Proverbios 11:11 - Dios Iwene

¹¹ Ja̧danö, ju'wibi yötawa: Diosma jweinöda yöba̧lö ju̧kwadönö ösödö pjaatobetjö̧ jobadö tjiteboma otiwanö jo̧be. Jo̧bekwö jokobe sulabenö omukwatadö tjiteboma. Sulabenö omukwatadö tjiteboma sulamachibobe, jobadöma jwiinö sulabenöda yöba̧lö tjö̧jobetjö̧.

Proverbios 11:11 Iomraidhean Croise

Génesis 45:8

Jo̧kwaobetjö̧ chömöledö, Diosda weinobe bai chichoböma, ökwödö weköbinaduwama̧kö̧. Ja̧danö, Diosma faraón ipjea luwo̧ baibanö ujuninobe ötjönöma, faraónnö pjabatö yötawobö. Diosda weinobe ötjönöma faraón ömöayedö tjuluwo̧bi, Egypto jojodö tjuluwo̧bi baibanö chö̧jobö.

2 Samuel 20:1

Ja̧danö, israel jojodö judasaso jojodökwö jejenö jwöjwöbakwawö tjö̧jenama, jobe bakwo̧ sulabo̧ Saba mikwo̧ ö̧jinobe. Jo̧ba Sabama, Benjaminsaso jojo, ja̧danö Bicri mikwo̧ itji̧. Jo̧ba Sabama, israel jojodö judasaso jojodö jwöjwötjakwawi̧ a̧ja̧kwö, trompeta pjubö, yöa̧linobe, —Judasaso jojodö yötja̧li̧danö, jobadöda David ömöledöma, ökwödö israel jojodöma David ömöledöböködösa, ja̧danö jo̧ba Isai itji̧ David iyi̧tjö la'akatjöda demökakwedösa. Jo̧kwajabetjö̧ jo̧banö kabatibö, bakwo̧nökwena dejube dȩwajaduwo, —jö̧ba̧lö yöa̧linobe.

Diosnö ösödo̧ Job mikwo̧ usula emawina jawa 22:30

Isabenö sulabenö ja̧böködönö tjö̧jibinö pjabato̧ Diosma Job, jo̧kwajabetjö̧ Dios wei̧ a̧ja̧kwö, otiwanö ja̧bö kwö̧jitjö̧ma, isabenö kwö̧jibinö pjaatakwo̧, —jö̧ba̧lö yöa̧linobe Elifazma, Jobnö.

Proverbios 11:10

Ja̧danö, ju'wibi yötawa: Bakwena ju̧kwadöma okobe deinö tjösödobe Dios wei̧ a̧ja̧kwadönöma. Ja̧danö, Dios, jobadönö pjaatobe tjedena jobe ju̧kwadöma tjo̧'wo̧ ösöwanö tjö̧jobe, otiwa jö̧ba̧lö. Jo̧bekwö tjösödijayonö, sulabenö omukwatö ja̧badönö jwiinö tjöpöjödobe. Ja̧danö, sulabenö ja̧badönö jwiinö tjöpöjödobetjö̧ jobadönö sulabenö baledobe edö tjo̧'wo̧ ösöwanö jwöbadö, otiwa jö̧ba̧lö. Isabenö, sulabenö ja̧badö debö tji̧'yenabi jobe ju̧kwadöma tjo̧'wo̧ ösöwanö yöba̧ladö, otiwa, wainö debö 'ya̧dö, jö̧ba̧lö.

Proverbios 11:12

Ja̧danö, ju'wibi yötawa: Isabenö, bakwo̧ ömöledöso̧nö, ökwöma mikwawököja, jö̧ba̧lö yöba̧lo̧ma jweinö omukwatökönö jo̧. Jobekwö yöa̧lokobe jweinö omukwato̧ma ömöledöso̧nöma. Jo̧ba jweinö omukwato̧ma sulabenö yöba̧lökönö, 'wiinöda jo̧.

Proverbios 14:34

Ja̧danö, ju'wibi yötawa: Bakwena ju̧kwadöma Dios wei̧ a̧ja̧kwö tjö̧jitjö̧ma tjiteboma otiwanö jȩna. Jo̧kwaijayonö, ba̧kwȩlö̧jatebö sulabenö ja̧bö tjö̧jitjö̧ma tabalö̧jawö̧da tju̧ju̧kwena, ja̧danö tjiteboma suli̧da jwöachena.

Proverbios 28:2

Ja̧danö, ju'wibi yötawa: Bakwena ju̧kwadöma sulabenö omukwatadö ba̧jȩkwadö tjö̧jitjö̧ma tjuluwo̧ inesö la'aka luwo̧nö katjatibotö jö̧ba̧lö ölakwabikwawö tjö̧jena. Jobekwö baledena ba̧kwȩlö̧jatebö jelo̧bi jelo̧bi tjuluwo̧ baibanö öwamatobe. Jobekwö baledokobe jobe inesö la'aka luwo̧ma, jweinö omukwato̧ma yöbawö weena. Jweinö omukwato̧ma yöbawö weitjö̧ma jobe ju̧kwadöma wene jwiinö, ölakwabikwawökönö tjö̧jakwedö. Jobe tjiteboma lekwe mölȩ otiwanö, ölakwabikwawökönö ja̧kwemi.

Proverbios 29:8

Ja̧danö, ju'wibi yötawa: Okobe jwiinö otiwi̧ jawa öpöjödö obadöma, obö jwötjeba̧lobetjö̧ jobe ju̧kwadötjö ju'wedöma jobadöbi tjo̧majadenö öpöjödachibö jwiinö tjölakwabikwawobe. Jobekwö baledena jweinö ju̧kwadöma jojodö labidönö tjo̧'o̧manö yöba̧lö pjatjatakwedö tjölabi̧ma tjo̧'wo̧ sötjinö.

Santiago 3:6

Chö̧ja̧wo̧dö, jejenö ökwödö dinenenö yöda̧li̧ma. Ja'yubetjö nötekwajö ubö okobe jwiinö ubi̧danö dinenema ja'yuwijayonö jwiinö sulabenö baibobe. Yelösöda daatjö laebi̧, dinenenö yöda̧li̧ma juluwobe okobe jwiinö dö̧ji̧ma sulabenö baibanö dö̧jobö. Chö̧ja̧wo̧dö, do̧'wo̧ luwo̧nö sulabenö edö dinenenö yöda̧li̧ma Awetja ökwöla juwawa önötekwaji̧danö, okobe jwiinö ubö loobema, okobe jwiinö dö̧ji̧ma sulabenöda baibanö.