Mateo 7:21 - Dios Iwene

²¹ Tupakwö yöawinobe Jesúsma: —Chömöledö, ju'wedöma ötjönö Duluwo̧ jö̧ba̧lö ötjabijayonö, chömöayedöböködö, ja̧danö ötjönö Duluwo̧ jö̧ba̧lö ötjabijayonö, mölejȩbe jo̧ Dios la'aka luwo̧ ö̧jakwa̧ tetjachökakwedö. Jau chömöledö, sule mölejȩbe jo̧ Chabe'do ösödi̧danö ja̧badöda jobe tetjachakwedö.

Mateo 7:21 Iomraidhean Croise

Mateo 12:50

Jau chömöledö, okobe deinö mölejȩbe jo̧ Chabe'do ösödi̧danö ja̧badöma, yöne chömöledö chö̧ja̧wo̧dö ömadöbi, chöjawujudö ya̧döbi, chojo'dobi tjö̧jobe— jö̧ba̧lö yöawinobe Jesúsma.

Mateo 16:17

Jejenö yöa̧lökwe Jesúsma Pedronö yöa̧linobe: —Isabenö kwo̧'wo̧ ösöwanö jo̧ja ökwö Jonás itji̧ Simón, Diosda ja̧ ökwönö öba̧ja̧dinobetjö̧. Jau chömöledöso̧, jojodödama ja̧ tjöba̧ja̧dinokobe ökwönö. Diosda ja̧ öba̧ja̧dinobe ökwönöma.

Mateo 18:10

Jau chömöledö, omukwatönö kwö̧jaduwo, bidö tjemunö mikwawöködö jö̧ba̧lö kwöpöjödaduwapji jö̧ba̧lö. Jau chömöledö, isabenö yötawaduwakwö, bidö tjemunö te'ada̧ladö ángelesdöma tjö̧jobe, ja̧danö jobadöma ba̧kwȩlö̧jatebö mölejȩbe Chabe'do öba a'o tjuju̧kwobe— jö̧ba̧lö yöawinobe Jesúsma.

Mateo 18:19

Ja̧danö ju'wibi yötawaduwakwö chömöledö. Ökwödö ötjönö ösödadötjö du̧ju̧taja bakwainö omukwatö Diosnö akebaduwitjö̧ma, mölejȩbe jo̧ Chabe'doma akebaduwi̧danö ja̧akobe.

Mateo 18:3

Jejenö junajo̧, jojodönö yöawinobe: —Isabenö yötawaduwakwö, kwomukwataduwi̧ balewachö, bidö tjemu tjomukwati̧danö omukwatadö bakibaduwökötjö̧ma, la'akatjöda Dios la'aka luwo̧ ö̧jakwa̧ tekachaduwökena.

Mateo 18:35

Tupakwö yöawinobe Jesúsma: —Mölejȩbe jo̧ Chabe'dobi ja̧danö chömöledö. Ökwödöma kwöjawo̧ sulabenö ja̧aja̧ omukwatökönö isabenö jo̧banö kwösödökötjö̧ma, Diosma ökwödö sulabenö ja̧köbaduwaja̧bi söbebö loökena— jö̧ba̧lö yöawinobe.

Mateo 19:24

Yemidanö wanedö yötawa: Kameyu makeösö'i isaju öbaledoböma isabenö jwiinö waiyena, ¿jö̧tö? Jo̧kwaijayonö ja̧ waiyi̧tjö bajalekwönönö isabenö waiyawö̧, nöinö juna̧ladö Dios la'aka luwo̧ ö̧jena tetjachoböma— jö̧ba̧lö.

Mateo 25:10

Jo̧kwajabetjö̧, jobadö waisanö omukwatöködöma dejuwa'yu̧sobu emö tji̧'yinobe, ja̧danö tji̧'yaja̧ okobe, ilekwonö emajo̧ma ichibinobe. Ichibenama, pjiesta junö teachinobe, ja̧danö möayedö tetjachobö te'ada̧ladöbi jo̧bakwö pjiesta junö tetjachinobe. Tetjachaja̧ ikenama, apjude tjipje'datinobe.

Mateo 25:21

Jejenö yöawökwe, uluwo̧ma atadinobe: Otiwanö kwotidajabe, chömöayo̧ otiwo̧, ja̧danö kwotido jö̧ka̧li̧danö otido̧ja. Ja'yubeda ökwönö wetinama otiwanö kwotido jö̧ka̧li̧danö kwotidajabe, jo̧kwajabetjö̧ tupakwö nöi̧ jawa kwite'ada̧lobö chujunocha. Ötjökwö pjiesta junö tebachi, jö̧ba̧lö.

