, jo̧ba sulabenö ja̧bö̧kö̧nö lȩekwa yöbawo̧ lȩebökwenö kwomajadenö, pjatatobö jo̧be, jö̧ba̧lö kwomukwato. Ja̧danö, pjatatobö jo̧be jö̧ba̧lö kwöwaisijayonö kwomukwatena, iteda jawa, wajwitökwe, pjatatökena, jö̧ba̧lö. Jobekwö jö̧ba̧lö kwomukwatoko chitji̧. Isabenö yötawa: Diosma, okobe jwiinö kwomajadenö kwomukwati̧ waiso̧. Ökwö kwomajadenö pjakatobö jo̧be jö̧ba̧lö kwöwaisi̧bi Diosma waiso̧. Jao chitji̧, Dios, ökwönö te'ada̧lo̧ma okobe jwiinö waiso̧. Ja̧danö, isabenö yötawa: Ökwödö ja̧dina mikwa baibanö iyakwo̧, Diosma.

Proverbios 5:22

Ju'wibi yötawakwö chitji̧, wanedö: Bakwo̧ ö̧jobe ba̧kwȩlö̧jatebö sulabenö omukwatö ja̧baibo̧ma. Ja̧danö, jo̧ba sulabenö ja̧inama jo̧banö do̧tja̧li̧danö do̧a̧lobe jo̧banöma. Ja̧danö, a̧la̧chi'bonö tjunu'yajökwedanö bo̧, ejachibö dilachibökönö, sulabenö ja̧inobetjö̧.

Mateo 16:27

Jau chömöledö, ötjö jojo baibanö jeminökwema, Chabe'do Dios ujulunö chömöayedö ángelesdökwö yemidanö chichocha, ja̧danö jejenö chichenama, lȩbebö chichocha, jojodö ja̧tjaja̧ mikwa baibanö.

Hebreos 11:26

Jejenö omukwatö ujuninobe Moisésma, Dios jojodönö tjö̧jibinö pjabatö weakwo̧nö ite'ada̧lobetjö̧, Israel jojodötjö öbötjachakwo̧nöma. Ja̧danö, jejenö te'ada̧lö ja̧nö, Moisésma Dios ömöledökwö usula emawinobe. Jejenö ja̧nö omukwatinobe, Usula emawö chö̧jijayonö, usula emawö Dios ömöledökwö Dios weakwo̧nö te'ada̧lö chö̧ji̧ma ajayinö Egiptonö okobe jwiinö juna̧lö chö̧jinatjö o̧penönö mikwawobe, jö̧ba̧lö. Moisésma jejenö omukwatinobe iteda ö̧ji̧ möle jawa omukwatokobetjö̧. Moisésma ju'wi möle mölejȩbe ö̧jakwa̧ omukwatinobe, Dios jwiinö mikwawi̧ iyakwa̧ möle. Isabenö, Moisésma ja̧ möle te'ada̧lö Diosnö o̧'wo̧ wana̧lö ö̧jinobe.

Hebreos 2:2

Ja̧danö chömöledö, Diosma jweinö omukwatö lȩebakobe jo̧batjö 'da̧bachibö, jo̧ba yöawina öpöjödö 'ya̧dönö. Omukwataduwi damötjö da'dödöminenö baledina, Dios yöawi̧ öpöjödinadönöma. Baikwö baledinobe: Diosma iteda iwene yöawinobe ángelesdönö, Moisésnö yötjawobö. Jemi ikenama Moisésma yöawinobe jojodönö, da'dödöminenöma. Ja̧ wenema Dios weina wene, jojodö a̧ja̧kwö tjö̧jobö wei̧. Ja̧danö, ja̧ wenema isabenö ji̧ jawa wene. Ja̧danö, Diosma iteda weina wene a̧ja̧kwöködönö sulabenö ja̧tji̧ mikwa baibanö lȩebinobe. Chömöledö, Diosma lȩebinobe iteda weinatjö ja̧'yubebi a̧ja̧kwö̧kö̧nöma. Ja̧danö, jo̧ba weina a̧ja̧kwökönö, ja'yube sulabenö ja̧bo̧nöbi, ja̧danö jwiinö sulabenö ja̧bo̧nöbi bakwainö edö lȩebinobe Diosma. Isabenö chömöledö, Dios wei̧, Moisés yöawina ja'yubebi a̧ja̧kwöködöma, Dios lȩebi̧tjö dötjibajoböma yelösöda jwiinobe. Jo̧kwaobetjö̧ ¿ökwödöja chömöledö, babe ju̧kwadöma? Dios yöawi̧, iteda Itji̧ yöawina, ökwödö dö̧ji̧ da̧ja̧kwinama jwiinö otiwa jawa wene, Dios dö̧jibinö pjaati̧ wenema. Ja̧ yöawina jwiinö mikwawi̧ yöawinama, ángelesdö Moisésnö yötjawinatjö o̧penönö mikwawi̧ yöawina. Jo̧kwaobetjö̧ Dios Itji̧ yöawina ösödö di̧'yobö jo̧be chömöledö. Ja̧danö ¿dakwö baledenada ökwödönöma, Dios dö̧jibinö pjaati̧ otiwa jawa wene da̧ja̧kwijayonö döpöjöditjö̧ma? ¿Dios lȩebi̧tjö dödibajenaji̧ iteda Itji̧ dö̧jibinö pjaati̧ yöawina öpöjödö di̧'yitjö̧ma? Chömöledö döbibajöködösa. Diosma ökwödönö lȩeboböda jo̧be, jo̧batjö 'da̧bachibö di̧'yitjö̧ma. Da'dödömine, Dios wei̧ a̧ja̧kwöködönö lȩebi̧ ji̧nadanö isabenö ökwödönöbi lȩebobö jo̧be, Dios Itji̧ yöawina döpöjöditjö̧ma. Ja̧danö chömöledö, Dios Itji̧ yöawina, ökwödö dö̧ji̧ da̧ja̧kwi̧ma, jwiinö otiwa jawa wene, Dios dö̧jibinö pjaati̧ma wene. Ökwödöma ¿dakwö da̧ja̧kwinada ja̧ dö̧jibinö pjaati̧ wenema? Ja̧ wenema Duluwo̧ Jesús ajayinö yöawinobe iteda ö̧jinena ju̧kwinadönö. Ja̧danö, ju'wi möle jobadö Duluwo̧ Jesús yöawi̧ a̧ja̧kwinadötjö ju'wedöma ökwödönö yötjawinobe, Dios otiwa jawa wene, dö̧jibinö pjaati̧ wenema. Jweinöda yötjawinobe, Isabenö chömöledö, Jesúsma ökwödö dö̧jibinö pjabato̧, jö̧ba̧lö.