Proverbios 10:1 - Dios Iwene

¹ Ju'wi Salomón jwebebö yöawina jawa baikwö laebobe: Isabenö yötawa: Tji̧tji̧mu̧ma jweinö omukwatö tjö̧jitjö̧ma tjabe'do tjojo'do tjo̧'wo̧ ösöwanö tjö̧jakwedö. Jo̧kwaijayonö tji̧tji̧mu̧ma jweinö omukwatökönö tjö̧jitjö̧ma tjabe'do tjojo'do tjo̧'wo̧ tjo̧bekwöda tjö̧jakwedö.

Proverbios 10:1 Iomraidhean Croise

1 Reyes 4:32

Ja̧danö, nöinö waisanö yöawakwawabi yöawinobe Salomonma, tres mil yöawakwawa jawa baibanö yöawinobe, ja̧danö ju'wibi lo̧awa jawa, mil cinco lo̧awa jawa lo̧inobe.

Proverbios 1:1

Bemi tupakwö laebakwa̧ma Salomón, Israel jojodötjö inesö la'aka luwo̧bina wanekwachi̧ iwȩyudina jawa, jwebebö yöawakwawa jawanö wanekwachi̧ jawama. Ja̧danö, Salomónma Israel jojodötjö inesö la'aka luwo̧bina Davidmine itji̧inobe.

Proverbios 13:1

Salomón ju'wi jwebebö yöawakwawa jawanö wanekwachi̧ jawa baikwö laebobe: Du̧ju̧tajanö, tjȩmunö wanedö yötawa, tjȩmu jweinö omukwato̧nöbi, tjȩmu obo̧nöbi. Tjemu jweinö omukwato̧ma abe'do jwebebö yöawenama ösödö a̧ja̧kwo̧. Jobekwö a̧ja̧kwokobe tjȩmu oböda obo̧ma. Tjemu oböda obo̧ma ösödokobe abe'do jwebebö yöawena. Jo̧bama abe'do jwebebö yöawena, ötjönö yöbawökönuwi, cha̧ja̧kwobö chöpöjöda, jö̧ba̧lö, a̧ja̧kwokobe.

Proverbios 15:20

Ju'wibi yötawa: Tjemuma jweinö omukwatö ö̧jitjö̧ma abe'dobi ojo'dobi tjo̧'wo̧ ösöwanö tjö̧jena, ditji̧ma jweinö omukwatö jo̧, jö̧ba̧lö. Isabenö, jo̧ba tjȩmuma otiwanö omukwatö jo̧. Jo̧kwaijayonö tjȩmu jweinö omukwatö̧kö̧ma sulabenö omukwato̧. Jo̧bama ojodönö o̧'wo̧ sulinö edo̧, chöpöjödoko jö̧ba̧lö.

Proverbios 17:21

Ja̧danö, ju'wibi yötawa: Tjemu omukwatökönö jo̧ma, omukwatökönö ö̧jobetjö̧ iteda abe'doma, ojo'doma tjo̧'wo̧ tjo̧achöda tjö̧jobe. Isabenö, tjo̧'wo̧ ösöwanö tjö̧joböma jwibadö tji̧tji omukwatökönö ö̧jobetjö̧.

Proverbios 17:25

Ja̧danö, ju'wibi yötawa: Tjemu omukwatökönö jo̧ma, omukwatökönö ö̧jobetjö̧ iteda abe'doma o̧'wo̧ tjo̧achöda ö̧jobe. Ja̧danö, ojo'dobi jwiinö o̧'wo̧ tjo̧achöda jö̧jobe, jitji̧ omukwatökönö ö̧jobetjö̧.