Mateo 26:39

Webajo̧, ödöokobe 'ya̧wibö, öba nijakwö bamatö, Diosnö aebinobe: —Chabe'do, inesö usula chemawakwa̧ma usula chemawökönö baledobö ji̧tjö̧ma, usula chemawökönö ja̧bitjö, jo̧kwaijayonö ötjö chösödi̧danömaökö Chabe'do, ökwöda kwösödi̧danö ja̧bi— jö̧ba̧lö.

Mateo 26:42

Ikenama, Jesúsma yemidanö tjebachibö 'ya̧wibö Diosnö aebinobe: —Chabe'do, usula chemawakwa̧ baledobö jwiitjö̧ma, isabenö usula chemawobö ji̧tjö̧ma, ökwöda kwösödi̧danö baibobö chösöda— jö̧ba̧lö.

Marcos 3:35

Jau chömöledö, okobe deinö Dios ösödi̧danö ja̧bö ju̧kwadöma chö̧ja̧wo̧döbi, chöjawujudöbi, chojo'dobi tjö̧jobe— jö̧ba̧lö yöawinobe Jesúsma.

Marcos 9:47

Ja̧danö, kwöbajale Dios weökö jawa ja̧köbobö weitjö̧ma ja̧le kelekwö loköbo. Jau chömöledö, bakwaleda jonö Dios La'aka Luwo̧ ö̧jobe kwi̧'yobema dölelataja jonö ökwöla la'akatjöda tiibokolabe kwi̧'yemitjö o̧penönö otiwa.

Lucas 11:28

Yöja̧liökwe, Jesúsma atadinobe: —Isabenö Dios otiwanö pjaatoko chojo'donöma, ötjönö jemobö iyinobetjö̧, jo̧kwaijayonö ja̧tjö bajalekwönönö isabenö nöinö pjabato̧ Diosma, Dios iwene a̧ja̧kwö laebachi̧danö ja̧bö ju̧kwadönöda chömöledö— jö̧ba̧lö.

Lucas 13:25

Eju luwo̧ a̧laibö apjude utumataja̧ ikenama, teachakwawa jwiakobe. Jau chömöledö, ida̧ökö jeju okwa kwö̧jaduwökötjö̧ma, apjude a̧petukwöchobe ja̧nö jwökeba̧laduwena: Duluwo̧, apjude po̧bebi tedachobö, jö̧ba̧lö. Jo̧kwaijayonö okwatjö atadena: Ökwödönö wajwitawö̧ja, detjö ichadöjö, jö̧ba̧lö, ökwödönö atadena, apjude po̧bebö tetatökö ökwödönö, jö̧ba̧lö.

Lucas 18:25

Jau chömöledö, isabenö waiyobe jobadönö. Baikwö wanedö yötawa: Kameyu makeösö'i isaju öbaledoböma isabenö jwiinö waiyena, ¿jö̧tö? Jo̧kwaijayonö ja̧ waiyi̧tjö bajalekwönönö isabenö waiyawö̧, nöinö juna̧ladö Dios la'aka luwo̧ ö̧jena tetjachoböma— jö̧ba̧lö yöawinobe Jesúsma.

Lucas 6:46

Tupakwö yöawinobe Jesúsma: —Chömöledö, ökwödöma ötjönö duluwo̧ jö̧ba̧lö öbabidöja ötjönö, ¿jö̧tö? Ja̧danö, jejenö duluwo̧ jö̧ba̧lö ötjönö ökabiduwitjö̧ma, ¿tajawedö yötawi̧danö ja̧bö kwö̧jaduwokobeda? Isabenö yötawi̧danö ja̧bö kwö̧jaduwobö jo̧be.

Juan 14:7

Ötjönö kwöwaisachibinaduwatjö̧ma ötjö Chabe'donöbi kwöwaisaduwena. Babema kwöwaisaduwobe Diosnöma, ötjönö kwedaduwobetjö̧— yöawinobe Jesúsma.

Juan 15:23

Ja̧danö, ötjönö öpöjödadöma ötjö Chabe'donöbi öpöjödadö.

Juan 3:5

—Isabenö yötawakwö. Bakwo̧ Dios O̧'wo̧ Luwo̧tjöbi ojwiyotjöbi baibökökwema isabenö Dios La'aka Luwo̧ ö̧jobekwö teachökakwo̧— yöawinobe Jesúsma—.

Juan 5:17

Ja̧danö, sulabenö jwötjeba̧lakwawökwe Jesúsma jö̧a̧linobe jobadönö: —Ötjö Chabe'do Diosma ba̧kwȩlö̧jatebö otido̧. Ja̧danö ötjöbi ba̧kwȩlö̧jatebö otido̧sa— jö̧a̧linobe Jesúsma judío jojodötjö la'aka luwedönöma.

