Mateo 26:61 - Dios Iwene

⁶¹ —Bite yöa̧lina da̧ja̧kwinobe, baikwö yöa̧linama, Ötjöma Dios eju söbebö lotobö juluwo̧sa, ja̧danö söbebö lobajo̧, wa̧pötakwa möle baledibajena yemidanö chotidobö juluwo̧sa, jö̧ba̧lö sulabenö yöa̧lina da̧ja̧kwijatö— jö̧ba̧lö yötja̧linobe.

Mateo 26:61 Iomraidhean Croise

Génesis 19:9

Jejenö jö̧a̧lijayonö jobadöma öpöjödijadötö. Lotnö webijadötö: —Apjudema tjöbeba̧lökönuwi. Pjolachibö ja̧wi tedachibo—labinö webijadötö. Ja̧danö, Lotnö tjo̧'wo̧ sulinö edö yöba̧lakwawijadötö idöda tjöwaye: —Bite, ökwödönö jelobetjö ichinama babeda ökwödönö edö, otiwanö domukwatojobö, sulabenö domukwatojobö, jö̧ba̧lö yöbawo̧ baibajabe— yöba̧lakwawijadötö idöda tjöwaye. Ikenama jö̧ba̧lijadötö Lotnö: —Ökwönö yödawa. Idönö sulabenö ja̧do jö̧da̧lajemi bajalekwönönö sulabenö ja̧dakwo̧ja ökwönöma— jö̧ba̧lijadötö. Jejenö jö̧ba̧lö bakobe isayunö mebö jibö döbebijadötö Lotnö apjudenö ö̧jajelöma, apjude 'dotjakwotö jö̧ba̧lö.

1 Reyes 22:27

Tjöba a'o ichibajadö, weti̧ jobadönö yökawaduwo, baikwö: –Bite Micaiasnö ka̧lena kwödaduwo, ja̧danö sule ja'yubeda pan ukwobö, ja̧danö ojwiyo owobö kwiyaduwonö, ötjö Acab wene jwiinö Ramot Galaadbetjö chȩwa̧jenanö baibanö, –jö̧ba̧lö weti̧ yökawodönö, —jö̧ba̧lö weinobe Acabma.

2 Reyes 9:11

Jemi ikenama, ju'wedö iteda uluwo̧ ömöayedö ölakwabikwawa luwedö tjö̧jobekwö ȩwa̧bijinobe Jehuma, ja̧danö ichibiawö̧, abebö tja̧ja̧kwinobe: —Wene jwiiji̧? Ite o̧'wo jwibo̧ma, tajawedö ökwönö yöa̧lobö ichaja̧da? —jö̧ba̧lö. Abebö tja̧ja̧kwökwe, —Omöna. Ökwödöma kwöwaisaduwa, jo̧baja̧yo̧ yöa̧li̧ma, —jö̧ba̧lö atadinobe.

Isaías 49:7

Isabenö Jo̧, Israel jojodönö tjöbeba̧lö pjabato̧, tjösödökwe suli̧ jwibo̧ma, baikwö yöa̧lobe tjitebotenia jojodö tjöpöjödökwe, ajayinö mikwawö̧kö̧ jö̧ba̧lö tjomukwatökwe la'aka luwedö tjö̧möayo̧nö: Ötjö ba̧kwelöjatebö yötawi̧danö ja̧bö jo̧ Isabenö Jo̧, Israel jojodö tjösödökwe Suli̧ Jwibo̧ Diosma ökwönö omudawö chujuninökweja, ötjöda chömöayo̧ bakibanö. Jo̧kwajabetjö̧, ju'winö inesö la'aka luwedöma ökwönö edö, kwöba a'o a̧la̧ibö tjöjamatakwedö, –Ökwöma mikwawo̧ja, –jö̧ba̧lö, ja̧danö ju'wedö luwedö kwöba a'o bȩbachibö tjö̧jakwedö, jö̧ba̧lö yöa̧lobe Diosma, iteda ömöayo̧nö.

Isaías 53:3

Jo̧banö edö döpöjödijatö, —Bitema mikwawö̧kö̧, inia tjöbo̧, inesö o̧'wo tjo̧bekwo̧, —jö̧ba̧lö. Jo̧banö edöbi tjedoböma tjöpöjödinökwe, —Sulabo̧, —jö̧ba̧lö, ja̧danö jo̧kwadabo̧ jö̧ba̧lö domukatijatö, jo̧ba Dios ömöayo̧nö.

Mateo 12:24

Jo̧kwaijayonö fariseo jojodö ja̧ wene tja̧ja̧kwenama, jobadöma yötja̧linobe: —Jesúsma tjo̧'wo̧ luwo̧nö sulabedö la'aka tjuluwo̧ Awetja ujulunöda tjo̧'wo̧ luwo̧nö sulabedö ja̧dönö a'dewö lobo̧— jö̧ba̧lö.

Mateo 26:62

Yötja̧liökwe, ö'weje pjabatadö la'aka tjuluwo̧ma a̧laibö jamatö Jesúsnö abebö a̧ja̧kwinobe: —Bidö ökwö sulabenö yöka̧lina wene yötjawobe a̧ja̧kwö, ¿atadakwawa jwiinö kwö̧jiji̧?— jö̧ba̧lö.

