Mateo 6:28 - Dios Iwene

²⁸ Ja̧danö, ¿tajawedö kamijido̧ jawa kwomukwataduwobö chömöledö? Mejetjö o̧bubiya kwomukwataduwo chömöledö. Otiwa, ¿jö̧tö? Jejenö otiwi̧ma, ¿'diinö otidajabetjö otiwobeji̧? ¿Kamijido̧ otiwado̧ 'dö̧ajabetjö otiwobeji̧?

Mateo 6:28 Iomraidhean Croise

Mateo 10:10

Ja̧danö inapjo e'ewökönaduwi, jeledo̧ kamijido̧bi, jeletu sapatubi, isö̧'a̧ kwotokwa'oduwi e'ewökönaduwi. Ökwödöma yöbawö kwotidaduwobetjö̧, jojodö ökwödönö tjiyi̧ kwakwawa tabakwökönö kwukwaduwo, otidadö tjotidaja̧ mikwa baibanö kwakwawa tjukwobö jo̧betjö̧— jö̧ba̧lö weinobe Jesúsma.

Mateo 6:25

Jo̧kwajabetjö̧ baikwö yötawaduwakwö chömöledö: Böjȩnö kwö̧jaduwi̧ jawama omukwatö kwö̧jaduwoko, Aaa, ¿taji dukwakwa̧jö?, ¿taji dowakwa̧jö?, ¿taji 'dudawakwa̧jö? jö̧ba̧löma. Jau chömöledö, ja̧kwawa mikwawi̧ma, sule kwakwawadamaökö, ja̧danö sule kwiteba'oduwinö 'duawakwawadamaökö, ¿jö̧tö? Jo̧kwajabetjö̧ ja̧ jawa omukwatö kwö̧jaduwoko chömöledö.

Mateo 6:27

Ja̧danö chömöledö, Aaa, dakwö ja̧bö lekwe chö̧jakwa̧jö, jö̧ba̧lö kwomukwataduwi̧ma, ¿ajayitjö bajalekwönönö lekwe kwö̧jaduwobö pjaatenaji̧? Pjaatokobe chömöledö.

Mateo 6:31

Jo̧kwajabetjö̧, ja̧ jawa kwomukwataduwoko chömöledö, Aaa, taji dukwakwa̧jö jö̧ba̧lö, ja̧danö taji dowakwa̧jö jö̧ba̧lö, ja̧danö taji 'dudawakwa̧jö jö̧ba̧lö.

Lucas 10:41

Yöja̧lökwe Jesúsma atadinobe: —Chömöledösuju chösödoko Marta, ju'wi jayebi, ju'wi jayebi nöinö kwo̧'wo̧ tjo̧kekwa, jo̧kwaijayonö ja̧ jayema isabenö mikwawökö ji̧ Marta.

Lucas 12:11

Ju'wibi yöawinobe Jesúsma: —Ja̧danö, ötjönö kwösödaduwobetjö̧, ökwödönö do̧batö öbibö tjujunena, judío jojodö ba̧nö tja̧ja̧kwa̧leju jojodö tjöba a'otjöbi, lȩekwa luwedö tjöba a'otjöbi, la'aka luwedö tjöba a'otjöbi. Ja̧danö tjöba a'otjö junajadö, ökwödönö sulabenö yötja̧lena, bidöma sulabedö jö̧ba̧lö. Jejenö baledenama kwo̧'wo̧ tjo̧kekwaduwa chömöledö, ¿dakwö datadakwajö? ¿taji yöda̧lakwajö? jö̧ba̧löma, Dios O̧'wo̧ Luwo̧da kwatadaduwakwa̧ pjaatakobetjö̧.

Lucas 12:22

Jemi ikenama Jesúsma iteda öba̧ja̧di̧ waisachadönö yöawinobe: —Böjȩ jawama nöinö mikwawokobetjö̧ baikwö yötawaduwakwö chömöledö: Böjȩnö kwö̧jaduwi̧ jawama omukwatö kwö̧jaduwoko, Aaa, ¿taji dukwakwa̧jö? ¿taji 'dudawakwa̧jö? jö̧ba̧löma.

Lucas 12:27

Jau chömöledö, ¿tajawedö kamijido̧ jawa kwomukwataduwobö chömöledö? Mejetjö o̧bubiya edö kwomukwataduwo chömöledö, otiwa, ¿jö̧tö? Jejenö otiwi̧ma, 'diinö otidajabetjö ¿otiwobeji̧? Kamijido̧ otiwado̧ 'dö̧ajabetjö ¿otiwobeji̧? Otidokobe chömöledö, jo̧kwaijayonö otiwanö 'duawobedanö ichejekwa o̧bubiyama, ¿jö̧tö? Jau chömöledö, damötjö ji̧na la'aka luwo̧bina Salomónmine inesö otiwanö 'duawi̧tjö bajalekwönönö otiwanö 'duawobedanö ichejekwa ka̧putjö o̧bubiyama.

Lucas 3:11

Abebö tja̧ja̧kwökwe Juanma atadinobe: —Baikwö ja̧bö kwi̧sebaduwo: Kamijido̧ dödo̧lataja juna̧lo̧ma, jwibo̧nö bakwado̧ iyobö jo̧be, ja̧danö kwakwawa juna̧lo̧ma, ujuna̧litjö jwibo̧nö iyobö jo̧be — jö̧ba̧lö atadinobe Juanma.

Filipenses 4:6

Ja̧danö, okobe jwiinö baledi̧ma, kwo̧'wo̧ tjo̧kekwaduwa chömöledö, dakwö ja̧dakwajö jö̧ba̧löma. Kwo̧'wo̧ tjo̧bekwökönö, Diosnöda akebaduwo chömöledö, jo̧ba pjaatobö akebaduwonö, otiwanö pjabato̧ja jö̧ba̧lö.

1 Pedro 5:7

Ja̧danö chömöledö, ökwödöwe, dakwö ja̧dakwajö jö̧ba̧lö yekabiduwenama, Diosnö abebö yekabiduwi̧ iyö loköbaduwo chömöledö, jo̧bama isabenö ökwödönö ösödö ite'ada̧lobetjö̧.