Juan 6:40

Ja̧danö ötjö, Dios Itji̧nö tjöwaisachibanö ösödadöma ba̧kwȩlö̧jatebö tjuju̧kwobö ösödobe Chabe'doma. Ja̧danö, 'dö̧ibaji̧ möle badekwachena yemidanö tjetjachajinö chotidobö ösödobe ötjönö webo̧, Chabe'doma—Jesús yöawinobe.

Juan 7:17

Ja̧danö, Dios ösödi̧ ösödadöma, ötjö yötawi̧ a̧ja̧kwö, ötjö chomukwati̧ yötawojobö, Dios omukwati̧da yötawojobö, tjöwaisachibakobe.

Hechos 14:22

Jobe comunidadkwena 'ya̧nö Jesúsnö ösödadönö pjabatö yöbawijadötö, Kwo̧'wo̧ luwo̧duwi juluwachibanö tupakwö kwi̧'yaduwo, jö̧ba̧lö. Jesúsnö kabatibökönö kwö̧jaduwo. Ja̧danö, jo̧banö omukwatö kwö̧jaduwo, jö̧ba̧lö, pjabatö yöbawijadötö. Jobadönö jö̧ba̧lijadötö: —Chömöledö ¿wajwiköbaduwiji̧? Ökwödö Jesúsnö ösödadöma, usula demawobö jo̧be. Isabenö ökwödöma usula emawadösa. Ökwödöma Dios webö ö̧jena ja̧nö, do̧'wo̧ ösöwachibanö duju̧kwenanö baibanö, usula emawadösa— jö̧ba̧lijadötö.

Romanos 12:2

Ja̧danö, ju'wedö böjȩ jojodö ja̧bö tjö̧ji̧danöma ja̧bö kwö̧jaduwoko chömöledö. Diosma kwomukwataduwi̧ balewachinö ja̧obö ösödo̧, ja̧danö balewachinö ja̧obö weköbaduwo, 'yayi̧ jawada omukwatadö bakibaduwanö. Ja̧danö, Dios ökwödö kwomukwataduwi̧ balewachinö ja̧itjö̧ma, Dios ösödi̧ jawa kwöwaisaduwena, inesö otiwa jawa, sulabe jwii̧ jawama.

Romanos 2:13

Jau chömöledö, Dios weina Moisés iwȩyudina juna̧ladönöma, wei̧danö ja̧tjökötjö̧ma, Aaa, bidöma wene jwibadö, ¿jö̧a̧lenaji̧ Diosma? Jö̧ba̧lö̧kö̧ chömöledö, Dios weinadanö ja̧tjitjö̧da jejenö jö̧ba̧lo̧ Diosma, Aaa bidöma wene jwibadö, jö̧ba̧lö.

Efesios 6:6

Ja̧danö, böjȩtjö kwuluwo̧duwi wei̧ kwotidaduwena Cristonö omukwatö otidaduwi. Jejenö otidaduwi, kwomajadeduwi okwanö, Duluwo̧ wei̧da chotida, Dios ösödi̧da, jö̧ba̧lö. Chömöledö, jojodöda ökwödö kwotidaduwi̧ tjösödoböma otidaduwökönuwi. Dios ösödoböbi otidaduwi.

Colosenses 4:12

Ja̧danö, ökwödö Colose jojodötjö jojo ja̧danö Cristo Jesús ömöayo̧ Epafras mikwo̧ma ökwödönö deawobedanö dokwa jö̧ba̧lö aebobe. Jo̧bama kabatökönö ökwödönö omukwatö nöinö Diosnö aebobe chömöledö, kwo̧'wo̧ luwo̧duwi da̧peachö kwö̧jaduwakobetjö̧, ja̧danö dötölatajanö omukwatökönö, jwaikwöda Dios ösödi̧ jawada ja̧bö kwö̧jaduwakobetjö̧.

1 Tesalonicenses 4:3

Dios ösödi̧ma baikwö yötawaduwakwö chömöledö: Bakweminö Dios ösödi̧danö ja̧bö kwö̧jaduwo, kwi̧lȩkwa̧muböködökwö ja̧bökönö.

1 Tesalonicenses 5:18

okobe jwiinö baledi̧ma, Diosnö kwösödaduwo, otiwanö pjabato̧ja jö̧ba̧lö. Jejenö ökwödö Cristo Jesúsnö dötewadö kwö̧jaduwobö ösödo̧ Diosma.

Tito 1:16

Jobadöma, Aaa, Diosnö waisadösa. jö̧ba̧lö yötjawijayonö, ja̧tji̧ma wainö i̧sebö yöbawadö, Diosnö öpöjödadösa, jö̧ba̧lö. Ja̧danö, jobadöma sulabedö, Dios wei̧ a̧ja̧kwökönö ja̧badö, ja̧danö ja'yubebi otiwanö ja̧bö tjuju̧kwoböma jwibadö.