Mateo 26:71

Ikenama, a̧petu tjöekwi̧ apjudekwö i̧'yibena, jeluju ömöayujubi jo̧banö edö, jobe ju̧kwadönö yöjawinobe: —Bitema Jesús Nazaret jojokwö kwebachina— jö̧ba̧lö.

Mateo 27:40

—Dios eju söbebö lobajo̧, wa̧pötakwa möle baledibajena yemidanö chotidakwo̧sa jö̧ba̧lö yöka̧linajayonö, juluwö̧kö̧ja. Isabenö yöka̧linadanö kwujuluwitjö̧ma, towisa'otjö kwö̧jibanö yutubaji, isabenö Dios itji̧köbitjö̧ma, towisa'otjö yutubaji— jö̧ba̧lö otjinobe.

Mateo 27:5

Ikenama Judasma tjiyina balada jobe Dios eju okwa nijibe ikwö loinobe, ja̧danö jobetjö labebajo̧, nubawö ö'wö baibinobe.

Marcos 14:58

—Bite yöawi̧ma da̧ja̧kwijatö, baikwö: Dios ejuma, jojodö otikwejuma, 'dobö lobö jeleju, jojodö otikwökeju wa̧pötakwa möle baledenanö chotidakwo̧sa, jö̧ba̧lö yöawi̧ da̧ja̧kwijatö—jö̧ba̧lijadötö.

Marcos 15:29

Jesús ö̧jena baledadöma tjo̧'wo̧ sulinö omukwatö, tjuu löwö löwö jö̧ba̧lijadötö: —Ökwöma, Dios eju 'dobö lobö jeleju wa̧pötakwa möle o̧penö chodidakwo̧sa jö̧ka̧lijatö.

Lucas 23:2

Ja̧danö Pilato öba a'o junajadö Jesúsnö wanedö yötja̧linobe: —Bite Jesúsnö lȩkebo Pilato, sulabo̧obetjö̧. Baikwö sulabenö ja̧obe dedijatö: Ditebo jojodönö sulabenö öbibö yöawinobe, inesö la'aka luwo̧ César mikwo̧nö impuesto jawa balada dimidoko, jö̧ba̧lö. Ja̧danö ju'wibi yöawinobe, Ötjödasa Dios weakwo̧ jö̧a̧linökwe Israel jojodö la'aka tjuluwo̧ma, jö̧ba̧lö. Jejenö yöbawö inesö la'aka luwo̧ César mikwo̧ wei̧ tjöpöjödobö sulabenö öibobe— jö̧ba̧lö Jesúsnö wanedö yötjawinobe Pilatonö.

Juan 9:29

Dios Moisésnö yöawinama döwaisa. Jo̧kwaijayonö ¿jo̧ba Jesús? Jo̧ba ichinabi wajwibadösa—jö̧tja̧liökwe:

Hechos 17:18

Ju'wedö jojodöbi Atenasnö ju̧kwijadötö. Jobadöma epicureos ötjabiwö̧bi, estoicos ötjabiwö̧bi. Epicureo jojodöma jelo̧ Epicureo mikwo̧ yöawina yöbawadö, Dios iwenemaökö. Ja̧danö, estoico jojodöbi jelo̧ yöawina, Estoico mikwo̧ yöawina, yöbawadö, Dios iwenemaökö. Ja̧danö, Pablokwö jobadö, estoico jojodökwö epicureo jojodökwö yöba̧lakwawijadötö, Dios jawa. Jobadötjö ju'wedöma Pablo yöawi̧ öpöjödö jö̧ba̧lijadötö: —Bitema omöna yöbawo̧— jö̧ba̧lijadötö. Jo̧kwaijayonö ju'wedöma jejenö omukwatijöködötö. Jobadöma jö̧ba̧lijadötö: —Omöna yöawökena. Ökwödöma domukwata bitema jelobe ju̧kwadö tjo̧'wo̧ tjöwana̧lawö̧ tjujuluda yöawena— jö̧ba̧lijadötö. Pabloma Jesús ö̧jina wenebi, ja̧danö jojodö wotjaja̧ ikena yemidanö tjeachajakwawa wenebi yöawiawö̧ jejenö jö̧ba̧lijadötö, Jelobe ju̧kwadö tjo̧'wo̧ tjöwana̧lawö̧ tjujuluda yöawena, jö̧ba̧lö.

Hechos 18:13

Jobe öbibö 'ya̧jadöma ichö la'aka luwo̧ Galiónnö yöbawö jwöbeba̧lijadötö Pablonö: —Duluwo̧, bitema da'dödömine Diosnö dösödobö wetjinadanö omukwatö̧kö̧, wainö omukwato̧. Jojodönö jwiinö ösödö yöbawo̧, iteda Diosnö wainö ösödi̧danö jobadöbi tjösödobö— yöbawijadötö.

Hechos 22:22

Pabloma jejenö yöawawö̧ judío jojodöma ajayinö a̧ja̧kwa̧löda bi̧jadötö. Jo̧kwaijayonö, Judío jojodöböködönöda yötawobö weinobe, jö̧ba̧lö, yöawiawö̧ jwiinö tjo̧'wo̧ sulachibanö jwöbeba̧lijadötö, Kwabö lodonö, jö̧ba̧lö.