Proverbios 19:13

Ja̧danö, ju'wibi yötawa: Isabenö, bakwo̧ itji̧ma, jweinö omukwatökönö ö̧jobetjö̧ abe'doma ba̧kwȩlö̧jatebö usula emawö jo̧. Ja̧danö, ju'wibi yötawa, wanedö: Bakwoma ilekwo ba̧kwȩlö̧jatebö jo̧banö jwöbeba̧lujukwö ö̧jobe. Isabenö yötawa: Jobuju ba̧kwȩlö̧jatebö jwöbeba̧lujuma jeju okwa mötjö̧ ba̧kwȩlö̧jatebö toi̧danö ba̧kwȩlö̧jatebö jwöbeba̧lö juju.

Proverbios 25:1

Bemi tupakwö laebakwa̧ma ju'wi Salomón jwebebö yöawakwawa jawanö wanekwachi̧ jawama. Ja̧danö, Salomón woinobe okobe lekwinemi ikena jelo̧, Judá mikwemi inesö la'aka luwo̧, Ezequías mikwo̧ma ö̧binobe. Jo̧ba Ezequíasma weinobe ömöayedönö Salomón iwȩyudinatjö̧ eda̧lö tjiwȩyudobö. Ja̧ tjiwȩyudinama baikwö laebobe:

Proverbios 27:11

Ja̧danö,ju'wibi yötawa, bakwo̧ iteda itji̧nö jwebebö yöawi̧danö: Chitji̧ kwö̧ji̧ma jweinö omukwatö kwö̧jö. Jobekwö jweinö omukwatö kwö̧jitjö̧ma isabenö cho'wo̧ ösöwanö chö̧jakwo̧sa. Chitji̧, jweinö omukwatö kwö̧jijayonö ju'wedöma ötjönö yötja̧lena, kwitji̧ma otiwanö omukwatö̧kö̧, jö̧ba̧lö. Jobekwö yötja̧lijayonö ökwöma jweinö omukwatö kwö̧jobe chöwaisobetjö̧ jobadönö chatadakwo̧sa, jweinö yöka̧laduwokobe, ötjö chitji̧ma jweinö omukwatö jo̧, jö̧ba̧lö.

Proverbios 29:15

Ja̧danö, ju'wibi yötawa: Tjemu sulabenö omukwatö ja̧enama abe'do, ojo'do jwebebö, kwabö yötjawobö jo̧be. Jobekwö jwebebö kwabö yötjawitjö̧ma öwaisachibena, jweinö omukwatö ö̧jakwobetjö̧. Jobekwö baledökakobe tjȩmunö, abe'do ojo'do jwebebö kwabö yötja̧wökökwenöma. Tjemuma iteda ösödi̧da sulabenö omukwatö ja̧bo̧nö, abe'do, ojo'do jwebebö kwabö yötjawökötjö̧ma sulabenö omukwatö ö̧jakwo̧. Jobekwö ö̧jobetjö̧ ojo'doma jwiinö tabakwujuda jö̧jakwuju.

Proverbios 29:17

Ju'wibi yötawa: Kwi̧tji̧nö ina tjȩmubaiyo̧nö jwebebö kwabö yökawo öwaisachibobö. Jobekwö jwebebö kwabö yökawitjö̧ma kwo̧'wo̧ tjo̧bekwökönö kwö̧jena, kwitji̧ma otiwanö omukwatö ö̧jobetjö̧. Ja̧danö, kwo̧'wo̧ ösöwanö kwö̧jena, kwitji̧ma otiwanö omukwatö ö̧jobetjö̧.

Proverbios 29:3

Ja̧danö, ju'wibi yötawa: Bakwo̧ jweinö omukwatö ö̧jobö ösödö isakwitjö̧ma abe'do ojo'do tjo̧'wo̧ ösöwanö tjö̧jena, ditji̧ma otiwanö omukwatö jo̧, jö̧ba̧lö. Jobekwö otiwanö ö̧jokobe jelo̧, ya̧dö 'da'dabakwawadökwö ö̧jobö ösödo̧ma. sulabenö alewö, 'da̧'da̧bö ö̧jobetjö̧ okobe jwiinö u̧kwa baladama iyö lobo̧.