Hebreos 4:6

Chömöledö, Dios yöbawö ujuninama babebi badekwachobetjö̧ jojodötjö ju'wedöma Dioskwö ö'wachö tjöbamatobe. Jo̧kwaijayonö da'dödömine, Dios iwene, otiwi̧ jawa wene waisinadöma, ja̧ iwene öpöjödö tja̧ja̧kwokobetjö̧ Dioskwö tjo̧'wo̧ luwo̧nö ö'wachö tjöbamatinokobe.

Santiago 1:22

Ja̧danö chö̧ja̧wo̧dö, Dios iwene kwa̧ja̧kwaduwaja̧ ikena ¿dakwö ja̧köbaduwakwa̧da? Kwomukwataduwena, Dios iwene da̧ja̧kwobetjö̧ tjo̧wi̧ otiwa. Ja̧ da̧ja̧kwi̧ di̧sekwobö, ja̧danö Dios weina ja̧doböma jwiobe. Chö̧ja̧wo̧dö yötawaduwakwö. Dios iwene kwa̧ja̧kwaduwijayonö iwenetjö weina ja̧bö kwö̧jaduwökötjö̧ma mikwawokobe. Ja̧danö, kwomukwataduwitjö̧ma, A̧ja̧kwöda da̧ja̧kwobö otiwa. Dö̧ji̧ di̧sekwoböma jwia, jö̧ba̧lö, ökwödöda omöna yöba̧lö jelobekwö omukwatö ökikwaduwena. Chö̧ja̧wo̧dö, böjȩnö ja̧nö Dios iwenetjö yöawakwawa, iteda wei̧ma a̧ja̧kwö dö̧jobö jo̧be.

1 Pedro 2:15

Jau chömöledö, kwöwaisaduwa, ju'wedö wajwibadöma, tjo̧'wo̧ jwibö ökwödö Jesúsnö ösödadönö sulabenö wanedö yötja̧lobe, Sulabenö ja̧badö, tjuluwo̧ wei̧ a̧ja̧kwöködö, jö̧ba̧lö, ¿jö̧tö? Jo̧kwaijayonö luwedö wetji̧ a̧ja̧kwö jwaikwöda otiwanö ja̧bö kwö̧jaduwitjö̧ma, jobadö sulabenö yöba̧ladöma ökwödönö sulabenö yöba̧lö katjatena. Jau chömöledö, jejenö luwedö wetji̧ a̧ja̧kwö jwaikwöda otiwanö ja̧bö kwö̧jaduwo chömöledö, Kwabe'do Diosma jejenö ja̧bö kwö̧jaduwobö ösödobetjö̧.

1 Pedro 4:2

tupakwö diteba'onö dö̧jakwa̧ma jojodö ösödö ja̧tji̧danö ja̧bökönö, Diosda ösödi̧danö ja̧bö dö̧jakobetjö̧.

Apocalipsis 2:27

Ökwödö tjuluwedö bakibaduwakwedöma, labinö webö kwö̧jaduwakwedöja, kwöpöjojodöduwinö le jwiinö söbebö lobö. Wanedö yötawa: Dȩja̧'do̧, letiyatjö otikwa'do̧, 'dii̧ jawatjö kwabö 'dabebö lotji̧danö ökwödöma söbebö loköbaduwakobe kwöpöjojodöduwinöma. Ja̧danö, chömöledö, Chabe'do ötjönö, inesö la'aka luwo̧ batibanö kabebö ujuninadanö kabebö chujunakwo̧sa ökwödönöma, la'aka luwedö bakibaduwanö.

Apocalipsis 22:14

Ina jö̧a̧lijatö: —Ötjö chömöledö, tjökamisi dichadöma, suli̧ jwibadödanö babibö, otiwanö tjo̧'wo̧ ösöwanö tjö̧jakwedö. Jobadöma 'yayi̧ Jerusalén comunidad apjude po̧bebö tetjachakwedö, ba̧kwȩlö̧jatebö ja̧kwawa towi wa̧ji̧tjö tjukwobö.

Apocalipsis 3:5

Yötawaduwakwö. Sulabetjö juluwinadöma jejenö, kamisi dewi̧ 'dutjawakwedö. Isabenö jobadö tjimibiyama söbebö lotökakobe, tjimi wȩyukwa'yetjö, ba̧kwȩlö̧jatebö ja̧kwawa juna̧ladö tjimi wȩyukwa'yetjöma. Jobadö tjimi yötawakwo̧sa Chabe'donöbi, iteda ömöayedö ángelesdönöbi, Bidö tjimi yöta̧lawö̧ ba̧kwȩlö̧jatebö ja̧kwawa juna̧ladö tjimi, jö̧ba̧lö.